གཟའ་མིག་དམར་ཉིན་སུད་སིའི་ནང་གི་གྲོང་ཁྱེར་ཆེ་ཁག་བཞིའི་ནང་དྲུག་བཞིའི་དོན་རྐྱེན་དང་འབྲེལ་བའི་ཡིག་ཆ་དང་། བོད་གནས་འགྲེལ་བརྗོད་ཀྱི་ཡིག་ཆ་འགྲེམས་སྤེལ་གྱི་ལས་འགུལ་ཞིག་སྤེལ་ཡོད་འདུག
དེ་རིང་ནི་རྒྱ་ནག་པེ་ཅིན་དུ་སློབ་ཕྲུག་སྟོང་ཕྲག་མང་པོ་དམར་གསོད་བྱས་ཏེ་མི་ལོ་ ༢༤ འཁོར་བའི་དུས་དྲན་ཉིན་མོ་ཡིན་ཞིང་། ཉིན་འདིར་རྒྱ་རིགས་གཙོས་པའི་དམངས་གཙོ་དང་རང་དབང་བརྩོན་ལེན་བྱེད་མཁན་ཚོས་འཛམ་གླིང་གང་སར་དུས་དྲན་འདི་སྲུང་གཙི་བྱས་ཏེ་རྒྱ་གཞུང་ལ་ངོ་རྒོལ་བྱེད་ཀྱིན་པའི་ཉིན་མོ་འདིར། བོད་ཀྱི་མི་རབས་གསར་བའི་མཐུན་ཚོགས་ཀྱི་གོ་སྒྲིག་འོག་སུད་སིའི་རྒྱལ་ས་སྦར་དང་། ཇི་ནེ་ཝི། ལོའུ་ཙན་བཅས་གྲོང་ཁྱེར་བཞིའི་ནང་མི་ཚོགས་འདུས་སྡོད་མང་ས་དང་ཡུལ་སྐོར་བ་མང་སར་དྲུག་བཞིའི་དོན་རྐྱེན་གྱི་བྱུང་རིམ་དང་གནས་སྟངས་དང་། བོད་ནང་རང་ལུས་མེར་བསྲེགས་གནང་མཁན་ ༡༡༨ ཙམ་བྱུང་བའི་རྒྱབ་ལྗོངས་ལོ་རྒྱུས། རྒྱ་གཞུང་གིས་དམངས་གཙོ་དོན་གཉེར་བ་དང་ཁྲིམས་རྩོད་པ། རྩོམ་པ་པོ། ཤེས་ཡོན་པ་མང་པོ་བཙོན་འཇུག་བྱེད་ཀྱིན་ཡོད་པ། རྒྱ་རིགས་མི་མང་ས་ཡ་མང་པོར་སྡུག་སྦྱོང་མནར་གཅོད་གཏོང་བཞིན་ཡོད་པ། དེ་བཞིན། གྲངས་ཉུང་མི་རིགས་ཀྱི་རིགས་གཞུང་དང་ཡུལ་སྲོལ་གོམས་གཤིས་རྡོག་རོལ། འཁོར་ཡུག་གཏོར་བརླག་བཅས་གཏོང་བཞིན་པའི་སྐོར་གྱི་ཡིག་ཆ་རྒྱ་ཡིག་དང་འཇར་མན། ཧྥི་རན་སི། དབྱིན་ཡིག་བཅས་ཀྱི་ནང་བསྒྱུར་ཏེ་འགྲེམས་སྤེལ་གནང་ཡོད་ཅིང་། སུད་སིའི་ཇི་ནི་ཝིར་བརྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་འཛམ་གླིང་ཚོང་འབྲེལ་སྐུ་ཚབ་ལས་ཁུངས་སོགས་སུ་ཡིག་ཆ་ཕུལ་ཡོད་འདུག ལས་འགུལ་འདིར་མཉམ་ཞུགས་གནང་མཁན་བོད་ཀྱི་མི་རབས་གསར་མཐུན་ཚོགས་ཀྱི་ཚོགས་མི་རྣམས་དང་། ཡུ་རོབ་གཞོན་ནུ་ལྷན་ཚོགས་ཀྱི་འཐུས་མི་བཅས་ཡོད་འདུག
ཐེངས་འདིའི་ལས་འགུལ་སྤེལ་དགོས་པའི་རྒྱུ་མཚན་ངོ་སྤྲོད་གནང་བ་ལྟར་ན། དྲུག་བཞིའི་དོན་རྐྱེན་ཞེས་པ་ཕྱི་ལོ་ ༡༩༨༩ ལོའི་ཟླ་ ༦ ཚེས་ ༤ ཉིན་རྒྱ་ནག་པེ་ཅིན་གནམ་བདེ་སྒོ་མོ་ཆེའི་ཐང་ཆེན་དུ་རྒྱ་རིགས་སློབ་མ་ཁྲི་ཕྲག་ཅིག་གིས་རྒྱ་གཞུང་གི་སྒེར་གཅོད་སྲིད་བྱུས་བསྒྱུར་བཅོས་དང་། དམངས་གཙོ། རང་དབང་། འགྲོ་བ་མིའི་ཐོབ་ཐང་སོགས་ཀྱི་ཆེད་ངོ་རྒོལ་སྐད་འབོད་དང་། ཟས་བཅད་ངོ་རྒོལ་སོགས་འཚེ་མེད་ཞི་བའི་ལས་འགུལ་ཉིན་ཤས་རིང་སྤེལ་སྐབས། རྒྱ་གཞུང་གིས་དྲག་དམག་བཏང་སྟེ་སློབ་ཕྲུག་ ༢༠༠༠ ལྷག་དམར་གསོད་བཏང་ཡོད།
རྒྱ་གཞུང་གིས་ལས་འགུལ་འདི་དང་འབྲེལ་ཡོད་སློབ་ཕྲུག་དང་དགེ་རྒན། ཤེས་ཡོན་པ། ལས་བཟོ་བ་སྟོང་ཕྲག་མང་པོ་བཙོན་འཇུག་མནར་གཅོད་བཏང་དང་གཏོང་བཞིན་ཡོད་སྟབས། ང་ཚོ་བོད་པ་ཚོས་བདེན་པའི་འཐབ་རྩོད་བྱེད་ཀྱིན་ཡོད་པ་དང་འཚེ་མེད་ཞི་བའི་ལྟ་གྲུབ་ལ་ཡིད་ཆེས་བློ་འགེལ་བྱེད་མཁན་ཞིག་དང་། ལྷག་པར་དུ་འཛམ་གླིང་མི་མང་སྤྱི་དང་རྒྱ་རིགས་མི་མང་ལ་རེ་སྐུལ་ཞུས་ཏེ་བོད་ཀྱི་འཐབ་རྩོད་ལ་རྒྱབ་སྐྱོར་དགོས་པའི་འབོད་སྐུལ་ཞུ་བཞིན་པའི་སྐབས་འདིར། ང་ཚོས་ཀྱང་ངེས་པར་དུ་མི་རིགས་གཞན་དང་ལུང་པ་གཞན་ནང་འཚེ་མེད་ཞི་བ་དང་། རང་དབང་། དམངས་གཙོ་བཅས་ཀྱི་ཆེད་དུ་ད་ལྟའི་བོད་པའི་དཀའ་སྡུག་དང་གཅིག་མཚུངས་ལྟར་གདུག་རྩུབ་དྲག་གནོན་སྲིད་བྱུས་འོག་མནར་གཅོད་མྱོང་བཞིན་པར་གདུང་སེམས་མཉམ་སྐྱེད་ཞུ་རྒྱུ་ནི་ང་ཚོའི་འཐབ་རྩོད་འདི་བདེན་པའི་འཐབ་རྩོད་ཅིག་ཡིན་པའི་དཔང་རྟགས་སུ་འགྱུར་རྒྱུ་དང་། བོད་དོན་འཐབ་རྩོད་ཀྱི་སྟོབས་ཤུགས་རྒྱ་སྐྱེད་གཏོང་སྟངས་གལ་ཆེན་ཞིག་ཡིན་སྟབས། དེ་རིང་རྒྱ་རིགས་ས་ཡ་མང་པོས་དྲུག་བཞིའི་དུས་དྲན་ཐེངས་ ༢༤ སྲུང་གཙི་བྱེད་ཀྱིན་པའི་སྐབས་འདི་དང་བསྟུན་ཏེ། དྲུག་བཞིའི་དོན་རྐྱེན་ལ་གདུང་སེམས་མཉམ་སྐྱེད་ལས་འགུལ་འདི་སྤེལ་བ་ཡིན། ཞེས་སོགས་བརྗོད་འདུག
དྲུག་བཞིའི་རེ་སྨོན།
བོད་སོག་ཡུ་རྒྱ་བཞི་པོའི་མཉམ་གནས་ལ། །
མའོ་ཏིང་ཤོ་ཛང་མིན་ཧུ་དང་བཞིའི། །
ལག་དམར་ཐེར་འདོན་ངོ་རྒོལ་མཐར་ཕྱིན་དགོས། །
ད་ལྟའི་དམར་གཞུང་མང་གཙོའི་ལམ་ལ་རྒྱུགས། །
དྲུག་བཞིའི་དོན་རྐྱེན་གྱིས། གཞུང་གི་ཁྱབ་སྒྲོག་ནང་ལ་མོ་གསོད་ཁྲག་སྦྱོར་གྲངས་འབོར་ཉི་བརྒྱ་ཞེ་གཅིག་ལས་༢༤༡ལས་བཤད་མེད་ཀྱང་། མི་མང་ཚོས་ནི། མི་གྲངས་ཆིག་སྟོང་༡༠༠༠ཟིན་པར་འདས་གྲོངས་བྱངར་བར་ཤོད་བགྱིན་ཡོད་འདུག་གདའ།
་་་་་ གྲངས་ཉུང་མི་རིགས་ཀྱི་རིགས་གཞུང་དང་ཡུལ་སྲོལ་གོམས་གཤིས་རྡོག་རོལ། འཁོར་ཡུག་གཏོར་བརླག་བཅས་གཏོང་བཞིན་པའི་སྐོར་གྱི་ཡིག་ཆ་རྒྱ་ཡིག་དང་འཇར་མན། ཧྥི་རན་སི། དབྱིན་ཡིག་བཅས་ཀྱི་ནང་བསྒྱུར་ཏེ་འགྲེམས་སྤེལ་གནང་ཡོད་་་་་་་ཟེར།