གཟའ་མིག་དམར་ཉིན་ནས་བཟུང་བཀའ་ཟུར་ཀིརྟི་རིན་པོ་ཆེ་མཆོག་གིས་ཡུ་རོབ་རྒྱལ་ཁབ་ཁག་ཅིག་ཏུ་ཕྱོགས་སྐྱོད་ཀྱིས་བོད་དོན་ཞུ་གཏུག་གི་ལས་འགུལ་སྤེལ་གྱིན་པ་ལྟར། ཁ་སང་སུད་སིའི་གནད་ཡོད་མི་སྣར་མཇལ་འཕྲད་གནང་རྗེས་ར་བྷ་སུ་བེར་ས་གནས་ཀྱི་བོད་མི་སུམ་བརྒྱ་ལྷག་ལ་ལམ་སྟོན་བཀའ་སློབ་གནང་ཡོད་འདུག
ཟླ་འདིའི་ཕྱི་ཚེས་ ༢ ཉིན་ནས་བཟུང་བཀའ་ཟུར་ཀིརྟི་རིན་པོ་ཆེ་མཆོག་ཡུ་རོབ་རྒྱལ་ཁབ་ཁག་སུད་སི་དང་ཧྥ་རན་སི། འཇར་མན། བྷེལ་ཇེམ། ནེར་རྡུ་ལེན་ཌི། དབྱིན་ཡུལ་བཅས་རྒྱལ་ཁབ་ཁག་ཅིག་ནང་བོད་དོན་ཞུ་གཏུག་ཆེད་ཕྱོགས་སྐྱོད་གནང་བཞིན་པ་ལྟར། ཁ་སང་ཕྱི་ཚེས་ ༣ ཉིན་གྱི་ཉིན་རྒྱབ་ཆུ་ཚོད་ ༢།༠༠ ཐོག་བཀའ་ཟུར་ཀིརྟི་རིན་པོ་ཆེ་མཆོག་སུད་སི་ར་བྷ་སུ་བེར་ས་གནས་སུ་ཆིབས་བསྒྱུར་བསྐྱངས་ཡོད་འདུག འདུ་འཛོམས་དེའི་ཐོག་སུད་སི་བོད་རིགས་ཚོགས་པའི་ཚོགས་གཙོ་གངས་གཞོན་ཚང་བློ་བཟང་ལགས་ཀྱིས། ད་ལྟའི་ཆར་སུད་སིར་བོད་མི་ ༤༠༠༠ ལྷག་ཡོད་ཚུལ་དང་། ད་ལྟའི་བར་བོད་པའི་ཚོགས་པའི་ཚོགས་པ་ཆེ་ཆུང་ ༢༣ ལྷག་གིས་བོད་དོན་དང་འབྲེལ་བའི་ལས་དོན་གང་དག་བསྒྲུབས་ཡོད་མེད་ངོ་སྤྲོད་དང་། སུད་སི་སྐུ་ཚབ་དོན་གཅོད་ཚེ་བསྟན་བསམ་འགྲུབ་ལགས་ཀྱིས། ཐེངས་འདིའི་ཀིརྟི་རིན་པོ་ཆེ་མཆོག་གི་ཕྱོགས་སྐྱོད་གནས་ཚུལ་དང་མཛད་རིམ་ངོ་སྤྲོད། བོད་རིཊ་ཚོགས་པའི་ཚོགས་གཞོན་བསམ་པའི་དོན་འགྲུབ་ལགས་ཀྱིས་རིན་པོ་ཆེ་མཆོག་གི་མཛད་རྣམ་ངོ་སྤྲོད་བཅས་གནང་རྗེས། རིན་པོ་ཆེ་མཆོག་གིས་དེར་ཡོད་བོད་མི་ ༣༠༠ ལྷག་ལ་བཀའ་སློབ་གསུང་བཤད་དང་མིོ་མང་གི་དྲི་བར་ལན་འདེབས་གནང་ཡོད་འདུག
སྐབས་དེར་བཀའ་ཟུར་ཀིརྟི་རིན་པོ་མཆོག་གིས་བོད་ནང་རང་ལུས་མེར་བསྲེཊ་ཀྱི་གནས་ཚུལ་རིམ་པ་བྱུང་དགོས་པའི་རྒྱུ་རྐྱེན་གཙོ་བོ། རྒྱ་ནག་གཞུང་གིས་བོད་ཀྱི་ཁོར་ཡུག་དང་མི་རིཊ་རྩ་མེད་གཏོང་བའི་སྲིད་ཇུས་དང་། དགོན་སྡེ་དང་སློབ་གྲྭར་དམ་དྲག་གིས་བོད་མིའི་སྐད་དང་ཡི་གེ་གཙོས་རིག་གཞུང་སྲུང་སྐྱོབ་ཀྱི་ཐོབ་ཐང་སྤྲོད་ཀྱི་མེད་པ། བོད་མིའི་ས་ཐོག་རྒྱ་རིགས་གནས་སྤོར་གྱིས་བོད་མི་ཚོ་གྲངས་ཉུང་མི་རིགས་ཆགས་བཞིན་པ་དང་། བོད་མི་ཚོར་དམ་དྲག་གིས་གང་བྱུང་འཛིན་བཟུང་བཙོན་འཇུག་བྱེད་ཀྱིན་པའི་དབང་གིས་རང་ལུས་མེར་བསྲེཊ་ཀྱི་གནས་ཚུལ་འབྱུང་བཞིན་པའི་སྐོར་གསུངས་ཏེ། སུད་སིར་གནས་སྡོད་བོད་མི་ཚོར། “ སུད་སི་ནི་བོད་མི་སྐྱབས་བཅོལ་དུ་ཕེབས་ནས་ཕྱིའི་རྒྱལ་ཁབ་ཏུ་སླེབས་པའི་གཞི་ཆགས་ཐོག་མ་དེ་ཆགས་ཡོད་ལ། ད་ཆར་བོད་ནས་འབྱོར་བའི་མི་རབས་གཉིས་པ་ཡང་གང་འཚམ་ཞིག་བསླེབ་ཐུབ་ཡོད་པ་རེད། ཁྱེད་རང་ཚོའི་ངོས་ནས་༧གོང་ས་མཆོག་གིས་བཀའ་སློབ་གང་གནང་བ་དེར་བསམ་བློ་ཡག་པོ་ཞིག་བཏང་སྟེ། རང་ངོས་ནས་ཅི་ཞིག་ལག་ལེན་ཏུ་བསྟར་ཐུབ་མིན་ཐོག་བསམ་བློ་གཏོང་རྒྱུའི་དུས་ལ་བསླེབས་ཡོད་པ་རེད། བོད་ནང་རྒྱ་གཞུང་གིས་ཐབས་ལམ་འདྲ་མིན་བཏང་སྟེ་བོད་འདི་ཐ་སྙད་ཙམ་ལམ་མི་ལྷག་པའི་གནས་སུ་སྐྱེལ་ཐབས་བྱེད་ཀྱི་ཡོད་པ་རེད། བོད་ཕྱི་ཕྱོགས་ལ་མཚོན་ན། ༧རྒྱལ་བ་རིན་པོ་ཆེ་དགུང་ནའི་བབ་དང་ཕྱོགས་ཡོངས་ནས་ཧ་ཅང་གཉན་འཕྲང་གི་དུས་སྐབས་ཤིག་ཏུ་བསླེབས་ཡོད་པ་རེད། ཕྱིི་རྒྱལ་ཁག་ཁག་ལ་མཚོན་ན། ད་སྐབས་ཨ་རི་དང་ཡུ་རོབ་རྒྱལ་ཁབ་ཁག་གི་བོད་པའི་སྤྱི་ཚོགས་ནང་བོད་སྐད་བཤད་མི་ཤེས་པའི་བོད་ཕྲུག་མང་ནས་མང་དུ་འགྲོ་བཞིན་ཡོད་པ་སོགས་ཕྱོགས་ཡོངས་ནས་གཉན་འཕྲང་གི་དུས་སྐབས་ཤིག་ཏུ་བསླེབས་ཡོད་སྟབས། མ་འོངས་པར་བོད་པ་མི་རེ་ངོ་རེས་ཧུར་ཐག་འབད་ཐག་སྔར་ལས་ཆེ་རུ་གཏོང་རྒྱུའི་དུས་ལ་བབ་འདུག ” ཅེས་སོགས་གསུངས་འདུག
ཡང་རིན་པོ་ཆེ་མཆོག་གིས་ཁོང་རང་ཉིད་ཀྱི་ངོས་ནས་རང་ལུས་མེར་བསྲེཊ་ཀྱི་ལས་འགུལ་དེ་གང་འདྲ་ཞིག་ལ་ངོས་འཛིན་བྱེད་ཀྱི་ཡོད་མེད་དང་། རང་སྲེག་ལས་འགུལ་གྱི་ནུས་པ་གང་འདྲ་ཞིག་ཐོན་ཡོད་མེད་ཐད།“ ང་ཚོས་ལས་དོན་གང་འདྲ་ཞིག་བསྒྲུབ་ཀྱང་གཙོ་བོ་གཙོ་བོ་སེམས་ཀྱི་ཀུན་སློང་ལ་རག་ལས་ཡོད་པ་རེད། སྟག་མོ་ལུས་སྦྱིན་གྱི་སྐབས་སུ་ཡང་སྟག་མོ་མ་བུ་ལྔའི་ཆེད་དུ་སངས་རྒྱས་ཀྱིས་རང་ལུས་སྦྱིན་པར་བཏང་བར་ཆ་བཞག་ན་བོད་མི་ས་ཡ་དྲུག་གི་ཆེད་དུ་རང་ལུས་མེར་བསྲེགས་བཏང་བ་དེ། འཚེ་བའི་ལས་ཀ་མ་རེད་ལ་ནང་བ་སངས་རྒྱས་པའི་དགོངས་པ་དང་འགལ་ཡོད་པ་རེད་བསམ་གྱི་མེད། ད་ཆར་བོད་མི་མང་པོ་ཞིག་གིས་མེར་བསྲེགས་ལས་འགུལ་ལ་ནུས་པ་མི་འདུག་ཟེར་མཁན་ཡོང་གི་འདུག གནས་སྟངས་ལ་བལྟ་རྒྱུ་གལ་ཆེན་པོ་རེད། ལས་འགུལ་གྱི་ནུས་པ་ཟེར་དུས་ཀྱང་བློ་གཟུ་བོར་གནས་བའི་ཐོག་ནས་དབྱེ་བ་འབྱེད་དགོས་པ་རེད། རྒྱ་ནག་ད་ལྟའི་ཆར་འཛམ་གླིང་ནང་སྟོབས་ཤུགས་ཆེན་པོ་ཆགས་བསྡད་ཡོད་སྟབས། ལམ་སེང་ནུས་པ་ཤུགས་ཆེན་པོ་འཐོན་རྒྱུ་དཀའ་ལས་ཡོད་རུང་། བོད་ནང་ཁུལ་གྱི་མཐུན་སྒྲིལ་ལ་བསམ་བློ་བཏང་བ་ཡིན་ན། ཧ་ལས་པའི་ནུས་པ་ཆེན་པོ་རེད་བསམ་གྱི་ཡོད། བོད་ཀྱི་ལོ་རྒྱུས་ཀྱི་ཁྲོད་དུ་བོད་མིའི་རྡོག་རྩ་གཅིག་སྒྲིལ་གྱི་ནུས་པ་མེ་བསྲེགས་ཀྱི་ལས་འགུལ་འདི་བརྒྱུད་ནས་ཐོན་ཡོད་པ་ལྟ་བུ་ཞིག་ང་ཚོའི་ལོ་རྒྱུས་སུ་མཐོང་རྒྱུ་མེད་པ་གསལ་བོ་རེད། དེ་ཡང་ལས་འགུལ་འདིའི་ནུས་པ་རེད་བསམ་གྱི་ཡོད། ”ཅེས་གསུངས་ཡོད།
ཐེངས་འདིའི་ཁོང་གི་ཕྱོགས་སྐྱོད་དེ་ནི། བོད་མིའི་སྒྲིག་འཛུགས་ཀྱིས་གཞུང་འབྲེལ་ཐོག་གོ་སྒྲིག་གནང་བ་ཞིག་ཡིན་འདུག་ལ། ཟླ་འདིའི་ཕྱི་ཚེས་ ༡ ནས་བཟུང་རིན་པོ་ཆེ་མཆོག་གིས་སུད་སིར་བོད་དོན་ཞུ་གཏུག་གི་ལས་འགུལ་སྤེལ་རྗེས། དེ་རིང་ཧྤ་རན་སིར་ཆིབས་བསྒྱུར་གནང་ཡོད་འདུག་ལ། དེའི་རྗེས་བྷེལ་ཇེམ་དང་འཇར་མན། དབྱིན་ཇི་སོགས་རྒྱལ་ཁབ་ཁག་ཏུ་བོད་དོན་ཞུ་གཏུག་ཆེད་ཕྱོགས་སྐྱོད་གནང་རྒྱུ་ཡིན་འདུག
གནས་ཚུལ་མཁོ་གཏོང་བ། ཀླུ་རྒྱལ་དོན་འགྲུབ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཀིརྟི་རིན་པོ་ཆེ་མཆོག་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། ཀིརྟི་གྲྭ་ཚང་གི་བོད་གནས་འབྲེལ་མཐུད་པ་གཉིས་ནས་ཀྱང་བོད་ནང་གི་གནས་ཚུལ་བསྡུ་ལེན་ཐད་དཀའ་ལས་མང་པོ་བརྒྱབ་སོང་ཁྱེད་རྣམ་པ་གཉིས་ལ་ཐུགས་རྗེ་ཆེ་ཞུ་རྒྱུ་དང། ལྷག་པར་དུ་བོད་ནང་གི་རང་ལུས་མེ་སྲེག་སྐོར་གྱི་དཔེ་དེབ་བོད་རྒྱ་དབྱིན་གསུམ་ནང་དཔར་སྐྲུན་གནང་སོང་བས་ཀིརྟི་གྲྭ་ཚང་གིས་འགྲོ་གྲོན་གནང་བ་ལ་ཡང་ཐུགས་རྗེ་ཆེ་ཞུ།
ངས་ཟིན་བྲིས་ག་ཚོད་བྲིས་ན་གཏོང་གི་མི་འདུག་ག་རེ་ཡིན་ནམ།
བོད་དོན་ཞུ་གཏུགས་ཟེར་བའི་ཐ་སྙད་འདི་མགོ་ཚོས་ཀྱི་མི་འདུག ཞུ་གཏུགས་བྱེད་རྒྱུའི་བོད་དོན་ཞིག་ཡོད་ན་དེ་ཞུ་ས་དང་གཏུགས་ས་དེ་རྒྱལ་སྤྱིའི་ཁྲིམས་ཁང་དང་རྒྱ་ནག་གཞུང་གི་ཁྲིམས་ཁང་གཉིས་ལས་འགྲོ་ས་མེད། རྒྱ་ནག་གི་ལྟོ་མ་ཟོས་ཤིང་གོས་མ་གྱོན་པར་ཁ་མི་སོས་པའི་ཡོ་རོབ་རྒྱལ་ཁབ་ཆུང་ཆུང་དེ་ཚོ་འདུག་གི་ཆུགས།
བཀའ་ཟུར་རིན་པོ་ཆེ་མཆོག་སྐུ་ཚག་ལ་མ་འཛེམ་པར་ཕྱི་རྒྱལ་ཁག་དུ་ཕེབས་ནས་བདེན་པ་དངདངོས་ཡོད་ར་སྤྲད་པ་མ་ཟད་བོད་མི་རིགས་ཀྱི་འདས་མ་ད་གསུམ་ལ་ཡང་དཔྱོད་ཤེས་དངཐུགས་བསམ་བཞེས་བ་སྙིང་ཁུངས་རུས་པའི་གཏིང་ཐུགས་རྗེ་ཆེ་ཞུ་བ་ཡིན།
སྲིད་དོན་བཤད་སར་ཆོས་བཤད་མ་ཡོང་ཀླུ་སྨྱོན་ལོ་ལོ། མེར་སྲེག་གཏོང་མཁན་ཚོའི་སེམས་ལ་ཞེ་སྡང་ཡོད་མེད་ཀྱི་སྐད་ཆ་མ་རེད། ཁོང་ཚོས་གང་གི་ཆེད་དུ་རང་སྲེག་བཏང་བ་རེད་ཤེས་དགོས། ངས་བལྟས་ན་ཁོང་ཚོས་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་ཆེད་མེར་སྲེག་ལས་འགུལ་སྤེལ་བ་མ་རེད་བསམ།
ཡང་འདི་ན་ཀླུ་སྨྱོན་སོགས་ཁག་ཅིག་གིས་ཤེས་མདོག་མཁྱེན་མདོག་བྱས་ནས་བསོར་འདུག་ཡོད་ཀ།ཁྱེད་ཅག་གིས་སྐད་ཆ་བཤད་སྐབས་གཟུ་བོར་གནས་ཏེ་བཤད་ཀྱི་ཡོད་ན་ནོར་འཆུག་བྱུང་མིན་ལ་མི་བཤད་པར་མངོན་པར་བསྟོད།དོགས་པའི་བསམ་མནོ་དེ་ཡང་མེད་པར་ཤོད།གཞན་ཡང་།སོ་སྐྱེས་འཚོ་སྒྲུབ་པ་དག་གིས་གང་ནས་བཤད་ཀྱང་རང་ཉིད་དོར་ཏེ་བཤད་མཁན་ཞིག་དཀའ་མོ་རེད།ཁྱོད་ཀྱི་ཐོག་མར་ཁྱོད་རང་ཉིད་རྟོགས་པར་མཛོད།ཁྱོད་ཀྱིས་འདིར་ནག་མཆན་ཞིག་བཞག་ན་དེ་ནི་སུའི་ཆེད་ཡིན།
བཀུར་འོས་དྲ་གྲོགས་རྣམ་པ་ལགས།
བཀའ་ཟུར་༸སྐྱབས་རྗེ་ཀིརྟི་རིན་པོ་ཆེ་མཆོག་གིས་ཡུ་རོབ་རྒྱལ་ཁབ་ཁག་ཅིག་ཏུ་ཕྱོགས་སྐྱོད་ཀྱིས་བོད་དོན་ཞུ་གཏུག་གི་ལས་འགུལ་སྤེལ་གྱིན་པའི་སྐུ་པར་ཁག་ལ་གཟིགས་རོགས་ཞུ།
པར་བ། Yewa Sherab
དྲ་བྱང་ལ་གཟིགས་རོགས་ཞུ། https://www.facebook.com/media/set/?set=a.523691151014756.1073741825.100001216281406&type=1
རིན་པོ་ཆེ་མཆོག་གིས་གོ་སླ་བོ་དང་དངོས་ཡོད་གནས་ཚུལ་ལ་མཐུན་པའི་བཀའ་སློབ་བསྩལ་འདུག འདི་ནི་ད་ལྟའི་བར་བྲོས་བྱོལ་སྤྱི་ཚོགས་ཁྲོད་ནས་ཐོན་པའི་གསུང་སྐད་དྲང་པོ་དེ་རེད། ་དེ་མིན་མེར་བསྲེག་ལས་འགུལ་ནང་ཆོས་དང་མཐུན་མིན་ཡང་ལྟོས་ས་བལྟས་འཇོག་གིས་བཤད་དགོས་པ་ཞིག་རེད་མ་གཏོགས། ཕྲ་བའི་དབང་དུ་བཏང་ན྄། ད་ལྟའི་སྐྱེས་ཆེན་དམ་པ་ཚོའི་འཛད་པའང་ནང་ཆོས་མཐུན་མིན་ཧ་ཅང་གི་བཤད་ཁག་པོ་མ་རེད་དམ། དྲང་པོར་ཞུས་ན། སུ་ཞིག་གི་སེམས་ནང་དུ་གཞན་ཕན་ལས་རང་དོན་དོར་ཡོད་དམ།
གང་ལྟར་མེར་བསྲེག་ལས་འགུལ་གྱིས་དོ་ཆེན་མང་པོ་ཞིག་གི་སྒོ་མོ་འབྱེད་སོང་། ༡ མི་རིགས་ཀྱི་སྟོབས་ཤུགས་གཅིག་བསྡུའི་ལམ་ནང་ཞུགས་སོང་། ༢ རང་དབང་ལ་མཆོད་པ་མི་རིགས་སུ་གང་གིས་ཕུལ་མ་མྱོང་བ་ཞིག་ཕུལ་སོང་། ༣ མི་རིགས་མདུན་ལམ་བགྲོ་གླེང་གི་སྒོོ་མོ་འབྱེད་སོང་། ༤ ནང་ཆོས་དག་ཐེར་གྱི་གོ་སྐབས་བསྐྲུན་སོང་། ༥ མི་རིགས་ལ་ཤ་ཚ་ཡོད་མེད་ཀྱི་ཚད་གཞིའི་བགྲོ་གླེང་ཐོལ་བརྒལ་རང་བཞིན་གྱི་མཐོ་སར་སླེབས་སོང་།
ཀླུ་སྨྱོན་ལགས་ལ་ཀུན་སློང་ལ་སྐྱོན་ཡོད་པར་བརྩི་གི་མེད་ལ། རང་ལུས་མེར་བསྲེགས་ལ་མོས་མཐུན་མེད་པར་ཡང་གོ་བ་མི་ལོན་རྒྱུ་ཅི་ཡང་མི་འདུག འོན་ཀྱང་། དུས་རྒྱུན་དུ་དག་སྣང་དང་མོས་གུས་ཀྱི་གསུང་སྐད་བརྗིད་པོ་དག་འགག་མཚམས་རེ་ནས་རྐང་གཅིལ་རྙིང་པ་ཞིག་ལྟར་འདོར་རྐྱང་བྱེད་པ་མ་ཟད། རང་ལུས་མེར་བསྲེགས་འདི་ཚོ་ཁྱེད་ལྟར་སྡིག་ལས་ཡིན་པར་བྱས་ཀྱང་། ཁྱེད་རང་སོགས་འགའ་ཞིག་གིས་འཛེམས་སོན་ཙམ་མེད་པར་བོད་མི་མང་མང་གིས་དད་མོས་དང་ཡིད་ཆེས་བྱ་སའི་སྐྱེས་ཆེན་ཚོར་ཟུར་ཟ་དང་དམའ་འབེབས་པའི་སྐད་ཆ་འདི་ཚོ་ཡང་སྡིག་པའི་ངོས་ནས་འདི་ལས་ཐུ་བ་མེད་པའི་ཁར་འཇིག་རྟེན་གྱི་ཆ་ནས་ཀྱང་དབྱེན་དཀྲུག་གི་མཐུ་མི་ཆུང་བ་ཞིག་གནས་པ་མངོན་སུམ་ཡིན་ཐོག མི་རིགས་ཀྱི་ལོ་རྒྱུས་ལ་འགན་ཁུར་མེད་པའི་རྒྱགས་གཏམ་ལས་མ་འདས་པས། བདག་གི་རེ་བར་དེ་འདྲ་མི་གནང་བར་ཞུ།
་་་་ བོད་ནང་ཁུལ་གྱི་མཐུན་སྒྲིལ་ལ་བསམ་བློ་བཏང་བ་ཡིན་ན། ཧ་ལས་པའི་༼རང་ལུས་མེར་བསྲེགས་ཀྱིས་༽ནུས་པ་ཆེན་པོ་རེད་བསམ་གྱི་ཡོད། ་་་་་ཟེར།
ཡང་ཅིག་གིས། ་་་་་ ཡིན་ཡང་ང་ཚོའི་མེར་སྲེག་པ་ཚོར་མཚོན་ན་དགྲ་ཁ་གཏད་ཅིག་གི་མདུན་དུ་རང་ལུས་མེར་སྲེག་གཏོང་གི་ཡོད་པས་དེ་ཚོ་ཚང་མའི་ཀུན་སློང་ན་ཞེ་སྡང་མེད་ཟེར་རྒྱུ་ཧ་ཅང་ཁག་པོ་རེད། ་་་་་ཟེར།
ངས་སྔོན་ཆད་མེར་སྲེག་ལས་འགུལ་འདི་སྟག་མོ་ལུས་སྦྱིན་ལ་སྦྱར་ནས་རྩོམ་ཡིག་ཅིག་དུས་བབ་སྟེང་སྤེལ་བ་ཡིན། ད་ཆ་བསམས་ན་ང་ནོར་འདུག སྟག་མོ་ལ་ལུས་སྦྱིན་མཁན་རྒྱལ་སྲས་དེ་ལ་དགྲ་ཁ་གཏད་དེ་འདྲ་གང་ཡང་མི་འདུག་པས་ཁོང་གི་ཀུན་སློང་ལ་བརྒྱ་ཆའི་བརྒྱ་ཞེ་སྡང་མེད་པ་གཏན་ཁེལ་རེད། ཡིན་ཡང་ང་ཚོའི་མེར་སྲེག་པ་ཚོར་མཚོན་ན་དགྲ་ཁ་གཏད་ཅིག་གི་མདུན་དུ་རང་ལུས་མེར་སྲེག་གཏོང་གི་ཡོད་པས་དེ་ཚོ་ཚང་མའི་ཀུན་སློང་ན་ཞེ་སྡང་མེད་ཟེར་རྒྱུ་ཧ་ཅང་ཁག་པོ་རེད། དེ་བས་སྟག་མོ་ལུས་སྦྱིན་ལྟ་བུའི་ཆོས་ལུགས་ཀྱི་ལུས་སྲོག་སྦྱིན་པར་གཏོང་སྟངས་དང་སྲིད་དོན་གྱི་གནོན་ཤུགས་འོག་རང་ལུས་མེར་སྲེག་གཏོང་མཁན་གཉིས་མཉམ་དུ་སྦྱོར་རྒྱུ་མི་འདུག་བསམས་སོང་།
སྐུ་ན་བགྲེས་ཡང་བོད་པའི་རྩ་དོན་དང་། གཞིས་ལུད་བོད་པའི་དངོས་ཡོད་བདེན་པའི་གནས་ཚུལ་ཞུ་གཏུགས་བྱེད་པར་ཕེབས་པར་བཀའ་དྲིན། ཡིན་ནའི་ཞུ་གཏུགས་དང། བདེན་པ་ར་སྤྲོད་བྱ་ཡུལ་གཙོ་བོ་ནི་ཡོ་རབ་ཡུལ་གྲུ་ཁག་གི་གཞུང་འབྲེལ་དང། གཞུང་འབྲེལ་མིན་པའི་ལས་སྣེ་ཚོ་དང། དེ་ཁུལ་མི་མང་ནང་བོད་མིའི་ད་ལྟའི་མེ་བསྲེགས་ཀྱི་ཡིད་སྐྱོ་བའི་གནས་སྟངས་ཡོང་བཞིན་དེ་དག་ངོ་སྤྲོད་དགོས་པ་ལས། བོད་མིའི་ཚོ་ཁག་ནང་གནས་ཚུལ་གང་ཡིན་ཤེས་ཀྱི་ཡོད་པས་དགོངས་འཇགས་ཞུ།