ཁ་སང་སུད་སིའི་ཛུ་རིག་ཏུ་བོད་མི་སྒེར་བ་ཁག་ཅིག་གི་གོ་སྒྲིག་འོག་བསམ་བློ་བརྗེ་རེས་དང་སྤོབས་པ་མཉམ་བསྐྱེད་ཅེས་པའི་བགྲོ་གླེང་གནང་ཡོད་འདུག
ཁ་སང་ཚེས་ ༧ ཉིན། སུད་སི་ས་གནས་ཛུ་རིག་ནང་༼བསམ་བློ་བརྗེ་རེས་དང་སྤོབས་པ་མཉམ་སྐྱེད་ཀྱི་བགྲོ་གླེང་།༽ཐེངས་ ༡༢ པ་ཚོགས་ཡོད་པ་དང་། ཐེངས་འདིའི་བགྲོ་གླེང་ཐོག་སུད་སི་ས་གནས་གྲོས་ཚོགས་ཀྱི་ཚོགས་གཙོ་གཞོན་གཉིས་གཙོས་པའི་འཐུས་མི་རྣམས་གདན་ཞུས་ཐོག་མི་མང་མཉམ་ཞུགས་ཀྱིས། བོད་མི་རིགས་ཀྱི་སྤྱི་ཚོགས་ཁྲོད་དཀའ་སྡུག་ལ་མ་འཛེམས་པར་ལོ་དང་ཟླ་བ་བསྟུན་ནས་ཞབས་ཞུ་སྒྲུབ་བཞིན་པའི་འཐུས་མི་དག་གི་མི་ཚེ་ཉམས་མྱོང་དང་འབྲེལ་བའི་སྤྱི་ཚོགས་གནད་དོན་ཞེས་པའི་བརྗོད་གཞིའི་ཐོག་བགྲོ་གླེང་གནང་ཡོད་པ་དང་། དེའི་རྗེས་མི་མང་དང་དྲི་བ་དྲིས་ལན་དང་བསམ་ཚུལ་ལྷུག་བརྗོད་གནང་སོང་།
བགྲོ་གླེང་འདིའི་ཐོག་བསམ་ཚུལ་སྣ་ཚོགས་བྱུང་བའི་ཁྲོད། སུད་སི་དང་ལིཀ་ཏེན་སི་ཊཡན་བོད་རིགས་མི་མང་གི་ས་གནས་འཐུས་ཚོགས་འདི་བཙན་བྱོལ་བོད་མིའི་བཅའ་ཁྲིམས་དང་། བོད་མི་མང་སྤྱི་འཐུས་ལྷན་ཚོགས་ཀྱི་སྒྲིག་གཞིའི་འོག་བཙུག་པའི་གཞུང་འབྲེལ་ས་གནས་འཐུས་ཚོགས་ཤིག་ཡིན་པ་དང་། ས་འཐུས་འདི་ཉིད་བོད་པའི་རྩ་དོན་སྒྲུབ་ཕྱོགས་ཐད་ཧ་ཅང་གལ་ཆེན་ཡིན་པ་མི་མང་གིས་ཧ་གོ་དགོས་པ་མ་ཟད། མ་འོངས་པར་མི་མང་ཚང་མའི་འགན་ཁུར་བའི་ཐོག་ནས་སྐབས་བཅུ་དྲུག་པའི་ས་གནས་འཐུས་མི་འོས་འདེམས་གནང་དགོས་པ་ཤིན་ཏུ་གལ་ཆེན་ཡིན་སྐོར། ང་ཚོའི་སྤྱི་ཚོགས་ནང་ཕན་ཚུན་སྐྱོན་བརྗོད་གནང་མཁན་མང་པོ་ཡོང་གི་ཡོད་ཀྱང་། དོན་དངོས་ཐོག་སྤྱི་ཚོགས་ནང་ལག་ལེན་གནང་མཁན་ཤིན་ཏུ་ཉུང་ཉུང་ཡིན་པ་འདི་ནི་དཀའ་ངལ་ཆེ་ཤོས་ཡིན་པ་དང་། ས་འཐུས་ཁ་ཤས་ཀྱིས་ས་གནས་ཁག་ནང་འགན་ཏག་ཏག་འཁུར་གྱི་མེད་ཚུལ་སོགས་སྤྱི་ཚོགས་ཀྱི་དཀའ་ངལ་མང་པོ་ཞིག་གི་ཐོག་བགྲོ་གླེང་གནང་སོང་།
བགྲོ་གླེང་འདི་བཞིན་སུད་སིའི་ནང་གནས་སྡོད་བཀྲ་ཤིས་དཔོན་ཚང་དང་དཀོན་མཆོག་བཀྲ་ཤིས། གླུ་རྒྱལ་དོན་གྲུབ་གསུམ་གྱིས་དང་བླངས་ཐོག་ ༢༠༡༡ ཟླ་ ༦ པའི་ནང་མགོ་འཛུགས་ཀྱིས་ད་སྔ་བགྲོ་གླེང་ཐེངས་ ༡༢ གོ་སྒྲིག་གིས་སྤྱི་ཚོགས་ཀྱི་དཀའ་གནད་མང་པོ་ཞིག་གི་ཐོག་རང་མོས་བགྲོ་གླེང་གནང་སྟེ། སུད་སི་ནང་བོད་རིགས་མི་མང་ཁྲོད་ཆབ་སྲིད་དང་རིག་གནས། བོད་དོན་འཐབ་རྩོད་བཅས་ཀྱི་གོ་རྟོགས་སྤེལ་ཡོད་པ་རེད།
གསར་འགྱུར་གཏོང་མཁན། ཙ་ཡུས་ཕུན་ཚོགས།
