ཨ་རིས་སེ་རི་ཡར་དམག་རྒྱག་རྒྱུ་ཡིན་ཟེར།

ཨ་རིའི་གྲོས་ཚོགས་གོང་མའི་ནང་སེ་རི་ཡའི་གཞུང་ལ་དམག་རྒྱག་རྒྱུ་ཐག་གཅོད་བྱུང་ཡོད་པ་དང་། མི་འགྱངས་པར་གྲོས་ཚོགས་འོག་མའི་ནང་མང་མོས་བལྟ་རྒྱུ་ཡིན་འདུག

ཁ་སང་ཕྱི་ཚེས་ ༣ ཉིན་ཨ་རིའི་རྒྱལ་དོན་དྲུང་ཆེ་ཇོན་ཀེ་རེ་ (John Kerry) གཙོས་བདེ་སྲུང་དྲུང་ཆེ་ཧད་གྷེལ་( Chuck Hagel) དང་དམག་སྤྱི་ཆེན་མོ་ཊེམ་སའེ་(Gen Martin Dempsey) བཅས་ཀྱིས་ཨ་རིའི་གྲོས་ཚོགས་གོང་མའི་ཕྱི་འབྲེལ་ཚོགས་ཆུང་དང་མཉམ་དུ་སེ་རི་ཡའི་སྲིད་འཛིན་སྦ་ཤཱར་གྱིས་དུག་མཚོན་བེད་སྤྱོད་བཏང་བར། ཨ་རིའི་གྲོས་ཚོགས་ཀྱིས་དུས་བཀག་ཉིན་ ༦༠ རིང་སི་རེ་ཡ་གཞུང་ལ་མཁའ་དམག་གིས་འཇབ་རྒོལ་བྱེད་ཆོག་པ་དང་། གལ་སྲིད་དུས་ཡུན་དེ་བརྒལ་ཚེ་ཟླ་གཅིག་གི་དུས་ཡུན་ནར་འགྱངས་བྱེད་ཆོག་པའི་ཆོག་མཆན་སྤྲད་ཡོད་འདུག ཟླ་འདིའི་ཚེས་༩ ཉིན་ཨ་རིའི་གྲོས་ཚོགས་འོག་མའི་ནང་ཨོ་བྷ་མ་གཞུང་གིས་སེ་རི་ཡ་རྒྱལ་ཁབ་ལ་དམག་འཁྲུག་བརྒྱབ་ཆོག་མིན་སྐོར་ལ་འོས་ཤོག་བརྒྱུད་ཐག་གཅོད་བྱེད་རྒྱུ་ཡིན་འདུག

གནད་དོན་འདིའི་སྐོར་ལ་ཨ་རིའི་གྲོས་ཚོགས་འཐུས་མི་མང་པོ་ཞིག་གིས། འཛིན་ཨོ་བྷ་མའི་སེ་རི་ཡའི་གཞུང་ལ་མཁའ་དམག་གི་འཇབ་རྒོལ་བྱེད་པའི་འཆར་གཞི་ལ་རྒྱབ་སྐྱོར་བྱེད་ཀྱི་ཡོད་པའི་རྣམ་འགྱུར་བསྟན་ཡོད་པ་མ་ཟད། དེ་ནི་བྱང་ཀོ་རི་ཡ་དང་ཨི་རན་ལྟ་བུའི་རྒྱལ་ཁབ་ཁག་དག་གིས་འབྱུང་འགྱུར་དུག་མཚོན་བེད་སྤྱོད་གཏོང་མི་ཐུབ་པའི་ཉེན་བརྡ་བཏང་བ་ཞིག་ལ་ཡིད་ཆེས་བྱེད་ཀྱི་ཡོད་འདུག 

ཕྱི་ཟླ་ ༨ ཚེས་ ༢༡ ཉིན་གྱི་ཞོགས་པར་སེ་རི་ཡ་གཞུང་གིས་ གྱེན་ལོག་ཚོགས་པས་འཛིན་བཟུང་བྱས་པའི་གྲོང་ཚོ་ཨ་ཨིན་ཌར་མཱ་ (Ain Tarma) དང་། རྫ་མཱ་ཁཱ་( Zamalka) སོགས་ལ་དུག་མཚོན་བེད་སྤྱོད་ཀྱིས་མི་ ༡༤༢༩ ལྷག་རྐྱེན་ལམ་བཏང་ཡོད་འདུག ཨ་རིའི་རྒྱལ་དོན་དྲུང་ཆེ་ཇོན་ཀེ་རི་ཡིས་གྲོས་ཚོགས་ཕྱི་འབྲེལ་ཚོགས་ཆུང་ལ་བརྗོད་དོན། “ རང་ཉིད་ཀྱིས་ཁེར་སྡོད་རྐུབ་སྟེགས་བཟུང་སྟེ་མི་གསོད་ཁྲག་སྦྱོར་བྱེད་མཁན་ལ་ལྟད་མོ་ལྟ་བའི་དུས་སྐབས་ཤིག་མ་རེད” ཅེས་བརྗོད་འདུག ཨ་རིའི་རྒྱལ་དོན་དྲུང་ཆེ་དང་བདེ་སྲུང་དྲུང་ཆེ་གཉིས་ཀྱིས་དམག་མིའི་འཇབ་རྒོལ་གྱིས་སེ་རི་ཡའི་སྲིད་འཛིན་སྦ་ཤཱར་གཞུང་དང་དེའི་དུག་མཚོན་གྱི་ནུས་སྟོབས་ལ་ཚོད་འཛིན་བྱེད་ཐུབ་པར་འགྲེལ་བརྗོད་གནང་འདུག

གྲོས་ཚོགས་ཀྱི་ཚོགས་གཙོ་ཇོན་སྦོ་ནེར་(John Boehner) དང་ཨེ་རི་ཁུ་( Eric Cantor) གཉིས་ཀྱིས་ཨ་རིའི་སྲིད་འཛིན་ཨོ་བྷ་མའི་རྒྱལ་ཁབ་ནང་ལོགས་ཀྱི་སྲིད་བྱུས་འཛིན་སྟངས་ཁག་གི་རྒྱབ་སྐྱོར་དེ་ཙམ་ཡག་པོ་མེད་ཀྱང་། སེ་རི་ཡ་གཞུང་ལ་དམག་འཁྲུག་རྒྱག་པར་རྒྱབ་སྐྱོར་ཤུགས་ཆེན་བྱས་ཡོད་པ་དང་། ཁོང་གཉིས་ཀྱིས་དེ་ནི་ཨ་རིའི་རྒྱལ་ཁབ་ཀྱིས་བྱེད་དགོས་པའི་འོས་འགན་ཞིག་ཡིན་པ་དང་། གྲོས་ཚོགས་འཐུས་མི་ཡོངས་ཀྱིས་རྒྱབ་སྐྱོར་བྱེད་དགོས་པའི་འབོད་སྐུལ་བྱས་ཡོད་འདུག

ཨ་རིའི་སྲིད་འཛིན་ཨོ་བྷ་མས་སི་རེ་ཡ་གཞུང་གིས་དུག་མཚོན་བེད་སྤྱོད་བཏང་རྗེས་ཀྱི་ཉིན་དེར་བརྗོད་དོན། སི་རེ་ཡ་གཞུང་གིས་དུག་མཚོན་བེད་སྤྱོད་བཏང་བ་དེས་ཨ་རིའི་རྒྱལ་སྲུང་བདེ་འཇགས་དང་ཨ་རིའི་མནའ་འབྲེལ་རྒྱལ་ཁབ་ཚོར་འཇིགས་སྐུལ་བྱས་པར་བརྟེན། དེའི་མཇུག་འབྲས་ཚང་མ་སྲིད་འཛིན་སྦ་ཤཱར་དང་སི་རེ་ཡ་གཞུང་གཉིས་ལ་ཡོད་པ་དང་། སི་རེ་ཡའི་གཞུང་ལ་འཇབ་རྒོལ་བྱེད་པར་ཨ་རིའི་མཁའ་དམག་གཏོང་བ་ལས་རྐང་དམག་བེད་སྤྱོད་མི་གཏོང་བར་ཁས་ལེན་བྱས་ཡོད།

ཨ་རི་གཞུང་གིས་སི་རེ་ཡ་གཞུང་ལ་མཁའ་དམག་གིས་འཇབ་རྒོལ་བྱེད་པར་ཧྥ་རན་སི་སྲིད་འཛིན་ཧོད་ལན་ཊི་( Francois Hollande) ཡིས་རྒྱབ་སྐྱོར་བྱས་ཏེ་ “ དུག་མཚོན་གྱིས་མང་ཚོགས་དམར་གསོད་བྱས་པ་འཛམ་གླིང་མི་མང་གིས་གོ་ཐོས་བྱུང་ཡོད་ལ། དེ་ནི་ཉེས་ཅན་པ་ཡིན་པར་ངེས་པར་དུ་བརྡ་ལན་གསལ་བོ་སྟོན་དགོས་” ཞེས་བརྗོད་འདུག ད་དུང་ཁོང་གིས་ཡུ་རོབ་མཐུན་ཚོགས་ཀྱིས་གནད་དོན་འདིའི་ཐོག་གཅིག་གྱུར་མོས་མཐུན་བྱེད་དགོས་སྐོར་བརྗོད་ཀྱང་། ཁོང་གི་ལངས་ཕྱོགས་དེར་དེ་རིང་ཧྥ་རན་སིའི་གྲོས་ཚོགས་ཀྱིས་མང་མོས་ཐག་གཅོད་བྱེད་ཀྱི་ཡོད་འདུག

ཐེངས་འདིར་དབྱིན་ཇིའི་སྲིད་བློན་ཁེ་མེ་རོན་( David Cameron) གྱིས་སི་རེ་ཡའི་སྲིད་འཛིན་སྦ་ཤཱར་གྱིས་དུག་མཚོན་བེད་སྤྱོད་བཏང་བར་སྐྱོན་བརྗོད་བྱེད་པ་ལས། དམག་བཏང་སྟེ་སི་རེ་ཡའི་གཞུང་ལ་རྒོལ་ལན་སློག་རྒྱུར་དབྱིན་ཇིའི་གྲོས་ཚོགས་ནང་རྒྱབ་སྐྱོར་ཐོབ་མི་འདུག 

ཨུ་རུ་སུའི་གསར་འགོད་མཐུན་ཚོགས་ཀྱིས་སྲིད་འཛིན་པུ་ཌིན་ལ་སི་རེ་ཡའི་གནད་དོན་སྐོར་ལ་བཅར་འདྲི་བྱས་པའི་ལན་དུ། ཁོས་ “ མཉམ་འབྲེལ་རྒྱལ་ཚོགས་ཀྱིས་ཆོག་མཆན་མེད་པར་སི་རེ་ཡའི་ནང་ནུབ་ཕྱོགས་རྒྱལ་ཁབ་གང་རུང་གིས་འཇབ་རྒོལ་བྱས་པ་ཡིན་ན། དེ་ནི་བཙན་འཛུལ་བྱེད་པ་ཞིག་ལ་ངོས་འཛིན་བྱེད་རྒྱུ་ཡིན ” ཞེས་བརྗོད་འདུག

མཉམ་འབྲེལ་རྒྱལ་ཚོགས་ཀྱི་དྲུང་ཆེ་སྦན་ཁེ་མོན་( Ban ki-moon) ལགས་ཀྱིས་ནུབ་ཕྱོགས་རྒྱལ་ཁབ་ཚོའི་དམག་དཔུང་གིས་སི་རེ་ཡ་ལ་འཇབ་རྒོལ་བྱས་ན། སི་རེ་ཡའི་གནས་སྟངས་ཇེ་སྡུག་ཏུ་འགྲོ་རྒྱུ་ཡིན་པ་དང་། མི་མང་པོའི་ཚེ་སྲོག་ཤོར་རྒྱུ་ཡིན་པའི་ཉེན་བརྡ་བཏང་ཡོད་འདུག རྒྱ་ནག་དང་ཨི་རན་གཉིས་ཀྱིས་ཀྱང་སི་རེ་ཡའི་ནང་རྒྱལ་ཁབ་གང་རུང་གིས་དམག་འཁྲུག་རྒྱག་པར་རྒྱབ་སྐྱོར་མེད་པའི་རྣམ་འགྱུར་སྟོན་བཞིན་ཡོད་འདུག

སང་ཉིན་ཕྱི་ཚེས་ ༥ ཉིན། འཛམ་གླིང་གི་རྒྱལ་ཁབ་༢༠ ( G-20) ཡི་དཔལ་འབྱོར་ཚོགས་འདུ་ཞིག་ཨུ་རུ་སུའི་གྲོང་ཁྱེར་སན་པེ་ཌེར་པར་གྷུར་( St Petersburg) ནང་འཚོགས་རྒྱུ་ཡིན་པ་དང་། སྐབས་དེར་ཨ་རིའི་སྲིད་འཛིན་ཨོ་བྷ་མ་དང་སྲིད་འཛིན་པུ་ཌིན་གཉིས་ཀྱིས་སི་རེ་ཡའི་གནད་དོན་སྐོར་ལ་གྲོས་མོལ་བྱ་འཆར་ཡོད་འདུག

གསར་འགོད་པ། ལྷ་སྐྱབས་རྒྱལ།