ཡུ་རོབ་ནང་ཆུ་ལོག་གནོད་སྐྱོན།

ཡུ་རོབ་དབུས་ཁུལ་དུ་ཆར་བ་ཤུགས་ཆེན་བབས་པའི་དབང་གིས་རྒྱལ་ཁབ་ཁག་ཅིག་ནང་གི་ཆུ་བོ་རྒྱས་ཏེ་མང་ཚོགས་ལ་དཀའ་ངལ་ཤུགས་ཆེན་འཕྲད་བཞིན་ཡོད་འདུག  

ཟླ་འདིའི་ཕྱི་ཚེས་ ༢ ནས་ཚེས་ ༤ ཉིན་བར་ཡུ་རོབ་དབུས་ཀྱི་རྒྱལ་ཁབ་འཇར་མན་སུད་སི། ཅཱེཀ་ཁི། ཨོ་སི་ཋྀ་རི་ཡ་བཅས་ནང་ཆར་བ་ཤུགས་ཆེན་བབས་ཏེ། འཇར་མན་གྲོང་ཁྱེར་པཱད་སཱོ་(Passau) ནང་གི་ཆུ་བོ་ཌན་ཇོ་ཕུ་(Danube)ཤུགས་ཆེན་པོ་རྒྱས་ཏེ། གྲོིང་ཁྱེར་མང་པོའི་ནང་ཆུ་ལུད་དེ་ཁང་པ་དང་ཅ་དངོས་ལ་གཏོར་སྐྱོན་ཆེན་པོ་བཏང་ཡོད་འདུག འཇར་མན་གཞུང་གིས་ཆུ་བོ་ཌན་ཇོ་ཕུའི་སྟོད་སྨད་བར་གསུམ་གྱི་གྲོང་ཁྱེར་ཁག་གི་མི་མང་ ༢༠༠༠ ལྷག་སྤོེར་བྱེད་བཅུག་ཡོད་པ་མ་ཟད། ཟམ་པ་དང་གཞུང་ལམ། ཆུ་བོའི་ཐོག་དངོས་ཟོག་སྐྱེལ་འདྲེན་མཚམས་འཇོག་དགོས་པའི་ཛ་དྲག་གི་གསལ་བསྒྲགས་སྤེལ་འདུག

འཇར་མན་སྲིད་འཛིན་མེར་ཁེལ་(Merkel)ལགས་ཆུ་ལོག་གི་གནོད་སྐྱོན་ཐེབས་ཡུལ་དུ་བསྐྱོད་དེ་མི་མང་ལ་སེམས་གསོ་དང་རྒྱལ་ཁབ་ཀྱིས་རོགས་སྐྱོར་མ་དངུལ་ཡུ་སྒོར་ས་ཡ་ ༡༠༠ གནང་ཡོད་འདུག འཇར་མན་བདེ་སྲུང་བློན་ཆེན་གྱིས། “གཞུང་གིས་ཟ་མ་དང་སྡོད་གནས། ལྭ་བ་སོགས་ཀྱི་རོགས་རམ་བྱེད་ཀྱིན་ཡོད་པ་དང་། གྲོང་ཁྱེར་ནང་ཆུ་རགས་གསར་རྒྱག་ཆེད་དམག་མི་ ༤༠༠༠ བཏང་” ཞེས་བརྗོད་འདུག

ཅཱེག་ཁི་སྤྱི་མཐུན་རྒྱལ་ཁབ་ཀྱི་རྒྱལ་ས་པུ་རེད་ཁཱོ་ (Prague) ནང་དུའང་ཆར་བ་ཤུགས་ཆེན་བབས་ཏེ། ཆུ་བོ་ཝེལ་ཊལ་བཱ་(Vltava)ཤུགས་ཆེན་རྒྱས་ཏེ་གྲོང་ཁྱེར་ནང་ཆུ་ལོག་བྱུང་ཡོད་སྟབས། ཚོང་ལས་དང་འགྲིམ་འགྲུལ། སློབ་གྲྭ་སོགས་ཀྱི་བྱེད་སྒོ་མཚམས་འཇོག་ཏུ་བཅུག་ཡོད་པ་དང་། ཅཱེག་ཁི་སྲིད་བློན་ནེ་ཁཱ་སི་ (Petr Necas) ཡི་ལོ་རྒྱུས་ལྡན་པའི་བསྟི་གནས་རྒྱལ་ས་པུ་རེད་ཁཱོ་ཆུ་ལ་ཆུ་ལོག་གི་གནོད་སྐྱོན་བྱུང་སྟབས། སྲིད་གཞུང་གིས་ཛ་དྲག་གསལ་བསྒྲགས་སྤེལ་ཏེ་མི་མང་ ༦༠༠༠ ལྷག་གནས་སྤོར་དང་། ཨ་སྒོར་ས་ཡ་ ༡༥ ཡིས་རོགས་དངུལ་སྤྲད་པ། དམག་མི་ ༢༠༠༠ ས་གནས་སུ་མི་མང་སྲུང་སྐྱོབ་དང་། ཆུ་རགས་བརྒྱབ་སྟེ་ཆུ་ལོག་འགོག་ཐབས་བྱེད་བཞིན་ཡོད་འདུག

ཨོ་སི་ཋྀ་རི་ཡའི་གྲོིང་ཁྱེར་ཨེ་ཌེན་ནོ (Ettenau)གཙོས་པའི་ས་གནས་ཁ་ཤས་ནང་ཆུ་ལོག་དང་ས་རིལ་སོགས་ཀྱི་གནོད་སྐྱོན་ཆེན་པོ་ཐེབས་ཡོད་འདུག

ཡུ་རོབ་རྒྱལ་ཁབ་ཧང་གྷ་རི་(Hungary) ཡི་ཆུ་བོ་ཌན་ཇོ་ཕུ་རྒྱས་བཞིན་ཡོད་སྟབས། སྲིད་བློན་ཨོར་སྦན(Viktor Orban)ལགས་ཀྱིས་ཛ་དྲག་གི་གསལ་བསྒྲགས་སྤེལ་ཏེ། ཆུ་བོ་དེའི་མཐའ་འཁོར་གྱི་མི་མང་སྲུང་སྐྱོབ་ཆེད་དམག་མི་༨༠༠༠ དང་། ཆུའི་ཁྱད་མཁས་པ་ ༡༤༠༠ སོགས་བཏང་སྟེ་ཆུ་ལོག་སྔོན་འགོག་གི་ལས་དོན་སྤེལ་བཞིན་ཡོད་འདུག

ཆུ་བོ་ཪན་ (Rhein) འགྲམ་རྒྱུད་དུ་ཡོད་པའི་སུད་སི་གཏན་སྡོད་ལའང་གནས་སྤོར་བྱ་དགོས་པའི་ཉེན་བརྡ་བཏང་ཡོད་པ་དང་། དེའི་ནང་དུ་དངོས་ཟོག་སྐྱེལ་འདྲེན་ཡང་གནས་སྐབས་རིང་མཚམས་འཇོག་བྱེད་བཅུག་ཡོད་འདུག

ད་ཐེངས་ཡུ་རོབ་ཁུལ་དུ་ཆར་བ་ཤུགས་ཆེན་པོ་བབས་ཏེ། ཆུ་བོ་རན་དང་ཌན་ཇོ་ཕུ། ཝེལ་ཊལ་བཱ། ཨེ་སྦེ་ས་སོགས་ཤུགས་ཆེན་པོ་རྒྱས་བཞིན་ཡོད་སྟབས། ཆུ་མཛོད་མང་པོ་ཁ་ཕྱེས་བྱས་དགོས་བྱུང་ཡོད་པ་མ་ཟད། ཟམ་པ་དང་ཆུ་ཐོག་སྐྱེལ་འདྲེན་བཅས་སྒོ་རྒྱག་ཏུ་བཅུག་ཡོད་འདུག  

ཐེངས་འདིའི་ཆར་ཞོད་དང་ཆུ་ལོག་གི་གནོད་འཚེ་འོག་མི་ ༡༢ ཙམ་རྐྱེལ་ལམ་དུ་ཕྱིན་ཡོད་པ་དང་། གཞན་མང་པོ་ཞིག་བོར་བརླག་དང་རྨས་སྐྱོན་བཅས་བྱུང་ཡོད་འདུག

དུས་རབས་ ༡༦ ནང་ད་རེབ་ཀྱི་ཆུ་ལོག་ལྟ་བུ་ཐེངས་གཅིག་བྱུང་མྱོང་ཡོད་འདུག ༢༠༠༢ ལོར་ཡུ་རོབ་ནང་ཆུ་ལོག་གནོད་སྐྱོན་བྱུང་བ་དང་། ཐེངས་འདིའི་ནང་མི་མང་གི་ཚེ་སྲོག་ལ་ཤི་སྐྱོན་དེ་ཙམ་བྱུང་མེད་ཀྱང་དཔལ་འབྱོར་གྱང་གུད་ཚབས་ཆེན་ཕོག་ཡོད་འདུག