ཉིན་འདི་གར་ཆར་ཞོད་ཀྱི་དབང་གིས་རྒྱ་གར་རྒྱལ་ས་ལྡི་ལིའི་བོད་སྒར་བསམ་ཡས་གླིང་དང་ལ་དྭགས་ངྷ་རམ་ས་ལ་གཉིས་སུ། བོད་མི་ཚོའི་སྡོད་ཁང་དང་མགྲོན་ཁང་བཅས་སུ་ཆུ་ལུད་དེ་དཀའ་ངལ་ཤུགས་ཆེན་འཕྲད་དེ་མི་མང་པོ་ཞིག་གནས་སྤོར་དང་ཅ་དངོས་ཕྱི་ལོགས་སུ་འདོན་བཞིན་ཡོད་འདུག
ཉིན་འདི་འགར་རྒྱ་གར་བྱང་ཤར་གྱི་མངའ་སྡེ་མང་པོ་ཞིག་ཏུ་ཆར་ཞོད་ཆེན་པོ་བབས་ཏེ། གཙང་ཆུ་རྒྱས་པ་དང་རི་ཉིལ་བ། ལམ་དང་ཟམ་ཆད་པ་སོགས་ཀྱི་གནས་ཚུལ་མང་པོ་འབྱུང་བཞིན་ཡོད་པ་དང་། རྒྱ་གར་རྒྱལ་ས་ལྡི་ལི་གྲོང་ཁྱེར་གྱི་ས་ཁུལ་མང་པོར་ཆུ་ལུད་དེ་དཀའ་ངལ་ཤུགས་ཆེན་འཕྲད་བཞིན་ཡོད་ཅིང་། ལྡི་ལི་བོད་སྒར་བསམ་ཡས་གླིང་དང་ལ་དྭགས་ངྷ་རམ་ས་ལ་བཅས་ཀྱི་བོད་མི་ཚོའི་སྡོད་ཁང་དང་ཁྲོམ་རྭ་སྲིང་ལམ་བཅས་ལ་ཆུ་ལུད་དེ་དཀའ་ངལ་ཆེན་པོ་འཕྲད་བཞིན་ཡོད་འདུག བོད་སྒར་བསམ་ཡས་གླིང་རྒྱབ་ལོགས་ཀྱི་ཡ་མུ་ནཱ་གཙང་པོ་ཤུགས་ཆེན་པོ་རྒྱས་ཏེ། ཆུ་འགྲམ་ཁུལ་གྱི་བོད་པ་དང་རྒྱ་གར་བའི་སྡོད་ཁང་ཕལ་ཆེ་བའི་ནང་ཆུས་ཁེངས་ཡོད་པ་མ་ཟད། བསམ་ཡས་གླིང་སྲིང་བར་གྱི་ས་སྐྱ་མགྲོན་ཁང་དང་རྙིང་མ་མགྲོན་ཁང་། ཞི་བདེ་མགྲོན་ཁང་གསར་པ། ཏཱ་ར་མགྲོན་ཁང་། ཨ་མ་ཟ་ཁང་བཅས་ཀྱི་ནང་ཆུ་ལུད་དེ་མི་མང་གནས་སྤོ་བྱེད་དགོས་བྱུང་ཡོད་པ་མ་ཟད། ཁང་པ་ཐོག་བརྩེགས་དག་གི་འོག་ཤོད་ཀྱི་ཅ་དངོས་འོར་འདྲེན་བྱེད་བཞིན་ཡོད་འདུག
འདི་གའི་གསར་འགོད་པས་ཁ་པར་བརྒྱུད་ལྡི་ལི་བསམ་ཡས་གླིང་ས་གནས་གཞིས་མགོ་ལེགས་སྐྱེས་རྡོ་རྗེ་ལགས་སུ་བཅར་འདྲི་ཞུས་པ་ལྟར་ན། རྒྱ་གར་རྒྱལ་ས་ལྡི་ལི་ཁུལ་དུ་བདུན་ཕྲག་གཅིག་ཙམ་གོང་ནས་ཆར་ཞོད་མགོ་བཙུགས་ཡོད་པ་དང་། ལྷག་པར་དུ་ཁ་སང་ཕྱི་ཚེས་ ༡༩ ཉིན་གྱི་ཞོགས་པར་ཙམ་ལ་ཡ་མུ་ན་གཙང་པོ་ཤུགས་ཆེན་རྒྱས་ཏེ། གཙང་འགྲམ་གྱི་མི་སྒེར་གྱི་སྡོད་ཁང་ཚང་མའི་ནང་ཆུ་ལུད་ཡོད་པ་མ་ཟད། ཚུར་ཕྱོགས་ཀྱི་མགྲོན་ཁང་མང་པོ་ཞིག་གི་འོད་ཤོད་ནང་ཆུ་ལུད་དེ་མི་རྣམས་གནས་སྤོར་བྱས་ཡོད་ཀྱང་། ཅ་དངོས་འབོར་ཆེན་འཕྲོ་བརླག་ཏུ་ཕྱིན་ཡོད་འདུག ཁོང་གིས་བརྗོད་དོན་ལྟར་ན། བསམ་ཡས་གླིང་དུ་རྒྱུན་ལྡན་མི་ཚང་ ༣༧༢ ཙམ་དང་མི་གྲངས་ ༤༠༠༠ ལྷག་ཡོད་པ་ལས། ད་རེབ་མི་ཚང་ ༢༠༠ ལྷག་ལ་ཆུས་གནོན་འཚེ་ཐེབས་ཡོད་འདུག
ལེགས་སྐྱེས་རྡོ་རྗེ་ལགས་ཀྱིས་མུ་མཐུད་དུ་བརྗོད་པར། ལ་དྭགས་ངྷ་རམ་ཁུལ་དུའང་ཆུ་ལུད་དེ་མི་མང་པོ་གནས་སྤོ་བྱེད་ཀྱིན་ཡོད་པ་དང་། ཁང་པ་ཐོག་བརྩེགས་དག་གི་འོག་ཤོད་ཀྱི་ཅ་དངོས་དག་ཀྱང་འོར་འདྲེན་བྱེད་ཀྱི་ཡོད་འདུག ཁ་སང་ཉིན་གུང་ཙམ་ནས་ས་གནས་མགོ་འཛིན་ལས་ཁུངས་དང་ས་གནས་གཞོན་ནུ། བུད་མེད། བརྒྱ་དཔོན་བཅས་ཚོགས་སྐྱིད་ཚང་མ་མཉམ་རུབ་ཐོག གནས་སྤོར་དང་ཅ་དངོས་ཕྱི་ལོགས་སུ་འདོན་ཐབས་བྱེད་ཀྱི་ཡོད་པ་དང་། ད་ཆར་ཤིང་གྲུ་ཁག་ཅིག་གི་ཐོག་ཅ་དངོས་སྐྱེལ་འདྲེན་བྱེད་བཞིན་ཡོད་འདུག ས་གནས་དེར་ནམ་རྒྱུན་སྐྱབས་བཅོལ་མིང་གཞུང་ནང་ཡོད་མཁན་མི་ཚང་ ༥༠ ལྷག་ཙམ་ཡོད་པ་དང་། མིང་གཞུང་ནང་མེད་མཁན་དང་ཚོང་ར་གཉེར་སྡོད་མཁན། རྒྱ་གར་བ་བཅས་མི་ཚང་ ༢༠༠ ལྷག་དང་མི་གྲངས་ ༡༥༠༠ ལྷག་ཡོད་འདུག
བསམ་ཡས་གླིང་གི་བརྒྱ་དཔོན་སྐར་ལྡན་ཚེ་རིང་ལགས་སུ། ཆུས་དཀའ་ངལ་འཕྲད་རིགས་ཚོར་སྡོད་གནས་ཇི་ལྟར་གྲ་སྒྲིག་བྱེད་ཀྱིན་ཡོད་པ་དང་། ས་གནས་རྒྱ་གར་གཞུང་དང་བོད་གཞུང་གིས་རོགས་སྐྱོར་འབྱོར་ཡོད་མེད་དྲིས་པར་ཁོང་གིས། “ས་གནས་མགོ་འཛིན་ལས་ཁུངས་དང་ཚོགས་པ་ཁག་གིས་སློབ་གྲྭའི་ནང་སྡོད་གནས་གྲ་སྒྲིག་བྱས་འདུག མི་མང་ཆེ་བ་སོ་སོའི་ངོ་ཤེས་གྲོགས་པོ་གཞན་པའི་ནང་གནས་སྤོར་བྱས་ཏེ། སློབ་གྲྭའི་ནང་སྡོད་མཁན་ཉུང་ཉུང་རེད། ས་གནས་རྒྱ་གར་གཞུང་གིས་ཀྱང་བསམ་ཡས་གླིང་མདུན་ཕྱོགས་སུ་གུར་ཕུབ་པ་དང་ཟ་མ་སོགས་གོ་སྒྲིག་བྱེད་ཀྱི་འདུག” ཅེས་བརྗོད་བྱུང་།
གསར་འགོད་པས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལགས་སུ། ལྡི་ལི་བོད་སྒར་དུ་ཆར་ཞོད་ཆུ་ལུད་ཀྱི་གནས་འཚེ་ཐེབས་པ་མཁྱེན་རྟོགས་བྱུང་ཡོད་མེད་དང་། ཡོད་ཚེ་དེ་ལ་རོགས་རམ་སོགས་ཀྱི་འཆར་གཞི་གང་འདྲ་ཡོད་མེད་དྲིས་པར་ཁོང་གིས། “ ཁ་སང་བསམ་ཡས་གླིང་ས་གནས་མགོ་འཛིན་གྱིས་ཨེམ་ཊེ་(MT)དང་ཐཱི་པེ་ཡ་ལ་དྭགས་སྡོད་སྒར་དུ་ཆུའི་དཀའ་ངལ་འབྱུང་བཞིན་ཡོད་སྐོར་སྙན་གསན་ཞུས་སོང་། འོན་ཀྱང་དེ་ཙམ་ཚབ་ཆེན་རང་མི་འདུག་ཅེས་ཞུས་བྱུང་། འོན་ཀྱང་། གསར་ལམ་ཁག་ལ་བལྟས་བསྡད་སྐབས་ལྡི་ལིའི་ནང་གི་ཆར་ཞོད་ཆུ་ལུད་ཀྱི་ཉེན་ཚབས་ཆེ་ཤོས་ས་གནས་ལྔ་དྲུག་ཅིག་བརྗོད་ཀྱི་ཡོད་པའི་ནང་ཨེམ་ཊེ་དང་བྷོ་ཐཱི་པེ་ཡ་གཉིས་ཚུད་འདུག འདི་ནས་གནས་བབ་ལ་བལྟས་ཏེ་དུས་ནས་དུས་སུ་སྙན་གསན་ཞུས་ཤོག གནས་ཚབས་ཆེན་པོ་བྱུང་ཚེ་རྒྱ་གར་གཞུང་ལའང་འབྲེལ་བ་ཞུས་ཏེ། རོགས་སྐྱོར་དང་སྐྱོབ་གསོ་ཞུ་ཐབས་བྱ་དགོས་པ་སོགས་མངག་བྱ་བྱས་ཡོད” ཅེས་བརྗོད་བྱུང་།
ཡང་ཁོང་ལ་རྒྱ་གར་ནང་གི་བོད་མིའི་སྡོད་སྒར་གཞན་དག་ལ་ཉིན་འདི་འགར་ཆར་ཞོད་ཆུ་ལུད་སོགས་ཀྱི་དཀའ་ངལ་རིགས་བྱུང་ཡོད་མེད་དྲིས་པར། ཁོང་གིས། བྱང་ཕྱོགས་ཁུལ་གྱི་ཉེན་ཚབས་ཆེ་ཤོས་ཨུ་ཊར་ཁཱན་མངའ་སྡེ་ཆགས་ཡོད་ཀྱང་། བོད་མིའི་འདུས་སྡོད་ཁག་ཆར་ཞོད་དང་ཆུ་ལོག་གི་གནོན་འཚེ་ཐེབས་ཡུལ་ཁག་ཏུ་མེད་སྟབས། ད་སྔ་དཀའ་ངལ་འཕྲད་ཀྱི་ཡོད་པའི་གནས་ཚུལ་གང་ཡང་འབྱོར་མ་སོང་། ནང་སྲིད་ལས་ཁུངས་ཀྱིས་ས་གནས་ཁག་ལ་གནོད་འཚེ་བྱུང་མིན་ལ་མ་བལྟས་པར་སྤྱང་གྲུང་དོད་པོ་བྱ་དགོས་པའི་མངག་སྡོམ་བྱས་ཡོད” ཅེས་བརྗོད་བྱུང་།
དེང་སྐབས་རྒྱ་གར་བྱང་ཕྱོགས་ཁུལ་དུ་ཆར་དུས་མགོ་ཚུགས་ཡོད་པ་ལྟར། ཨུ་ཊར་ཁཱན་མངའ་སྡེ་དང་ཧི་མ་ཅལ། ཧཱ་རེ་ཡ་ནཱ། ལྡི་ལི་བཅས་སུ་ཆར་ཞོད་ཆེན་པོ་བབས་ཏེ། གཙང་པོ་རྒྱས་པ་དང་ཆུ་ལུད་པ། རི་ཉིལ་བ། ལམ་ཁ་དང་ཟམ་པ་ཆད། ཁང་པ་བརྡིབས་པ་སོགས་ཀྱིས་ད་སྔ་མི་ ༡༥༠ ཙམ་རྐྱེན་ལམ་དུ་ཤོར་ཡོད་པ་ལས། ཨུ་ཊར་ཁཱན་གཅིག་པུའི་ནང་མི་ ༡༠༢ ཙམ་རྐྱེན་ལམ་དུ་ཕྱིན་ཡོད་འདུག
གསར་འགོད་པ། བནྡེ་སྐྱབས།
![A large crowd walks in a market area outside Dadar station in Mumbai, India, Friday, March 17, 2023. [AP Photo/Rajanish Kakade]](https://tibettimes.net/wp-content/uploads/2026/04/Screen-Shot-2026-04-02-at-5.36.58-PM-360x180.png)
་་་་་ ཁོང་གིས་བརྗོད་དོན་ལྟར་ན། བསམ་ཡས་གླིང་དུ་རྒྱུན་ལྡན་མི་ཚང་ ༣༧༢ ཙམ་དང་མི་གྲངས་ ༤༠༠༠ ལྷག་ཡོད་པ་ལས། ད་རེབ་མི་ཚང་ ༢༠༠ ལྷག་ལ་ཆུས་གནོན་འཚེ་ཐེབས་ཡོད་འདུག ་་་ཅེས་དང་།
་་་་་་་ ལྡི་ལི་བཅས་སུ་ཆར་ཞོད་ཆེན་པོ་བབས་ཏེ། གཙང་པོ་རྒྱས་པ་དང་ཆུ་ལུད་པ། རི་ཉིལ་བ། ལམ་ཁ་དང་ཟམ་པ་ཆད། ཁང་པ་བརྡིབས་པ་སོགས་ཀྱིས་ད་སྔ་མི་ ༡༥༠ ཙམ་རྐྱེན་ལམ་དུ་ཤོར་ཡོད་པ་ལས། ཨུ་ཊར་ཁཱན་གཅིག་པུའི་ནང་མི་ ༡༠༢ ཙམ་རྐྱེན་ལམ་དུ་ཕྱིན་ཡོད་འདུག ་་་་་་ཟེར།
ཆུ་འདི་ཚོ་གད་ཉིག་ཀྱང་རེད་ད་པགས་ནད་མེད་པ་དང་འགོ་ནད་མེད་པ་ཤོག།།།
འཕྲོད་རྟེན་ལས་ཁུངས་ལགས་ད་དོ་སྣང་གནང་རོགས་ད་ཆུ་མྱལ་ལ་ཤོར་ཤག།།།
ཨ་ཁ་ཀ་་་་།།།
ལས་ཀྱི་རྣམ་པ་སྨིནཔ་་ནི་ཨོའོ་བསམ་མི་ཁྱབ།།
བརྩེ་བས་བདག་ཉིད་ཅན་ཨོའོ་དུད་འགྲོར་སྐྱེས་ཤག།།
དཀོན་མཆོག་མཆོད་དོ།།།
གནས་ཚུལ་དུས་ཐོག་ཏུ་སྤེལ་བར་ཐུགས་རྗེ་ཆེ། བོད་ཀྱི་དུས་བབ་ཀྱི་གསར་འགྱུར་འགོད་སྟངས་འདི་རྒྱ་གར་གྱི་གསར་འགྱུར་བརྒྱུད་ལམ་ཆེ་ཁག་གི་འགྲོ་སྟངས་ཀྱི་རྗེས་ཟིན་གྱི་འདུག གོང་གི་པར་གྱི་ནང་དུ་བལྟས་པ་ཡིན་ན་ཆུ་ཁོང་པའི་སྒོའི་ཕྱེད་ཀ་བར་བསླེབས་འདུག གོ་ཐོས་ལྟར་ན་ཁ་སང་དང་དེ་རིང་བསམ་ཡས་གླིང་དུ་ཆུ་སྔར་ལས་ཤུགས་ཆེན་པོ་རྒྱས་ཡོད་ས་རེད། མ་འོངས་པར་རྒྱ་གར་གཞུང་དང་བོད་གཞུང་ལ་ཞུས་ཏེ་ཆུ་མ་ཡོང་གོང་གི་རག་དང་དགྲ་མ་ཡོང་གོང་གི་མཚན་གྲ་སྒྲིག་ཅིག་བྱེད་དགོས་ཀྱི་འདུག སྔོན་མ་ནས་བསམ་ཡས་གླིང་དང་ལ་དྭགས་རྡ་རམ་ས་ལ་གཉིས་ཀྱི་རྙོག་དྲའི་ཐོག་སྤྱི་འཐུས་ཚོགས་གཞོན་རྒྱ་རི་སྒྲོལ་མས་ཕྱག་ལས་མང་པོ་གནང་ཡོད་པ་རེད། ད་ནང་སྲིད་བཀའ་བློན་ཡིན་དུས་ཐད་ཀར་འབྲེལ་བ་ཆགས་ཡོད་པ་རེད། ནུས་པ་ཡོད་ན་འདོན་ཚད་ལ་སླེབས་ཡོད་པ་རེད།