རྒྱབ་སྐྱོར་གྱི་མཚན་རྟཊ་བསྡུ་རུབ།

མདོ་སྨད་དབུས་རྒྱུན་གྱིས་རྒྱ་བལ་འབྲུག་གསུམ་གཙོས་ཕྱི་རྒྱལ་ཡུལ་གྲུ་ཁག་ནས་གྲྭ་བློ་བཟང་དཀོན་མཆོག་ལགས་ལ་རྒྱབ་སྐྱོར་གྱི་མཚན་རྟགས་བསྡུ་རྒྱུ་ཡིན་ཟེར།  

འདི་ལོའི་ཕྱི་ཟླ་ ༢ ཚེས་ ༡ ཉིན་རྒྱ་གཞུང་གིས་ཀིརྟི་དགོན་གྱི་གྲྭ་བློ་བཟང་དཀོན་མཆོག་ལགས་ལ་མི་བསད་པའི་ཉེས་མིང་འོག་ལོ་གཉིས་འཕར་འགྱངས་ཀྱིས་སྲོག་ཁྲིམས་བཅད་པ་དང་། ཁོང་གི་ཚ་བོ་བློ་བཟང་ཚེ་རིང་ལགས་ལ་ལོ་ ༡༠ ཁྲིམས་ཐག་བཅད་པ་ཕྱིར་བསྒྲགས་བྱས་ཡོད་པ་ལྟར། དེ་རིང་སྔ་དྲོའི་ཆུ་ཚོད་ ༡༡ ཙམ་ལ། མདོ་སྨད་དབུས་སྤྱི་ཁྱབ་རྒྱུན་ལས་ཁང་དུ་མདོ་སྨད་དབུས་ས་གཉིས་ནས་སང་ཉིན་དམངས་གཙོའི་ཉིན་མོ་ནས་མགོ་འཛུགས་ཀྱིས་བདུན་ཕྲག་གཅིག་རིང་རྒྱ་བལ་འབྲུག་གསུམ་གཙོས་ཕྱི་རྒྱལ་ཡུལ་གྲུ་ཁག་ནས། གྲྭ་བློ་བཟང་དཀོན་མཆོག་ལགས་ཀྱིས་གཙོས་བོད་ཀྱི་ཆབ་སྲིད་བཙོན་པ་རྣམས་ཆ་རྐྱེན་ཅི་ཡང་མེད་པའི་ཐོག་ནས་འཕྲལ་དུ་ཀློད་གྲོལ་ཡོང་བར་རྒྱབ་སྐྱོར་གྱི་མཚན་རྟགས་བསྡུ་རུབ་གནང་སྟེ། མཉམ་འབྲེལ་རྒྱལ་ཚོགས་དང་ཡུ་རོབ་མཐུན་ཚོགས། རྒྱལ་སྤྱིའི་འགྲོ་བ་མིའི་ཐོབ་ཐང་། དེ་བཞིན་རྒྱལ་ཁབ་ཁག་གི་གཞུང་ཚབ་བཅས་ལ་ཐད་ཀར་སྦྲག་ཐོག་བརྒྱུད་འབོད་སྐུལ་སྙན་ཞུ་འབུལ་རྒྱུ་ཡིན་པའི་གསལ་བསྒྲགས་གནང་སོང་།

སྐབས་དེར་མདོ་སྨད་དབུས་ཚོགས་གཙོ་བསྟན་པའི་དངོས་གྲུབ་ལགས་ཀྱིས་བསྒྲགས་གཏམ་སྒྲོགས་སྦྱང་གནང་བའི་ནང་། ད་ལྟའི་བར་བོད་ས་ཡོངས་ནས་རང་ལུས་མེར་བསྲེགས་དང་འབྲེལ་བའི་ཉེས་མིང་སྣ་ཚོགས་འོག ཁྱོན་མི་ ༧༠ ཙམ་འཛིན་བཟུང་དང་ཁྲིམས་ཆད་བཅད་པ་ཤེས་རྟོགས་བྱུང་ཡོད་སྐོར་དང་འབྲེལ་འབོད་སྐུལ་གནང་དོན། “བོད་ནང་རང་སྲེག་གི་དོན་རྐྱེན་རྒྱུན་མ་ཆད་པར་བྱུང་བཞིན་པ་དང་། རྒྱ་གཞུང་གིས་བོད་དུ་བོད་མིའི་ཐོག་ཆབ་སྲིད་བཙན་གནོན་དང་མི་རིགས་དབྱེ་འབྱེད།  དཔལ་འབྱོར་བཤུ་གཞོག  བོད་ཀྱི་ཆོས་དང་རིག་གཞུང་། སྐད་ཡིག་དང་ཡུལ་གོམས་གཤིས་ལུགས་བཅས་པ་རྩ་མེད་ཀྱི་སྲིད་ཇུས་རྒྱུན་མཐུད་སྤེལ་བཞིན་པ་མ་ཟད། རང་སྲེག་བྱུང་ཡུལ་ས་གནས་སུ་བོད་མིར་བརྙས་གཙེར་བརྡབ་གསིག་གི་ལས་འགུལ་སྣ་ཚོགས་སྤེལ་ཏེ། བོད་རིགས་མང་ཚོགས་རྣམས་མགོན་མེད་སྐྱབས་མེད་ཀྱི་འཇིགས་དངངས་ཁྲོད་ཉིན་མཚན་འཁྱོལ་དཀའི་འཚོ་བ་སྐྱེལ་བཞིན་ཡོད་སྟབས། མཉམ་འབྲེལ་རྒྱལ་ཚོགས་ནས་བོད་ནང་གི་རང་སྲེག་དོན་རྐྱེན་གྱི་འབྱུང་རྐྱེན་ངོ་མ་དང་བྱུང་རིམ་བཅས་པར་ཞིབ་འཇུག་བྱེད་མཁན་རང་དབང་ཅན་གྱི་ཚོགས་ཆུང་ཞིག་འཕྲལ་དུ་བོད་ནང་གཏོང་ཐབས་ཀྱིས་རྒྱ་གཞུང་གིས་གཉའ་གནོན་གདུག་རྩུབ་ཅན་གྱི་སྲིད་ཇུས་འཕྲལ་དུ་མཚམས་འཇོག་ཡོང་ཐབས་དང་། བོད་ནང་གི་ད་ལྟའི་ཛ་དྲག་གི་གནས་ཚུལ་ཞི་འཇགས་ཡོང་ཐབས། བློ་བཟང་དཀོན་མཆོག་གཙོས་པའི་མ་ཉེས་ཁག་གཡོག་གིས་སྲོག་ཁྲིམས་སོགས་ཉེས་ཁྲིམས་སྣ་ཚོགས་འོག་ཚུད་བཅུག་ཡོད་པའི་ཆབ་སྲིད་བཙོན་པ་རྣམས་འཕྲལ་དུ་ཀློད་གྲོལ་ཡོང་བའི་གནོན་ཤུགས་ནུས་ལྡན་སྤྲོད་དགོས” ཞེས་བརྗོད་སོང་།

དེ་རྗེས་མདོ་སྨད་དབུས་དྲུང་ཆེ་སྤྱི་འཐུས་རྒྱ་རིགས་ཐར་ལགས་ཀྱིས། རྒྱ་གཞུང་གིས་དང་ཐོག་རང་ལུས་མེར་བསྲེགས་ཀྱི་གནད་དོན་བྱུང་མྱོང་མེད་ལུགས་ཀྱི་དྲིལ་བསྒྲགས་བྱས་ཏེ་གསང་ཐབས་བྱས་ཡོད་པ་དང་། བར་ལམ་ནས་རང་ལུས་མེར་བསྲེགས་བསྟུད་མར་བྱུང་སྟེ་གསང་ཐབས་མེད་པར་གྱུར་སྐབས། མེར་སྲེག་མཁན་རེ་འགའ་བྱུང་ཡང་བཟའ་ཚང་མ་འཆམ་པ་དང་སེམས་ཁམས་ཐང་པོ་མིན་ལུགས་ཀྱི་འཁྱོག་བརྗོད་བྱས་པ་དང་། རིམ་གྱིས་མེར་སྲེག་གཏོང་མཁན་གྱི་ཁྱིམ་མིར་བཙན་དབང་དང་ལྐོག་རྔན་སྤྲད་དེ་རང་ལུས་མེར་བསྲེགས་ཀྱི་རྒྱུ་རྐྱེན་ཁ་བསྒྱུར་ཐབས་བྱས་ཡོད་པ་མ་ཟད། གྲོང་སྡེ་དེར་གཞུང་གི་ལོ་རེའི་རོགས་དངུལ་སྤྲོད་རྒྱུ་མིན་པ་སོགས་ཀྱི་འཇིགས་སྐུལ་དང་གནོན་ཤུགས་སྤྲོད་བཞིན་ཡོད་པ་མཉམ་དུ། ཕྱི་ལོགས་ནས་བརྒྱུད་སྐུལ་དང་བཙན་སྐུལ་བྱེད་ཀྱི་ཡོད་པའི་འཁྱོག་བརྗོད་བྱེད་བཞིན་ཡོད་པ་ལྟར། བློ་བཟང་དཀོན་མཆོག་གི་ཁྲིམས་ཆད་དེ་ཕྱི་ལོགས་ཀྱི་བཙན་སྐུལ་དང་བརྒྱུད་སྐུལ་འོག་ཏུ་ཚུད་དེ། སོ་སོའི་ཁྱིམ་མིར་རང་ལུས་མེར་བསྲེགས་གཏོང་བར་ངན་སྐུལ་བྱས་ཡོད་པའི་ཉེས་མིང་བཏགས་ཏེ་ཁྲིམས་ཆད་བཅད་ཡོད་པ་ངོ་སྤྲོད་དང་འབྲེལ། མདོ་སྨད་རྒྱུན་ལས་ཀྱི་ངོས་ནས་མ་འོངས་པར་མུ་མཐུད་དེ་སྒྲོལ་མ་སྐྱབས་སོགས་འདི་རིགས་ཀྱི་གནད་དོན་རྣམས་རྒྱལ་སྤྱིའི་སྡིངས་ཆ་ཁག་དང་། འགྲོ་བ་མིའི་ཐོབ་ཐང་སོགས་མིའི་རིགས་ཀྱི་ཐོབ་ཐང་དང་བདག་དབང་ལ་གཅེས་འཛིན་བྱེད་མཁན་གྱི་ཚོགས་སྡེ་དང་མི་སྒེར་སོགས་ལ་འབོད་སྐུལ་རིམ་པར་བྱེད་པའི་འཆར་གཞི་ཡོད་ལུགས་བརྗོད་སོང་།

གསར་འགོད་པ། པདྨ་མཚོ།