གསུང་རབ་མེར་བསྲེག་རྒྱུ་ཡིན་ཟེར།

ཨ་རིའི་མཆོད་དཔོན་ཇོ་ནེ་སི་ཡིས་ཁ་ཆེ་གསུང་རབ་པར་བཤུས་མེར་བསྲེགས་བྱས་ཏེ་ཨ་རིའི་ ༩།༡༡ དུས་དྲན་ཐེངས་༡༢ པ་སྲུང་གཙི་བྱེད་སྐབས་ཉེན་རྟོག་པས་ཁོ་རང་འཛིན་བཟུང་བྱས་འདུག

ཁ་སང་ཕྱི་ཚེས་ ༡༡ ཉིན་ཨ་རིའི་ ༩།༡༡ དོན་རྐྱེན་གྱི་དུས་དྲན་ཐེངས་བཅུ་གཉིས་པ་དང་བསྟུན་ཏེ། འཛམ་གླིང་ཕུག་རོན་རོགས་སྐྱོར་ཞབས་ཞུ་བསྟི་གནས་ཁང་གི་མཆོད་དཔོན་ཇོ་ནེ་སི་( Terry Jones) ཡིས། ༩།༡༡ དོན་རྐྱེན་ཁྲོད་ཚེ་སྲོག་ཤོར་བའི་མི་རྣམས་ལ་མྱ་ངན་ཞུ་ཆེད་དུ་མངའ་སྡེ་ཧྥུ་ལོབ་རེ་ཊཱ་(  Florida) ཡི་མོལ་བྷེ་རེ( Mulberry) སྐྱེད་ཚལ་དུ་ཁ་ཆེ་གསུང་རབས་( The Quran) གྱི་པར་བཤུས་གྲངས་ ༢༩༩༨ ཙམ་མེར་བསྲེགས་གཏོང་བར་འགྲོ་བའི་ལམ་བར་དུ། ས་གནས་ཉེན་རྟོག་པས་ཁོ་རང་འཛིན་བཟུང་བྱས་ཏེ་གསུང་རབ་སྐྱེལ་འདྲེན་རླངས་འཁོར་དེ་ཡང་བཀག་འགོག་བྱས་ཡོད་འདུག

ས་གནས་ཉེན་རྟོག་པས་ཁོ་རང་འཛིན་བཟུང་རྗེས་གསར་འགོད་གསར་བསྒྲགས་ཤིག་སྤེལ་བའི་ནང་། མཆོད་དཔོན་ཇོ་ནེ་སི་དང་ཁོའི་མཉམ་རོགས་འགས་རླངས་འཁོར་ནང་ས་སྣུམ་གྱིས་སིམ་པའི་ཁ་ཆེ་གསུང་རབ་སྐྱེལ་འདྲེན་བྱས་པའི་ཁྲིམས་འགལ་ཉེས་མིང་འོག་འཛིན་བཟུང་བཀག་ཉར་བྱས་པ་མ་ཟད། ད་དུང་ཇོ་ནེ་སི་ཡིས་མངོན་གསལ་དད་པོས་མེ་མདའ་བཏགས་ཡོད་པའི་ཉེས་འཛུགས་ཀྱང་བྱས་ཡོད་པ་དང་། རླངས་འཁོར་དེར་མེ་འབར་བའི་ཉེན་ཁ་ཆེན་པོ་ཡོད་སྟབས་གཞུང་ལམ་སྟེང་མུ་མཐུད་འགྲོ་རྒྱུར་བཀག་འགོག་བྱས་སྐོར་བརྗོད་འདུག

༢༠༡༠ ལོའི་ ༩།༡༡ དོན་རྐྱེན་གྱི་དུས་དྲན་སྐབས། ཇོ་ནེ་སི་ཡིས་ཁ་ཆེ་གསུང་རབ་མེར་བསྲེགས་ཀྱི་ཉིན་ཞེས་པའི་སྟེང་ཁ་ཆེ་གསུང་རབས་ ༢༠༠ མེར་བསྲེགས་གཏོང་རྒྱུ་ཡིན་པའི་གསལ་བསྒྲགས་བྱས་ཡོད་སྟབས། ཨ་རིའི་སྲིད་འཛིན་ཨོ་བྷ་མ་གཙོས་རྒྱལ་སྤྱིའི་མགོ་ཁྲིད་ཚོས་རེ་སྐུལ་ལྟར། ཁོས་ཁོ་རང་གི་ཁ་ཆེའི་གསུང་རབ་མེར་བསྲེགས་གཏོང་བའི་ལས་གཞི་ཕྱིར་འཐེན་གྱིས་མ་འོངས་པར་དེ་རིགས་མི་བྱེད་རྒྱུའི་ཁས་ལེན་བྱས་ཡོད་འདུག

འོན་ཀྱང་ ༢༠༡༡ ལོའི་ཟླ་ ༣ པའི་ནང་ཁོས་ཡང་བསྐྱར་ཁ་ཆེ་ཆོས་ལུགས་ལ་སྐྱོན་བརྗོད་དང་སྦྲགས། ཁོའི་སྣེ་ཁྲིད་པའི་ཡེ་ཤུ་ལྷ་ཁང་དེའི་ནང་ཁ་ཆེ་གསུང་རབ་མེར་བསྲེགས་བཏང་བ་མ་ཟད།  ལ་བ་དང་ཞ་མོ། ཇ་ཕོར་སོགས་ཀྱི་སྟེང་ “ ཁ་ཆེ་གསུང་རབ་ནི་གཤེད་མ་རེད་” ཅེས་བཀོད་དེ་བཀྲམས་པར་བརྟེན། དབུས་ཨེ་ཤ་ཡའི་རྒྱལ་ཁབ་ཁག་དང་པ་ཀི་སི་ཐན། ཨབ་གྷན་སི་ཐན། ཨིན་ཊོ་ནེ་ཤི་ཡ། བྷང་ག་ལཱ་བཅས་ཀྱི་ནང་གཞི་རྒྱ་ཆེ་བའི་ངོ་རྒོལ་དང་ཁ་ཆེ་ཆོས་ཚོགས་ཁ་ཤས་ཀྱིས་གསལ་བསྒྲགས་སྤེལ་ཏེ། སུ་ཞིག་གིས་ཁོ་གསོད་ཐུབ་ན་ཨ་སྒོར་ས་ཡ་ ༡ ཙམ་གྱི་རྔན་པ་སྤྲོད་རྒྱུ་ཡིན་སྐོར་བཤད་ཡོད།  

ཇོ་ནེ་སི་ཡིས་རྒྱལ་སྤྱིའི་ཁ་ཆེ་གསུང་རབ་མེར་བསྲེགས་ཀྱི་ཉིན་མོ་གསལ་བསྒྲགས་བྱས་པ་ནས་བཟུང་ཁོ་རང་ལ་དངོས་ཤུགས་གང་རུང་ནས་འཇིགས་སྐུལ་གྱི་འཕྲིན་ཡིག་འབྱོར་སྟབས། ད་ལྟ། ས་གནས་ཉེན་རྟོག་ལས་ཁུངས་ཀྱིས་ཁོའི་བདེ་འཇགས་སྲུང་སྐྱོབ་ཐད་ཨ་སྒོར་ས་ཡ་ ༡ ལྷག་གི་འགྲོ་གྲོན་བཏང་ཡོད་འདུག

འཛམ་གླིང་ཕུག་རོན་རོགས་སྐྱོར་ཞབས་ཞུ་བསྟི་གནས་ཁང་(Dove world Outreach Center)ནི། ༡༩༨༦ ལོར་ཨ་རིའི་མངའ་སྡེ་ཧྥུ་ལོབ་རེ་ཊཱའི་ནང་གསར་འཛུགས་བྱས་པའི་ཡེ་ཤུ་ཆོས་ལུགས་གསར་མའི་ལྷ་ཁང་ཞིག་ཡིན། ད་ལྟ་དེའི་ནང་ཚོགས་མི་ ༥༠ ལྷག་དང་། མཆོད་དཔོན་ཇོ་ནེ་སི་དང་ཁོའི་བཟའ་ཟླ་གཉིས་ཀྱིས་གཙོ་སྐྱོང་གནང་བཞིན་ཡོད་འདུག

གསར་འགོད་པ། ལྷ་སྐྱབས་རྒྱལ།