གླུ་བ་བློ་བློ་ལ་ཁྲིམས་ཐག་བཅད་འདུག

ཉེ་ཆར་རྒྱ་གཞུང་གིས་ཁམས་ཡུལ་ཤུལ་ཉ་མཚོ་ཟིལ་དཀར་དགོན་པའི་གྲྭ་བློ་བཟང་སྦྱིན་པ་ལགས་སུ་ལོ་ ༥ དང་བྲག་དཀར་སྡེ་བའི་གླུ་བ་བློ་བློ་ལགས་སུ་ལོ་ ༦ བཅས་ཀྱི་ཁྲིམས་ཐག་བཅད་འདུག

ཕྱི་ལོ་ ༢༠༡༢ ཟླ་ ༩ ཚེས་ ༡ ཉིན་སྐྱེ་རྒུ་མདོ་ཁྲི་འདུ་རྫོང་ཉ་མཚོ་ཟིལ་དཀར་དགོན་པའི་དགེ་འདུན་པ་ལྔ་རྒྱ་གཞུང་གིས་འཛིན་བཟུང་བྱས་པ་ལས། དབང་པོ་སྐྱོན་ཅན་ཡིན་པ་གྲྭ་ངག་དབང་སྨོན་ལམ་ཟླ་གཅིག་རྗེས་ཀློད་གྲོལ་བཏང་ཡོད་ཀྱང་། གཞན་རྣམས་བཙོན་འཇུག་གིས་ཟླ་འགའ་ཕྱིན་རྗེས་གྲྭ་བློ་བཟང་སྦྱིན་པ་དང་ཚུལ་ཁྲིམས་སྐལ་བཟང་གཉིས་ལ་བཙོན་ཁང་དུ་ཉེས་རྡུང་ཚད་མེད་བཏང་སྟེ་སྐུ་གཟུགས་ལ་གནོད་སྐྱོན་ཚབས་ཆེན་ཕོག་པར་བརྟེན། གནས་སྐབས་བཙོན་གྲོལ་གཏོང་དགོས་བྱུང་ཡོད་ཀྱང་། ཟླ་སྔོན་མའི་ཕྱི་ཚེས་ ༢༣ ཉིན་གྲྭ་བློ་བཟང་སྦྱིན་པ་ལགས་སླར་ཡང་དགོན་ནང་ནས་འཛིན་བཟུང་བྱས་ཏེ་ཉེ་ཆར་ལོ་ ༥ བཙོན་འཇུག་ཁྲིམས་ཐག་བཅད་ཡོད་པ་དང་། ད་ལྟ་ཁོང་བཙོན་ཁང་གང་དུ་བཅུག་ཡོད་མེད་དང་གནས་སྟངས་གང་འདྲ་ཡིན་མིན་ཤེས་རྟོགས་མེད་པ་ཆགས་ཡོད་འདུག གྲྭ་བློ་བཟང་སྦྱིན་པ་ལགས་ད་ལྟ་རང་ལོ་ ༣༡ ཡིན་ཞིང་། ཁོང་གི་ཕ་མིང་ལ་རྟ་རྒྱལ་དང་མ་མིང་པདྨ་མཚོ་མོ་ཟེར་གྱི་ཡོད་འདུག 

 གཞན། ཡུལ་ཤུལ་བྲག་དཀར་སྡེ་བའི་གླུ་བ་བློ་བློ་ལགས་ ༢༠༡༢ ཟླ་ ༤ ཚེས་ ༡༩ ཉིན་རྒྱ་གཞུང་གིས་འཛིན་བཟུང་གིས་འདྲི་རྩད་མནར་གཅོད་ཚད་མེད་བཏང་མཐར་ཀློད་གྲོལ་བཏང་ཡོད་ཀྱང་། ཕྱི་ལོ་ ༢༠༡༣ ཟླ་ ༢ ཚེས་ ༢༣ ཉིན་སླར་ཡང་འཛིན་བཟུང་གིས་ཉེ་ཆར་ལོ་ ༦ ཡི་ཁྲིམས་ཐག་བཅད་ཡོད་པ་དང་། ད་ཆར་ཁོང་བཙོན་ཁང་གང་དུ་བཅུག་ཡོད་པ་དང་གནས་སྟངས་གང་འདྲ་ཡོད་མེད་སོགས་ཀྱི་གནས་ཚུལ་ཤེས་རྟོགས་མེད་པ་ཆགས་ཡོད། གླུ་བ་བློ་བློ་ལགས་ད་ལྟ་རང་ལོ་ ༣༠ ཡིན་ཞིང་། ཁོང་གི་ཕ་མིང་ལ་འཇམ་དབྱངས་ཆོས་རྒྱལ་དང༌མ་མིང་ལ་ཆོས་སྐྱིད་སྒྲོལ་མ་ཟེར་གྱི་ཡོད་འདུག

གོང་གསལ་གཉིས་ཀར་ཁྲིམས་ཁང་གང་ནས་ཁྲིམས་ཐག་བཅད་ཡོད་མེད་དང་། ཉེས་འཛུགས་ག་རེ་བྱས་ཡོད་མེད་སོགས་གསལ་བོ་མི་འདུག 

གླུ་བ་བློ་བློ་ལགས་ཀྱིས་༼བོད་དར་ཆ་སྒྲེངས་ཤིག་གངས་བུ་ཚོ་༽  ཞེས་པའི་ཆེད་སྒྲིག་བརྙན་འཁོར་ཞིག་འགྲེམས་སྤེལ་བྱས་ཡོད་པའི་ནང་། ༡༽ ཕ་ལམ་གས་ཆག་ཤོར་བའི་མིག་ཆུ། ༢༽ ཕ་ས་ཤོར་བའི་དབུགས་རིང་། ༣༽པཎ་ཆེན་ལགས། ༤༽ ཕེབས་ཤོག ༥༽བོད་དར་ཆ་སྒྲེངས་ཤིག་གངས་བུ་ཚོ། ༦༽ སྡེ་དགོན་ཟུང་། ༧༽བདེན་གཏམ། ༨༽ རེ་སྒུག་གི་ལོ་ཟླ། ༩༽ ངའི་ཚེ་སྲོག ༡༠༽ མཛའ་གཞས། ༡༡༽ མ་འོངས་རྒྱལ་ཁའི་རྩ་བ། ༡༢༽ མདུན་ལམ། ༡༣༽ ལེགས་ཚོགས་རབ་བཀྲ། ༡༤༽ བཀྲ་རེ་ཤིས་བཅས་གཞས་སྣ་ཁག་ ༡༤ ཙམ་ཡོད་འདུག 

༼བོད་དར་ཆ་སྒྲེངས་ཤིག་གངས་བུ་ཚོ་༽ཞེས་པའི་གཞས་ཚིག་ནི། བོད་བཙན་པོའི་གདུང་རྒྱུད་སྐྱོང་བའི་ཕྱིར། རྒྱ་དམར་པོའི་དཔུང་ལ་རྒོལ་བའི་སླད། དོན་བདེན་པ་དབུ་མའི་ལམ་ཁ་ནས། བོད་དར་ཆ་སྒྲེངས་ཤིག་གངས་བུ་ཚོ། གངས་དཀར་པོའི་ལ་རྒྱ་སྐྱོང་བའི་ཕྱིར། བོད་རང་བཙན་གཙང་མ་འཐོབ་པའི་སླད། དོན་གནས་ལུགས་དུ་མའི་རྒྱབ་ལྗོངས་ནས། བོད་དར་ཆ་སྒྲེངས་ཤིག་གངས་བུ་ཚོ། ༧སྐྱབས་རྒྱལ་བ་བོད་ལ་ཕེབས་པའི་ཕྱིར། བོད་གཞིས་བྱེས་ལྷན་འཛོམས་འབྱུང་བའི་སླད། སྲོག་དམར་པོར་བསྡེབས་པའི་ཉག་ཁ་ནས། བོད་དར་ཆ་སྒྲེངས་ཤིག་གངས་བུ་ཚོ། སེང་གངས་རིས་བརྒྱན་པའི་དར་ཆ་འདི། བོད་མི་རིགས་འདི་ཡི་རྒྱལ་དར་ཡིན། བོད་སྔོན་གཤེགས་དཔའ་བོའི་དགྲ་ལན་དུ། བོད་དར་ཆ་སྒྲེངས་ཤིག་གངས་བུ་ཚོ། བྲིས་ཡོད་འདུག