དེ་རིང་ཉིན་རྒྱབ་བོད་ཨ་མདོ་བླ་བྲང་བཀྲ་ཤིས་འཁྱིལ་ཨ་མཆོག་དགོན་པའི་གྲྭ་ཚུལ་ཁྲིམས་རྒྱ་མཚོ་ལགས་ཀྱིས་རྒྱ་གཞུང་ལ་ངོ་རྒོལ་གནང་སྟེ་རང་ལུས་མེར་བསྲེགས་ཀྱིས་སྐུ་གྲོངས་ཡོད་འདུག
ད་ལྟ་རང་རྒྱ་གར་ལྷོ་ཕྱོགས་འབྲས་སྤུངས་དགོན་པའི་གྲྭ་བསོད་ནམས་ལགས་ཀྱིས་གནས་ཚུལ་བཏང་འབྱོར་བྱུང་བར། དེ་རིང་ཉིན་རྒྱབ་བོད་ནང་གི་ཆུ་ཚོད་ ༢།༣༠ སྟེང་། ཀན་ལྷོ་ཁུལ་བསང་ཆུ་རྫོང་ཨ་མཆོག་གྲོང་བརྡལ་དུ། ཨ་མཆོག་དགོན་པའི་གྲྭ་ཚུལ་ཁྲིམས་རྒྱ་མཚོ་ལགས་ཀྱིས། བོད་བསྟན་སྲིད་མི་རིགས་ཆེད་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་འདུག དེ་མ་ཐག་ས་གནས་སྐྱ་སེར་མི་མང་གིས་ཁོང་གི་སྐུ་ཕུང་དགོན་པའི་ནང་གདན་འདྲེན་ཞུས་ཏེ། དགོན་པའི་གྲྭ་བ་ ༤༠༠ ལྷག་གིས་མཆོད་འབུལ་དང་བསྔོ་སྨོན་གསུང་བཞིན་ཡོད་འདུག
ཁོང་གིས་ཞལ་ཆེམས་ཡི་གེ་ཞིག་བཞག་ཡོད་པའི་ནང་། རྒྱ་ནག་གི་བཙན་དབང་ཁྲིམས་འོག་ན་བོད་མི་ཚོས་སྡུག་བསྔལ་མྱོང་གི་ཡོད་ཅིང་། ཁོ་རང་གིས། རྒྱལ་བ་བསྟན་འཛིན་རྒྱ་མཚོ་རང་ཡུལ་དུ་ཕེབས་ཆེད་དང་། པཎ་ཆེན་སྣང་བ་མཐའ་ཡས་བཙོན་གྲོལ་ཐོབ་ཆེད། བོད་མི་ས་ཡ་དྲུག་གི་སྡུག་བསྔལ་སེལ་ཆེད་རང་ལུས་མེར་བསྲེགས་བཏང་བ་ཡིན་ཚུལ་དང་། བོད་མི་ཚོས་མཐུན་སྒྲིལ་བྱེད་དགོས་སྐོར་སོགས་བཀོད་ཡོད་འདུག
རྒྱལ་གཅེས་དཔའ་བོ་གྲྭ་ཚུལ་ཁྲིམས་རྒྱ་མཚོ་ལགས་ཨ་མཆོག་དགོན་པའི་རྒྱུད་པ་གྲྭ་ཚང་གི་གྲྭ་བ་ཡིན་ཞིང་ད་ལྟ་རང་ལོ་ ༤༣ ཡིན་འདུག ཁོང་གི་སྐྱེས་ཡུལ་ཨ་མཆོག་ཉི་མ་ལུང་ཡིན་པ་དང་། ཕ་མིང་ལ་རྟ་མགྲིན་བཀྲ་ཤིས་ཟེར་ཞིང་སྔ་མོ་ནས་འདས་ཟིན་ཞིང་མ་མིང་ལ་ལྷ་མོ་སྐྱིད་ཞུ་བཞིན་ཡོད་འདུག ཁོང་གི་སྤུན་ཆེ་བའི་མིང་ལ་ཚེ་བྷེ་ཟེར་ཞིང་། གཞན། གཅོད་པ་དང་སངས་རྒྱས་སྒྲོལ་མ་ཟེར་བའི་སྲིང་མོ་གཉིས་ཡོད་འདུག ཁོང་ཆོས་དང་རིག་གནས་ཀུན་ལ་ཐུགས་སྣང་ཆེ་ཞིང་། དགོན་པའི་ཆོ་ག་ཕྱག་ལེན་ལ་སྙིང་རུས་ཆེན་པོས་བློར་འཛིན་དང་ཉམས་ལེན་གནང་མཁན་ཞིག་དང་། གཅོད་ཀྱི་གདམས་པ་ཟབ་མོར་ཉམས་ལེན་སྒོམ་སྒྲུབ་དང་ཆུ་མིག་འགྲིམ་ཏེ་དཀའ་ཐུབ་ལ་རྒྱུན་བཞུགས་གནང་མཁན་ཞིག་ཀྱང་ཡིན་འདུག
སྐུ་གཤེགས་རྒྱལ་གཅེས་དཔའ་བོ་སྙིང་ནས་གུས་འདུད་དང་བཅས། དཔའ་བོའི་སྙིང་སྟོགས་དང་། གཟི་བརྗེད། ལར་ཞེན་བཅས་ནམ་ཡང་ཉམས་པ་མེད་པར་རྒྱལ་གྱུར་ཅིག
གཟི་བརྗིད། རླབས་ཆེན། དཔའ་རྒོད། བདེན་སྟོབས་ཀྱི་སྐྱེས་བུ་དམ་པ་རྣམ་པར་སྙིང་ནས་གུས་འདུད་ཞུ། བཀའ་དྲིན་ཞུ། བདེ་བ་ཅན་དུ་སྐྱེ་བར་སྨོན།
དཔའ་བོའི་རྣམ་ཤེས་སླར་ཡང་བོད་ནས་འཁྲུངས་བར་ཤོག ཞལ་ཆེམས་ནང་གསལ་བོ་རེད། གོང་ས་མཆོག་ལ་དྲི་བ་གནང་འདུག མ་གོ་མ་ཐོས་མི་གནང་བའི་རེ་བ་ཡོད།
ད་དངོས་གནས་དྲང་གནས་མཚམས་འཇོག་ཚུལ་རེད། སེམས་སྐྱོ་ནས་འཚོ་བ་ལ་དོན་སྙིང་མེད་པ་ཞིག་གི་སྣང་བ་འཆར་ཡོང་གི བཙན་བྱོལ་བོད་གཞུང་གིས་ཀྱང་བོད་ནང་གི་རང་ལུས་མེར་བསྲེགས་སྐབས་རེར་མཚམས་འཇོག་དགོས་ཀྱི་ཡོད་མདོག་མདོག། མཚམས་མེར་མུ་མཐུད་སྲེག་འཇུག་རྒྱུ་ལས་ཐབས་མེད་མདོག་མདོག མཚམས་རེར་དེ་ལ་སྐད་ཆ་བཤད་པའི་དབང་ཆ་མེད་མདོག་མདོག དེ་འདྲ་མ་གནང་རོགས། ཁ་སངས་པོའི་ཐོག་ནས་འབོད་སྐུལ་ཞིག་གནང་རོགས།
བོད་འབར་ཐལ། རྒྱལ་སྤྱིའི་སྤྱི་ཚོགས་གཉིད་ཐལ། རྒྱ་ནག་དམར་གཞུང་སྨྱོས་ཐལ། བཙན་བྱོལ་བོད་མི་བོར་ཐལ།
ཨོཾ་མ་ཎི་པདྨེ་ཧཱཾ་་་་་་་་་་་བོད་རྒྱལ་ལོ། ཨོཾ་མ་ཎི་པདྨེ་ཧཱཾ་་་་་་་་་་་བོད་རྒྱལ་ལོ། ཨོཾ་མ་ཎི་པདྨེ་ཧཱཾ་་་་་་་་་་་བོད་རྒྱལ་ལོ།