རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་ཞི་ཆུང་ལགས་ཀྱི་རུས་ཐལ་ཁྱིམ་དུ་འཁྱེར་མ་བཅུག་པར་རྔ་ཆུའི་ནང་གཏོར་དུ་བཅུག་ཡོད་འདུག
ཕྱི་ཟླ་ ༩ ཚེས་ ༢༨ ཉིན་རྔ་བ་སྒོ་མང་ལྷ་སྡེ་མཐའ་བའི་ཞི་ཆུང་ལགས་ཀྱིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་སྐུ་གྲོངས་རྗེས། ས་གནས་མི་མང་གིས་ཁོང་གི་སྐུ་ཕུང་ཁྱིམ་དུ་གདན་འདྲེན་ཞུས་ཡོད་ཀྱང་། དེ་མ་ཐག་རྒྱ་ནག་གི་ཉེན་རྟོག་པ་དང་དམག་མི་ཕོན་ཆེན་འབྱོར་ཏེ་ཕུང་པོ་བཙན་འཕྲོག་བྱས་ཡོད་ཅིང་། ཚེས་ ༢༩ ཉིན་རྔ་བ་རྫོང་གིས་རུས་ཐལ་ལེན་དུ་ཡོང་དགོས་པའི་བརྡ་ལན་འབྱོར་བ་ལྟར། ཇོ་ནང་བསེ་དགོན་པའི་གྲྭ་བ་དང་ཁོང་གི་གཉེན་ཉེ་ཁག་ཅིག་ཕྱིན་སྐབས། རྫོང་གི་ལས་བྱེད་དང་ཉེན་རྟོག་པ་ཚོས་རུས་ཐལ་ཁྱིམ་དུ་འཁྱེར་མི་ཆོག་པར་ཁོ་ཚོས་མཐོང་ས་ནས་ཆུ་ལ་གཏོར་བ་དང་། ཡང་ན་ས་འོག་ཏུ་བཅུག་དགོས་པའི་བཙན་བཀའ་བཏང་ཡོད་སྟབས། འདས་པོའི་རུས་ཐལ་ཁྱིམ་དུ་འཁྱེར་མ་ཐུབ་པར་རྔ་ཆུའི་ནང་གཏོར་དགོས་བྱུང་ཡོད་འདུག
གོང་གསལ་གནས་ཚུལ་སྐོར་ངྷ་སར་གནས་སྡོད་ཚངས་དབྱངས་ལགས་ཀྱིས་བཏང་བ་ལྟར་ན། ཚེས་ ༢༨ ཉིན་རྒྱ་ནག་གི་ཉེན་རྟོག་པ་དང་དམག་མི་མང་པོས་ཞི་ཆུང་ཚང་གི་ཁང་པའི་སྒོ་དང་སྒེའུ་ཁུང་བཅག་སྟེ་སྐུ་ཕུང་བཙན་འཁྱེར་བྱས་རྗེས། ཇོ་ནང་བསེ་དགོན་པའི་གྲྭ་བ་ ༢༠༠ འདས་པོའི་ཁྱིམ་དུ་ཕེབས་ཏེ་སྨོན་ལམ་གསུངས་ཡོད་པ་དང་། ཚེས་ ༢༩ ཉིན་ཇོ་ནང་བསེ་དགོན་པའི་དགོན་བདག་བསེ་ཚང་ཕེབས་ཏེ་སྨོན་ལམ་གསུངས་ཤིང་། རང་ལུས་མེར་བསྲེགས་གནང་བའི་ཉིན་དེར་འདས་པོའི་ཁྱིམ་དུ་མི་མང་པོ་འཛོམས་ཏེ་མཆོད་འབུལ་སྨོན་ལམ་བྱས་ཡོད་འདུག
ཕྱི་ཚེས་ ༣༠ ཉིན་ནས་བཟུང་རྒྱ་གཞུང་གིས་ས་གནས་དེ་ཁུལ་བཀག་སྡོམ་བྱས་ཏེ། མང་ཚོགས་འདས་པོའི་ཁྱིམ་དུ་འགྲོ་རྒྱུར་བཀག་འགོག་དང་སྔོག་བཤེར་བྱས་ཡོད་པ་དང་། ལག་ཁྱེར་ཁ་པར་བཙན་འཕྲོག་བྱས་པ་སོགས་ཀྱི་གནས་ཚུལ་ཡང་བྱུང་ཡོད་འདུག རྒྱ་གཞུང་གིས་འདས་པོའི་སྐུ་ཕུང་བཙན་འཁྱེར་བྱེད་སྐབས། ཁོང་གི་ཆུང་མ་བ་ལོས་ངུ་འབོད་བྱེད་བཞིན་སྐུ་ཕུང་ལ་འཐམ་ནས་མ་བཏང་བར་ཁོ་མོ་ཡང་བཙན་ཁྲིད་བྱས་ཡོད་ཀྱང་། ཕྱི་ཚེས་ ༢༩ ཉིན་ཀློད་གྲོལ་བཏང་ཡོད་འདུག
རྒྱལ་གཅེས་དཔའ་བོ་ཞི་ཆུང་ལགས་ཕྱི་ལོ་ ༡༩༧༢ ལོར་ཕ་བསོད་ནམས་བརྟེན་དང་། མ་ཞེས་ཁོ་མ་གཉིས་ཀྱི་བུར་སྐྱེས་ཤིང་། ཆུང་དུས་ནས་ཇོ་ནང་བསེ་དགོན་པར་ཆོས་ཞུགས་བྱས་ཏེ་སློབ་གཉེར་གནང་ཡོད་པ་དང་། ཕྱིས་སུ་ལོ་ངོ་གཉིས་རིང་བསེ་ཚང་གི་གསོལ་ཐབ་པ་བྱས། ཕྱི་ལོ་ ༡༩༨༩ ལོར་ཇོ་ནང་འཛམ་ཐང་དགོན་ཆེན་དུ་མཁན་ཆེན་ཡོན་ཏན་བཟང་པོའི་མདུན་ནས་ལོ་གསུམ་རིང་དུས་འཁོར་སྦྱོར་དྲུག་ལ་ཉམས་ལེན་བྱས་པ་དང་། ཕྱི་ལོ་ ༢༠༠༨ ལོར་སྐྱ་སར་བབས་ཏེ་ཕྱི་ལོ་ ༢༠༠༩ ལོར་ཁོང་གི་སྤུན་མཆེད་འདས་པོ་འཇའ་ཚེ་དབང་རིག་ཁོའི་ཆུང་མ་བ་ལོ་དང་མཉམ་དུ་བསྡད། ཁོང་གི་སྤུན་མཆེད་དང་ཆུང་མ་བ་ལོ་གཉིས་ལ་རང་ལོ་ ༡༨ ཡིན་པའི་བུ་མོ་ཚེ་པོ་དང་། རང་ལོ་༡༤ ཅན་བུ་ཀུན་དགའ་ཕུན་ཚོགས་ཟེར་བ་གཉིས་ཡོད་ལ། བུ་ཀུན་དགའ་ཕུན་ཚོགས་ཀྱིས་ཇོ་ནང་བསེ་དགོན་དུ་སློབ་གཉེར་བྱེད་བཞིན་ཡོད་འདུག
གསར་འགོད་པ། པདྨ་མཚོ།
སེམས་སྐྱོ་ཡ་རང་རེད། དཔའ་བོ་འདི་དག་གིས་ཉུང་མཐར་རང་དབང་དགོས་ཞེས་རང་སྲོག་བློས་བཏང་ཡོག་རེད།