གནམ་བདེ་སྒོ་མོའི་ཆེ་མདུན་གྱི་གཏོར་རྒོལ་དོན་རྐྱེན་གྱི་དོགས་ཡོད་ཡུ་གུར་བ་ ༥ འཛིན་བཟུང་བྱས་ཏེ་ཡུ་གུར་དྲག་སྤྱོད་པར་དོགས་ཟོན་དགོས་པའི་བརྡ་ཁྱབ་སྤེལ་ཡོད་འདུག
ཁ་སང་ཕྱི་ཚེས་ ༣༠ ཉིན་གྱི་ཕྱི་དྲོར་རྒྱ་ནག་ཞིན་ཧྭ་གསར་འགྱུར་ལས་ཁང་གིས་གནས་ཚུལ་སྤེལ་པ་ལྟར་ན། ཕྱི་ཚེས་ ༢༨ ཉིན་གནམ་བདེ་སྒོ་མོ་ཆེའི་གསེར་ཆུ་ཟམ་པའི་གཏོར་རྒོལ་དོན་རྐྱེན་བྱུང་རྗེས། པེ་ཅིན་གྲོང་ཁྱེར་ཉེན་རྟོག་ཁང་གི་མགྲིན་ཚབ་པས། དོན་རྐྱེན་དེ་འཆར་གཞི་ངེས་ཅན་ལྡན་པའི་འཇིགས་སྐུལ་རིང་ལུགས་པའི་དྲག་སྤྱོད་སྤེལ་བ་ཞིག་ཡིན་པ་དང་། འབར་གས་བྱུང་བའི་རླངས་འཁོར་གྱི་ནང་ནས་རླངས་སྣུམ་དང་གྲི། ལྕགས་དབྱུག ཆོས་ཚིག་འཁོད་པའི་དར་ཆ་བཅས་རྙེད་སོན་བྱུང་བ་ལྟར། དོགས་ཡོད་ཡུ་གུར་བ་ ༥ འཛིན་བཟུང་བྱས་ཡོད་པ་དང་། ད་ལྟའི་ཆར་ཞཱིན་ཅང་ཉེན་རྟོག་ཁང་དང་མཉམ་འབྲེལ་གྱིས་དོགས་ཡོད་ཉེས་ཅན་གྱི་སྡོད་གནས་སོགས་རྩད་གཅོད་བྱེད་བཞིན་ཡོད་སྐོར་བརྗོད་ཡོད་པ་མ་ཟད། པེ་ཅིན་ཉེན་རྟོག་ཁང་གིས་གྲོང་ཁྱེར་ཡོངས་སུ་གུ་ཡུར་བ་ ༢ ཀྱི་མིང་དང་ཞཱིན་ཅང་གི་རླངས་འཁོར་ ༤ ཡི་ཨང་རྟགས་བཅས་འཚོལ་ཞིབ་བརྡ་ཁྱབ་བཏང་ཡོད་འདུག
ཁ་སང་ཧོང་ཀོང་ལན་ཧྭ་ཞོགས་པའི་ཚགས་པར་གྱིས་གནས་ཚུལ་སྤེལ་བ་ལྟར་ན། རྒྱ་གཞུང་གིས་རྩད་གཅོད་བྱེད་བཞིན་པའི་དོགས་ཡོད་ཉེས་ཅན་ ༨ ལས་མི་གཅིག་སི་ཁྲོན་ཞིང་ཆེན་ནས་ཞཱིན་ཅང་དུ་གནས་སྤོར་བྱས་པའི་རྒྱ་རིགས་ཤིག་ཡིན་པ་དང་། ཐེངས་འདིའི་དོན་རྐྱེན་བྱུང་རྗེས། རྒྱ་གཞུང་གིས་གྲོང་ཁྱེར་ཡོངས་སུ་ཡུ་གུར་འཇིགས་སྐུལ་དྲག་སྤྱོད་པས་ཟིང་ཆ་སློང་བཞིན་ཡོད་པས་དོགས་ཟོན་ནན་པོ་དགོས་པའི་བརྡ་ཁྱབ་བཏང་བ་ལྟར། རྒྱ་རིགས་ཚོས་ཡུ་གུར་བར་སྡང་ཟུག་དང་འཁོན་སེམས་ཆེ་རུ་འགྲོ་བཞིན་ཡོད་འདུག
ཐེངས་འདིའི་དོན་རྐྱེན་ཐད་པེ་ཅིན་གྱི་ཡུ་གུར་སློབ་མ་ཞིག་གིས་བརྗོད་དོན། “ས་གནས་སྲིད་གཞུང་ལ་མི་མང་པོ་རེ་ཐག་ཆད་ཀྱི་ཡོད་སྟབས། ཁོ་ཚོ་མཐོ་རིམ་དཔོན་རིགས་དང་འཛམ་གླིང་མི་མང་གིས་དོ་སྣང་ཡོང་ཆེད་པེ་ཅིན་དུ་ཡོང་བ་ཡིན་སྲིད་ལ། ལོ་འདི་ཚོར་ང་ཚོས་ཞཱིན་ཅང་གི་གནད་དོན་ཐོག་རྟོག་ཞིབ་བྱེད་སྐབས་རྩོད་རྙོག་ཇེ་ཆེ་དང་འགལ་བ་མངོན་གསལ་དུ་འགྱུར་བཞིན་འདུག སྲིད་གཞུང་གིས་ཆོས་ལུགས་སྟངས་འཛིན་བྱས་ཡོད་ཀྱང་ཆོས་ལུགས་ཀྱི་གནད་དོན་འབུར་དུ་ཐོན་པ་དང་། མི་མང་གི་རེ་འབོད་སྦ་གསང་བྱས་ཡོད་ཀྱང་སྔར་ལས་ཡོངས་ཁྱབ་ཏུ་གྱུར། དེ་བཞིན་མི་མང་གི་བསམ་ཚུལ་བཙན་གནོན་བྱས་ཡོད་ཀྱང་སྔར་ལས་མཐོ་རླབས་འཕྱུར་བཞིན་ཡོད་པ་རེད། གནད་དོན་འདི་དག་ཐག་གཅོད་དགོས་ཚེ། མི་རིགས་རང་སྐྱོང་ས་ཁུལ་གྱི་བཅའ་ཁྲིམས་ནང་གསལ་ལྟར། གྲངས་ཉུང་མི་རིགས་ཀྱི་ཆོས་ལུགས་རང་དབང་དང་སྐད་ཡིག་རིག་གཞུང་ལ་སྲུང་གཙི་བྱས་ཏེ། མི་རིགས་གཞན་དང་རིག་གནས་བརྗེ་རིས་བྱེད་སྐབས་ཕན་ཚུན་གུས་བཀུར་ཤེས་དགོས་པ་ལས། དྲག་པོའི་སྲིད་བྱུས་ཀྱིས་ཁ་གཏད་བཅག་སྟེ་ཡོང་ཐབས་མེད”ཅེས་བརྗོད་འདུག
