ཚོགས་པ་གསར་པས་ལྡི་ལིའི་གཞུང་འཛིན་རྒྱུ་རེད།

རྒྱ་གར་རྒྱལ་ས་ལྡི་ལིར་ལོ་གཉིས་གོང་གསར་དུ་བཙུགས་པའི་མི་མང་དཀྱུས་མའི་ཚོགས་པས་ཁ་སང་གསལ་བསྒྲགས་ཤིག་སྤེལ་ཏེ། ལྡི་ལི་ས་གནས་སྲིད་གཞུང་ཁོ་རང་ཚོས་འཛིན་སྐྱོང་བྱ་རྒྱུ་ཡིན་སྐོར་གསལ་བསྒྲགས་སྤེལ་འདུག

ཁ་སང་རྒྱ་གར་རྒྱལ་ས་ལྡི་ལིའི་མི་སེར་དཀྱུས་མའི་ཆབ་སྲིད་ཚོགས་པའི་མགོ་ཁྲིད་ཨར་ཝུན་ཌི་( Arvind Kejriwal)ལགས་ཀྱིས་ལྡི་ལིའི་གྲོང་ཁྱེར་སྤྱི་ཁྱབ་པ་ཎ་ཇིབ་ཇོང་ ( Najeeb Jung ) ལགས་དང་ལྷན་དུ་གྲོས་མོལ་བྱས་ཏེ། ཁོང་གིས་ལྡི་ལི་ས་གནས་སྲིད་གཞུང་འཛིན་སྐྱོང་བྱ་རྒྱུ་ཡིན་སྐོར་ཁྱབ་བསྒྲགས་དང་། བཀའ་བློན་དྲུག་འདེམས་སྒྲུག་གིས་མིང་ཐོ་གསལ་བསྒྲགས་བྱས་འདུག ལྡི་ལིའི་ས་གནས་སྲིད་གཞུང་དེ་ཀོང་རེ་སེ་(Congress)ཚོགས་པའི་དབང་བསྒྱུར་འོག་ལོ་ངོ་ ༡༥ ཙམ་ཕྱིན་ཡོད་ཀྱང་། ཟླ་འདིའི་ཚེས་ ༤ ཉིན། རྐུབ་སྟེགས་ ༧༠ ཡོད་པའི་ལྡི་ལིའི་ས་གནས་སྲིད་གཞུང་གི་གྲོས་ཚོགས་འོས་བསྡུའི་ཁྲོད། བྷེ་ཇཱའི་པི་(BJP)ཚོགས་པར་འོས་གྲངས་ ༣༢ དང་། ཀོང་རེ་སེ་ཚོགས་པར་འོས་གྲངས་ ༨ ། མི་སེར་དཀྱུས་མའི་ཚོགས་པ་ (AAP)ཞེས་པར་འོས་གྲངས་ ༢༨ བཅས་ཐོབ་སྟེ་ཀོང་རེ་སེ་ཚོགས་པ་ཕམ་ཉེས་བྱུང་ཡོད།

འོས་བསྡུ་དེའི་ཁྲོད་ཆབ་སྲིད་ཚོགས་པ་གང་ལའང་གྲོས་ཚོགས་འཐུས་མིའི་རྩ་འབོར་གྱི་གསུམ་ཆ་གཉིས་ལོངས་མེད་པར། ཚོགས་པ་གཅིག་གིས་ལྡི་ལིའི་ས་གནས་གཞུང་འཛིན་སྐྱོང་བྱེད་པའི་བརྒྱ་ཆ་ལོན་མེད་སྟབས། ཨར་ཝུན་ཌི་ཡིས་སྣེ་ཁྲིད་པའི་མི་སེར་དཀྱུས་མའི་ཆབ་སྲིད་ཚོགས་པ་དང་ཀོང་རེ་སེ་ཚོགས་པ་གཉིས་མཉམ་རུབ་ཐོག་ལྡི་ལིའི་ས་གནས་གཞུང་འཛིན་སྐྱོང་བྱ་རྒྱུ་ཡིན་སྐོར་བསྒྲགས་འདུག

ཀོང་རེ་སེ་དང་བྷེ་ཇཱའེ་པེ་ཚོགས་པ་གཉིས་ཀྱིས་རེ་བ་ཆེན་པོ་བྱེད་ཀྱིན་པའི་འོས་བསྡུ་དེའི་ནང་། ཚོགས་པ་བཙུགས་ཏེ་ལོ་ངོ་ ༢ ཙམ་ལས་ཕྱིན་མེད་པའི་མི་སེར་དཀྱུས་མའི་ཚོགས་པར་རྒྱལ་ཁ་ཆེན་པོ་ཐོབ་ཡོད་སྟབས། མ་འོངས་པར་རྒྱ་གར་རྒྱལ་ཡོངས་སུ་རྒྱ་ཁྱབ་ཏུ་ཕྱིན་ཏེ། ལོ་རྗེས་མའི་ཕྱི་ཟླ་ ༤ པའི་ཚེས་ ༣ ཉིན་མགོ་འཛུགས་བྱ་འཆར་གྱི་རྒྱལ་ཡོངས་འོས་བསྡུ་ཆེན་མོར་ཤུགས་རྐྱེན་ཐེབས་སྲིད་པའི་སེམས་འཚབ་འོག ད་ལྟ་ནས་བྷེ་ཇཱའེ་པེ་དང་ཀོང་རེ་སེ་ཚོགས་པས་མངའ་སྡེ་འདྲ་མིན་ནང་འོས་བསྡུའི་ཁྱབ་བསྒྲགས་བྱེད་བཞིན་ཡོད་འདུག

 བྷེ་ཇཱའེ་པེའི་ཚོགས་པས་ཁོ་ཚོའི་འོས་མི་ཎ་རིན་ཌ་མུ་དྷི་ ( Narendra Modi )ཡིན་པ་མིང་འདོན་གྱིས་ “འོས་ཤོག་གཅིག་དང་དངུལ་ཤོག་གཅིག་ “ (One vote,One note) ཅེས་པའི་འབོད་ཚིག་འོག་ཁྱབ་བསྒྲགས་བྱེད་བཞིན་ཡོད་པ་དང་། ཀོང་རེ་སེ་ཚོགས་པས་རཱ་ཧུལ་གྷན་དྷི་ ( Rahul Gandhi)ཞེས་པ་མིང་འདོན་གྱིས་ “བག་ལེབ་ཧྲིལ་བོ་ཟ་འདོད་ན། ཉིན་བརྒྱར་ལས་ཀ་རག་དགོས་ན།  ཀོང་རེ་སེ་ཚོགས་པར་འོས་ལྡུག” ( Eat Full roti,work for 100 days,vote for Congress)ཅེས་པའི་འབོད་ཚིག་འོག་ཁྱབ་བསྒྲགས་བྱེད་བཞིན་ཡོད་འདུག

ལྡི་ལི་ས་གནས་ཀོང་རེ་སེ་ཚོགས་པའི་མགོ་ཁྲིད་དང་ད་ལྟའི་གྲོང་ཁྱེར་སྤྱི་ཁྱབ་བློན་ཆེན་ཤཱི་ལ་དྷེག་ཤཱི་ལགས་ཀྱིས། མི་མང་དཀྱུས་མིའི་ཆབ་སྲིད་ཚོགས་པའི་མགོ་ཁྲིད་ཨར་ཝིན་ཌི་ལགས་སུ་འཚམས་འདྲི་དང་། མི་མང་གི་རེ་བ་ཆུད་ཟོས་སུ་མ་བཏང་བར་མདུན་སྐྱོད་ཀྱིས་མང་ཚོགས་ཚོ་སྤྲོ་བ་འཕེལ་བའི་གཞུང་ཞིག་ཆགས་ཐུབ་པ་བྱེད་དགོས་སྐོར་དང་། དེ་སྔ་འོས་བསྡུའི་སྐབས་ཁས་ལེན་ཞུས་པ་བཞིན་ཁ་ཞེ་གཉིས་མེད་ཐོག་མང་ཚོགས་ཀྱི་དཀའ་ངལ་སེལ་ཐུབ་པ་བྱ་དགོས་སྐོར་བརྗོད་འདུག

ཆབ་སྲིད་དབྱེ་ཞིབ་པ་ཚོས་བརྗོད་པ་ལྟར་ན། མི་མང་དཀྱུས་མའི་ཆབ་སྲིད་ཚོགས་པ་དེ་ནི་མང་ཚོགས་ཀྱི་མངོན་འདོད་སྒྲུབ་མཁན་གྱི་ཚོགས་པ་ཞིག་ཡིན་པ་མ་ཟད། ལྟ་བ་ལངས་ཕྱོགས་མི་འདྲ་བའི་ཚོགས་པ་འདིའི་གསར་བརྗེའི་རླུང་འཚུབ་དེ་རྒྱ་གར་རྒྱལ་ཡོངས་ནང་ཁྱབ་རྒྱུ་ཡིན་སྐོར་བརྗོད་འདུག ལྷོ་ཤར་ཨེ་ཤ་ཡའི་ཆེད་ལས་མཁས་པ་ཀུ་ཎལ་ཀུ་ལི་ལགས་ཀྱིས། མི་སེར་དཀྱུས་མའི་ཆབ་སྲིད་ཚོགས་པའི་ལས་འགུལ་འདི་ནི་རྒྱ་གར་དབྱིན་ཡུལ་འོག་ཏུ་ཡོད་སྐབས་དབྱིན་ཇི་བཙན་རྒྱལ་རིང་ལུགས་མཐར་སྐྲོད་གཏོང་དགོས་ཞེས་པའི་རྒྱལ་ཡོངས་ཡར་ལངས་ལས་འགུལ་རྗེས་སུ་ཐོན་པའི་མི་མང་མཉམ་ཞུགས་ཀྱི་ལས་འགུལ་ཤུགས་ཆེ་ཤོས་སྤེལ་མཁན་གྱི་ཚོགས་པ་ཞིག་ཆགས་ཡོད་སྟབས། ཚོགས་པ་འདིས་མང་ཚོགས་ཀྱི་མངོན་འདོད་བསྒྲུབ་ངེས་ཡིན་ཚུལ་བརྗོད་འདུག གཞོན་སྐྱེས་ཚན་རིག་ཞིབ་འཇུག་པ་སཱོ་མན་ལགས་ཀྱིས། ཨར་ཝུན་ཌི་ཡིས་མགོ་ཁྲིད་པའི་མི་སེར་དཀྱུས་མའི་ཚོགས་པ་དེ་ནི་རྒྱ་གར་ནང་གི་དམར་ཤོག་ཚོགས་པ་གསར་པ་ཞིག་དང་ཚོགས་པའི་མགོ་གཙོ་ནི་སི་ཊ་ལཱེན་རེད་ཅེས་དང་། ཚོགས་པ་འདིས་མི་མང་གི་རེ་བ་བསྒྲུབ་རྒྱུ་དཀའ་ལས་ཁག་པོ་ཡིན་སྐོར་སྐྱོན་བརྗོད་བྱས་འདུག

མི་སེར་དཀྱུས་མའི་ཆབ་སྲིད་ཚོགས་པ་ (AAM AADMI Party) ཞེས་བ་འདི་ནི་ ༢༠༡༡ ལོའི་ཟླ་ ༡༢ ཚེས་ ༣ ཉིན། རྒྱ་གར་གྱི་ལྐོག་ཟ་རུལ་སུངས་ལ་ངོ་རྒོལ་སྣེ་ཁྲིད་བྱེད་མཁན་སྐད་དྲག་ཅན་ཨ་ཎ་ཨ་ཛྷ་རི་(Anna Hazare)ལགས་དང་། ཨར་ཝུན་ཌི་ཁེ་ཆེ་རེ་ཝལ་ (Arvind Kejriwal)ལགས་གཉིས་ཀྱི་གཙོས་མི་སྣ་ཁག་ཅིག་གིས་གསར་འཛུགས་བྱས་ཤིང་། ཚོགས་པ་འདིའི་དམིགས་ཡུལ་རྒྱ་གར་གྱི་ལྐོག་ཟ་རུལ་སུངས་རྩ་མེད་གཏོང་རྒྱུ་དེ་ཡིན་པ་དང་། ཚོགས་པའི་མཚོན་རྟགས་ནི་ཕྱག་མ་དང་ཚོགས་པའི་མགོ་ཁྲིད་ཨར་ཝུན་གཉིས་བཞག་ཡོད།

ཨར་ཝུན་ལགས་ནི་ ༡༩༦༨ ལོར་རྒྱ་གར་གྱི་མངའ་སྡེ་ཧར་ཡཱ་ཎ་ནང་སྐྱེས་ཤིང་། ཀཱ་རག་པུར་ཞེས་པའི་གཙུག་ལག་སློབ་ཆེན་དུ་རླངས་འཁོར་བཟོ་སྐྲུན་ཐོག་ཆེད་ལས་ཐོན་རྗེས། རྒྱ་གར་དབུས་དཔྱ་ཁྲལ་ལས་ཁུངས་གནང་ཕྱག་ལས་གནང་ཡོད་པ་དང་། རྗེས་སུ་ལས་ཁུངས་དེའི་སྤྱི་ཁྱབ་གཞོན་པའི་འགན་ཁུར་ཡོད། ༢༠༡༡ ལོར་རྒྱ་གར་རྒྱལ་ས་ལྡི་ལིར་ལྐོག་ཟ་རུལ་སུངས་ལ་རྒོལ་བའི་གསར་བརྗེ་ཆེན་པོ་བྱུང་སྐབས་ལས་འགུལ་སྣེ་ཁྲིད་གནང་ཡོད་ཅིང་། ད་ལྟ་མི་སེར་དཀྱུས་མའི་ཚོགས་པའི་མགོ་ཁྲིད་དང་། ཟླ་འདིའི་ཚེས་ ༢༨ ཉིན་ལྡི་ལིའི་གཞུང་གསར་པའི་སྤྱི་ཁྱབ་བློན་ཆེན་དུ་བསྐོ་བཞག་གནང་འཆར་ཡོད་འདུག