འདི་ལོའི་རྒྱ་གར་གྱི་སྲིད་བློན་འོས་མིའི་སྐོར་ལ་བསམ་ཤོག་བསྡུས་པ་བརྒྱུད་བྷེ་ཇཱའེ་པི་ཚོགས་པའི་འོས་མི་སྐུ་ཞབས་ཎ་རིན་ཌ་མུ་དྷིར་འོས་ཚད་མཐོ་ཤོས་རག་ཡོད་འདུག
ཁ་སང་རྒྱ་གར་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ལྡི་ལིའི་མང་ཚོགས་ཚོས་བསམ་ཤོག་འཕངས་པ་བརྒྱུད་མི་སེར་དཀྱུས་མའི་ཆབ་སྲིད་ཚོགས་པ་( AamAadmi Party)ཞེས་པས་འདི་ལོའི་རྒྱལ་ཡོངས་གྲོས་ཚོགས་འོས་བསྡུ་ཆེན་མོའི་ཁྲོད་ཤུགས་རྐྱེན་ཆེན་པོ་བཟོ་བཞིན་ཡོད་དང་། ཐེངས་འདིའི་སྲིད་བློན་འོས་མིའི་ཁྲོད་བྷེ་ཇཱའེ་པི་ཚོགས་པའི་འོས་མི་སྐུ་ཞབས་ཎ་རིན་ཌ་མུ་དྷི་ ( NarendraModi ) ལགས་སུ་བསམ་ཤོག་མང་ཤོས་ཨང་དང་པོ་དང་། མི་སེར་དཀྱུས་མའི་ཚོགས་པའི་སྲིད་བློན་འོས་མི་ཨར་ཝུན་ཁེ་ཅེ་རེ་ཝལ་( ArvindKejiriwal)ལགས་ཨང་གཉིས་པ། ཀོང་རེ་སེའི་ཚོགས་པའི་སྲིད་བློན་འོས་མི་ར་ཧུལ་གྷན་དྷི་(Rahul Gandhi)ལགས་ཨང་གསུམ་པ་བཅས་ཐོབ་ཡོད་འདུག
དུས་བབ་གསར་ཁང་གིས་རྒྱ་གར་རྒྱལ་ཡོངས་ཀྱི་གྲོང་ཁྱེར་ཆེ་ཁག་ ༨ དེ། ལྡི་ལི་ ( Delhi )དང་མོམ་བྷེ། ( Mumbai)། ཀཱ་ལི་ཀཱ་ཐཱ ( Kolkata)། མ་ངྷི་ར་སི ( Madras)། བྷིང་ལོར ( Bangalore )། ཧེ་དྷར་པཱ་ཐཱ ( Hyderabad)། པུ་ཎེ ( Pune)། ཨ་མི་ཌ་ལྦ་ཐཱ ( Ahmeddabad)སོགས་ཀྱི་མི་མང་རང་ལོ་ ༡༨ ནས་ ༤༥ བར་གྱི་མང་ཚོགས་ ༢༠༡༥ ཙམ་ལ་བསམ་ཤོག་བསྡུས་པ་ལྟར་ན། ཁག་ཅིག་གིས་སེར་དཀྱུས་མའི་ཚོགས་པར་འོས་བསྡུ་ཆེན་མོའི་ཁྲོད་གྲོས་ཚོགས་འཐུས་མིའི་རྐུབ་སྟེགས་ ༢༦ ནས་ ༥༠ བར་ཐོབ་རྒྱུ་དང་། མང་ཚོགས་བརྒྱ་ཆ་ ༢༦ ཙམ་གྱིས་རྐུབ་སྟེགས་ ༥༡ ནས་ ༡༠༠ བར་ཐོབ་རྒྱུ་ཡིན་པ། བརྒྱ་ཆ་ ༡༡ ཙམ་གྱིས་འཐུས་མི་ ༡༠༠ ལྷག་གྱི་རྐུབ་སྟེགས་ཐོབ་རྒྱུ་ཡིན་པ་བཅས་ཀྱི་ཚོད་དཔག་བྱས་ཡོད་པ་དང་། ཁྱོན་ཡོངས་ནས་ཐེངས་འདིར་རྒྱ་གར་རྒྱལ་ཡོངས་ཀྱི་མི་འབོར་བཞི་ཆའི་ ༣ ཙམ་གྱིས་མི་སེར་དཀྱུས་མའི་ཚོགས་པར་རྒྱལ་ཡོངས་འོས་བསྡུ་ཆེན་མོའི་ཁྲོད་མང་མོས་རྒྱལ་ཁ་ཐོབ་རྒྱུ་ཡིན་པའི་ཚོད་དཔག་བྱས་ཡོད་འདུག
ཐེངས་འདིའི་སྲིད་བློན་འོས་མིའི་སྐོར་ལ་བྷེ་ཇཱའི་པི་ཚོགས་པའི་སྲིད་བློན་འོས་མི་སྐུ་ཞབས་ཎ་རིན་ཌ་མུ་དྷི་ལགས་ལ་མང་ཚོགས་བརྒྱ་ཆ་ ༥༤ དང་། མི་སེར་དཀྱུས་མའི་ཆབ་སྲིད་ཚོགས་པའི་འོས་མི་ཨར་ཝུན་ཁེ་ཅེ་རེ་ཝལ་ལགས་སུ་བརྒྱ་ཆ་ ༢༥། ཀོང་རེ་སེ་ཚོགས་པའི་འོས་མི་ར་ཧུལ་གྷན་དྷིར་ལགས་སུ་བརྒྱ་ཆ་ ༡༤ བཅས་ཀྱི་རྒྱབ་སྐྱོར་ཐོབ་ཡོད་སྟབས། བྷེ་ཇཱའི་པིའི་སྲིད་བློན་འོས་མིར་བརྒྱ་ཆ་མཐོ་ཤོས་ཐོབ་ཡོད་ཀྱང་། མ་ངྷ་ར་སི་དང་མོམ་བྷེ་གཉིས་ནང་མི་སེར་དཀྱུས་མའི་ཚོགས་པའི་སྲིད་བློན་འོས་མིར་བརྒྱ་ཆ་མང་ཤོས་ཐོབ་ཡོད་འདུག
ཐེངས་འདིའི་འོས་བསྡུ་ཆེན་མོའི་ཁྲོད་མི་སེར་དཀྱུས་མའི་ཚོགས་པས་བྷེ་ཇཱའི་པི་དང་ཀོང་རེ་སེ་ཚོགས་པ་གཉིས་ཕམ་ཉེས་ཆེན་པོ་གཏོང་རྒྱུ་ཡིན་སྐོར་དང་། ལྷག་པར་དུ་ཏཱ་མིལ་ཎ་ངྷའོ་ས་ཁུལ་ནང་དབང་ཤུགས་ཆེན་པོ་ཡོད་པའི་ཌི་ཨེམ་ཁེ་ ( DKM)དང་ཨལ་ཨའེ་ཌི་ཨེམ་ཁེ་ ( AIADMK) ཚོགས་པ་གཉིས་ལ་འོས་བསྡུའི་ཁྲོད་བརྒྱ་ཆ་ ༤༤ ཙམ་གྱིས་ཕམ་ཉེས་ཕོག་རྒྱུ་ཡིན་སྐོར་བསྒྲགས་འདུག
ཐེངས་འདིའི་རྒྱ་གར་རྒྱལ་ཡོངས་འོས་བསྡུའི་ནང་མང་ཚོགས་ཚོས་མི་སེར་དཀྱུས་མའི་ཆབ་སྲིད་ཚོགས་པར་དོ་སྣང་ཆེན་པོ་བྱེད་དགོས་དོན་གང་ཡིན་སྐོར་ལ་རྒྱུས་ལོན་བྱས་པར། མང་ཚོགས་བརྒྱ་ཆ་ ༤༠ ཙམ་གྱིས་མི་སེར་དཀྱུས་མའི་ཆབ་སྲིད་ཚོགས་པས་ཉམ་ཐག་གི་དཀའ་ངལ་མང་པོ་ཞིག་ལ་ལྷག་བསམ་རྣམ་དག་ཐོག་བཅོས་བསྒྱུར་གཏོང་གི་ཡོད་སྐོར་དང་། མང་ཚོགས་བརྒྱ་ཆ་ ༣༥ ཙམ་གྱིས་ཚོགས་པ་འདིའི་མགོ་ཁྲིད་ཚོ་གཞུང་དྲང་ཡིན་ཡིན་སྐོར། བརྒྱ་ཆ་ ༢༤ ཙམ་གྱིས་ཚོགས་པ་འདིས་མང་ཚོགས་ཀྱི་མངོན་འདོད་ལྟར་གཞུང་འཛིན་སྐྱོང་བྱ་འཆར་ཡོད་པ། མང་ཚོགས་ ༤༤ ཙམ་གྱིས་ལྐོག་ཟ་རུལ་སུངས་ཀྱི་བྱ་སྤྱོད་དག་ཉུང་དུ་གཏོང་ཐུབ་སྐོར། མང་ཚོགས་བརྒྱ་ཆ་ ༢༩ ཙམ་གྱིས་ལྐོག་ཟ་རུལ་སུངས་ཀྱི་བྱ་སྤྱོད་དག་རྩ་མེད་བཟོ་ཐུབ་པར་ཡིད་ཆེས་བྱེད་ཀྱིན་ཡོད་འདུག
མི་སེར་དཀྱུས་མའི་ཆབ་སྲིད་ཚོགས་པས་སྣེ་ཁྲིད་པའི་ལྡི་ལི་ས་གནས་སྲིད་གཞུང་ལ་མང་ཚོགས་བརྒྱ་ཆ་ ༧༠ ཙམ་གྱིས་གདེང་འཇོག་བྱེད་ཀྱི་ཡོད་ཅིང་། ལྷག་པར་དུ་ལྡི་ལིའི་མང་ཚོགས་བརྒྱ་ཆ་ ༨༣ ཙམ་གྱིས་ཆ་འཇོག་ཤུགས་ཆེན་བྱེད་ཀྱིན་ཡོད་པ་དང་། རྒྱལ་ཡོངས་ནང་མང་ཚོགས་བརྒྱ་ཆ་ ༦༠ ཙམ་གྱིས་གདེང་འཇོག་ཆེན་པོ་བྱེད་ཀྱི་ཡོད་ཀྱང་། རིན་མེད་ཆུ་སྤྲོད་པ་དང་གློག་རིན་ཆག་ཡངས་གཏོང་བའི་སྲིད་ཇུས་དག་ནི་དཔལ་འབྱོར་འཕེལ་རྒྱས་གཏོང་ཐབས་ལ་འགན་ཁུར་མ་བླངས་པའི་བྱ་ཐབས་ཤིག་ཡིན་སྐོར་སྐྱོན་བརྗོད་ཀྱང་ཕོག་གི་ཡོད་འདུག འོན་ཀྱང་། མང་ཚོགས་བརྒྱ་ཆ་ ༦༠ ཙམ་གྱིས་སྲིད་ཇུས་དེས་དཔལ་འབྱོར་འཕེལ་རྒྱས་མགྱོགས་སུ་གཏོང་རྒྱུར་ཕན་ཐོགས་ཡོད་སྐོར་དང་། གཞན་བརྒྱ་ཆ་ ༢༧ ཙམ་གྱིས་དཔལ་འབྱོར་འཕེལ་རྒྱས་ཐོག་དོ་ཕོག་འགྲོ་རྒྱུ་ཡིན་སྐོར་བཅས་བསྒྲགས་འདུག
མང་ཚོགས་ཚོས་མི་སེར་དཀྱུས་མའི་ཆབ་སྲིད་ཚོགས་པར་ཁ་ཞེ་གཉིས་མེད་ཐོག་རྒྱབ་སྐྱོར་བྱས་ན། ཁོ་ཚོས་ཆབ་སྲིད་ཚོགས་པར་དཔལ་འབྱོར་ཐོག་རོགས་རམ་དང་འོས་བསྡུའི་ཆེད་ཁྱབ་བསྒྲགས་བྱེད་མིན་སྐོར་ལ་མང་ཚོགས་བརྒྱ་ཆ་ ༤༧ ཙམ་གྱིས་དཔལ་འབྱོར་ཐོག་མཐུན་རྐྱེན་སྦྱོར་གྱི་མིན་སྐོར་དང་། བརྒྱ་ཆ་ ༤༡ ཙམ་གྱིས་རོགས་རམ་བྱེད་ཀྱི་ཡིན་སྐོར་རྗོད་བཞིན་ཡོད་ཀྱང་། མང་ཚོགས་བརྒྱ་ཆ་ ༤༧ ཙམ་གྱིས་ཆབ་སྲིད་ཚོགས་པ་ཁྱབ་བསྒྲགས་དང་། བརྒྱ་ཆ་ ༤༢ ཙམ་གྱིས་དུས་ཚོད་བཏང་སྟེ་ཁྱབ་བསྒྲགས་བྱེད་ཀྱི་མིན་སྐོར་བརྗོད་འདུག འགའ་ཞིག་གིས་རྒྱལ་ཡོངས་འོས་བསྡུ་ཆེན་མོའི་ཁྲོད་མི་སེར་དཀྱུས་མའི་ཆབ་སྲིད་ཚོགས་པར་རྒྱལ་ཁ་ཐོབ་དགོས་ན་ལྡི་ལི་ས་གནས་སྲིད་གཞུང་ཇི་ལྟར་འཛིན་མིན་ལ་རག་ལས་ཡོད་སྐོར་སོགས་རྗོད་བཞིན་ཡོད་འདུག
ད་ལྟ་ཆབ་སྲིད་ཚོགས་པ་ཁག་གིས་རྒྱལ་ཡོངས་འོས་བསྡུ་ཆེན་མོའི་ཁྲོད་རྒྱལ་ཁ་ཐོབ་ཆེད་འོས་མི་ཁྱབ་བསྒྲགས་དང་དཔལ་འབྱོར་མཁོ་སྒྲུབ། མང་ཚོགས་སྐུལ་སློང་སོགས་ཀྱི་ལས་འགུལ་སྤེལ་བཞིན་ཡོད་འདུག
