དེ་རིང་ཞོགས་པར་ཁ་ཆེ་དྲག་སྤྱོད་པ་འགས་ལེ་བྷེ་ཡཱའི་སྲིད་བློན་བཙན་འཁྲིད་བྱས་ཡོད་ཀྱང་། ད་སྔ་ལེ་བྷེ་ཡའི་གཞུང་གིས་སྲིད་བློན་གང་ཞིག་ཏུ་ཁྲིད་པ་དང་དམིཊ་ཡུལ་ཅི་ཡིན་སོགས་ཤེས་རྟོགས་ཐུབ་མི་འདུག
དེ་རིང་ཞོགས་པར་ལེ་བྷེ་ཡ་ (Libya)ཡི་རྒྱལ་སའི་མགྲོན་ཁང་ཀོ་རེན་ཐཱ་ (Corinthia)ཞེས་པའི་ནང་། ཁ་ཆེ་དྲག་སྤྱོད་པ་འགས་མི་གསོད་ཁྲག་སྤྱོར་སོགས་གང་ཡང་མེད་པར། ལེ་བྷེ་ཡའི་སྲིད་བློན་ཛེན་ཊན་(Ali Zeidan)ལགས་བཙན་ཁྲིད་བྱས་ཡོད་འདུག དེའི་རྗེས་སྲིད་བློན་ལས་ཁུངས་ནས་གསལ་བསྒྲགས་ཤིག་སྤེལ་བའི་ནང་། ད་སྔ་ལེ་བྷེ་ཡའི་གཞུང་ཕྱོགས་ནས་མི་སུ་ཞིག་གིས་སྲིད་བློན་བཙན་ཁྲིད་བྱས་པ་དང་། དམིགས་ཡུལ་གང་འདྲ་ཡིན་པ། ས་ཕྱོགས་གང་དུ་འཁྲིད་པ་སོགས་ཀྱི་གནས་ཚུལ་གང་ཡང་ཤེས་རྟོགས་ཐུབ་མེད་སྐོར་བརྗོད་འདུག
མགྲོན་ཁང་དེའི་བདེ་སྲུང་མགོ་བ་སྐུ་ཞབས་ཤཱ་བྷན་ (Abd al-razaq shaban )ལགས་ཀྱིས། རེའུ་ཊིར་(Reuters )གསར་ཁང་གི་གསར་འགོད་པར་ “ད་ནང་ཞོགས་པར་ལེ་བྷེ་ཡཱའི་གསར་བརྗེ་པ་འགའ་མགྲོན་ཁང་དུ་འབྱོར་ཏེ། སྲིད་བློན་ཛེན་ཊན་འཛིན་བཟུང་ཆོག་པའི་བཀའ་ཁྱབ་ཡིག་ཆ་བསྟན་ཏེ། ཁོ་བཟུང་ནས་ཁྲིད་སོང་”ཞེས་བརྗོད་འདུག་ཀྱང་། ལེ་བྷེ་ཡཱའི་ཁྲིམས་ལུགས་བློན་ཆེན་སྐུ་ཞབས་མཱར་གྷ་ནེ་ ( salah al-Marghani)ལགས་ཀྱིས་ “ སྲིད་བློན་འཛིན་བཟུང་ཆོག་པའི་བཀའ་ཡིག་ཅིག་གཏན་ནས་སྤྲད་མེད་”ཅེས་གཞུང་འབྲེལ་བརྙན་འཕྲིན་ནང་བརྗོད་འདུག
གནད་དོན་དབྱེ་ཞིབ་པ་ཚོས་ཐེངས་འདིར་ལེ་བྷེ་ཡའི་སྲིད་བློན་བཙན་འཁྲིད་བྱས་པའི་སྐོར་ལ་ཚོད་དཔག་སྣ་ཚོགས་བྱེད་བཞིན་ཡོད་པ་དང་། ཁག་ཅིག་གིས་ལེ་བྷེ་ཡཱའི་གཞུང་གི་ཆོག་མཆན་མེད་པར་ཟླ་འདིའི་ཚེས་ ༥ ཉིན་ཨ་རིའི་དམག་དཔུང་ལེ་བྷེ་ཡཱའི་རྒྱལ་ཁོངས་སུ་འཛུལ་ཏེ། ཨོལ་ཁཱ་ཌ་( Al-Qaeda)འཇིགས་སྐུལ་ཚོགས་པའི་ཚོགས་མི་ལི་བྷེ་( Anas Al-liby)འཛིན་བཟུང་བྱས་པ་དེ་དང་འབྲེལ་བ་ཡོད་ཚུལ་བརྗོད་ཅིང་། འཇིགས་སྐུལ་བ་ལི་བྷེ་ནི་ ༡༩༩༨ ལོར་ཨ་ཧྥི་རི་ཀའི་རྒྱལ་ཁབ་ཁེན་ཡཱ་ (Kenya ) དང་ཌན་ཛད་ནེ་ཡཱ་(Tanzania ) གཉིས་ནང་ཡོད་པའི་ཨ་རིའི་གཞུང་ཚབ་ཁང་དུ་འགད་རྫས་འཇོག་མཁན་གྲས་ཡིན་འདུག་ལ། ཉིན་འགའི་སྔོན་སྲིད་བློན་ཛེན་ཊན་གྱིས་ནུབ་ཕྱོགས་རྒྱལ་ཁབ་ཚོས་ལེ་བྷེ་ཡཱའི་ནང་གི་ཁ་ཆེ་དྲག་སྤྱོད་པ་དང་མཚོན་ཆ་ནག་ཚོང་རྒྱག་མཁན་ཚོ་རྩ་མེད་གཏོང་བར་རོགས་སྐྱོར་ཡོང་བའི་འབོད་སྐུལ་ཞུས་ཡོད་འདུག
ལེ་བྷེ་ཡཱའི་ཆབ་སྲིད་པ་གྷ་མཱ་ཌེ་ (Guma El Gamaty) ཡིས་བྷི་བྷི་སི་གསར་འགོད་པར། ཨ་རིའི་དམག་མིས་ལེ་བྷེ་ཡཱའི་ཆོག་མཆན་མེད་པར་འཇིགས་སྐུལ་བ་ལི་བྷེ་འཛིན་བཟུང་བྱས་ཡོད་སྟབས། མང་ཚོགས་ཨ་རིའི་བྱ་སྤྱོད་དེར་ཁོང་ཁྲོ་ལངས་ཏེ་ངོ་རྒོལ་བྱས་པ་ཞིག་ཡིན་ཚུལ་བརྗོད་འདུག ཨ་རིའི་རྒྱལ་དོན་དྲུང་ཆེ་ཇོན་ཁད་རེ་ (John Kerry ) ཡིས། ཨ་རིའི་དམག་མི་ལེ་བྷེ་ཡཱའི་རྒྱལ་ཁོངས་སུ་འཛུལ་ཏེ་འཇིགས་སྐུལ་བ་འཛིན་བཟུང་བྱས་པའི་གནད་དོན་དེར་སྲིད་བློན་ཛེན་ཊན་གྱིས་སྔོན་ནས་ཧ་གོ་ཡོད་ཅེས་བརྗོད་ཡོད་འདུག
ཨ་རི་གཙོས་ནུབ་ཕྱོགས་རྒྱལ་ཁབ་ཁག་གིས་དྲག་སྤྱོད་པས་སྲིད་བློན་བཙན་ཁྲིད་བྱེད་པ་ནི་ཐ་ཤལ་གྱི་བྱེད་སྟངས་ཤིག་ཡིན་པའི་སྐྱོན་བརྗོད་བྱས་འདུག
གང་ལྟར་འཇིགས་སྐུལ་བ་འདི་ཚོ་ནི། སྤྱོད་བཟང་ཡིན་མིན་དང་ཡ་རབས་ཀྱི་སྐད་ཆ་མ་བཅིངས་པར། སྤྱི་བཏང་མི་ཞིག་གི་ལས་ཀ་དང་། འཆར་འགོད་བྱེད་སྟངས་སོགས་ནི་ཧ་ཅང་གི་འཆར་གཞི་ལྡན་པ་དང་། རླབས་ཆེ་བའི་ལས་ཀ་ཤིག་རེད། དཔེར་ན་ལི་བྷིའི་ཁྲིམས་ཁང་གི་ངོས་སྦྱོར་རྫུན་མ་བཟོ་རྒྱུ་དང་། དེའི་གཞུང་གི་བཀའ་ཁྱབ་ཡིན་ལུགས་ཀྱི་སྐད་ཆ་དེ་ཚོ། སྤྱི་བཏང་གི་བསམ་བློ་ཞིག་མ་རེད། ང་ཚོ་བོད་པ་ཚོ་རྒྱ་གར་དང་བལ་ཡུལ་གྱི་ས་མཚམས་སུ། ཉེན་རྟོག་པ་ཐུག་དུས་སྐད་ཆ་གང་བཤད་དགོས་མིན་མ་ཤེས་པར། ཚོང་རྫས་ཕྲན་བུ་ཡོད་པ་དེ་ཡང་། ཕར་ཤོར་ནས་ལག་པ་སྟོང་པ་ལོག་ཡོང་མཁན་ཕལ་ཆེ་བ་རེད། དེའི་ཕྱིར་འདི་ནི་ལས་ཀ་བཟང་པོ་མིན་ནའང་། བྱེད་ཐབས་ནག་པོ་རེད་ལ། མི་སུ་ཞིག་གིས་བཟང་ངན་གང་ཞིག་བྱེད་ཀྱང་གྲ་སྒྲིག་ཨ་སང་དགོས་རྒྱུ་དེ། འདི་ཚོ་ལ་བལྟས་ན་གལ་ཆེན་པོ་ཡིན་པར་ཤེས་ནུས།