ཕྱི་ཚེས་ ༦ ཉིན་འབར་མའི་དམངས་གཙོ་དོན་གཉེར་པ་ལྕམ་ཨང་སན་སུའུ་ཀེས་གསར་འགོད་ལྷན་ཚོགས་ཤིག་གི་ཐོག འབར་མའི་རྩ་ཁྲིམས་ནང་མོ་རང་སྲིད་འཛིན་འོས་མིར་ལངས་ཆོག་གི་མེད་ཀྱང་། མོ་རང་ ༢༠༡༥ ལོའི་འབར་མའི་སྲིད་འཛིན་འོས་མིར་ལངས་འདོད་ཡོད་ཅེས་བསྒྲགས་ཡོད་པ་མ་ཟད། གལ་སྲིད་མོ་རང་སྲིད་འཛིན་དུ་འདུག་འདོད་མེད་ཁུལ་བྱས་པ་ཡིན་ན། དེ་ནི་སོ་སོས་དྲང་པོ་མ་བྱས་པ་ཞིག་ཡིན་སྐོར་བརྗོད་འདུག
འབར་མའི་རྩ་ཁྲིམས་ནང་། འབར་མའི་མི་རིགས་སུ་ཞིག་གི་བཟའ་ཟླ་འམ་བུ་ཕྲུག་ཕྱི་མི་ཡིན་ཚེ་གཞུང་གི་གནས་བབ་མཐོ་ཤོས་ཀྱི་གོ་གནས་ཐོག་ཡོང་ཆོག་གི་མེད་པ་གསལ་ཡོད་འདུག ད་ལྟའི་ཆར་འབར་མའི་གྲོས་ཚོགས་ཀྱི་རྐུབ་སྟེགས་བརྒྱ་ཆ་ ༢༥% དམག་གིས་བཟུང་ཡོད་པ་དང་། ད་སྔའི་གཞུང་གི་རྩ་ཁྲིམས་བསྐྱར་བཅོས་དང་ལྕམ་ཨང་སན་སུའུ་ཀེ་འོས་མིར་ལངས་ཆོག་པ་བཟོ་རྒྱུར་ཉུང་མཐར་གྲོས་ཚོགས་འཐུས་མི་བརྒྱ་ཆ་ ༧༥% རྒྱབ་སྐྱོར་དགོས་པ་མ་ཟད། དེའི་སྟེང་མི་མང་གི་བསམ་ཤོག་བསྡུས་ཏེ་བརྒྱ་ཆ་ ༥༠% རྒྱབ་སྐྱོར་ཐོག་དགོས་ཀྱི་ཡོད་འདུག
དེའི་ཐད་ལྕམ་ཨང་སན་སུའུ་ཀེ་ཡིས། “རྩ་ཁྲིམས་བསྐྱར་བཅོས་འདི་དཀའ་ངལ་ཆེ་ཤོས་རེད། གྲོས་ཚོགས་འཐུས་མི་བརྒྱ་ཆ་ ༢༥% དམག་དོན་ལྷན་ཁང་གིས་ཐད་བསྐོས་བྱས་ཡོད་སྟབས། ང་ཚོ་མི་མང་གི་རྐུབ་སྟེགས་གཅིག་ཀྱང་མ་ལྷག་པར་འཐུས་མི་བསླེབས་ཐུབ་པར་བྱ་དགོས་པ་དང་། ཚང་མས་རྩ་ཁྲིམས་བསྐྱར་བཅོས་རྒྱབ་སྐྱོར་བྱས་ཏེ་ཉུང་མཐར་བློ་སྟོབས་ལྡན་པའི་དམག་མི་ (ཐད་བསྐོས་འཐུས་མི་) གཅིག་གིས་དེར་རྒྱབ་སྐྱོར་བྱེད་དགོས་སྟབས། རྩ་ཁྲིམས་བསྐྱར་བཅོས་འདི་ཧ་ཅང་དཀའ་ལས་ཁག་པོ་ཞིག་ཆགས་ཡོད་ཀྱང་། ཡོང་མི་སྲིད་པ་ཞིག་མ་རེད། ལོ་ ༣ ཐུང་ཐུང་མ་རེད། ང་ཚོས་རྩ་ཁྲིམས་བསྐྱར་བཅོས་ཐད་མི་མང་གི་ཡིད་ཆེས་བརླག་འཇུག་འདོད་མེད ” ཅེས་བརྗོད་འདུག
ད་ལྟའི་ཆར་ཕྱི་ནང་གི་རྒྱུ་རྐྱེན་དང་ལྷག་པར་དུ་རྒྱལ་སྤྱིའི་གནོན་ཤུགས་འོག འདས་པའི་ལོ་གཉིས་ལྷག་གི་རིང་འབར་མའི་ནང་ལྕམ་ཨང་སན་སུའུ་ཀེ་གཙོས་པའི་ཆབ་སྲིད་བཙོན་པ་རྣམས་ཀློད་གྲོལ་དང་། དམངས་གཙོ་ཚོགས་པ་སོགས་ལ་གཞུང་གི་ངོས་འཛིན་ཆོག་མཆན་གནང་བ། ཨང་སན་སུའུ་ཀེ་གྲོས་ཚོགས་འཐུས་མིར་འོས་འདེམས་དང་ཕྱི་རྒྱལ་ཁག་ཏུ་ཕྱོགས་སྐྱོད་བྱེད་བཅུག་པ་སོགས་འབར་མའི་ཆབ་སྲིད་བཅོས་བསྒྱུར་ཕྱོགས་གང་ཐད་ནས་འཕེལ་རྒྱུས་སུ་འགྲོ་བཞིན་ཡོད་འདུག
གསར་འགོད་པ། བནྡེ་སྐྱབས།
