གཟའ་ཟླ་བའི་ཉིན་རྒྱ་གར་གསང་བའི་ལས་ཁུངས་ཀྱིས་དྲག་སྤྱོད་པ་ཞིག་འཛིན་བཟུང་བྱས་ཏེ་ད་ལོའི་ཕྱི་ཟླ་ ༧ པའི་ནང་གནས་མཆོག་རྡོ་རྗེ་གདན་དུ་འབར་རྫས་འཇོག་མཁན་ངོས་འཛིན་ཐུབ་ཡོད་འདུག
དེ་རིང་རྒྱ་གར་དུས་བབ་སྟེང་གནས་ཚུལ་སྤེལ་པ་ལྟར་ན། རྒྱ་གར་གསང་བའི་ལས་ཁུངས་ཀྱིས་ཟླ་འདིའི་ཚེས་ ༤ ཉིན་ཇར་ཁང་ཌི་( Jharkhand )མངའ་སྡེའི་རྒྱལ་ས་རན་ཅི་ནང་རྟེན་གཞི་བྱས་པའི་མགྲོན་ཁང་ཞིག་ལ་འཇབ་རྒོལ་བྱས་ཏེ། དྲག་སྤྱོད་པ་མོ་ཇིབ་(Mujib)ཟེར་བ་འཛིན་བཟུང་བྱས་པ་བརྒྱུད་འབར་རྫས་ ༢༧ དང་། འཆར་འགོད་དཔེ་རིས་སོགས་རྙེད་སོན་བྱུང་ཡོད་འདུག་ལ། དེ་དག་ནི་ད་ལོའི་ཕྱི་ཟླ་ ༧ ཚེས་ ༧ ཉིན་གནས་མཆོག་རྡོ་རྗེ་གདན་གྱི་མཆོད་རྟེན་ཉེ་ཁོར་དུ་འབར་གས་དོན་རྐྱེན་བྱུང་བ་དང་། ཕྱི་ཟླ་ ༡༠ ཚེས་ ༢༧ ཉིན་རྒྱ་གར་བྷེ་ཧར་མངའ་སྡེའི་རྒྱལ་ས་པ་ཊི་ན་(patna)ནང་འབར་གས་དོན་རྐྱེན་བྱུང་བ་ཁག་དང་འབྲེལ་བ་ཡོད་པ་གསལ་རྟོགས་ཐུབ་འདུག
རེས་གཟའ་ཟླ་བའི་ཉིན་རྒྱ་གར་གསང་བའི་ལས་ཁུངས་ཀྱིས་རྙེད་སོན་བྱུང་བའི་དཔེ་རིས་ཡིག་ཆ་ཁག་གི་ནང་གསལ་བ་ལྟར་ན། གྲོང་ཁྱེར་པ་ཊི་ནའི་འབར་གས་དོན་རྐྱེན་དེ་ནི་རྒྱ་གར་གྱི་འཇིགས་སྐུལ་དྲག་སྤྱོད་པ་ཏེ་སིན་ཨག་དྷར་(Tehsin Akhtar)དང་ཧ་དྷར་ཨ་ལི་(Haidar Ali) གཉིས་ཡིན་ཞིང་། གཞན། རྡོར་གདན་ཐའེ་ལན་ཌིའི་དགོན་པའི་ཉེ་འགྲམ་དུ་འབར་རྫས་འཇོག་མཁན་དེ་ནི་ཨཱན་སར་རིས་(Imtiaz Ansari )ཡིན་པ་དང་། ༧རྒྱལ་བ་ཀརྨ་པའི་གཏེར་སྒར་དགོན་པའི་སྒོ་འགྲམ་དུ་འབར་རྫས་འཇོག་མཁན་ནི། ཟླ་སྔོན་མར་པ་ཊི་ན་གྲོང་ཁྱེར་མེ་འཁོར་འབབ་ཚུགས་ཀྱིི་འབར་གས་དོན་རྐྱེན་འོག་རང་སྲོག་ཤོར་བའི་འཇིགས་སྐུལ་རིང་ལུགས་པ་ཏ་རེ་ཁེའུ་ (Ainul alias Tarique)སོགས་ཡིན་འདུག
པ་ཊི་ནའི་མེ་འཁོར་འབབ་ཚུགས་ཀྱི་འབར་གས་དོན་རྐྱེན་འོག་འཛིན་བཟུང་བྱས་པའི་དྲག་སྤྱོད་པ་ཨན་སར་རིས་ཀྱིས་བརྗོད་པ་ལྟར་ན། རྡོར་གདན་གྱི་འབར་གས་དེ་དག་ནི་འཇིགས་སྐུལ་པ་ཏེ་སན་གྱིས་བཀོལ་བྱུས་ཡིན་པ་ལས་ཁོ་རང་ལ་འབྲེལ་བ་མེད་ཚུལ་བརྗོད་འདུག ཐེངས་འདིར་འཛིན་བཟུང་བྱས་པའི་དྲག་སྤྱོད་པ་མོ་ཇིབ་ནི་རྡོ་རྗེ་གདན་དུ་འབར་རྫས་འཇོག་མཁན་དང་། དེ་མིན་རྒྱ་གར་ནང་འབར་གས་དོན་རྐྱེན་འདྲ་མིན་བྱུང་བ་ཁག་ལ་འབྲེལ་བ་ཡོད་པའི་བྱེད་གཏེ་གཙོ་བོ་ཞིག་ཀྱང་ཡིན་འདུག
