ལི་ཁེ་ཆང་པ་ཀི་སི་ཐན་ནང་སྐོར་སྐྱོད།

ཟླ་འདིའི་ཕྱི་ཚེས་ ༢༢ ཉིན་རྒྱ་ནག་སྲིད་བློན་ལི་ཁེ་ཆང་གིས་སྣེ་འཁྲིད་པའི་མཐོ་རིམ་སྐུ་ཚབ་ཚོགས་ཆུང་པ་ཀི་ས་ཐན་གྱི་རྒྱལ་ས་ཨེ་སི་ལཱ་མཱ་བྷ་ཌི(Islamabad) གནམ་ཐང་དུ་འབྱོར་ཡོད་པ་དང་། སྐབས་དེར་པ་ཀི་སི་ཐན་གྱི་དམག་མིའི་རུ་སྒྲིག་གི་དབུས་སུ། པ་ཀི་སི་ཐན་གྱི་སྲིད་འཛིན་རྫར་ཌ་རེ་( zardari) དང་། བར་བརྒལ་གཞུང་གི་སྲིད་བློན་ཧཱ་རྫར་ཁམ་ཁཱོད་སོ་( Hazar Khan Khoso) གཉིས་ཀྱིས་གཞུང་འབྲེལ་སྣེ་ལེན་བྱས་འདུག

ཐེངས་འདིར་པ་ཀི་སི་ཐན་གཞུང་གི་དེ་སྔོན་རྒྱ་ནག་དང་མཉམ་འབྲེལ་གྱིས་བཟོས་པའི་དམག་འཐབ་གནམ་གྲུ་(JF -17)རྟགས་ཅན་ ༦ གིས་སྲིད་བློན་ལི་ཁེ་ཆང་གི་གནམ་གྲུའི་མཐའ་སྐོར་ཏེ་བདེ་འཇགས་སྲུང་སྐྱོབ་དམ་པོ་བྱས་ཡོད་པ་མ་ཟད། ཉིན་གུང་ཆུ་ཚོད་ ༡ པོའི་བར་པ་ཀི་སི་ཐན་གྱི་རྒྱལ་ས་ཡོངས་སུ་ལག་འཁྱེར་ཁ་པར་བརྡ་རྟགས་བཀག་སྡོམ་བྱས་ཡོད་འདུག

དེའི་རྗེས་པ་ཀི་སི་ཐན་གྱི་སྲིད་འཛིན་ལས་ཁུངས་ནང་རྒྱ་ནག་གི་སྲིད་བློན་ལི་ཁེ་ཆང་དང་པ་ཀི་སི་ཐན་གྱི་སྲིད་འཛིན་རྫར་ཌ་རེ་གཉིས་གཙོས་པའི་རྒྱལ་ཁབ་གཉིས་ཀྱི་མཐོ་རིམ་དཔོན་རིགས་བར་དཔལ་འབྱོར་དང་རིག་གཞུང་། ཚན་རིག་ལག་རྩལ། བར་སྣང་བརྡ་འཕྲིན། ས་མཚམས་དོ་དམ། འཛུགས་སྐྲུན་དང་གློག་ཤུགས་སོགས་ཀྱི་ཐད་དོན་ཚན་ ༡༢ ཅན་གྱི་གྲོས་མཐུན་མིང་རྟགས་བཀོད་ཡོད་འདུག

ཚོགས་འདུའི་རྗེས་སུ་སྲིད་བློན་ལི་ཁེ་ཆང་ལ་སྲིད་འཛིན་རྫར་ཌ་རི་ཡིས་པ་ཀི་སི་ཐན་རྒྱལ་ཁབ་ཀྱི་ཆེས་མཐོའི་གཟེངས་རྟགས་(Nishan-e-pakistan)ཞེས་པ་དེ་ཕུལ་ཡོད་འདུག ལོ་སྔོན་མའི་རྒྱལ་ཁབ་གཉིས་ཀྱི་ཚོང་འབྲེལ་ཁྱོན་ཨ་སྒོར་དུང་ཕྱུར་ ༡༢ ཡིན་པ་དང་། འབྱུང་འགྱུར་ལོ་གཉིས་གསུམ་ནང་ཚོང་འབྲེལ་ཁྱོན་ཨ་སྒོར་དུང་ཕྱུར་ ༡༥ ལ་འཕར་སྣོན་བྱ་རྒྱུའི་གྲོས་འཆམ་བྱུང་ཡོད་འདུག

སྲིད་བློན་ལི་ཁེ་ཆང་གིས་པ་ཀི་སི་ཐན་གྱི་གྲོས་ཚོགས་གོང་འོག་གཉིས་ལྷན་འཛོམས་ཐོག་གཏམ་བཤད་སྤེལ་སྐབས། རྒྱལ་ཁབ་གཉིས་བར་དེ་སྔོན་ནས་ཕྱི་སྲིད་མཛའ་འབྲེལ་ཧ་ཅང་ཡག་པོ་ཡོད་པའི་སྟེང་། ད་དུང་མཉམ་ལས་འབྲེལ་ལམ་མུ་མཐུད་གཏིང་ཟབ་ཏུ་གཏོང་དགོས་པ་དང་། པ་ཀི་སི་ཐན་ནང་གློག་ཤུགས་དཀའ་ངལ་ཡོད་པར་རོགས་རམ་བྱ་རྒྱུ་ནི་ཁོང་གི་མངོན་འདོད་ཡིན་སྐོར་བརྗོད་འདུག 

སྲིད་འཛིན་རྫར་ཌ་རི་ཡིས་ཀྱང་པ་ཀི་སི་ཐན་གྱི་ཆབ་སྲིད་ཚོགས་པ་ཁག་གིས་སྲིད་བློན་ལི་ཁེ་ཆང་གི་གཟིགས་སྐོར་བརྒྱུད་དེ། རྒྱ་ནག་ལ་གྲོགས་པོ་བཟང་པོ་ཞིག་གི་འདུ་ཤེས་ཐོག་འབྲེལ་ལམ་ཡག་པོ་འཛུགས་རྒྱུར་ཁོང་གིས་རྒྱབ་སྐྱོར་བྱེད་ཀྱིན་ཡོད་པ་དང་། མ་འོངས་པར་རྒྱ་ནག་དང་ལྷན་དུ་རྒྱལ་ཁབ་གཉིས་ཀྱི་ལས་དོན་གང་ཅིའི་ཐད་མཉམ་ལས་བྱེད་འདོད་ཡོད་པ། རྒྱ་ནག་ལ་འབྲེལ་ལམ་འཛུགས་རྒྱུ་ནི་པ་ཀི་སི་ཐན་གྱི་ཕྱི་འབྲེལ་སྲིད་བྱུས་གལ་ཆེན་ཞིག་ཡིན་སྐོར་སོགས་བརྗོད་འདུག

ཁ་སང་ཚེས་ ༢༣ ཉིན་ལི་ཁེ་ཆང་། ཉེ་ཆར་གསར་དུ་བདམས་ཐོན་བྱུང་བའི་པ་ཀི་སི་ཐན་གྱི་སྲིད་བློན་སྐུ་ཞབས་ནཱ་ཝ་རྫི་ཞཱར་ཧྥི་(Nawaz Sharif )ལགས་དང་དམག་སྤྱི་ཁཱ་ཡཱ་ནེ་(Kayani)། དེ་བཞིན། ཆབ་སྲིད་ཚོགས་པ་གཞན་ཁག་གི་མཐོ་རིམ་མི་སྣ་བཅས་ལ་ཐུག་འཕྲད་སྐབས། ནཱ་ཝ་རྫི་ཡིས་པ་ཀི་སི་ཐན་གྱི་གཞུང་འཛིན་ཚོགས་པ་བརྗེ་བོ་བརྒྱབ་ཀྱང་རྒྱལ་ཁབ་གཉིས་ཀྱི་མཛའ་འབྲེལ་སྔར་བཞིན་འགྱུར་བ་མེད་ཚུལ་བརྗོད་འདུག

དེ་རིང་གོང་གསལ་གནས་ཚུལ་སྐོར་རྒྱ་གར་དུས་བབ་ཚགས་པར་ནང་བཀོད་པ་ལྟར་ན། རྒྱ་དཀར་ནག་བར་གྱི་འབྲེལ་བའི་དབང་གིས་པ་ཀི་སི་ཐན་གྱི་འཛིན་སྐྱོང་འོག་ཡོད་པའི་ཀ་ཤི་མིར་ས་ཁུལ་(POK)ཞེས་པ་དེར། རྒྱ་ཕྱོགས་ནས་འཛུགས་སྐྲུན་ལས་གཞི་གང་ཡང་སྤེལ་འཆར་མེད་པ་རྒྱ་ནག་ཕྱི་སྲིད་མགྲིན་ཚབ་པས་བརྗོད་སྐོར་ལུང་འདྲེན་བྱས་འདུག

སྔོན་ཆད་རྒྱ་གཞུང་གིས་ཡུ་གུར་འཇིགས་སྐུལ་པ་ཚོས་པ་ཀི་སི་ཐན་གྱི་ནུབ་བྱང་མཐའ་མཚམས་སུ་ཡོད་པའི་འཇིགས་སྐུལ་ཚོགས་པ( Al- Qaeda)ལ་འབྲེལ་ལམ་འཛུགས་སྲིད་པར་སེམས་འཚབ་ཡོད་སྐོར་གླེང་སྐབས། པ་ཀི་སི་ཐན་གཞུང་གིས་ལོ་ཁ་ཤས་སྔོན་ནས་འཇིགས་སྐུལ་པ་མང་པོ་བསད་ཚར་བ་མ་ཟད། ཁོ་ཚོ་པ་ཀི་སི་ཐན་གྱི་ས་ཁོངས་ནས་ཕྱིར་འཕུད་བཏང་ཡོད་ཚུལ་ལན་འདེབས་བྱས་ཡོད།

ཁ་སང་ཕྱི་ཚེས་ ༢༣ ཉིན་སྲིད་བློན་ལི་ཁེ་ཆང་གིིིས་པ་ཀི་སི་ཐན་ནང་ཉིན་གཉིས་ཀྱི་གཟིགས་སྐོར་གྲུབ་ཏེ། དེ་རིང་ཡུ་རོབ་རྒྱལ་ཁབ་སུད་སུའི་ནང་འབྱོར་ཏེ་རྒྱལ་ཁབ་གཉིས་ཀྱི་མཐོ་རིམ་དཔོན་རིགས་ཐུག་འཕྲད་གནང་མགོ་བརྩམས་ཡོད་པ་རེད།