རྒྱ་ནག་གི་མཁར་སྐྱོད་གྲུ་གཟིངས།

དེ་རིང་ཕྱི་དྲོར་རྒྱ་ནག་གིས་མིས་བཟོས་མཁའ་སྐྱོད་ “རྒྱང་འཕུར་མེ་ཤུགས་འཕུར་མདའ་ཨེ་ཧྥི་གཉིས་ (2F) ” རྟགས་ཅན་མཁའ་དབྱིངས་སུ་གཏོང་རྒྱུ་རེད།

དེ་རིང་ཕྱི་ཚེས་ ༡༡ ཉིན་གྱི་ཕྱི་དྲོའི་པེ་ཅིན་གྱི་ཆུ་ཚོད་ ༥།༣༨ སྟེང་། རྒྱ་ནག་གི་དབང་སྒྱུར་འོག་ཡོད་པའི་ནང་སོག་ཏུ་ཡོད་པའི་ཇེའུ་ཁུན་ (Jiuquan) རྟེན་གཞི་ནས་རྒྱ་ནག་གིས་མིས་བཟོས་མཁའ་སྐྱོད་ཐེངས་ལྔ་བ་ “རྒྱང་འཕུར་མིས་བཟོས་འཁོར་སྐར་ཨེ་ཧྥི་གཉིས་ (2F) ” རྟགས་ཅན་མཁའ་དབྱིངས་སུ་བཏང་ཡོད་པ་དང་། ཨེ་ཧྥི་གཉིས་རྟགས་ཅན་གྱི་མཁའ་སྐྱོད་མེ་ཤུགས་འཕུར་མདའ་དེར་ལྷ་སྐྱོད་གྲུ་གཟིངས་བཅུ་བ་ (Shenzhou-10) ཞེས་བཏགས་ཡོད་འདུག

ཨེ་ཧྥི་གཉིས་རྟགས་ཅན་གྱི་ལྷ་སྐྱོད་གྲུ་གཟིངས་བཅུ་བ་ཞེས་པའི་ནང་རྒྱ་ནག་གི་མཁའ་སྐྱོད་པ་ནའེ་ཧ་ཤེང་ (Nie Haisheng) ཟེར་བའི་སྣེ་ཁྲིད་འོག ཤང་ཞཱེའོ་གྷུང་ (Zhang Xiaoguang)  དང་། བུད་མེད་ཝང་ཡ་ཕེན་ (Wang Yaping) གསུམ་འཕུར་སྐྱོད་བྱས་ཡོད་པ་དང་། ཝང་ཡ་ཕེན་ནི་རྒྱ་ནག་གི་མཁའ་སྐྱོད་བུད་མེད་ཐེངས་གཉིས་པ་དེ་ཆགས་ཡོད་འདུག

ཐེངས་འདིའི་ཨེ་ཧྥེ་གཉིས་རྟགས་ཅན་གྱི་མཁའ་སྐྱོད་མེ་ཤུགས་འཕུར་མདའ་འདི་རྒྱ་ནག་གི་མཁའ་ལམ་བརྟག་དཔྱད་འབབ་ཚུགས་ལྷའི་ཁང་བཟང་ (Tiangong-1) ཞེས་པ་ནས་འབབ་རྒྱུ་ཡིན་པ་དང་། སའི་གོ་ལའི་འཁོར་ལམ་ (Orbit) ནང་ཉིན་ ༡༥ སྡོད་འཆར་ཡོད་འདུག་ལ། ཐེངས་འདིའི་མཁའ་སྐྱོད་དེའི་དམིགས་འབེན་ནི་རྒྱ་ནག་གི་མཁའ་ལམ་འབབ་ཚུགས་འཐུས་སྒོ་ཇེ་ཚང་དུ་གཏོང་ཆེད་ཡིན་སྐོར་བརྗོད་འདུག

རྒྱ་ནག་གིས་མིས་བཟོས་མཁའ་སྐྱོད་ཐོག་མ་ ༢༠༠༣ ལོར་མཁའ་དབྱིངས་སུ་བཏང་ཡོད་པ་དང་། འདས་པའི་ལོ་བཅུ་ཕྲག་གཅིག་ཙམ་གྱི་རིང་མཁའ་སྐྱོད་མེ་ཤུགས་འཕུར་མདའི་ལས་གཞིར་ཡར་རྒྱས་དང་ནུས་ཤུགས་བཏོན་ཡོད་ཀྱང་། ཨ་རི་དང་རཱ་ཤཱི་ཡ་སོགས་དང་བསྡུར་ན་ད་དུང་ཧེ་བག་ཆེན་པོ་ཤོར་ཡོད་འདུག རྒྱ་ནག་གིས་ ༢༠༢༠ ལོའི་བར་ཟླ་བའི་སྟེང་འགྲོ་ཐུབ་པ་དང་སའི་གོ་ལའི་འཁོར་ལམ་དུ་མཁའ་སྐྱོད་འབབ་ཚུགས་རྒྱག་རྒྱུ་བཅས་ཀྱི་ཕུགས་བསམ་བཟུང་ཡོད་འདུག

དཔྱད་བརྗོད་པ་དག་གིས་རྒྱ་ནག་གིས་མཁའ་སྐྱོད་མེ་ཤུགས་འཕུར་མདའི་ལས་གཞིའི་ཐད་ཨ་སྒོར་ཐེར་འབུམ་མང་པོའི་འགྲོ་གྲོན་གཏོང་གི་ཡོད་པ་ནི། རྒྱ་ནག་གིས་རང་ཉིད་རྒྱལ་སྤྱིའི་སྤྱི་ཚོགས་ཁྲོད་སྣང་བརྙན་སྐྲུན་ཐབས་དང་། འཕྲུལ་རིག་ཡར་ཐོན། དེ་སྔའི་དབུལ་ཕོངས་ཀྱི་མི་རིགས་དེ་ཉིད་དམར་པོའི་སྲིད་གཞུང་གིས་འཕེལ་རྒྱས་སུ་བཏང་ཡོད་པའི་གྲུབ་འབྲས་སོགས་སྟོན་ཕྱིར་ཡིན་པར་གླེང་།