ཉི་ཧོང་གཞུང་གིས་རྒྱལ་སྲུང་བདེ་འཇགས་སྔོན་རྩིས་བརྒྱ་ཆ་ ༥ སྤར་ཆ་བཏང་སྟེ་དམག་ཆས་ཤུགས་ཆེ་རུ་གཏོང་འཆར་དེར་རྒྱ་ནག་གཞུང་གིས་སྐྱོན་བརྗོད་ཤུགས་ཆེན་བྱས་འདུག
རྒྱལ་སྤྱིའི་གསར་ལམ་ཁག་ནང་གནས་ཚུལ་ཐོན་པ་ལྟར་ན། ཟླ་འདིའི་ཚེས་ ༡༩ ཉིན་ཉི་ཧོང་སྲིད་བློན་ཤིང་ཛོ་ཨ་བྷེ་(Shinzo Abe)ལགས་ཀྱིས་ཉི་ཧོང་གི་དམག་དོན་འཕེལ་རྒྱས་གཏོང་ཐབས་ཐད། ལོ་ལྔ་ཅན་གྱི་གྲོས་ཆོད་ཞིག་གྲོས་ཚོགས་ནང་འཁྱེར་ཡོད་པ་དེར། ཁ་སང་གྲོས་ཚོགས་འཐུས་མི་ཚོས་བགྲོ་གླེང་བྱས་པ་བརྒྱུད་རྒྱབ་སྐྱོར་ཐོབ་ཡོད་འདུག
གྲོས་ཆོད་དེའི་ནང་ཉི་ཧོང་གི་རྒྱལ་དོན་བདེ་སྲུང་སྔོན་རྩིས་ལོ་སྔོན་མ་དག་ལས་བརྒྱ་ཆ་ ༥ སྤར་ཆ་བཏང་སྟེ། འབྱུང་འགྱུར་ལོ་ལྔའི་ནང་ཉི་ཧོང་གིས་ཤུགས་ཚད་ལྡན་པའི་མཁའ་དམག་འཕུར་མདེལ་ ༡༧ དང་། མཚོ་ཐོག་གཏོར་རྒོལ་མཚོན་ཁག་ ༢༢། དེ་བཞིན། འགོག་སྲུང་མ་ལག་གི་དམག་ཆས་འཕྲུལ་ཆས་ ༥༢ ཙམ་བཟོ་སྐྲུན་སོགས་དམག་འཐབ་འཕྲུལ་རིགས་རྐྱང་ཡིན་སྟབས། རྒྱ་ནག་གཞུང་གིས་དེ་ནི་ཉི་ཧོང་གིས་རྒྱ་ནག་ལ་ཁ་གཏད་པའི་དྲག་འཐབ་གྲ་སྒྲིག་ཅིག་ཡིན་སྐོར་སྐྱོན་བརྗོད་ཤུགས་ཆེན་བྱས་ཡོད་འདུག
ཤིང་ཛོ་ཨ་བྷེ་ལགས་ཀྱིས་གནད་དོན་དེའི་སྐོར་གསར་འགོད་གསལ་བསྒྲགས་ཤིག་གི་ཐོག ཉི་ཧོང་གཞུང་གིས་རྒྱལ་སྲུང་བདེ་འཇགས་དམག་དོན་སྲིད་ཇུས་དེ་འདྲ་འཛིན་དགོས་དོན་ནི། ཉེ་ཆར་རྒྱ་ནག་གཞུང་གིས་ཞི་བདེ་རྒྱ་མཚོའི་མངའ་ཁུལ་ལ་མཁའ་དབྱིངས་དབྱེ་མཚམས་ཐིག་ཚད་བཟོས་པ་དང་། རྒྱ་ནག་གི་མཁའ་དམག་དང་མཚོ་དམག་གཉིས་ཀྱིས་མཉམ་རུབ་ཐོག་ཉི་ཧོང་གི་སིན་ཁཱ་ཁུ་ ( Senkaku ) མཚོ་གླིང་ལ་གློ་བུར་འཇབ་རྒོལ་དང་བཙན་འཛུལ་བྱེད་ཀྱི་ཡོད་སྟབས། ལྷོ་ཤར་ཨེ་ཤ་ཡའི་བདེ་འཇགས་དང་ཡང་སྒོས་ཉི་ཧོང་གི་རྒྱལ་སྲུང་བདེ་འཇགས་ཐོག་གོ་མཚོན་འཕེལ་རྒྱས་གཏོང་རྒྱུའི་ཐབས་ཇུས་ཤིག་མི་འཛིན་ཐབས་མེད་བྱུང་། ཞེས་དང་། ང་ཚོའི་དམག་དོན་སྲིད་ཇུས་དེ་ཕྱི་གསལ་ནང་གསལ་ཞིག་ཡིན་སྟབས། མ་འོངས་པར་འཛམ་གླིང་ཞི་བདེ་དང་སྲུང་སྐྱོབ་བྱ་རྒྱུར་ནུས་པ་ལྡན་པའི་ཆ་ཤས་ལེན་ཐུབ་པ་བྱ་རྒྱུ་ཡིན་སྐོར་སོགས་བརྗོད་འདུག
འོན་ཀྱང་། རྒྱ་ནག་བདེ་སྲུང་ལྷན་ཁང་གི་མགྲིན་ཚབ་པ་གྷེན་ཡང་ཤིན་(Geng Yansheng )གྱིས་ཤིན་ཧཱ་གསར་འགྱུར་ནང་། ཉི་ཧོང་སྲིད་བློན་ཤིང་གིས་རྒྱལ་ཁབ་བདེ་འཇགས་སྲུང་སྐྱོབ་ལ་ཁ་གཡར་ཏེ་དམག་དོན་རྒྱ་སྐྱེད་བྱེད་ཀྱི་ཡོད་ཚུལ་དང་། ཐེངས་འདིའི་ཉི་ཧོང་གི་ལས་གཞི་དེས་ཁྱིམ་མཚེས་རྒྱལ་ཁབ་ཁག་གི་བདེ་འཇགས་ལ་ཉེན་ཁ་བཟོ་བཞིན་ཡོད་པ་མ་ཟད། ལས་གཞི་དེ་ལ་བརྟེན་ཏེ་ཨེ་ཤ་ཡའི་རྒྱལ་ཁབ་ཁག་འབྲེལ་ལམ་ལ་དོ་ཕོག་འགྲོ་སྲིད་སྐོར་སོགས་བརྗོད་འདུག
ཆབ་སྲིད་དབྱེ་ཞིབ་པ་ཚོས་བརྗོད་པ་ལྟར་ན། ད་ལྟ་རྒྱ་ནག་དང་ཉི་ཧོང་གི་འབྲེལ་ལམ་དེ་ཉིན་རེ་བཞིན་ཇེ་སྡུག་ཏུ་འགྲོ་ཡི་ཡོད་སྟབས། ཨ་རི་གཙོས་རྒྱལ་ཁབ་ཁག་གིས་དོ་སྣང་བྱེད་བཞིན་ཡོད་སྐོར་དང་། དེ་བཞིན། འཛམ་གླིང་སྟེང་གི་དཔལ་འབྱོར་སྟོབས་ཤུགས་ཆེ་ཤོས་གཉིས་པ་དང་གསུམ་པ་ཡིན་པའི་ཨེ་ཤ་ཡའི་རྒྱལ་ཁབ་གཉིས་ཀྱི་འབྲེལ་ལམ་དེ། ཞི་བདེ་རྒྱ་མཚོའི་མཚོ་གླིང་ཐོག་རྒྱ་ནག་གཞུང་གིས་མཚོ་གླིང་དབྱེ་མཚམས་ཐིག་ཚད་བཟོས་པར་བརྟེན་ནས་བྱུང་བ་ཞིག་ཡིན་སྐོར་བརྗོད་འདུག
ཉི་ཧོང་རྒྱལ་སྲུང་བདེ་འཇགས་སྐོར་གྱི་ཆེད་མཁས་པ་ཎ་རོ་ཤི་གྷི་མི་ཇི་ཤི་ཌ་ལགས་ཀྱིས། ང་ཚོས་རྒྱལ་ཁབ་གཞན་གྱི་དམག་དོན་སྲིད་ཇུས་ལ་ཐེ་བྱུས་མ་བྱས་པར་རང་སོར་བསྡད་པ་ཡིན་ན་གནས་བཟོད་བདེ་པོ་ཡོད་ཀྱང་། རྒྱ་ནག་གི་སྟོབས་ཤུགས་ཉིན་རེ་བཞིན་འཕེལ་རྒྱས་ཤུགས་ཆེན་འགྲོ་ཡི་ཡོད་པ་དང་། ལྷག་པར་དུ་ཨ་རིས་ཨེ་ཤ་ཡའི་ཁུལ་དུ་ལངས་ཕྱོགས་བརྟན་པོ་དང་། དེ་ཁུལ་རྒྱལ་ཁབ་ཁག་གི་བདེ་འཇགས་ལ་འགན་ཁུར་དེ་ཙམ་ལེགས་པོ་བྱེད་ཀྱི་མེད་སྟབས། ཉི་ཧོང་གི་ངོས་ནས་ཞི་བདེ་རྒྱ་མཚོའི་མངའ་ཁུལ་སྲུང་སྐྱོབ་བྱ་རྒྱུར་ཆ་ཤས་ལེན་དགོས་སྐོར་བརྗོད་འདུག
ཀྲོག་ཁྱོག་ཏུ་རྟེན་གཞི་བྱས་པའི་སོ་ཧྥི་ཡ་གཙུག་ལག་སློབ་གྲྭ་ཆེན་མོའི་རྒྱལ་སྤྱིའི་འབྲེལ་ལམ་ཐོག་གི་མཁས་དབང་ཁོ་ཆི་ཎ་ཁ་ཎོ་ལགས་ཀྱིས། ཤིང་ཛོ་ཨ་བྷེ་ལགས་ཀྱིས་འདས་པའི་ཉི་ཧོང་གི་དམག་འཁྲུག་དོན་རྐྱེན་ཁག་ནང་མཉམ་ཞུགས་ཀྱིས་མི་གསོད་ཁྲག་སྦྱོར་ག་ཚོད་ཕྱིན་ཡོད་མེད་སྐོར་རྒྱུས་མངའ་ཙམ་ཡང་མ་བྱས་པར་དམག་དོན་སྲིད་ཇུས་དེ་འདྲ་ཞིག་བཟུང་བ་དེ་ནི་ཆེས་ནོར་འཁྲུལ་ཅན་ཞིག་ཡིན་ཚུལ་བརྗོད་འདུག
ད་ལྟ་ཉི་ཧོང་ནི་ཨ་རི་དང་རྒྱ་ནག་གཉིས་ཀྱི་འཕྲོས་དམག་དོན་ཐོག་འགྲོ་གྲོན་གཏོང་མཁན་ཤུགས་ཆེ་ཤོས་ཀྱི་རྒྱལ་ཁབ་ཨདྷ་གསུམ་པའི་གྲས་སུ་ཚུད་ཀྱི་ཡོད་པ་མ་ཟད། གོ་མཚོན་ལག་ཆ་མང་ཤོས་ཀྱི་རྒྱལ་ཁབ་ཞིག་ཀྱང་ཆགས་ཡོད་འདུག
