ཁ་སང་རྒྱ་དཀར་ནག་གཉིས་ཀྱི་མཐའ་མཚམས་སྲུང་དམག་བར་སྦྱོང་བརྡར་ཞིག་རྒྱ་ནག་བྱང་ཕྱོགས་དམག་དཔུང་བཀོད་འདོམས་ལྟེ་གནས་སུ་མགོ་འཛུགས་བྱས་ཡོད་འདུག
ཁ་སང་ཕྱི་ཚེས་ ༥ ཉིན་ཁྲིན་ཏུའུ་རྟེན་གཞི་བྱས་པའི་རྒྱ་ནག་གི་བྱང་ཕྱོགས་དམག་དཔུང་བཀོད་འདོམས་ཁང་དུ། བཀོད་འདོམས་ཁང་དེའི་དམག་སྤྱི་གཞོན་པ་དབྱང་ཅིན་ཧྲན་ (Yang Jinshan) དང་རྒྱ་གར་གྱི་གནམ་མཆོངས་དམག་དཔུང་གི་དམག་སྤྱི་གཞོན་པ་བྷ་ཌེ་ཡ་ (Vinod Bhatia) གཉིས་ཀྱི་སྣེ་ཁྲིད་འོག རྒྱ་གར་དཀར་ནག་གཉིས་ཀྱི་དམག་མི་ ༣༢༠ ལྷག་གིས་ཉིན་ ༡༠ རིང་འཇིགས་སྐུལ་དྲག་སྤྱོད་པར་རྒོལ་རྡུང་དམག་སྦྱོང་ཞེས་པ་ཞིག་མགོ་བཙུགས་བྱས་ཡོད་པ་དང་། དེའི་ནང་དམག་མི་ཕན་ཚུན་གཉིས་བར་དེང་དུས་ཀྱི་མཚོན་ཆ་བེད་སྤྱོད་གཏོང་སྟངས་དང་དམག་འཁྲུག་གི་ཐབས་ཇུས། དེ་བཞིན་འཇིགས་སྐུལ་དྲག་སྤྱོད་པས་མི་སྣ་བཙན་འཁྲིད་དང་གཏའ་མར་ཉར་བ། འཇིགས་སྐུལ་འཇབ་རྒོལ་བྱེད་སྐབས་དམག་མིས་གདོང་ལེན་བྱེད་ཕྱོགས་བཅས་ཀྱི་དམག་སྦྱོང་ཞིག་ཡིན་འདུག
ཐེངས་འདིའི་དམག་སྦྱོང་སྐོར་ལ་དམག་སྤྱི་གཞོན་པ་གཉིས་ཀྱིས་ཤིན་ཧྭ་གསར་ཁང་གི་གསར་འགོད་པའི་བཅར་འདྲི་དང་ལེན་བྱས་ཏེ། དམག་སྤྱི་གཞོན་པ་དབྱང་ཅིན་ཧྲན་ (Yang Jinshan) ཡིས། རྒྱ་དཀར་ནག་གཉིས་ལ་འཇིགས་སྐུལ་པའི་ཉེན་ཁ་གཅིག་མཚུངས་ཡོད་པ་དང་། རྒྱ་ནག་གི་མཐུན་ཕྱོགས་རྒྱལ་ཁབ་པ་ཀི་སི་ཐན་ཡིན་ཡང་། པེ་ཅིན་གྱིས་རྒྱ་གར་མཉམ་དུ་ཡིད་ཆེས་བློས་འགེལ་དང་དམག་མི་ཕན་ཚུན་བར་མཉམ་ལས་གོང་འཕེལ་གཏོང་དགོས་ཀྱི་ཡོད་ཅེས་བརྗོད་པ་དང་། རྒྱ་གར་དམག་སྤྱི་གཞོན་པ་བྷ་ཌེ་ཡ་ཡིས་ཀྱང་། རྒྱ་དཀར་ནག་གཉིས་ཀྱི་གྲོས་ཆོད་བཞག་པ་ལྟར་རྒྱལ་ཁབ་གཉིས་ཀྱིས་འབྲེལ་ལམ་བསྐྱར་གསོ་མགོ་འཛུགས་བྱས་ཡོད་པ་དང་། དམག་མི་ཕན་ཚུན་བར་དམག་སྦྱོང་ཡག་ཤོས་སྤྲོད་ལེན་བྱས་ན། ཕྱོགས་གཉིས་ཀར་ཁེ་ཕན་ཆེན་པོ་ཡོད་ཅེས་བརྗོད་འདུག
གསར་ལམ་ཁག་ཏུ། རྒྱ་དཀར་ནག་གཉིས་བར་གྱི་དམག་སྦྱོང་འདི་ནི། ཟླ་སྔོན་མའི་ཚེས་ ༢༣ ཉིན། རྒྱ་གར་གྱི་སྲིད་བློན་མན་མོ་ཧན་སིན་དང་རྒྱ་ནག་གི་སྲིད་བློན་ལི་ཁེ་ཆང་གཉིས་པེ་ཅིན་མཇལ་འཕྲད་ཀྱིས་ས་མཚམས་སྲུང་སྐྱོབ་ཀྱི་མཉམ་ལས་གྲོས་ཆོད་ (BDCA)ཞེས་པའི་ནང་དོན་ལྟར། རྒྱལ་ཁབ་གཉིས་མཐའ་སྲུང་དམག་མིས་ཕན་ཚུན་ལ་ཡིད་ཆེས་དང་ས་མཚམས་བརྟན་བརླིང་ཞི་བདེ་ཡོང་ཆེད་ཡིན་སྐོར་སོགས་བརྗོད་འདུག
༢༠༠༧ ལོར་རྒྱ་ནག་གི་གྲོང་ཁྱེར་ཀོང་མེན་ ( Kunming) དུ། རྒྱ་གར་དང་རྒྱ་ནག་གཉིས་ཀྱི་དམག་སྦྱོང་ཐེངས་དང་པོ་བྱས་ཡོད་པ་དང་། ༢༠༠༩ ལོར་རྒྱ་གར་གྱི་མངའ་སྡེ་ཀཱ་ནཱ་ཌཱ་ (Karnataka) ནང་དམག་སྦྱོང་ཐེངས་གཉིས་པ་བྱས་ཡོད། ༢༠༡༠ ལོར་རྒྱ་གར་གྱི་བྱང་ཕྱོགས་དམག་དཔུང་བཀོད་འདོམས་ཁང་དུ་དམག་སྦྱོང་ཐེངས་གསུམ་གྲ་སྒྲིག་བྱེད་སྐབས། རྒྱ་གར་མངའ་ཁོངས་ཀཱ་ཤི་མིར་གྱི་མི་སེར་གྱི་ཕྱི་སྐྱོད་ལག་ཁྱེར་ཐོག་ཏུ་རྒྱ་ནག་གི་ཐོངས་མཆན་མ་སྤྲད་པར། སྤྱིར་བཏང་གི་ཤོག་བུ་ཞིག་གི་སྟེང་ཐོངས་མཆན་སྤྲད་དེ། མངའ་སྡེ་དེ་ནི་རྒྱ་གར་གྱི་མངའ་ཁོངས་ཡིན་པ་ངོས་ལེན་མེད་པའི་རྣམ་འགྱུར་བསྟན་ཡོད་སྟབས། རྒྱལ་ཁབ་གཉིས་བར་གྱི་དམག་སྦྱོང་ཐེངས་གསུམ་པ་དེ་བྱེད་ཐུབ་མེད་པ་དང་། སྐབས་དེ་ནས་ད་ལོའི་བར་གྱི་ལོ་གསུམ་རིང་དམག་སྦྱོང་འབྲེལ་ལམ་བསྐྱར་མཐུད་ཐུབ་མེད།
ཁྲིན་ཏུའུ་རྟེན་གཞི་བྱས་པའི་རྒྱ་ནག་བྱང་ཕྱོགས་དམག་དཔུང་བཀོད་འདོམས་ཁང་དེ་ནི། བོད་ཀྱི་ལྷོ་བྱང་ས་ཁུལ་གཙོས་རྒྱ་གར་དང་ས་འབྲེལ་ཁག་ཏུ་མཐའ་སྲུང་བཀོད་འདོམས་ཀྱི་ལས་འགན་འཁུར་ཡོད་པའི་རྒྱ་ནག་བཅིངས་གྲོལ་དམག་ཟེར་བའི་ལྟེ་གནས་གལ་ཆེན་ཞིག་ཡིན་འདུག
གསར་འགོད་པ། ལྷ་སྐྱབས་རྒྱལ།
