གཟའ་སྤེན་པའི་ཉིན་སུད་སིར་བོད་དོན་འཐབ་རྩོད་ཀྱི་སྟོབས་ཤུགས་གཅིག་སྒྲིལ་ཡོང་ཐབས་དང་འབྲེལ་བའི་སྐོར་ལ་བགྲོ་གླེང་ཞིག་གནང་ཡོད་འདུག
གནས་ཚུལ་བཏང་འབྱོར་བྱུང་བ་ལྟར་ན། ཟླ་འདིའི་ཕྱི་ཚེས་ ༡༨ ཉིན་གྱི་ཆུ་ཚོད་ ༡།༣༠ ནས་༥།༣༠ པའི་བར། སུད་སིའི་བོད་ཀྱི་མི་རབས་གསར་བའི་མཐུན་ཚོགས་ཀྱི་གོ་སྒྲིག་འོག སུད་སི་ཛུ་རིག་ཏུ་ཡུ་རོབ་སྐུ་ཚབ་སྐལ་བཟང་རྒྱལ་མཚན་དང་། སུད་སི་རི་ཀོན་བོད་ཡིག་སློབ་གྲྭའི་དགེ་རྒན་ཟམ་མདོ་བྱམས་པ་ལགས། གཞན་སུད་སིའི་ནང་ཡོད་པའི་ཆོལ་ཀ་གསུམ་གྱི་ཚོགས་གཙོ་དང་སྐུ་ཚབ། ཡུ་རོབ་གཞོན་ནུའུ་མཐུན་ཚོགས། སུད་སི་བོད་ཀྱི་བུད་མེད་ཚོགས་པའི་སྐུ་ཚབ། བོད་ཀྱི་མི་རབས་གསར་བའི་མཐུན་ཚོགས་ཀྱི་ཚོགས་གཙོ་བཅས་ནས། བོད་དོན་འཐབ་རྩོད་ཀྱི་སྟོབས་ཤུགས་གཅིག་སྒྲིལ་ཡོང་ཐབས་དང་འབྲེལ་བའི་བརྗོད་ཐོག་བགྲོ་གླེང་ཞིག་གནང་ཡོད་འདུག
ཐེངས་འདིའི་བགྲོ་གླེང་དེ་བོད་ཀྱི་མི་རབས་གསར་བའི་མཐུན་ཚོགས་ཀྱི་ལས་འཆར་ལྟར། ལོ་རེར་སུད་སི་དང་རྒྱ་གར་ནང་བཅས་སུ་བགྲོ་གླེང་ཐེངས་རེ་གོ་སྒྲིག་ཞུ་བཞིན་ཡོད་པ་ལྟར། སུད་སིའི་ནང་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་གི་མཛད་གཙོ་རྣམས་སྡིངས་ཆ་གཅིག་ཏུ་ལྷན་འཛོམས་ཀྱིས། བོད་པའི་འཐབ་རྩོད་ཁ་ཕྱོགས་དང་ལས་འགུལ་སྤེལ་ཕྱོགས། ཆོལ་གསུམ་རྡོག་རྩ་གཅིག་སྒྲིལ་ཡོང་ཐབས་བཅས་ཀྱི་ཐོག་བགྲོ་གླེང་གནང་རྗེས་མི་མང་དང་དྲི་བ་དྲིས་ལན་དང་། བསམ་ཚུལ་བརྗེ་རེས་བཅས་གནང་ཡོད་འདུག གཞན། བགྲོ་གླེང་ཐོག་དམིགས་བསལ་སྐུ་མགྲོན་ཏུ་ཨ་རིར་གནས་བཞུགས་དང་བོད་དོན་ཆེད་ཡུ་རོབ་རྒྱལ་ཁབ་ཁག་ནང་ལྕགས་རྟ་སྐོར་སྐྱོད་གནང་མཁན་རིན་པོ་ལགས་མཉམ་ཞུགས་གནང་སྟེ། ཁོང་གི་ལས་འགུལ་སྤེལ་དགོས་པའི་རྒྱུ་མཚན་དང་། མི་མང་གིས་བོད་དོན་ལ་འགན་ཁྱེར་ཕྱོགས་བཅས་ཀྱི་ཐོག་གཏམ་བཤད་གནང་ཡོད་འདུག
བོད་ཀྱི་མི་རབས་གསར་བའི་མཐུན་ཚོགས་ཀྱི་དྲུང་ཡིག་ཕུན་ཚོགས་ལགས་ཀྱིས་བགྲོ་གླེང་ངོ་སྤྲོད་དང་འབྲེལ། བོད་པའི་ད་ལྟའི་སྤྱི་ཆོགས་གནས་བབ་དང་། ལྷག་དོན་བཙན་བྱོལ་ནང་གི་བོད་མི་ཚོ་ཆབ་སྲིད་ཀྱི་གོ་རྟོགས་ཧ་ཅང་སྐྱོ་བ་དང་། ཆབ་སྲིད་ལ་དོ་སྣང་མེད་པའི་གནས་སྟངས་འོག་༧གོང་ས་མཆོག་གཙོས་པའི་གཞུང་གི་མཛད་གཙོ་རྣམ་པ་དང་། གཞུང་འབྲེལ་མིན་པའི་ཚོགས་སྡེ་ཁག་གི་དབུ་ཁྲིད། ལྷག་དོན་མཁས་དབང་ཁག་གིས་ཆབ་སྲིད་དཔྱད་ཞིབ་ལ་ངོས་འཛིན་གནང་མ་ཐུབ་པའི་དབང་གིས། བོད་ཀྱི་སྤྱི་ཚོགས་འདི་ཉིད་དཀའ་རྙོག་ནང་ནས་མུ་མཐུད་སྡོད་དགོས་བྱུང་བ་དང་། འདི་ལྟའི་བགྲོ་གླེང་དང་བསམ་ཞིབ། གྲོས་བསྡུར་བཅས་བརྒྱུད་ནས་མི་མང་གི་ཤེས་ཡོན་སྤྱི་དང་། ཁྱད་པར་ཆབ་སྲིད་ཐད་གོ་རྟོགས་སྤེལ་རྒྱུ་གལ་ཆེན་དུ་མཐོང་གི་ཡོད་སྐོར་སོགས་བརྗོད་འདུག
བགྲོ་གླེང་མཇུག་དུ་བོད་ཀྱི་མི་རབས་གསར་བའི་མཐུན་ཚོགས་ཀྱི་ཚོགས་གཞོན་མཁར་འཕགས་ལགས་ཀྱིས། བོད་ཀྱི་མི་རབས་གསར་བའི་མཐུན་ཚོགས་ངོ་སྤྲོད་དང་སྦྲགས། གསལ་བོར་བཤད་དགོས་པ་ཞིག་ནི། ང་ཚོས་གཞུང་གི་ལངས་ཕྱོགས་ལ་རྒྱབ་སྐྱོར་གཙང་མ་བྱེད་རྒྱུ་ཡིན་ཞེས་བརྗོད་སྐབས། མི་རེ་ཟུང་ཞིག་གིས་ང་ཚོའི་ཚོགས་པ་འདི་ནི་རང་བཙན་རྩོད་མཁན་རྣམས་ལ་ཁ་གཏད་གཅོག་ཆེད་རེད་ཟེར་གྱི་ཡོད་པ་ནི་དོན་དངོས་དང་མི་མཐུན་ཞིང་། ལྷག་དོན་ང་ཚོའི་ཚོགས་པ་འདིས་མི་རབས་རྒན་གཞོན་བར་དཀྲུག་ཤིང་རྒྱག་གི་འདུག་པའི་བསམ་ཚུལ་ཤོད་མཁན་ཡོད་པ་བཅས་ནི་ཆེད་དུ་ཚོགས་པར་མིང་ཆལ་བཟོ་ཐབས་བྱེད་ཀྱི་ཡོད་པ། ང་ཚོས་དམིགས་ཡུལ་དོན་ཚན་དགུ་ལ་ཤར་སྐྱོད་གནང་དགོས་དོན་ནི་མི་རབས་རྒན་པ་ཚོས་མི་ཚེ་ཧྲིལ་བོར་དཀའ་ལས་བརྒྱབ་ཚར་བ་རྣམས་ཀྱི་བཀའ་དྲིན་དྲན་པའི་སྒོ་ནས། མི་རབས་གསར་བ་རྣམས་ཀྱིས་བོད་དོན་ཐད་འགན་ལེན་གནང་དགོས་པའི་རྒྱུ་མཚན་ལ་བརྟེན་ནས། བོད་ཀྱི་མི་རབས་གསར་བའི་མཐུན་ཚོགས་ཞེས་སུ་མིང་འདོག་བྱས་ཡོད་པ་དང་། གཞན་ང་ཚོའི་ལས་འགུལ་གང་ཞིག་ཡིན་ན་བསམ་ཤེས་དང་གུ་ཡངས། གུས་བརྩི་བཅས་ཀྱི་ཐོག་ནས་འགྲོ་བཞིན་ཡོད་སྐོར་སོགས་བརྗོད་ཡོད་འདུག
བོད་ཀྱི་མི་རབས་གསར་པའི་མཐུན་ཚོགས་ཀྱིས་ལས་འགུལ་དོན་ཕན་ལྡན་པ་མང་པོ་ཞིག་སྤེལ་གྱི་ཡོད་པ་ལས་རྒྱ་ནག་གཞུང་གི་རྒྱུག་ཁྱུ་དེ་དག་ཐེར་འདོན་གནང་བ་ལས་དོན་རླབས་ཆེན་རེད། གནས་ཚུལ་དེ་སུད་སི་ཙམ་མ་རེད། ཨོ་སི་ཊོ་ལེ་ཡའི་ནང་དུ་ཡང་བྱུང་ཡོད་པ་རེད། བྱེད་གཏེ་འདི་དག་བོད་ཀྱི་མི་རབས་གསར་པའི་མཐུན་ཚོགས་ཙམ་མ་ཡིན་པར། བོད་ཀྱི་གཞོན་ནུ་ཚོགས་པ་དང་བུད་མེད་ཚོགས་པ། བོད་རང་དབང་སློབ་ཕྲུག་ཚོགས་པ། དེ་བཞིན་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་སོགས་མཉམ་རུབ་ཐོག་རྩ་མེད་གཏོང་དགོས་པ་རེད། གལ་སྲིད་ཁྱུ་ངན་བཞིན་བྱ་རྒྱུད་སྤྱོད་རྒྱུ་མང་ན་ས་གནས་ཁྲིམས་ཁང་གི་ལག་ཏུ་འཇོག་དགོས་པ་རེད།
བོད་ཀྱི་མི་རབས་གསར་པའི་མཐུན་ཚོགས་ཀྱི་གཟི་བརྗིད་ཆེ་ཤོས་ཀྱི་ལས་དོན་དེ་འདི་ཡིན། ཚང་མས་འདི་ལ་གཟིགས་རོགས། http://www.khabdha.org/?p=42523
བོད་ཀྱི་མི་རབས་གསར་པའི་ཐུན་ཚོགས་ཟེར་བ་འདི་ལ་བསྔགས་བརྗོད་བླ་མེད་ཡོད། ཁྱེད་ཅག་གི་ལས་དོན་བྱེད་པྱོགས་དང་ཆབ་སྲིད་ལྟ་བའི་བཞེངས་ཕྱོགས་བཅས་ལ་མོས་མཐུན་བརྒྱ་ཆའི་བརྒྱ་ཐམས་པ་ཡོད། ལས་དོན་གསར་པ་གང་ཞིག་དབུ་བརྙས་སྐབས་དེ་ལ་ཕྲག་དོག་དང་བར་ཆད་གཏོང་མཁན་མང་པོ་ཡོད་ཡོད་པ་རེད། དཀའ་ངལ་ལ་གདོང་ལེན་བྱེད་དགོས་རེད།