གསང་མྱུལ་བ་འཛིན་བཟུང་བྱས་ཡོད་ཟེར།

ཁ་སང་ཕྱི་ཚེས་༡༤ ཉིན་གྱི་དགུང་མོར། ཨུ་རུ་སུའི་གསང་བའི་ལས་ཁུངས་(FSB)ཀྱིས་རྒྱལ་ས་མོ་སི་ཁོ་རུ་རྟེན་གཞི་བྱས་པའི་ཨ་རིའི་གཞུང་ཚབ་ཁང་གི་ཆབ་སྲིད་སྡེ་ཚན་གྱི་གནས་རིམ་གསུམ་པའི་དྲུང་ཡིག་སྐུ་ཞབས་རཱ་ཡན་ཧྥོ་གྷེལ་(Ryan Fogle)ལགས་ཨ་རིའི་གསང་བའི་ལས་ཁུངས་( CIA) ཀྱི་གསང་མྱུལ་བ་ཡིན་པའི་དོགས་གཞིའི་འོག་འཛིན་བཟུང་བྱས་ཏེ། འདྲི་རྩད་བྱས་རྗེས་ཨ་རིའི་གཞུང་ཚབ་ཁང་ལ་རྩིས་སྤྲོད་བྱས་ཏེ། ཁོ་རང་གང་མགྱོགས་ཨུ་རུ་སུའི་ས་ཁོངས་ནས་ཕྱིར་འཐོན་དགོས་ཚུལ་བརྗོད་འདུག

རྒྱལ་ས་མོ་སི་ཁོ་ཡི་གསར་འགྱུར་བརྙན་འཕྲིན་ (RT) གནས་ཚུལ་སྤེལ་བ་ལྟར་ན།  གསང་མྱུལ་བ་རཱ་ཡན་ཧྥོ་གྷིལ་ལགས་ཀྱིས་ཨུ་རུ་སུའི་གསང་བ་ཤེས་རྟོགས་ཆེད། ཨུ་རུ་སུའི་གསང་བའི་ལས་ཁུངས་ཀྱི་ལས་བྱེད་པ་ཞིག་ལ་ཨ་རིའི་གསང་བའི་ལས་ཁུངས་ཀྱི་གསང་མྱུལ་པའི་ལས་ཀ་བྱེད་འཇུག་རྒྱུར་གྲོས་བསྡུར་བྱེད་པར་སྐྱོད་པའི་ལམ་བར་ནས་ཨུ་རུ་སུའི་གསང་བའི་ལས་ཁུངས་ཀྱི་མི་སྣས་འཛིན་བཟུང་བྱས་ཡོད་པ་དང༌། ཁོང་གི་ལག་ཏུ་ཡུ་སྒོར་ ༥༠༠ ཅན་མང་པོ་ཞིག་དང་སྐྲ་རྫུན་མ་གཉིས། ཕྱོགས་སྟོན་འཁོར་ལོ་གཅིག ལག་འཁྱེར་ཁ་པར་ཆུང་བ་གཅིག མོ་སི་ཁོ་གྲོང་ཁྱེར་གྱི་ས་ཁྲ། རིགས་མ་འདྲ་བའི་མིག་ཤེལ་ནག་པོ་གསུམ་བཅས་ཡོད་སྐོར་བཀོད་འདུག

ད་དུང་ཁོའི་ལག་ཏུ་འཕྲིན་ཡིག་ཅིག་ཡོད་པའི་ནང༌། མི་ཞིག་གིས་ཁྱེད་ཀྱི་ཆེད་ལས་ལ་ཡིད་སྨོན་ཤོར་བ་དང༌། འབྱུང་འགྱུར་ཁྱེད་ཀྱིས་མཉམ་ལས་བྱེད་པར་རྗེས་སུ་ཡི་རངས་བྱེད་ཀྱི་ཡོད་མ་ཟད། ཁྱེད་ཀྱི་བདེ་འཇགས་ང་ཚོར་མཚོན་ན་ཧ་ཅང་གལ་ཆེན་ཡིན། ཞེས་དང༌། ང་ཚོས་ཁྱེད་ཀྱི་ཉམས་མྱོང་དང་ཆེད་ལས་རང་བཞིན་གྱི་རྣམ་དཔྱོད། མཉམ་ལས་བྱེད་པ་བཅས་ཀྱི་ཐོག་ནས་ཨ་སྒོར་ ༡༠༠༠༠༠ སྤྲོད་རྒྱུར་གྲ་སྒྲིག་ཡོད་ལ། ཁྱེད་ཀྱིས་མུ་མཐུད་ང་ཚོ་དང་མཉམ་ལས་བྱས་པ་ཡིན་ན། ང་ཚོས་ལོ་གཅིག་ལ་ཨ་སྒོར་ས་ཡ་གཅིག་སྤྲོད་ངེས་ཡིན། ལྷག་པར་དུ་ཁྱེད་ཀྱིས་ང་ཚོར་གནས་ཚུལ་གལ་ཆེན་མཁོ་སྤྲོད་ཐུབ་ཚེ། དངུལ་འབབ་ད་དུང་ཁ་སྣོན་བྱེད་ཆོག་ཅེས་སོགས་བྲིས་ཡོད་པ་དང༌། ཁྱེད་ཀྱིས་(Gmail)ཐོག་གློག་འཕྲིན་ཁ་བྱང་གསར་བ་ཞིག་བཟོ་དགོས། དེ་བཟོ་སྐབས་ཁྱེད་ཀྱི་མིང་དང་སྡོད་གནས་ཁ་པར་ཨང་གྲངས་བཅས་གཏན་ནས་མཁོ་སྤྲོད་གནང་མི་དགོས། གློག་འཕྲིན་ཁ་བྱང་བཟོས་རྗེས་ཀྱི་བདུན་གཅིག་ནང་དུ་འཕྲིན་ལན་འབྱོར་ངེས་ཡིན་ཞེས་སོགས་བྲིས་ཡོད་འདུག  ཡིན་ནའང་འཕྲིན་ཡིག་དེའི་ནང་མི་སུ་ཡིས་སུ་ལ་བཏང་བའི་མིང་སོགས་གསལ་བོ་འཁོད་ཡོད་མི་འདུག

དེ་རིང་ཨ་རིའི་གཞུང་ཚབ་ཆེན་མོ་མཱལ་ཁཱེལ་མཱ་ཁུ་ཧྥོ་ (Michael McFaul) ལགས་ཨུ་རུ་སུ་ཕྱི་སྲིད་ལྷན་ཁང་དུ་སྐད་བཏང་སྟེ། ཨ་རིའི་གཞུང་ཚབ་ཁང་དུ་གསང་མྱུལ་ལས་བྱེད་གཉར་པའི་སྐོར་ལ་གྲོས་མོལ་བྱས་ཡོད་འདུག་ཀྱང༌། གསར་འགོད་པའི་དྲི་བའི་ལན་དུ་ཨ་རིའི་གཞུང་ཚབ་ཀྱིས་ལན་འདེབས་གང་ཡང་བྱས་མི་འདུག ཨུ་རུ་སུའི་ཕྱི་སྲིད་བློན་ཆེན་སིར་ཇེ་ (Sergei lavrov)ལགས་ཀྱིས་ཐེངས་འདིའི་གསང་མྱུལ་དོན་རྐྱེན་དེ། སྔོན་མའི་གྲང་དམག་སྐབས་ཀྱི་ཕྱོགས་གཉིས་བར་གྱི་གསང་མྱུལ་དོན་རྐྱེན་བསྐྱར་ལོག་རྒྱག་གི་ཡོད་སྐོར་བརྗོད་འདུག ཡང་ཨ་རིའི་གཞུང་གི་མགྲིན་ཚབ་པ་པད་ཌི་ཁུ་ (Patrick Ventrell) ལགས་ཀྱིས་ཨ་རིའི་གཞུང་ཚབ་ཁང་གི་ལས་བྱེད་ཅིག་འཛིན་བཟུང་བྱས་པ་བདེན་པ་ཡིན་ཡང༌། དེ་ནི་ཨ་རིའི་གསང་བའི་ལས་ཁུངས་(CIA)ཀྱི་གསང་མྱུལ་བ་རེད་ཟེར་བ་དེར་ངོས་ལེན་རྩ་བ་ནས་མེད་སྐོར་བརྗོད་འདུག

ཉེ་ཆར་ཨ་རིའི་སྤོ་སི་ཌོན་(Boston)ནང་གི་འབར་གས་དོན་རྐྱེན་ཐད་ཨུ་རུ་སུ་གཞུང་གིས་གནས་ཚུལ་གང་ཡོད་མཁོ་སྤྲོད་བྱ་རྒྱུའི་ཁས་ལེན་བྱས་ཏེ། ཨ་རི་དང་ཨུ་རུ་སུའི་འབྲེལ་ལམ་ཡར་རྒྱས་རྒྱུན་འཁྱོང་ཐོག་འཇིགས་སྐུལ་པར་རྒོལ་ལན་སློག་རྒྱུ་བྱས་ཡོད་ཀྱང༌། ཐེངས་འདིའི་དོན་རྐྱེན་གྱིས་འབྱུང་འགྱུར་རྒྱལ་ཁབ་གཉིས་བར་གྱི་ཕྱི་འབྲེལ་སྲིད་བྱུས་ཐོག་དོ་ཕོག་ཆེན་པོ་འགྲོ་རྒྱུ་ཡིན་པ་དང༌། ལྷག་པར་དུ་ཉེ་ཆར་རྒྱལ་ཁབ་གཉིས་བར་སེ་རེ་ཡཱ( Syria) ཡི་ཟིང་འཁྲུག་ཞི་འཇགས་གཏོང་བར་མོས་མཐུན་གྲོས་ཆོད་ཅིག་བཞག་ཡོད་པ་དེར་གནོད་སྐྱོན་ཐེབས་རྒྱུ་ཡིན་ཚུལ་གནད་དོན་དབྱེ་ཞིབ་པ་ཚོས་བརྗོད་འདུག