ཧོང་ཀོང་དུ་རྟེན་གཞི་བྱས་པའི་རྒྱ་གཞུང་འབྲེལ་མཐུད་ལས་ཁུངས་ཀྱི་མགོ་ཁྲིད་ཀྲང་ཞོལ་མིན་ ( Zhang Xiaoming)་གྱིས་གཙོ་སྐྱོང་འོག མི་འགྱངས་པར་ཧོང་ཀོང་གྲོས་ཚོགས་ནང་གི་དམངས་གཙོར་རྒྱབ་སྐྱོར་བྱེད་མཁན་འཐུས་མི་ཚོ་དང་རྒྱ་ནག་དམར་ཤོག་ཚོགས་པའི་མཐོ་རིམ་སྐུ་ཚབ་ཁག་ཅིག་བར། ཧོང་ཀོང་གི་གྲོས་ཚོགས་ནང་གང་མགྱོགས་ཐུག་འཕྲད་བྱེད་རྒྱུ་ཡིན་འདུག
དུས་ཚེས་ནམ་ཞིག་ལ་ཐུག་འཕྲད་བྱ་འཆར་ཡོད་མེད་དང་གྲོས་གཞི་གང་དག་ཡིན་མི་གསལ་ཁ་མེད་ཀྱང་། དེ་ནི་ཧོང་ཀོང་རྒྱ་ནག་གི་དམིགས་བསལ་སྲིད་འཛིན་ས་ཁུལ་ཆགས་རྗེས་ཀྱི་ལོ་ངོ་ ༡༦ རིང་གི་ཐེངས་དང་པོ་དེ་ཆགས་ཡོད་པ་རེད།
དེ་རིང་གསར་ལམ་ཁག་ཏུ་གནས་ཚུལ་ཐོན་པར། ཧོང་ཀོང་གྲོས་ཚོགས་ནང་གི་དམངས་གཙོར་རྒྱབ་སྐྱོར་བྱེད་མཁན་འཐུས་མི་ཚོས་རྒྱ་གཞུང་གི་མཐོ་རིམ་སྐུ་ཚབ་ལ། ཧོང་ཀོང་ནང་གི་རང་དབང་དང་དམངས་གཙོ། གནམ་བདེ་སྒོ་མོ་ཆེའི་དམར་གསོད་དོན་རྐྱེན་སྐོར་སོགས་གླེང་སློང་བྱ་རྒྱུ་ཡིན་སྐོར་བཀོད་འདུག རྒྱ་ནག་གཞུང་གིས་དེ་སྔོན་ནས་ཧོང་ཀོང་གི་དམངས་གཙོ་དོན་གཉེར་བ་ཚོ་རྒྱ་ནག་ནང་ཡོང་མི་ཆོག་པ་བཟོས་ཡོད་འདུག
ཕྱི་ཟླ་ ༧ པའི་ཚེས་ ༡ ཉིན་ནི་དབྱིན་ཇི་གཞུང་གིས་ཧོང་ཀོང་རྒྱ་ནག་ལ་རྩིས་སྤྲོད་བྱས་ཏེ་ལོ་ངོ་ ༡༦ འཁོར་བའི་དུས་ཆེན་སྲུང་གཙིའི་སྐབས། ཧོང་ཀོང་གི་མི་མང་ཁྲི་གཉིས་ལྷག་གིས་ཧོང་ཀོང་དམིགས་བསལ་ས་ཁུལ་གྱི་མགོ་གཙོ་ལེང་ཆོན་ཡེན་(Leung Chun Ying) ངེས་པར་དགོངས་པ་ཞུ་དགོས་པ་དང་། ༢༠༡༧ ལོར་ཧོང་ཀོང་མི་མང་གིས་ཧོང་ཀོང་གི་མགོ་གཙོ་དང་གྲོས་ཚོགས་འཐུས་མི་འོས་འདེམས་བྱེད་ཆོག་པའི་རང་དབང་སྤྲོད་དགོས་པའི་སྐད་འབོད་ཤུགས་ཆེན་བྱས་ཡོད་པ་རེད། ལེང་ཆོན་ཡེན་ནི་ཧོང་ཀོང་མཐོ་རིམ་མི་སྣ་ ༡༢༠༠ ཙམ་གྱིས་འོས་འདེམས་བསྐོ་བཞག་བྱས་པ་ཞིག་ཡིན་པ་དང་། ཁོ་རང་འོས་འདེམས་བྱེད་མཁན་ནི་རྒྱ་གཞུང་ལ་དགའ་ཞེན་ཡོད་མཁན་དག་ཡིན་སྟབས། ཧོང་ཀོང་མི་མང་གིས་ཁོ་ལ་དགའ་མོས་མི་བྱེད་སྟབས། ‘མི་མང་མི་དགའ་བའི་མགོ་ཁྲིད’ ཅེས་འབོད་ཀྱིན་ཡོད།
རྒྱ་ནག་གཞུང་གིས་ཐེངས་རྗེས་མའི་ཧོང་ཀོང་གི་མགོ་གཙོ་མང་གཙོའི་འོས་བསྡུས་ཐོབ་ཐང་གི་གནས་བབ་ཐོག་འོས་འདེམས་བྱ་རྒྱུ་བརྗོད་ཀྱང་ཧོང་ཀོང་གི་མི་མང་མང་པོས་པེ་ཅིན་གྱིས་ལྐོག་གཡོ་ངན་ཇུས་འཐེན་ཏེ་རྒྱ་གཞུང་ལ་དགའ་ཞེན་ཆེ་བའི་མགོ་གཙོ་ཞིག་འདེམས་སྒྲིག་བྱེད་རྒྱུ་ཡིན་པར་དོགས་པ་ཟ་ཡིན་འདུག
ཁ་སང་ཕྱི་ཚེས་ ༡༥ ཉིན་དབྱིན་ཇིའི་ཕྱི་སྲིད་དྲུང་ཆེ་ཧེད་གྷེ་( William Hague) ཡིས་ “ ཧོང་ཀོང་གི་སྤྱི་ཚོགས་བདེ་འཇགས་དང་ཡར་རྒྱས་མངོན་འདོད་ཆེད་མི་མང་ལ་འོས་བསྡུའི་ཐོབ་ཐང་སྤྲོད་དགོས་པ་དང་། ཁོ་ཚོས་ཧོང་ཀོང་གི་གཞི་རྩའི་རྩ་ཁྲིམས་ག་འདྲ་ཞིག་བཟོ་མིན་ཐག་གཅོད་བྱེད་ཐུབ་རྒྱུར། ང་རང་ཧོང་ཀོང་གི་གྲོས་ཚོགས་ལ་ཡིད་ཆེས་ཡོད་” ཅེས་བརྗོད་པ་རེད་འདུག
ཉེ་ཆར་ཧོང་ཀོང་གཙུག་ལག་མཐོ་སློབ་ཀྱིས་མི་མང་ལ་བསམ་ཤོག་ཅིག་བསྡུས་ཡོད་པའི་ཁྲོད། ཧོང་ཀོང་མི་མང་བརྒྱ་ཆ་ ༤༥།༤ ཡིས་རྒྱ་ནག་གཞུང་ལ་ཡིད་ཆེས་མེད་པའི་རྣམ་འགྱུར་བསྡད་ཡོད་དང་། དེ་ནི་སྔོན་མ་ཧོང་ཀོང་རྒྱ་ནག་ལ་རྩིས་སྤྲོད་སྐབས་ཀྱི་བསམ་ཤོག་གྲངས་ཚད་ལས་བརྒལ་ཡོད་པ་རེད།
ཧོང་ཀོང་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་གཞི་རྩའི་སྒྲོམ་གཞིའི་འོག་ནས་རྒྱལ་ཁབ་གཅིག་ལ་ལམ་ལུགས་གཉིས་ལག་བསྟར་བྱེད་ཀྱིན་པའི་དམིགས་བསལ་ཚད་མཐོའི་རང་སྐྱོང་ས་ཁུལ་ཞིག་ཡིན་པ་དང་། མ་འོངས་པར་ཧོང་ཀོང་རང་བཙན་གཙང་མ་བྱེད་རྒྱུ་ཡིན་ནམ། རྒྱ་ནག་གི་མངའ་འོག་ཏུ་འགྲོ་རྒྱུ་ཡིན། གདམ་ག་དེ་ནི་ ༢༠༥༠ ལོའི་ཟླ་ ༧ ཚེས་ ༡ གི་རྗེས་སུ་ཐག་གཅོད་དགོས་པ་ཞིག་ཆགས་ཡོད་འདུག
