རྒྱ་ནག་གིས་བར་སྣང་ཕྱོགས་སྟོན་འཕྲུལ་སྐར་མ་ལག་བརྒྱུད་དེ་ལྷོ་ཤར་ཨེ་ཤའི་རྒྱལ་ཁབ་ཁག་ལ་བརྡ་འཕྲིན་ཚོང་འབྲེལ་རྒྱ་སྐྱེད་བཏང་སྟེ་ཨ་རིར་ཁ་གཏད་གཅོག་འཆར་ཡོད་པ་རེད་ཟེར།
ཟླ་འདིའི་ཚེས་ ༢༢ ཉིན་རོའི་ཌིར་གསར་ཁང་གིས་རྒྱ་ནག་གི་བར་སྣང་ཕྱོགས་སྟོན་འཕྲུལ་སྐར་མ་ལག་སྐོར་ལ་གནས་ཚུལ་སྤེལ་བ་ལྟར་ན། ཡུ་རོབ་མཐུན་ཚོགས་ཀྱི་རྒྱབ་སྐྱོར་འོག་རྒྱ་ནག་གིས་པེ་ཊེའོ་ (Beidou) ཕྱོགས་སྟོན་འཕྲུལ་སྐར་མ་ལག་ཨང་གཉིས་པ་ཞེས་པ་ཞིག་བར་སྣང་དུ་བཏང་བ་ལེགས་འགྲུབ་བྱུང་ཡོད་ཅིང་། དེ་ནི་དམག་དོན་སྟོབས་ཤུགས་དང་ས་ཁམས་བརྟག་དཔྱད། ལྷོ་ཤར་ཨེ་ཤ་ཡའི་རྒྱལ་ཁབ་ཁག་གི་ནང་བརྡ་འཕྲིན་སོགས་ཀྱི་ཚོང་ལས་ཐོག་བཀོལ་སྤྱོད་བྱེད་འཆར་ཡོད་འདུག གནས་ཚུལ་དཔྱད་བརྗོད་པ་ཚོས་ཕྱོགས་སྟོན་འཕྲུལ་སྐར་མ་ལག་འདིས་ལོ་མང་རིང་ཨ་རིའི་འཛམ་གླིང་ཕྱོགས་སྟོན་མ་ལག་ (GPS) དང་། ཡུ་རོབ་མཐུན་ཚོགས་ཀྱི་གྷ་ལེ་ལེའོ་(Galileo)། ཨུ་རུ་སུའི་གྷུ་ལོབ་ནྰ་སི་(Glonass)བཅས་ཀྱིས་བར་སྣང་བརྡ་འཕྲིན་ལག་རྩལ་ལ་དབང་བསྒྱུར་བྱེད་བཞིན་པར་ཁ་གཏད་བཅག་པ་ཞིག་ཡིན་སྐོར་བརྗོད་འདུག
ལྷོ་ཤར་ཨེ་ཤ་ཡའི་ནང་ཐེ་ལན་ཌི་ནི་རྒྱ་ནག་གི་པེ་ཊེའོ་ཕྱོགས་སྟོན་འཕྲུལ་སྐར་མ་ལག་གི་ཚོང་འབྲེལ་བྱེད་མཁན་རྒྱལ་ཁབ་ཐོག་མ་དེ་ཆགས་ཡོད་ཅིང་། དེ་ནི་ད་ལོའི་ཕྱི་ཟླ་ ༣ པའི་ནང་རྒྱ་ནག་དང་ཐེ་ལན་ཌིའི་གཞུང་གཉིས་ཀྱིས་ཨ་སྒོར་ས་ཡ་ ༣༠༠ ལྷག་གི་ཚོང་འབྲེལ་གྲོས་ཆོད་བཞག་སྟེ། ལོ་རྗེས་མའི་ལོ་མགོ་ནས་བཟུང་ཐེ་ལན་ཌིའི་གཞུང་གིས་ཚོང་ཟོག་སྐྱེལ་འདྲེན་དང་གློག་ཤུགས་བགོ་འགྲེམས། དེ་བཞིན་རང་བྱུང་གནོད་འཚེ་ཆར་རླུང་སྔོན་འགོག་སོགས་ལ་བེད་སྤྱོད་གཏོང་རྒྱུ་ཡིན་འདུག
ཡུ་རོབ་ཀྱི་འཛམ་གླིང་ཕྱོགས་སྟོན་འཕྲུལ་སྐར་མ་ལག་ཁང་(GNSS)གིས་གནས་ཚུལ་སྤེལ་བར། ད་ལོར་འཛམ་གླིང་བརྡ་འཕྲིན་ཕྱོགས་སྟོན་འཁོར་ལོའི་ཚོང་རའི་ཡོངས་སྒོ་བརྒྱ་ཆ་ ༡༠ ཙམ་འཕར་ཡོད་སྟབས། ༢༠༢༠ ལོར་ཨ་སྒོར་ཐེར་འབུམ་ ༢༢༠ ལྷག་འཕར་རྒྱུ་ཡིན་པའི་ཚོད་དཔག་བྱེད་ཀྱི་ཡོད་ཅིང་། རྒྱ་ནག་གཞུང་གིས་ལྷོ་ཤར་ཨེ་ཤ་ཡའི་རྒྱལ་ཁབ་ཚོར་ཚོང་འབྲེལ་བྱས་ཏེ། ༢༠༢༠ ལོར་པེ་ཊེའོ་ཕྱོགས་སྟོན་འཕྲུལ་སྐར་མ་ལག་གི་ཚོང་འབྲེལ་ཡོངས་སྒོ་ཨ་སྒོར་ཐེར་འབུམ་གཅིག་ལྷག་བཟོ་ཐུབ་པའི་དམིགས་ཚད་བཟུང་ཡོད་པ་མ་ཟད། རྒྱལ་སྤྱིའི་བརྡ་འཕྲིན་ཚོང་རྭའི་ནང་འཛུལ་ཞུགས་བྱེད་ཐབས་སུ་འབད་བརྩོན་བྱེད་ཀྱིན་ཡོད་འདུག
ཡུ་རོབ་བར་སྣང་ས་ཚིགས་ཉམས་ཞིབ་པ་ཞིག་གིས། རྒྱ་ནག་གིས་ད་བར་ཨ་རིའི་འཛམ་གླིང་ཕྱོགས་སྟོན་འཕྲུལ་སྐར་དང་ཨུ་རུ་སུའི་གྷུ་ལོབ་ནྰ་སི་གཉིས་ཀྱི་བརྡ་འཕྲིན་རིན་མེད་ཐོག་བེད་སྤྱོད་གཏོང་གི་ཡོད་ཀྱང་། དེའི་བརྡ་རྟགས་ཚད་ལྡན་མིན་པ་དང་ཁྱད་ལས་རང་བཞིན་གྱི་ཆ་རྐྱེན་མེད་སྟབས། རྒྱ་ནག་དམག་དོན་ལས་ཁུངས་ཀྱིས་རྒྱ་ནག་གི་མགོ་ཁྲིད་ཏིན་ཞོ་ཕིན་ནས་བཟུང་རྒྱལ་ཁབ་སྲུང་སྐྱོབ་ཆེད་རང་སྐྱ་འཕེར་བའི་བར་སྣང་ཕྱོགས་སྟོན་འཕྲུལ་སྐར་མ་ལག་བཟོ་སྐྲུན་ལག་རྩལ་ཐོག་འབད་བརྩོན་བྱས་པའི་གྲུབ་འབྲས་ཤིག་ཡིན་སྐོར་བརྗོད་འདུག
སྔ་ལོར་རྒྱ་ནག་གིས་པེ་ཊེའོ་ཕྱོགས་སྟོན་འཕྲུལ་སྐར་མ་ལག་ཨང་གཉིས་པ་བར་སྣང་དུ་བཏང་བ་ལེགས་འགྲུབ་བྱུང་ཡོད་སྟབས། རྒྱ་ནག་བཅིང་འགྲོལ་དམག་ཟེར་བས་ཤར་ལྷོ་རྒྱ་ནག་རྒྱ་མཚོའི་མངའ་ཁུལ་དུ་དམག་དཔུང་རྒྱ་སྐྱེད་དང་། ཉི་ཧོང་དང་ལྷོ་ཀོ་རི་ཡ་གཉིས་ནང་རྟེན་གཞི་བྱས་པའི་ཨ་རིའི་མཚོ་དམག་གི་འཇབ་རྒོལ་ལ་གདོང་ལེན་བྱེད་ཐུབ་པའི་ཡིད་ཆེས་བྱེད་ཀྱི་ཡོད་ཅིང་། ཆབ་སྲིད་དབྱེ་ཞིབ་པ་ཚོས་རྒྱ་ནག་གིས་ཕྱོགས་གང་ཐད་ནས་ལྷོ་ཤར་ཨེ་ཤ་ཡའི་རྒྱ་མཚོའི་ནང་གཏན་སྡོད་བྱེད་བཞིན་པའི་ཨ་རིའི་དམག་དཔུང་ལ་གདོང་ལེན་བྱེད་ཀྱི་ཡོད་སྟབས། ཨ་རིའི་གཞུང་གིས་ཀྱང་ལྷོ་ཤར་ཨེ་ཤ་ཡའི་རྒྱལ་ཁབ་ཚོ་དང་མཉམ་དུ་ཕྱི་འབྲེལ་གཙོ་བོར་བཟུང་སྟེ་དཔལ་འབྱོར་འབྲེལ་ལམ་སྔར་ལས་ཤུགས་ཆེ་རུ་གཏོང་ངེས་ཡིན་སྐོར་བརྗོད་འདུག
༢༠༠༠ ལོར་པེ་ཊེའོ་བར་སྣང་ཕྱོགས་སྟོན་འཕྲུལ་སྐར་མ་ལག་ཨང་དང་པོ་དེ་བར་སྣང་དུ་བཏང་སྟེ། དེའི་ནང་མིས་བཟོས་སྐར་ཚོགས་འཕྲུལ་སྐར་རིམ་པ་གཉིས་ཡོད་འདུག ༢༠༡༡ ལོར་པེ་ཊེའོ་བར་སྣང་ཕྱོགས་སྟོན་འཕྲུལ་སྐར་མ་ལག་ཨང་གཉིས་པ་བར་སྣང་དུ་བཏང་སྟེ་མིས་བཟོས་འཕྲུལ་སྐར་ ༡༠ མཉམ་དུ་ཟླ་སྒྲིལ་བཏང་ཡོད་སྟབས། རྒྱ་ནག་གིས་ལྷོ་ཤར་ཨེ་ཤ་ཡའི་མངའ་ཁོངས་སུ་བརྡ་འཕྲིན་གྱི་མཐུན་རྐྱེན་སྐྲུན་ཡོད་འདུག
གསར་འགོད་པ། ལྷ་སྐྱབས་རྒྱལ།
