གཟའ་སྤེན་པའི་ཉིན་ཕྱི་ལོ་ ༢༠༢༠ ལོའི་རྒྱལ་སྤྱིའི་ཨོ་ལིམ་ཕིག་ལུས་རྩལ་འགྲན་ཚོགས་ཐེངས་ ༣༢ པ་དེ། ཉི་ཧོང་གི་རྒྱལ་ས་ཊོ་ཀེའོ་ནང་ཚོགས་རྒྱུ་གཏན་འཁེལ་ཡོད་འདུག
ཕྱི་ཚེས་ ༧ ཉིན་ཨར་ཇེན་ཌི་ན་( Argentina) ཡི་རྒྱལ་སར་རྒྱལ་སྤྱིའི་ཨོ་རྩལ་ལྷན་ཚོགས་ཀྱི་ཚོགས་འདུ་ཐེངས་ ༡༢༥ པ་ཚོགས་ཏེ། ཕྱི་ལོ་ ༢༠༢༠ ལོའི་རྒྱལ་སྤྱིའི་ཨོ་རྩལ་འགྲན་ཚོགས་ཐེངས་ ༣༢ པ་དེ་ཉི་ཧོང་གི་རྒྱལ་ས་ཊོ་ཀེའོ་(Tokyo)ནང་ཚོགས་རྒྱུའི་ཐག་གཅོད་བྱུང་ཡོད་འདུག ལྷན་ཚོགས་དེའི་སྟེང་། ཉི་ཧོང་དང་ཏུར་ཀི་( Turkey) གཉིས་ལ་འོས་ཤོག་བླུགས་ཏེ་ཉི་ཧོང་ལ་འོས་གྲངས་ ༦༠ ཐོབ་ཡོད་སྟབས། རྒྱལ་སྤྱིའི་ཨོལ་རྩལ་ལྷན་ཚོགས་ཚོགས་གཙོ་ཇེད་ཁུ་སི་ ( Jacques Rogge)ཡིས། ཉི་ཧོང་ནང་ ༢༠༢༠ ལོའི་རྒྱལ་སྤྱིའི་ཨོ་རྩལ་འགྲན་བསྡུར་ཐེངས་ ༣༢ པ་ཚོགས་ཡུལ་མགྲོན་བདག་ཡིན་པའི་གསལ་བསྒྲགས་གནང་ཡོད་པ་དང་། དེ་མ་ཐག་ཉི་ཧོང་གི་རྒྱལ་ས་སོགས་སུ་མི་མང་གིས་དགའ་བསུ་ཆེན་པོ་བྱས་ཡོད་པ་རེད།
ད་རེབ་ལྷན་ཚོགས་ཐོག ༢༠༢༠ ལོའི་རྒྱལ་སྤྱིའི་ཨོལ་རྩལ་འགྲན་ཚོགས་ཀྱི་མགྲོན་བདག་འོས་གཞི་ཉི་ཧོང་དང་སི་པན། ཏུར་ཀི་གསུམ་གྱི་མགོ་ཁྲིད་ཚོས་སོ་སོའི་རྒྱལ་ཁབ་ནང་རྒྱལ་སྤྱིའི་ཨོལ་རྩལ་བསྡུ་ཐུབ་པའི་རྒྱུ་མཚན་དང་འགྲོ་གྲོན་སོགས་སྙན་སྒྲོན་གནང་རྗེས་མང་མོས་འོས་བསྡུ་བྱས་ཡོད་ཅིང་། སི་པན་ལ་དཔལ་འབྱོར་ཉམས་རྒུད་ཀྱི་དཀའ་ངལ་མུ་མཐུད་འཕྲད་བཞིན་ཡོད་པ་དང་ཏུར་ཀིས་ཁྱིམ་མཚེས་རྒྱལ་ཁབ་སི་རེ་ཡ་ལ་དམག་འཁྲུག་རྒྱག་རྒྱུའི་ཀུན་སློང་ཡོད་པ་མ་ཟད། རྒྱལ་ཁབ་ནང་སྲིད་དོན་བརྟན་བརླིང་མེད་པའི་རྒྱུ་རྐྱེན་སོགས་ལ་བརྟེན་ཏེ། གོང་གི་རྒྱལ་ཁབ་དེ་གཉིས་ལ་ཐོབ་མེད། ༢༠༡༡ ལོར་ཉི་ཧོང་གི་ཧྥོ་ཀོ་ཤི་མཱ་( Fukushima)ཞེས་པར་མཚོ་འཁྱོམས་ཏེ་རྡུལ་ཕྲན་བཟོ་གྲྭ་གཏོར་སྐྱོན་ཆེན་པོ་ཐེབས་ཡོད་ཀྱང་། ཐེངས་འདིར་ཉི་ཧོང་གི་སྲིད་བློན་ཨ་བྷེ་(Shinzo Abe) ཡིས་དེང་སྐབས་ཧྥོ་ཀོ་ཤི་མའི་རྡལ་ཕྲན་བཟོ་གྲྭའི་དཀའ་ངལ་ཚན་རིག་དང་མཐུན་པར་ཚོད་འཛིན་བྱེད་ཐུབ་ཡོད་སྐོར་བརྗོད་འདུག
༡༩༤༠ ལོར་ཉི་ཧོང་ནང་རྒྱལ་སྤྱིའི་ཨོ་ལིམ་ཕིག་ལུས་རྩལ་འགྲན་ཚོགས་བསྡུ་རྒྱུ་གསལ་བསྒྲགས་བྱས་ཡོད་ཀྱང་། སྐབས་དེར་འཛམ་གླིང་དམག་ཆེན་གཉིས་པ་བརྒྱབ་པར་བརྟེན་ཚོགས་ཐུབ་མེད་པ་དང་། ༡༩༦༤ ལོར་ཉི་ཧོང་དུ་དབྱར་དུས་ཨོལ་རྩལ་འགྲན་བསྡུར་དང་། ༡༩༧༢ དང་ ༡༩༩༨ ལོར་དགུན་དུས་ཨོལ་རྩལ་འགྲན་ཚོགས་ཐེངས་གཉིས་གོ་སྒྲིག་གནང་ཐུབ་ཡོད་འདུག
གསར་འགོད་པ། ལྷ་སྐྱབས་རྒྱལ།
ཉི་ཧོང་རྒྱལ་ཁབ་ཆེན་མོ་ལ་བཀྲ་ཤིས་ལེགས་ཞུ།