ཞི་ཡིས་སྟག་འཛིན་རྒྱུར་གྲ་སྒྲིག་བྱེད་སྲིད་པ།

ཧིན་ཧེ་ཡིས་བརྩམས། ལྷ་སྐྱབས་རྒྱལ་གྱིས་བསྒྱུར།

ད་ལོའི་ཕྱི་ཟླ་བརྒྱད་པའི་ཚེས་མགོར་རྒྱ་ནག་དམར་ཤོག་ཚོགས་པའི་མཐོ་རིམ་དཔོན་རིགས་ཚོ་བྱང་ཕྱོགས་པེ་ཏཱ་ཧི་མཚོ་འགྲམ་དུ་སྤྲོ་སེང་ཕེབས་ཡོད་པ་དང་། སྐབས་དེར་ཁོ་ཚོས་དམར་ཤོག་ཚོགས་པའི་ལངས་ཕྱོགས་ཐོག་གལ་ཆེའི་ཐག་གཅོད་ཁག་ཅིག་བྱས་ཡོད། མཚོ་འགྲམ་དེར་ཁོ་ཚོས་གཞུང་འབྲེལ་མ་ཡིན་པའི་ཐོག་ནས་ཕན་ཚུན་བར་གླེང་མོལ་བྱས་པའི་བརྗོད་གཞི་གཙོ་བོ་ཞིག་ནི། དམར་ཤོག་ཚོགས་པར་ཞབས་འདྲེན་ཞུ་མཁན་འཐུས་མི་ཟུར་པ་པའོ་ཞི་ལེ་ཡི་ནག་ཉེས་ཁྲིམས་ཞིབ་བྱེད་པའི་སྐོར་རེད།

གནད་དོན་དེ་ནི་རྒྱ་ནག་གི་མགོ་ཁྲིད་ཚོ་ལ་ཞོག་ཁོག་ཚ་བོ་ཞིག་ཡིན་ལ། དམར་ཤོག་དྲུང་ཆེ་ཞི་ཅིན་ཕིན་གྱིས་ཀྱང་ཧ་ཅང་གཟབ་ནན་དང་དོགས་ཟོན་བྱ་དགོས་པའི་གནས་ཚུལ་ཞིག་ཡིན། གལ་སྲིད། གནད་དོན་དེར་ནོར་འཁྲུལ་ཤོར་བ་ཡིན་ན། མ་འོངས་པར་ཁོ་རང་ལ་ཉེས་འཛུགས་སྐྱོན་བརྗོད་རག་རྒྱུ་ཡིན་པ་དང་། ཐག་གཅོད་ཡག་པོ་བྱུང་ཚེ་རྒྱ་ནག་གི་མགོ་ཁྲིད་ཟུར་བ་ཧུའུ་ཅིན་ཐོ་དང་ཝན་ཅཱ་པོ་གཉིས་ལའང་ཆེས་མཐོང་རག་རྒྱུ་རེད།

འོན་ཀྱང་། དེང་སང་རྒྱ་ནག་ནང་གི་སྤྱི་ཚོགས་འཕེལ་རྒྱས་དེས་ཞི་ཅིན་ཕིན་ལ་ལྐོག་ཟ་རུལ་སུངས་བྱེད་མཁན་དག་འཛིན་བཟུང་བྱེད་པར་འདོད་མོས་ཡོད་པའི་ལམ་སྟོན་དང་རོགས་འདེགས་བྱེད་ཀྱིན་ཡོད་པ་དང་། ད་ལོའི་ཕྱི་ཟླ་ ༧ པའི་ཟླ་མཇུག་ཏུ། ཅིན་ནན་འབྲིང་རིམ་ཁྲིམས་ཁང་གིས་པའོ་ཞི་ལེ་ལ་དབང་ཆ་སྒེར་སྤྱོད་དང་ལྐོག་ཟ་རུལ་སུངས། ལྐོག་རྔན་བླངས་པ་བཅས་ཀྱི་ནག་ཉེས་ཡོད་པ་ཕྱིར་བསྒྲགས་བྱས་པ་ནས་བཟུང་། པའོ་ཞི་ལེ་དང་ལྐོག་ཇུས་ངན་འབྲེལ་བྱེད་མཁན་གཏེ་བོ་ཀྲུའུ་ཡཱོང་ཁང་གི་ལྐོག་ཟའི་གནས་ཚུལ་མང་པོ་ཞིག་ཀྱང་གསར་འགྱུར་བརྒྱུད་ལམ་ནང་ཐོན་ཡོད།

སྔོན་མ་ཀྲུའུ་ཡཱོང་ཁང་གིས་རྒྱ་ནག་བདེ་སྲུང་ལས་ཁུངས་ཀྱི་མགོ་ཁྲིད་ལོ་ ༨ རིང་འཁུར་སྐབས། གསར་འགྱུར་བརྒྱུད་ལམ་ཁག་ཏུ་ལྐོག་ས་རུལ་སུངས་ཀྱི་གནས་ཚུལ་རིམ་བསྟུད་དུ་ཐོན་ཡོད་ཀྱང་། ཁོས་གནད་དོན་དེར་ཁ་ཡ་མ་བྱས་པར་སྣང་མེད་དུ་བཞག་ཡོད་པ་དང་། ཐེངས་འདིར་དམར་ཤོག་ཚོགས་པས་ཀྲུའུ་ཡཱོང་ཁང་མང་ཚོགས་ཀྱི་མཐོང་སྣང་དུ་ཡང་བསྐྱར་ཡོང་བཅུག་སྟེ་པའོ་ཞི་ལེ་ལ་ཁྲིམས་མཐུན་ཐག་གཅོད་བྱེད་པའི་སྟེགས་བུ་བསྐྲུན་པ་རེད་དམ། ཡང་ན་པའོ་ཡི་ཉེས་དོན་ཁྲིམས་ཞིབ་ཀྱི་སྟེགས་བུ་བརྒྱུད་ཀྲུའུ་ལ་སྐྱོན་འཛུགས་བྱེད་རྒྱུར་གྲ་སྒྲིག་བྱེད་ཀྱིན་ཡོད་པ་རེད།

ལྐོག་ཟ་བྱེད་མཁན་ལ་ཉེས་འཛུགས།

ཉེ་ལམ་ནས་བཟུང་གསར་འགྱུར་བརྒྱུད་ལམ་ཁག་གིས་ཀྲུའུ་ཡཱོང་ཁང་གི་ལྐོག་ཟའི་སྐོར་ལ་སྐྱོན་འཛུགས་བྱེད་པར་རྨང་གཞིའི་ལས་ཀ་མང་པོ་ཞིག་གྲ་སྒྲིག་བྱས་དང་བྱེད་བཞིན་ཡོད། ཀྲུའུ་ཡི་བུ་ཀྲུའུ་ཕིན་ནི་ཀྲུའུ་ཚང་གི་ཚོང་ལས་དོ་དམ་བྱེད་མཁན་རེད། ཕྱི་ཟླ་༨ ཚེས་ ༣ ཉིན། ཀོན་ཧྭ་ཉིན་རེ་ཚགས་པར་(Guanghua)ནང་གནས་ཚུལ་བཀོད་པ་ལྟར་ན། བུ་ཀྲུའུ་ཕིན་གྱི་གྲོགས་པོ་ཝེ་ཕིན་ཟེར་བ་ཁོ་པེ་ཅིན་ནས་འབྲོ་རྩིས་བྱེད་སྐབས། པེ་ཅིན་བྱང་ཕྱོགས་མེ་འཁོར་ས་ཚིགས་སུ་ཉེན་རྟོག་པས་འཛིན་བཟུང་བྱས་ཡོད། ཁོ་ནི་ཀྲུའུ་ཕིན་གྱི་གྲོགས་པོ་ཡིན་པ་མ་ཟད། ཀྲུའུ་ཚང་ལ་ཁྲིམས་འགལ་ཐོག་དངུལ་གཏོང་ལེན་བྱེད་མཁན་གཙོ་གྲས་དེ་ཡང་ཡིན།  

བདུན་ཕྲག་སྔོན་མའི་ནང་རེ་འབོད་རླུང་འཕྲིན་ཁང་(Sound of hope)གིས་གནས་ཚུལ་སྤེལ་བ་ལྟར་ན། རྒྱ་ནག་མི་དམངས་བདེ་འཇགས་ལས་ཁུངས་ནང་ཁུལ་དུ་ཀྲུན་ཕིན་སྐོར་གླེང་སློང་བྱེད་སྐབས། དེ་སྔོན་ཀྲུའུ་ཕིན་ཕྱི་རྒྱལ་དུ་བྲོས་བྱོལ་དུ་ཕྱིན་པའི་གནས་ཚུལ་ཞིག་བྱུང་ཡོད་པ་དང་། ཡང་ཟླ་གཉིས་སྔོན་ཀྲུའུ་ཕིན་འཛིན་བཟུང་བྱས་ཟིན་པའི་གནས་ཚུལ་ཞིག་བཅས་ཀྲུའུ་ཕིན་སྐོར་ལ་གནས་ཚུལ་མ་འདྲ་བ་གཉིས་ཐོན་ཡོད།

ཀྲུའུ་དང་པའོ།

ཀྲུའུ་ནི་པའོ་ཞི་ལེ་ཡི་ནང་ཚགས་ཀྱི་བློ་མཐུན་ཞིག་རེད། ༢༠༡༢ ཟླ་ ༡ ཚེས་ ༡༠ ཉིན། པའོ་ཞི་ལེ་ཡི་བློས་ཐུབ་ཁྲུང་ཆིན་གྲོང་ཁྱེར་གྱི་སྤྱི་ཁྱབ་ཉེན་རྟོག་པ་ཝང་ལི་ཇོན་ ( wangLijun) ཁྲིན་ཏུའུ་གྲོང་ཁྱེར་གྱི་ཨ་རིའི་གཞུང་ཚབ་ཡན་ལག་ཁང་དུ་བྲོས་བྱོལ་སྐྱབས་བཅོལ་དུ་འཛུལ་བའི་ཉིན་བཞིའི་རྗེས། ཝ་ཤིན་ཏོན་རང་དབང་སྒྲོན་མེ་དུས་དེབ་(Free Beacon)སྟེང་ཨ་རིའི་གཞུང་འབྲེལ་མི་སྣ་ཞིག་གིས་“ཝང་ལི་ཇོན་ལ་ད་ལྟའི་རྒྱ་ནག་གི་མགོ་ཁྲིད་ཚོའི་བར་དབང་ཆ་འཐབ་རྩོད་སྐོར་གྱི་གནས་ཚུལ་གལ་ཆེན་མང་པོ་ཡོད་པ་དང་། དམར་ཤོག་མཁྲེགས་བཟུང་ཅན་ཀྲུའུ་དང་པའོ་གཉིས་ཀྱིས་ཞི་ཅིན་ཕིན་ལ་དབང་ཆ་རྩིས་སྤྲོད་ལམ་ལྷོངས་མི་འབྱུང་རྒྱུར་འབད་བརྩོན་བྱེད་ཀྱི་ཡོད་པ་རེད”ཅེས་བརྗོད་འདུག

དེའི་རྗེས་ལ། རྒྱལ་ཡོངས་མི་དམངས་འཐུས་མིའི་ཚོགས་ཆེན་སྐབས། ཀྲུའུ་ཡཱོང་ཁང་གིས་རྒྱ་ནག་དབུས་ཆབ་སྲིད་ཅུས་ཀྱི་རྒྱུན་ལས་ལྷན་ཚོགས་སྟེང་། ཁྲུང་ཆིན་གྲོང་ཁྱེར་དམར་ཤོག་ཚོགས་པས་པའོ་ཞི་ལེ་ལ་རྒྱབ་སྐྱོར་གྲོས་བསྡུར་བྱེད་ཀྱི་ཡོད་པའི་རྣམ་འགྱུར་སྟོན་ཐབས་བྱས་ཡོད་ཀྱང་། པའོ་ཞི་ལེ་ཡི་དབང་ཆ་འཐབ་རྩོད་དང་ལྐོག་ཇུས་སོགས་སྤྱི་ཚོགས་ནང་བརྗོད་གཞི་གཙོ་བོ་ཞིག་ཏུ་གྱུར་ཡོད་འདུག ཚོགས་འདུའི་སྐབས་པའོ་ཞི་ལེ་ཡིས་དཀྲོགས་གཏམ་དེར་དག་སྐྱེལ་ར་སྤྲོད་བྱེད་ཆེད། ཁོས་རྩ་འཛུགས་བྱས་པའི་རྒོལ་རྡུང་ལས་འགུལ་དེ་ནག་ཚོགས་རྩ་མེད་གཏོང་ཆེད་ཡིན་པའི་རྣམ་འགྱུར་སྟོན་ཐུབ་བྱས་ཡོད་ཀྱང་། ཁོས་ཕྱི་ཕྱོགས་སུ་ལས་འགུལ་དེ་ནི་ཀྲུའུ་ཡཱོང་ཁང་གིས་མགོ་ཁྲིད་པའི་རྒྱ་ནག་སྲིད་ཁྲིམས་ལས་དོན་ཨུ་ཡོན་ལྷན་ཁང་གི་ལྟ་སྐྱོང་འོག་ལག་བསྟར་བྱེད་བཞིན་ཡོད་སྐོར་བརྗོད་ཡོད།

པའོ་དང་ཀྲུའུ་གཉིས་ཀྱིས་མཉམ་ལས་བྱེད་ཀྱིན་ཡོད་པ་དེ་ཚང་མས་གསལ་བོར་ཤེས་ཀྱི་ཡོད། ཐ་ན།  ཀྲུའུ་ཡིས་དབུས་ཆབ་སྲིད་ཅུས་ཀྱི་རྒྱུན་ལས་གནས་རིམ་ཐོག་པའོ་ཡི་ལངས་ཕྱོགས་ལ་རྒྱབ་སྐྱོར་བྱས་པ་དང་། པའོ་ཡི་གནད་དོན་དེ་ནི་རྒྱ་ནག་དམར་ཤོག་ཚོགས་པའི་ནང་དབང་ཆ་འཐབ་རྩོད་དང་འབྲེལ་བ་ཆགས་སྟབས། ཀྲུའུ་ཡང་རྙོག་དྲ་དེར་རང་བཞིན་གྱིས་ཚུད་ཡོད་སྐོར་གླེང་ཡང་། ཀྲུའུ་ཡིས་གླེང་ཕྱོགས་དེར་མངོན་སུམ་འཛེམས་མེད་ཀྱིས་དགག་པ་རྒྱག་བཞིན་ཡོད།

དབང་ཆ་དང་ཐོབ་ཐང་།

འདས་པའི་ལོ་བཅུ་ཕྲག་འགའ་ནས་ ༢༠༡༢ ལོའི་ཟླ་ ༡༡ པའི་ཏང་གི་ཚོགས་ཆེན་བཅོ་བརྒྱད་པའི་བར་དུ། རྒྱ་ནག་སྲིད་ཁྲིམས་ལས་དོན་ཨུ་ཡོན་ལྷན་ཁང་དབང་ཚད་ཆེན་པོ་ཆགས་ཡོད་པ་དང་། དེ་ནི་ ༡༩༩༩ ལོར་ཅང་ཙེ་མེན་གྱིས་རྩ་རླུང་སྒོམ་སྒྲུབ་ཚོགས་པར་རྒོལ་རྡུང་ལས་འགུལ་སྤེལ་མགོ་བཙུགས་པ་ནས་དབང་ཚད་ཆེ་རུ་ཕྱིན་ཡོད། རྒྱ་ནག་གཞུང་གིས་དུས་རྒྱུན་རྩ་རླུང་སྒོམ་སྒྲུབ་ཚོགས་པར་ཉེས་འཛུགས་བྱེད་པ་ནི་ཆབ་སྲིད་ལས་འགུལ་ཞིག་ཡིན་པ་ལས་རྒྱལ་ཁབ་ཀྱི་རྩ་ཁྲིམས་ལག་ལེན་བསྟར་བའི་གནད་དོན་དང་འབྲེལ་བ་མེད། ཉེས་འཛུགས་ལ་དགོས་པ་ནི་ཁྲིམས་མཐུན་ལམ་ལུགས་ཀྱི་ཕྱི་ལོགས་སུ་དབང་ཆའི་གོ་རིམ་ཞིག་ཡོད་པ་དེས་ཁྲིམས་མཐུན་སྒྲིག་སྲོལ་ལ་ཤུགས་རྐྱེན་སྤྲོད་སྟབས། རྒྱ་ནག་གི་སྲིད་ཁྲིམས་ལས་དོན་ཨུ་ཡོན་ལྷན་ཁང་གིས་ལམ་ཁ་དེ་སྟབས་བདེ་ངང་བེད་སྤྱོད་གཏོང་གི་ཡོད། རྒྱུ་མཚན་དེའི་དབང་གིས་ལོ་གཉིས་རྗེས་སུ། ས་གནས་ཁག་ཏུ་རྒྱ་ནག་སྲིད་ཁྲིམས་ལས་དོན་ཨུ་ཡོན་ལྷན་ཁང་གི་ཡན་ལག་ལས་ཁུངས་ ༦༡༠ ཙམ་གསར་དུ་བཙུགས་ཏེ། རྩ་རླུང་སྒོམ་སྒྲུབ་ཚོགས་པར་ཉེས་འཛུགས་དང་རྒོལ་རྡུང་གཏོང་རྒྱུར་མཐུན་རྐྱེན་སྐྲུན་ཡོད།

རྒྱ་ནག་སྲིད་ཁྲིམས་ལས་དོན་ཨུ་ཡོན་ལྷན་ཁང་གི་མགོ་ཁྲིད་ལ་ཁྲིམས་ཀྱི་དབང་ཚད་འཕར་མ་སྤྲད་པ་དང་། དེའི་མགོ་ཁྲིད་ཐོག་མ་ལུའོ་གྷན་( luoGan)དང་དེ་རྗེས་ཀྲུའུ་ཡཱོང་ཁང་རེད།  ལོ་མང་རིང་ཁོ་གཉིས་ལ་དབང་ཚད་ཆེན་པོ་སྤྲད་ཡོད་འདུག  པེ་ཅིན་རྒྱལ་སྤྱིའི་ཨོལ་རྩལ་འགྲན་ཚོགས་སྐབས་དང་། དེའི་རྗེས་ལ་རྒྱལ་ཁབ་བརྟན་བརླིང་ཞེས་པའི་མིང་ཐོག་ནས་ཁྲིམས་ཀྱི་དབང་ཚད་དེར་བསྐྱར་འགྲེལ་བྱས་ཏེ་ཡར་རྒྱས་བཏང་ཡོད། དེའི་རྩ་བའི་དམིགས་ཡུལ་ནི་ཐོན་ཁུངས་དང་མིའི་ནུས་ཤུགས། ཉམས་མྱོང་དང་ཐབས་ཇུས་སོགས་བེད་སྤྱོད་གཏོང་དགོས་པ་དང་། དེ་དག་སྔོན་མ་རྩ་རླུང་སྒོམ་སྒྲུབ་ཚོགས་པ་ཁག་དང་ཚོགས་མི་སོགས་ལ་ཉེས་འཛུགས་ཁྲིམས་སྦྱོར་བྱེད་སྐབས་ཀྱི་ཉམས་མྱོང་བསྡུ་གསོག་བྱས་པ་ལས་བྱུང་བ་ཞིག་རེད།

དེར་བརྟེན། རྒྱ་ནག་སྲིད་ཁྲིམས་ལས་དོན་ཨུ་ཡོན་ལྷན་ཁང་གིས་རྩ་རླུང་སྒོམ་སྒྲུབ་ཀྱི་གནད་དོན་དང་རྒྱལ་ཁབ་བརྟན་བརླིང་སྲུང་སྐྱོང་གཉིས་ཐོག་རང་དབང་ལྡན་པའི་ངང་སྲིད་ཇུས་བཟོ་ཆོག་པའི་དབང་ཚད་ཡོད་པ་དང་། དམག་མི་དང་རོགས་འདེགས་དམག་དཔུང་རྒྱ་སྐྱེད། མི་སྒེར་གྱི་མངོན་འདོད་སོགས་ཀྱི་ཆེད་གཞུང་གིས་འགྲོ་གྲོན་ལ་ཚད་བཀག་མེད་པར་རྒྱབ་སྐྱོར་ཡོད་དང་།  ཀྲུའུ་ཡཱོང་ཁང་དང་ཁོས་མགོ་ཁྲིད་པའི་རྒྱ་ནག་སྲིད་ཁྲིམས་ལས་དོན་ཨུ་ཡོན་ལྷན་ཁང་དེ་དབུས་དམར་ཤོག་ཚོགས་པའི་མགོ་ཁྲིད་ཚོའི་དབང་ཚད་དང་གཅིག་མཚུངས་ཆགས་ཡོད།

རྒྱ་ནག་སྲིད་ཁྲིམས་ལས་དོན་ཨུ་ཡོན་ལྷན་ཁང་གི་དགྲ་བོ་གཉིས་ནི། རྒྱ་ནག་དམར་ཤོག་ཚོགས་པའི་ལོ་རྒྱུས་ཀྱི་བརྒྱུད་རིམ་ནང་། ༡༩༤༠ ལོའི་མགོར་མའོ་ཙེ་ཏུང་གིས་དབང་ཆ་སྒེར་འཛིན་བྱས་པ་ནས་བཟུང་། རྒྱ་ནག་དབུས་གཞུང་ནང་དབང་ཆ་གཉིས་པ་ཞིག་བྱུང་མྱོང་མེད་པ་དེ་འགོག་ཆེད་དང་། རྒྱ་ནག་དམར་ཤོག་ཚོགས་པའི་ནང་ཁུལ་དུ་དམར་ཤོག་ཚོགས་པ་ཁ་བྲལ་གཏོང་བའི་རྟགས་ཙམ་འཛིན་མཁན་གྱི་ཚོགས་པ་དང་མི་སྒེར་བཅས་ལ་རྡུང་རྡེག་ཚ་ནན་གཏོང་རྒྱུ་དེ་རེད། ཡིན་ནའང་ཀྲུའུ་ཡཱོང་ཁང་གིས་འགྲོ་བ་མིའི་ཐོབ་ཐང་རྡོག་རོལ་བཏང་བ་དེས། ཁོས་རང་ཉིད་དམར་ཤོག་ཚོགས་པའི་ནང་ཆེས་མི་དགའ་བའི་མི་སྣ་བཟོས་པ་མ་ཟད་། རྒྱ་ནག་སྲིད་ཁྲིམས་ལས་དོན་ཨུ་ཡོན་ལྷན་ཁང་ཡང་ཆེས་མི་དགའ་བའི་སྒྲིག་འཛུགས་ཞིག་ཏུ་ཆགས་བཅུག་ཡོད།

ཞི་ཅིན་ཕིན་གྱིས་སྟག་འཛིན་པ།

རྒྱ་ནག་དམར་ཤོག་ཚོགས་པ་ལ་ཡིག་ཐོག་ཏུ་མེད་པའི་སྒྲིག་ཁྲིམས་ཞིག་ཡོད།  དེས་དབུས་ཆབ་སྲིད་རྒྱུན་ལས་ཁང་གི་འཐུས་མི་ལའང་རྒྱུན་ལྡན་མ་ཡིན་པའི་ཉེས་འཛུགས་སམ་ཁྲིམས་ཆད་གཏོང་ཆོག་གི་ཡོད་ཅིང་། ཁ་ཤས་ཀྱིས་བརྗོད་ན་ཀྲུའུ་ཡི་སྟེང་བསླེབ་ན་སྒྲིག་ཁྲིམས་དེ་རྩིས་མེད་གཏོང་གི་རེད། འོན་ཀྱང་། ཁ་ཤས་ཀྱིས་ལྐོག་ཟ་རྒོལ་རྡུང་ལས་འགུལ་དེ་ཀྲུའུ་ཡི་སྟེང་མ་བསླེབས་པར་མཚམས་འཇོག་བྱེད་པར་ཡིད་ཆེས་བྱེད་ཀྱིན་ཡོད།

ད་ལྟའི་བར་ཞི་ཅིན་ཕིན་གྱི་ལྐོག་ཟ་རྒོལ་རྡུང་ལས་འགུལ་གྱིས་འབྲུག་སྒྲ་ལྡར་ལྡིར་ཇི་ལྟར་བྱས་ཀྱང་ཆར་བ་ཟིམ་ཟིམ་ཞིག་ལས་འབབ་ཐུབ་མེད། ཉེ་ཆར་རྒྱ་ནག་གི་ཁྲིམས་དཔོན་ཁག་ཅིག་གིས་ཧྲེང་ཧེ་གྲོང་ཁྱེར་དུ་གཞང་ཚོང་མ་ལོངས་སུ་སྤྱོད་བཞིན་པ་འཛིན་བཟུང་བྱས་ཡོད་དེས།  དམར་ཤོག་ཚོགས་པའི་ལས་བྱེད་ཚོས་ཞི་ཅིན་ཕིན་གྱི་ལས་འགུལ་གལ་ཆེན་དུ་རྩི་ཡི་མེད་པར་བསྟན་པ་རེད། དེར་བརྟེན་ཞི་ཅིན་ཕིན་གྱིས་རང་ཉིད་ཀྱི་དབང་ཚད་བསྐྲུན་དགོས་ན། ཁོས་ངེས་པར་དུ་སྟག་ངོ་མ་འཛིན་བཟུང་བྱེད་དགོས།

ཀྲུའུ་ཡཱོང་ཁང་ནི་སྟག་ངོ་མ་དེ་ཡིན་ཡང་ཁོ་ཧ་ཅང་བདེ་འཇགས་ཀྱང་ཡིན་སྟབས་འཛིན་བཟུང་བྱ་ཐབས་བྲལ་བ་ཞིག་རེད། ཀྲུའུ་ཡི་དབང་ཚད་ཁོ་རང་གི་གོ་གནས་ལ་རག་པ་ཞིག་ཡིན་སྟབས་པའོ་ཞི་ལེ་དང་གཅིག་མཚུངས་མིན། པའོ་ཡི་དབང་ཆ་དེ་ཁོ་རང་གི་ཕ་ཡིས་གསར་བརྗེ་ནང་བཞག་པའི་བྱས་རྗེས་ཀྱི་འབྲས་བུ་ལས་བྱུང་བ་ཞིག་ཡིན། རྒྱ་ནག་དམར་ཤོག་ཚོགས་པ་གསར་འཛུགས་བྱེད་མཁན་གྱི་བུ་ཕྲུག་ཚོའི་ནང་གི་རྒྱལ་སྲས་གཅིག་ནི་པའོ་ཞི་ལེ་ཡིན་ཞིང་ཁོ་ལ་སྐྱེས་དུས་ནས་དབང་ཆ་ཡོད། རྒྱལ་སྲས་མང་པོའི་ཁྲོད་པའོ་དང་པའོ་ཡི་ལྟ་བ་འདྲ་བོ་ཡོད་པའི་ངེས་པ་མེད། ཡིན་ནའང་ཁོ་ཚོས་པའོ་ལ་གདུང་སེམས་མཉམ་སྐྱེད་བྱེད་ཀྱི་ཡོད། དེའི་རྒྱུ་མཚན་ནི་ཁོ་ཚོ་ལའང་མི་རབས་གོང་མ་ནས་བརྒྱུད་པའི་དབང་ཆའི་ཁེ་ཕན་ཡོད་པ་མ་ཟད། ཁོ་ཚོས་སྤྱི་ཚོགས་ལས་རིམ་གཅིག་མཚུངས་ཀྱི་ཁེ་ཕན་མཉམ་ཟ་མཉམ་འཐུང་བྱེད་པའི་རྐྱེན་གྱིས་ཡིན། ཐ་ན་པའོ་འཛིན་བཟུང་བྱས་ཀྱང་། ཁོ་ནི་དམར་ཤོག་ཚོགས་པའི་ཕྱི་ནང་གཉིས་དང་སྦྱི་ཚོགས་ཀྱི་གནས་རིམ་མ་འདྲ་བའི་ནང་རྒྱབ་སྐྱོར་བྱེད་མཁན་མེད་པ་ཞིག་མ་རེད། ཀྲུའུ་ལ་འདི་ལྟ་བུའི་རྒྱབ་ལྗོངས་གང་ཡང་མེད།

ཅང་ཙེ་མེན་གྱིས་ཀྲུའུ་ཡི་གོ་གནས་སྤོར་བ་ནི་རྩ་རླུང་སྒོམ་སྒྲུབ་ཚོགས་པར་ཉེས་འཛུགས་བྱེད་པའི་དམིགས་འདུན་ཆེད་ཡིན་པ་དང་། ཀྲུའུ་ཡིས་ཐེངས་གཅིག་གོ་གནས་ཤོར་ན་ཁོས་རང་ཉིད་ཀྱི་དབང་ཆ་དང་འབྲེལ་ལམ་ཡོད་ཚད་བརླག་འགྲོ་ཞིང་། དེ་དུས་ཁོ་ནི་མི་དཀྱུས་མ་ཞིག་ཆགས་པ་དང་། ཡང་ན་དཀྱུས་མའི་ནང་གི་དཀྱུས་མ་ཞིག་ཆགས་རྒྱུ་རེད། ད་ལྟའི་མགོ་ཁྲིད་ཀྱིས་ཀྲུའུ་བེད་སྤྱོད་བཏང་སྟེ་ཧ་ཅང་བྲིན་བཞིན་པའི་འགྲོ་བ་མིའི་ཐོབ་ཐང་རྡོག་རོལ་བའི་མ་ཉེས་ཁ་གཡོག་བྱེད་ཀྱིན་ཡོད།

ལོ་འདི་རྫོགས་ན་པའོ་དང་ཀྲུའུ་གཉིས་མང་ཚོགས་ཀྱི་མཐོང་ལམ་ནས་ཡལ་རྒྱུ་ཡིན་ནའང་། ཁོ་གཉིས་མེད་པ་ཙམ་གྱིས་དམར་ཤོག་ཚོགས་པར་འགྱུར་བ་གང་ཡང་འགྲོ་མི་སྲིད། ད་དུང་མའོ་ཙེ་ཏུང་གི་ལྟ་བའི་དགོངས་གཞི་ནི་རྒྱ་ནག་དམར་ཤོག་ཚོགས་པའི་གཅེས་ནོར་གྱི་ཆ་ཤས་ཤིག་ཡིན་པ་དང་།  རྒྱལ་ཁབ་བརྟན་བརླིང་རྒྱུན་སྲུང་བྱེད་པའི་སྲིད་ཇུས་དང་ཐབས་ལམ་མུ་མཐུད་བེད་སྤྱོད་གཏོང་རྒྱུ་རེད། པའོ་དང་ཀྲུའུ་གཉིས་ཀྱི་ནག་ཉེས་ནི་རྒྱ་ནག་དམར་ཤོག་ཚོགས་པའི་ནག་ཉེས་ཡིན་པ་དང་། གལ་སྲིད་པའོ་ལ་ཁྲིམས་བཤེར་བྱེད་པའི་དགོས་དམིགས་དང་། ཀྲུག་ལ་ཉེས་འཛུགས་ཞུ་གཏུག་མ་བྱས་པ་གཉིས་ཀྱིས་དམར་ཤོག་ཚོགས་པར་མགོ་རྟིང་སློག་པའི་འཇིགས་ཉེན་ལས་སྐྱོབ་ཐུབ་པ་ཙམ་ལས། རྒྱ་ནག་གཞུང་ལ་འགྱུར་བ་འགྲོ་བའི་རེ་བ་གཏན་ནས་མེད།

མ་རྩོམ་དྲ་ཐག http://www.theepochtimes.com/n3/244150-xi-jinping-may-be-getting-ready-to-bag-a-tiger/