སུད་སི་དང་ལིཀ་ཏེན་སིཊཡན་བོད་རིགས་མི་མང་ས་གནས་འཐུས་ཚོགས་ཀྱི་གོ་སྒྲིག་འོག ཕྱི་ཟླ་ ༡༠ ཚེས་ ༤ ཉིན་ནས་ ༢༢ ཉིན་བར་ཁྱོད་ཉིན་གྲངས་ ༡༨ རིང་རྒྱལ་སྤྱིའི་སྤྱི་ཚོགས་ལ་བོད་དོན་ཁྱབ་བསྒྲགས་དང་། བོད་ནང་གི་བོད་མི་ཚོར་གདུང་སེམས་མཉམ་སྐྱེད་ཆེད། སུད་སི་མངའ་སྡེ་སིང་གྷ་ལེན་ནས་ཇི་ནི་ཝ་བར་སྤྱི་ལེ་ ༣༨༨ ལྷག་ལ་ཞི་བའི་གོམ་བགྲོད་ཞིག་མགོ་འཛུགས་གནང་འདུག
གནས་ཚུལ་བཏང་འབྱོར་བྱུང་བ་ལྟར་ན། ཐེངས་འདིའི་ཞི་བའི་གོམ་བགྲོད་གྱི་དགོས་དམིགས་གཙོ་བོ་ནི། ལོ་ཤས་རེའི་མཚམས་སུ་མཉམ་འབྲེལ་རྒྱལ་ཚོགས་ཀྱིས་འགྲོ་བ་མིའི་ཐོབ་ཐང་སྐོར་རྒྱལ་ཁབ་སོ་སོར་ཞིབ་བཤེར་གནང་གི་ཡོད་པ་ལྟར། ལོ་འདིའི་ཟླ་ ༡༠ ཚེས་ ༢༢ ཉིན་རྒྱ་ནག་གི་འགྲོ་བ་མིའི་ཐོབ་ཐད་རྒྱལ་ཚོགས་ཀྱིས་དྲི་བ་བཏང་སྟེ་གྲོས་ཆོད་འཇོག་རྒྱུ་ཡིན་སྟབས། རྒྱ་གཞུང་གིས་ད་ལྟའི་བོད་ཀྱི་གནས་བབ་ལྷིང་འཇགས་ཡིན་ཚུལ་དང་དཀའ་ངལ་མེད་ཚུལ་རྫུན་སྒྲོག་བྱེད་ཀྱི་ཡོད་ཀྱང་། དོན་དངོས་ཐོག་བོད་ས་ཡོངས་རྫོགས་མུན་ནག་གི་བཙོན་ཁང་ལྟ་བུ་དང་། གཡུལ་ས་ལྟ་བུར་སྒྱུར་བཞིན་པའི་གནས་བབ་འོག ད་བར་བོད་མི་ ༡༢༡ གིས་སྐུ་ལུས་མེར་བསྲེགས་གནང་ཡོད་པ། བོད་ཀྱི་བླ་མ་དང་སྤྲུལ་སྐུ། མཁས་དབང་། སྒྱུ་རྩལ་བ། རྩོམ་པ་པོ། གཞས་བ་གཞས་མ་སོགས་བོད་མི་སྟོང་ཕྲག་མང་པོ་བཙོན་འཇུག་མནར་གཅོད་བཏང་དང་གཏོང་བཞིན་པ་སོགས་ད་ལྟའི་བོད་ནང་གི་ཛ་དྲག་གི་གནས་སྟངས་དངོས་རྒྱལ་ཚོགས་ཀྱིས་གླེང་སློང་དང་། རྒྱ་ནག་ལ་གནོན་ཞུགས་སྤྲོད་ཆེད་ཞི་བའི་གོམ་བགྲོད་འདི་གོ་སྒྲིག་ཞུ་བཞིན་པ་ཡིན་འདུག
གོང་གསལ་ལས་འགུལ་སྐོར། སུད་སི་དང་ལིཀ་ཏེན་སི་ཊཡན་བོད་རིགས་མི་མང་གི་ཚོགས་གཞོན་བསམ་པ་དོན་གྲུབ་ལགས་སུ་བཅར་འདྲི་ཞུས་པར། ཁོང་གིས་རྩ་བའི་ཆ་ནས་སུད་སི་ནང་ཞི་བའི་གོམ་བགྲོད་ཐེངས་མང་པོ་སྤེལ་ཡོད་ཀྱང་། ཐེངས་འདི་ནི་གཞི་རྒྱ་ཆེ་ཤོས་དང་མི་གྲངས་མང་ཤོས་དེ་ཆགས་ཡོད་པ་དང་། སུད་སི་དང་ལིཀ་ཏེན་སིཊཡན་བོད་རིགས་མི་མང་གི་གོ་སྒྲིག་དང་འགན་ལེན་གནང་སྟེ། སུད་སི་མངའ་སྡེ་སིང་གྷ་ལེན་ནས་ནས་མཉམ་འབྲེལ་རྒྱལ་ཚོགས་ཡོད་ས་ཇི་ནི་ཝི་བར་ཉིན་གྲངས་༡༨ འགོར་གྱིན་ཡོད་པ་དང་། ཉིན་དང་པོའི་དབུ་འཛུགས་སྐབས་མི་ ༨༥ ཙམ་ཉམས་ཞུགས་གནང་གི་ཡོད་ཀྱང་། ཉིན་ལྟར་མི་ ༤༠ བརྒལ་བ་མཉམ་ཞུགས་གནང་ངེས་སྐོར་སོགས་བརྗོད་འདུག
ཐེངས་འདིའི་གོམ་བགྲོད་ཉིན་དང་བོར་སུད་སིའི་ནང་གནས་སྡོད་བོད་མི་༨༢ མཉམ་ཞུགས་ཀྱིས་གོམ་བགྲོད་དབུ་འཛུགས་གནང་ཡོད་ཅིང་། གོམ་བགྲོད་པ་རྒན་ཤོས་ལོ་ན་ ༨༢ དང་། ཆུང་ཤོས་ལོ་ན་ ༡༥ ཙམ་ཡིན་འདུག་ཅིང་། ཁོང་ཚོས་མུ་མཐུད་ཉིན་༡༨ རིང་སུད་སི་མངའ་སྡེ་ ༡༥ ཙམ་ནང་གོམ་བགྲོད་དང་། བོད་ནང་གི་དཀའ་ངལ་འགྲེལ་བརྗོད་ཀྱི་ཡིག་ཆ་འབུམ་ཕྲག་གཅིག་ལྷག་འགྲེམས་སྤེལ་གནང་འཆར་ཡོད་འདུག
༄༅། །རྒྱལ་སྤྱིའི་བོད་རང་བཙན་ལས་འགུལ་ཚོགས་པའི་(International Tibet Independence Movement, ITIM) http://www.rangzen.org རྒྱུན་ལས་ཡོངས་ཀྱི་ངོས་ནས་གོམ་བགྲོད་པ་རྒྱལ་བཅེས་དཔའ་བོ་དཔའ་མོ་རྣམ་པ་ལྷན་རྒྱས་ཚང་མ་ལ་མཚམས་འདྲི་བཀྲ་ཤིས་བདེ་ལེགས་དང་རྒྱབ་བསྐྱོར་བརྒྱ་ཆ་བརྒྱ་ཐམས་པ་ཞུ་རྒྱུ་ཡིན། མ་ཟད་གོམ་བགྲོད་ཀྱི་དགོས་དོན་ཚང་མ་ལམ་ལྷོངས་ཡོང་བའི་སྨོན་འདུན་ཞུ།