ཨ་ཇིབ་གནའ་རྫས་རྐུ་ལ་ཤོར།

ཁ་སང་ཨི་ཇིབ་གཞུང་གིས་གསལ་བསྒྲགས་སྤེལ་བར་ཨི་ཇིབ་ཀྱི་གནའ་རྫས་མཛོད་ཁང་ལ་རྐུ་ཤོར་ཏེ་ཅ་དངོས་རྩ་ཆེན་ ༩༦ ཙམ་བོར་རླག་ཕྱིན་ཡོད་འདུག

ཁ་སང་ཕྱི་ཚེས་ ༡ ཉིན། ཨི་ཇིབ་གཞུང་གནའ་རྫས་སྲུང་སྐྱོབ་བློན་ཆེན་ལྷན་ཁང་གིས་གསལ་བསྒྲགས་སྤེལ་བ་ལྟར་ན། ཨི་ཇིབ་ལྷོ་ཕྱོགས་ཀྱི་གྲོང་ཁྱེར་ཨ་སུ་བན་ (Aswan)ནང་གི་ཨ་སུ་བན་གནའ་རྫས་བང་མཛོད་ཁང་དུ་རྐུན་མ་ཤོར་ཏེ། ཕྱི་ལོ་མ་བྱུང་སྔོན་ཏེ་ཨི་ཇིབ་རྒྱལ་རབས་ཧྥེ་རོབ་(Pharaohs) སྐབས་ཀྱི་སྐུ་བརྙན་དང་རིན་པོ་ཆེའི་ཕྲེང་བ། ཅ་དངོས་བཅས་ཀྱི་རིགས་ ༩༦ ལྷག་བོར་རླག་བྱུང་ཡོད་འདུག འོན་ཀྱང་། གནའ་རྫས་དེ་དག་མཛོད་ཁང་གི་ནང་དུ་ཡོད་པ་དང་། ག་དུས་བོར་བརླག་ཕྱིན་པ། རྐུན་མ་སུ་ཡིན་གྱི་དོགས་ཡོད་ཉེས་ཅན་སུ་ཡིན། རིན་ཐང་ག་ཚོད་ལ་གནས་མིན་སོགས་གང་ཡང་བརྗོད་མི་འདུག

གནའ་རྫས་མཛོད་ཁང་གི་ལས་བྱེད་ཞིག་གིས་གསར་འགོད་པར། མཛོད་ཁང་གི་ཐོ་གཞུང་ནང་ཡོད་པའི་གནའ་རྫས་རིགས་༩༦ བོར་རླག་བྱུང་ཞིང་། འདི་ནི་མཛོད་ཁང་དེར་གོད་ཆག་བྱུང་པ་དང་པོ་ཡིན་ཡང་། མཛོད་ཁང་ནང་ལོགས་ཀྱི་སྒོ་ལྕགས་གཅོག་སྟངས་ལ་གཞུག་ན་ཆེད་ལས་ཅན་རྐུན་མ་ཞིག་མིན་པ་གསལ་བོ་རེད། དེ་ཙམ་ལས་ཞིབ་ཕྲ་བརྗོད་པའི་དབང་ཆ་མེད་ཅེས་བརྗོད་ཡོད་འདུག གནའ་རྫས་རྟོག་ཞིབ་མཁན་ཚོས། ཨི་ཇིབ་ནང་ཟིང་འཁྲུག་བྱུང་བ་ནས་ད་བར་གནའ་རྫས་མཛོད་ཁང་མང་པོ་ཞིག་ལ་རྐུ་ཇག་ཤོར་ཏེ་ཅ་དངོས་རྩ་ཆེན་༨༠༠ ལྷག་བོར་བརླག་དང་ཆག་སྐྱོན་ཤོར་ཡོད་ཅེས་བརྗོད་འདུག

༢༠༡༡ ལོར་ཨི་ཇིབ་མང་ཚོགས་ཀྱིས་སྲིད་འཛིན་མོ་བྷ་རག་ (Hosni Mubarak) སྲིད་འཛིན་གོ་གནས་ནས་ཕྱིར་འཕུད་ཆེད་ཉིན་ ༡༨ རིང་ངོ་རྒོལ་བྱས་ཡོད་པ་དང་། སྐབས་དེར་རྒྱལ་ས་ཁད་རོབ་ནང་ཡོད་པའི་ཨི་ཇིབ་གནའ་རྫས་འགྲེམས་སྟོན་ཁང་དུ་རྐུ་ཇག་ཤོར་ཏེ། གནའ་རྫས་རིགས་ ༥༡ ཙམ་བོར་བརླག་ཕྱིན་ཡོད་ཅིང་། སྲིད་འཛིན་མོ་བྷ་རག་ཕྱིར་འཕུད་བྱས་ཏེ་ཅུང་མ་འགོར་བར། ཇོར་ཊན་མི་རིགས་ཡིན་པའི་ཚོང་པ་ཞིག་གིས་ཨི་ཇིབ་ཀྱི་གནའ་རྫས་ཊམ་ཀ་དང་གསེར་དངུལ་རྒྱན་ཆའི་རིགས་ ༣༧༥༣ ཙམ་ཕྱིར་འདྲེན་བྱེད་བཞིན་པའི་སྐབས་སུ་འཛིན་བཟུང་བྱས་ཡོད།