མན་ཌེ་ལ་དགུང་ལོ་༩༥ ཕེབས་པའི་འཁྲུངས་སྐར།

དེ་རིང་ནི་ལྷོ་ཨ་ཧྥི་རི་ཀའི་སྲིད་འཛིན་ཟུར་པ་ནེལ་སིན་མན་ཌེ་ལཱ་མཆོག་དགུང་གྲངས་ ༩༥ ལ་ཕེབས་པའི་འཁྲུངས་སྐར་རྟེན་འབྲེལ་མཛད་སྒོ་དེ་སྨན་ཁང་དུ་ཚོགས་ཡོད་འདུག  

དེ་རིང་ཕྱི་ཚེས་ ༡༨ ཉིན་ལྷོ་ཨ་ཧྥི་རི་ཀའི་སྲིད་འཛིན་ཟུར་ནེལ་སིན་མན་ཌེ་ལཱ་མཆོག་དགུང་གྲངས་ ༩༥ ལ་ཕེབས་པའི་སྐུའི་འཁྲུངས་སྐར་དུས་ཆེན་ཡིན་པ་དང་། ཉེ་སྔོན་ཞིག་ནས་ཁོང་གི་གློ་ཚད་ནད་གཞི་ཇེ་སྡུག་ཏུ་ཕྱིན་ཏེ་སྨན་ཁང་དུ་བཞུགས་ཡོད་སྟབས། འཁྲུངས་སྐར་མཛད་སྒོ་དེ་ཕེར་ཌོབ་རཱེ་(Pretoria)སྨན་ཁང་དུ་གཏོང་དགོས་བྱུང་ཡོད་པ་དང་། ཁ་སང་ནས་བཟུང་ལྷོ་ཨ་ཧྥི་རི་ཀའི་མི་མང་གིས་སྨན་ཁང་དེའི་སྒོ་རྭའི་ནང་དང་། རྩིག་ངོས་སོགས་སུ་སྐྱེས་ཆེན་ཁོང་གི་འཁྲུངས་སྐར་ལ་རྟེན་འབྲེལ་ཞུ་བའི་ཤིས་ཚིག་སྣ་ཚོགས་དང་མེ་ཏོག་སོགས་གང་སར་བཞག་ཡོད་པ་མ་ཟད། ཁོང་གི་ན་ཚ་དྲག་སྐྱེད་བྱུང་སྟེ་གང་མགྱོགས་ཁྱིམ་དུ་ལོག་ཐུབ་པར་སྨོན་འདུན་ཞུ་བཞིན་ཡོད་འདུག

ནེལ་སིན་མན་ཌེ་ལཱ་མཆོག་གིས་ལོ་ངོ་ ༦༧ རིང་མི་རིགས་དཀར་ནག་དབྱེ་འབྱེད་ལ་ཁ་གཏད་དང་རང་དབང་འཐབ་རྩོད་སོགས་ཀྱི་རླབས་ཆེན་མཛད་རྗེས་ཁག་ལ་ཡི་རངས་དང་རྗེས་དྲན་ཆེད། ༢༠༠༩ ལོར་འཛམ་གླིང་མཉམ་འབྲེལ་རྒྱལ་ཚོགས་ཀྱིས་ཕྱི་ཟླ་ ༨ ཚེས་ ༡༨ ཉིན་ནི་རྒྱལ་སྤྱིའི་མན་ཌེ་ལ་ཉིན་མོ་(Mandela International Day)ཞེས་གཏན་འབེབས་བྱས་ཡོད་པ་དང་། ལྷོ་ཨ་ཧྥི་རི་ཀའི་མི་མང་གིས་ཀྱང་མལ་ཁོང་གི་སྐྱེ་སྐར་ཉིན་ལ་མན་ཌེ་ལཱ་ཉིན་མོ་( Mandela Day )ཞེས་སྲུང་གཙི་རྒྱ་ཆེན་པོ་བྱེད་བཞིན་ཡོད་ལ། མན་ཌེ་ལཱ་ཐེབས་རྩ་ཚོགས་པས་ཀྱང་མི་མང་གིས་དང་བླངས་ཐོག་སྐར་མ་ ༦༧ རིང་སྤྱི་ཚོགས་དགེ་རྩའི་ལས་དོན་བསྒྲུབ་དགོས་པའི་འབོད་སྐུལ་ཞུས་འདུག

ད་རེབ་མལ་ཌེ་ལཱ་མཆོག་དགུང་གྲངས་ ༩༥ ལ་ཕེབས་པའི་འཁྲུངས་སྐར་ཉིན་མོར། འཛམ་གླིང་ནང་སྐད་གྲགས་ཆེ་བའི་མི་སྣ་བོད་མིའི་དབུ་ཁྲིད་༧གོང་ས་མཆོག་དང་ཡེ་ཤུ་བླ་ཆེན་ཌེ་སུ་མོན་ཊུའུ་ཊུའུ་( Desmond Tutu)། ཨ་རིའི་སྲིད་འཛིན་ཟུར་བ་ཁུ་ལིན་ཌོན(Bill Clinton)། གློག་བརྙན་འཁྲབ་སྟོན་པ་མོར་གྷན( Morgan Freeman) དབྱིན་ཡུལ་གྱི་ཚོང་པ་རི་ཆར་ཊི( Richard Branson) སོགས་ཀྱིས་བརྙན་པར་བརྒྱུད་དེ། ཁོང་གི་འཁྲུངས་སྐར་ལ་རྟེན་འབྲེལ་ཞུ་བ་དང་། ཁོང་གི་བྱམས་བརྩེའི་རིན་ཐང་དང་ཀུན་ཕན་ལྷག་བསམ་བཅས་ལ་བསྔགས་བརྗོད་གནང་ཡོད་པ་རེད།

ཁ་སང་ཕྱི་ཚེས་ ༡༧ དབྱིན་ཇིའི་བརྙན་འཕྲིན་ལས་ཁང་( Sky TV) ཞེས་པས་ནེལ་སིན་མན་ཌེ་ལཱའི་བཟའ་ཟླ་གཉིས་པའི་བུ་མོ་ཛིན་ཌེ་ཛེ( Zindzi) ལ་བཅར་འདྲི་བྱས་པའི་ལན་དུ། ཁོང་མོས་“  ཁ་སང་སྨན་ཁང་དུ་ཨ་ཕར་ཐུག་འཕྲད་དུ་འགྲོ་སྐབས། ཁོང་གིས་ང་ཚོར་འཛུམ་མདངས་བསྟན་པ་དང་ལག་པ་ཚུར་བརྐྱངས་ཏེ། མིག་ཟུང་ལས་བརྩེ་བ་དང་དགའ་སྣང་བསྟན་སོང་བས། ཁོང་གི་ནད་ཚ་དྲག་སྐྱེད་ཀྱིས་གང་མགྱོགས་རང་ཁྱིམ་དུ་འགྲོ་ཐུབ་པར་ངས་ཡིད་ཆེས་བྱེད་ཀྱིན་ཡོད ”ཅེས་བརྗོད་འདུག

ཕྱི་ཟླ་ ༦ པའི་ཚེས་ ༢༦ ཉིན་གསར་ལམ་ཁག་ཏུ། མན་ཌེ་ལཱ་མཆོག་ལ་དབུགས་གཏོང་ལེན་གྱི་ཡོ་བྱད་དང་སྨན་ཁབ་སོགས་བརྒྱབ་པ་མ་གཏོགས་ཀླད་པ་དང་སྙིང་གི་བྱེད་ལས་ཉམས་ཡོད་ཚུལ་དཀྲོགས་གཏམ་ཞིག་ཁྱབ་ཡོད་ཀྱང་། སྨན་ཁང་དང་ལྷོ་ཨ་ཧྥི་རི་ཀའི་སྲིད་འཛིན་ཇད་ཁོད་ཛོ་མཱ་( Jacob zuma) སོགས་ཀྱིས་མལ་ཌེ་ལཱ་མཆོག་གི་ན་ཚ་ཇེ་སྡུག་ཏུ་ཕྱིན་ཡོད་ཀྱང་ཁོང་དྲན་པ་བརྒྱལ་བ་སོགས་ཀྱི་གནས་ཚུལ་བྱུང་མེད་ལ། ན་ཚའི་གནས་སྟངས་ད་སྔ་རྒྱུན་ལྡན་ཐོག་གནས་ཡོད་སྐོར་བརྗོད་འདུག

ཉེ་སྔོན་མན་ཌེ་ལ་མཆོག་གི་སྐུའི་སྙུང་གཞི་ཇེ་སྡུག་ཏུ་ཕྱིན་ཏེ་སྨན་ཁང་དུ་ཕེབས་དགོས་བྱུང་རྗེས། མན་ཌེ་ལཱའི་ཚ་བོ་མལ་ཊི་ལཱ་(Mandla Mandela) དང་། མལ་ཌི་ལཱའི་བཟའ་ཟླ་དང་པོའི་བུ་མོ་མཱ་ཀཱ་ཛི་ནེ( Makazine Mandela) གཉིས་བར། མལ་ཌེ་ལཱ་མཆོག་སྐུ་གྲོངས་པ་ཡིན་ན་ཁོང་གི་སྐུ་ཕུང་གང་དུ་དུར་སྦས་བྱེད་མིན་ཐོག་རྩོད་རྙོག་ཆེན་པོ་བྱུང་ཡོད་པ་དང་། མཐར་རྩོད་རྙོག་དེ་ཁྲིམས་ཁང་གིས་ཐག་གཅོད་བྱས་པར། མན་ཌེ་ལ་སྐུ་གྲོངས་རྗེས་སྐུ་ཕུང་ཁོང་གི་ཁྱིམ་རྒྱུད་དུར་ས་ཁུ་ནུ(  Qunu) ཞེས་པར་འཇོག་དགོས་པའི་ཐག་གཅོད་བྱས་ཡོད་པ་མ་ཟད། དེ་དང་མཉམ་དུ། ཚ་བོ་མལ་ཊི་ལཱས་ ༢༠༡༡ ལོར་མན་ཌེ་ལཱ་མཆོག་གི་བུ་གཉིས་དང་བུ་མོ་གཅིག་བཅས་ཀྱི་དུར་སྒམ་ཁོ་རང་གི་གཞིས་ཀ་ཨམ་ཝེ་ཛོ་( Mvezo)ཞེས་པར་ཁྱེར་ཏེ་ཕ་གཞིའི་བསྟི་གནས་ཁང་གསར་འཛུགས་བྱ་འཆར་ཡོད་པ་དེ་ཡང་། ཁུ་ནུའི་དུར་ས་རུ་སླར་གནས་སྤོ་བྱེད་དགོས་པའི་བཅད་ཁྲ་བཏང་ཡོད་འདུག 

གཞན། མན་ཌེ་ལཱ་མཆོག་གི་རིགས་རྒྱུད་ཨ་བྷ་ཐེན་བྷོ་(Aba Thembu)ཞེས་པའི་མགོ་ཁྲིད་སུས་བྱེད་དང་། ཁོང་གི་ཁྱིམ་རྒྱུད་ནང་མ་དངུལ་ཨ་སྒོར་དུང་ཕྱུར་ལྷག་གི་ཚོང་ལས་ཡོད་པ་རྣམས་སུ་ལ་བདག་མིན་བཅས་ཀྱི་སྐོར་ལ་རྙོག་དྲ་མུ་མཐུད་ལྷག་ཡོད་འདུག

མན་ཌེ་ལཱ་མཆོག་ཕྱི་ཟླ་ ༦ ཚེས་ ༨ ཉིན་སྨན་ཁང་དུ་བཞུགས་དགོས་བྱུང་རྗེས། ཁོང་གི་མི་ཚེ་ནང་གི་འགྱོད་པ་ཆེ་ཤོས་དེ་ནི་ཁོང་གིས་བུ་ཕྲུག་ཚོར་བྱམས་བརྩེའི་གཟིགས་སྐྱོང་ཡག་པོ་ཞིག་གནང་མ་ཐུབ་པ་དེ་ཡིན་སྐོར་གསར་ལམ་ཁག་ཏུ་གསུངས་ཡོད་འདུག