ཆབ་མདོར་བྲོས་བྱོལ་དུ་ཕྱིན་པ།

མཁན་པོ་ཀར་ཚེས་བྲིས།

༄༅། །ཉིན་དེར་སྔར་རྒྱུན་ལྟར་དམངས་ཁྲོད་དུ་ཞིང་སྒྲུབ་འཚོགས་སུ་ཕྱིན་པ་ཡིན། ཉིན་བསྟུད་མར་ཁ་བ་བབས་དྲགས་པས་ས་མཐོ་ས་ཀུན་ཏུ་སྒང་གཤོངས་སྙོམས་པའི་ཚོར་སྣང་འབྱུང་བའི་ཁ་བ་ཆེན་པོ་བཞག་ཡོད་ཅིང༌། གྲང་ངར་ཅུང་ཟད་རྒྱས་འདུག འོན་ཀྱང་ཉིན་ཁ་ཤས་སྔོན་ནས་ཁས་བླངས་པ་ལྟར་དེ་རིང་ཅིས་ཀྱང་འགྲོ་དགོས། ངས་རང་ཉིད་འབོད་མཁན་ལ་སྡོང་རྒན་ཐང་ཞེས་པའི་འགག་སྒོ་གྲགས་ཆེན་དེ་ནས་ཐར་མིན་ཞིབ་འདྲི་བྱས་པ་ཡིན་ལ་རྒྱུན་ལྡན་གྱི་འགྲོ་ལུགས་ལྟར་ས་གནས་ནང་ཆེན་རྫོང་གི་འཐབ་ཕྱོགས་གཅིག་སྒྱུར་ལས་ཁུངས་ལ་ཆོག་མཆན་ཞུས་པ་ཡིན།

3གང་ལྟར་བསྐྱོད་དགོས། ཉིན་གུང་དུས་ཚོད་གཉིས་པའི་སྟེང་ནས་ང་རང་བསུ་མཁན་དང་མཉམ་དུ་ལམ་ལ་བསྐྱོད་པ་ཡིན། དུས་ཚོད་གཅིག་དང་ཕྱེད་ཙམ་གྱི་སྟེང་མཚོ་སྔོན་དང་བོད་ལྗོངས་ཏེ་ཞིང་ཆེན་གཉིས་ཀྱི་ས་མཚམས་སུ་སླེབས་བྱུང༌། ང་རང་འབོད་མཁན་གྱི་མི་སྣས་བཤད་ན་གསེར་རྟ་ནས་ཀྱང་མཁན་པོ་ཞིག་ཆེད་ཕེབས་གནང་བ་དང་དུས་ཚོད་གཅིག་ཙམ་ནས་ཞིང་ཆེན་གཉིས་ཀྱི་ས་མཚམས་སུ་བསླེབ་རྒྱུ་ཡིན་འདུག གང་ལྟར་དུས་ཚོད་ཅུང་འཕྱི་པོ་ཆགས་ཡོད་པ་དང་ལམ་ཐག་ད་དུང་ཅུང་ཟད་ཡོད་སྐད་འདུག་པས་ང་ཚོ་སྔོན་དུ་འགྲོ་རྒྱུ་ཐག་བཅད་ནས་སྐར་མ་ཁ་ཤས་སོང་མཚམས་ལྕི་ཆུ་འགྲམ་རྒྱུད་དུ་སླེབས་སོང༌། ཁོང་ཚོས་བཤད་ན་འགག་སྒོའི་འགྲམ་དུ་སླེབས་གྲབས་ཡོད་པས་ས་ཆ་གཞན་ནས་བསྐོར་ནས་འགྲོ་དགོས་རབ་ཤོད་བཞིན་འདུག  ང་བསུ་རུ་ཡོང་མཁན་དག་གིས་ཁ་པར་ཁ་ཤས་བཏང་སོང་། ཁ་པར་གཏོང་ས་དག་ཁོང་ཚོའི་འབྲེལ་བ་ཆེན་པོ་ཡོད་ས་ཁོ་ན་ཡིན་པ་འདྲ། འོན་ཀྱང་ང་བསུ་རུ་སོང་བའི་སྐོར་ལ་དྲང་བཤད་བྱེད་ཕོད་ཀྱི་མི་འདུག་ཅིང་ཕན་ཚུན་གོ་ན་རྒྱ་མིས་ཧ་གོ་འགྲོ་གི་རེད། ཅེས་ལབ་འདུག

བལྟས་ཚོད་ལ་ཁོང་ཚོ་ཚང་མ་དངངས་སྐྲག་ཆེན་པོ་ཡོད་པའི་སྣང་བ་ཞིག་སྐྱེས་བྱུང༌། གང་ལྟར་ང་ཚོ་འགག་སྒོ་ལས་བྲོས་བྱོལ་དུ་འགྲོ་བའི་ཐག་བཅད་ནས་ལམ་ཆེན་ལས་ཁ་བྲལ་ཏེ་ལུང་པ་ཁུག་ཀྱོག་གཅིག་ཏུ་གྱེན་འདེད་བྱས་ནས་སོང་མཐར་གྲོང་ཚོ་ཆུང་ཆུང་དུད་ཁྱིམ་བཅུ་ཕྲག་ཙམ་ཡོད་ངེས་སྙམ་པ། ཕྱི་ནས་བལྟས་ན་ཁང་པ་ཆེ་ཐག་ཆོད་པ་གློག་སྡོང་དང་ལམ་གློག་བཅས་པ་འཛུགས་སྐྲུན་ཐད་ཡར་རྒྱས་ཆེ་ཙམ་ལོས་ཡོད་སྙམ་པ་དང༌། ཁང་པ་རེ་རེའི་བད་ཁ་ནས་ལྷབ་ལྷུབ་ཏུ་གཡོ་བའི་རྒྱལ་དར་དམར་པོ་རེ་བཙུགས་ཡོད་ཅིང་རྒྱལ་གཅེས་དང་རྒྱལ་ཞེན་ལོས་ཆེ་སྙམ་པའི་ཚོར་སྣང་ཞིག་ཀྱང་སྟེར་གྱི་འདུག ལམ་ཟུར་ནས་སྐྱེས་པ་ལོ་གྲངས་བཞི་བཅུ་བརྒལ་བ་ཞིག་ཐུག་བྱུང་། ང་ཚོའི་རོགས་པ་གཉིས་ཀྱིས་འཕྲུལ་རྟ་གཡར་རྒྱུ་ཡོད་མེད་ཀྱི་སྐད་ཆ་དྲིས་སྐབས་ཁོས་བཤད་རྒྱུར། ང་ལ་འཕྲུལ་རྟ་ཡོད་ཀྱང་བཞོན་ཤེས་མཁན་ནི་སུ་ཡང་མེད། ང་ཚོའི་གྲོང་ཚོ་ནང་དུ་འཕྲུལ་རྟ་ཡོད་མཁན་ཁ་ཤས་ཡོད་ཀྱང་སྐྱེས་པ་ཚང་མ་དགོན་པ་ཞིག་གི་ནང་དུ་ཕྱིན་པས་མེད་ཟེར། ད་བལྟས་ན་འཕྲུལ་རྟ་ལ་རེ་བ་མེད་པ་འདྲ། ཅེས་གྲོགས་པོ་རྣམས་ཀྱིས་ཡི་ཆད་པའི་རྣམ་འགྱུར་སྟོན་བཞིན་འདུག ངས་ཁོང་ཚོར་རྐང་ཐང་གིས་ཕྱིན་ན་ལམ་ཐག་ག་ཚོད་ཡོད་མེད་དྲིས་ཀྱང་ཁོ་ཚོས་འཕྲུལ་རྟ་ཐབས་བྱེད་རྒྱུ་སྐོར་ལས་རྐང་ཐང་དུ་འགྲོ་རྒྱུ་སྐོར་ལ་ཁ་ཡ་བྱེད་ཀྱི་མི་འདུག རིམ་གྱིས་ང་ཚོ་ཁྱིམ་ཚང་ཞིག་ཏུ་སླེབས་ཏེ་ནང་དུ་འགྲོ་སྐབས་བྱིས་པ་ལོ་བཅུ་ལྷག་ཡིན་པ་གཅིག་གིས་སི་ཁྲོན་འཕྲིན་ལམ་གྱི་ཐོག་ནས་མུ་འབྲེལ་བརྙན་འཕྲིན་ལྟ་བཞིན་འདུག

ཁང་པའི་ནང་ནག་ཅིང་ཆ་རྐྱེན་ཡང་ཞན་པོ་ལས་མི་འདུག ཁྱིམ་ཚང་དེར་ད་དུང་རྒན་པོ་ཞིག་དང་བུད་མེད་གཅིག་གཉིས་འདུག་ཅིང་ཁོང་ཚོས་འོ་ཇ་དྲི་ཞིམ་ཅན་ཞིག་བླུགས་བྱུང༌། ངས་ཇ་འགྱོགས་ཙམ་བཏུང་རྗེས་རྐང་ཐང་དུ་སོང་ན་དགའ་ཞེས་ཐག་བཅད་པ་ཡིན། དེ་ནས་ང་དང་རོགས་པ་གྲྭ་པ་ཞིག་དང་ལམ་ཁྲིད་མཁན་གྱི་མི་གཅིག་བཅས་མཉམ་དུ་རྐང་ཐང་དུ་ཕྱིན་པ་ཡིན། ཅ་ལག་ཙག་ཙིག་ཡོད་པ་དག་ལས་དམིགས་བསལ་གྲྭ་པའི་རེད་སྙམ་པ་དག་ཚང་མ་རྒྱབ་ཏུ་ཁུར་བ་ལས་རླངས་འཁོར་དུ་བཞག་ན་དཀའ་ངལ་འཕྲད་སྐད་ལ་ང་ཚོས་ཀྱང་དེ་ལྟར་བྱས་ཏེ་རླངས་འཁོར་ལམ་ཆེན་དུ་བཏང་བ་ཡིན།

ལྟོས་དང་ང་བྲོས་བྱོལ་དུ་འགྲོ་གི་ཡོད། ང་འགྲོ་སའི་རླངས་འཁོར་ཡོད་ཅིང་རླངས་འཁོར་ཁ་ལོ་བ་དང༌། ཁ་ལོ་བར་ཆོག་ཡིག གཞན་ཡང་ཐོབ་དཔང་དང་གྲྭ་འཛིན་ལྟ་བུ་ཡོད་དགོས་པ་ཁག་ཚང་མ་ཡོད་ཅིང་ལུགས་དང་ཁྲིམས་ཀྱི་རིགས་གང་ལ་ཡང་འགལ་མེད། འོན་ཀྱང་ཁ་བ་མཐུག་པོ་དང་ལ་ཁ་གཟར་མོ་དག་ལས་འདི་ལྟར་འགྲོ་བཞིན་ཡོད།   གྲོང་ཚོ་ཆུང་ཆུང་འདི་རྒྱབ་ཏུ་བསྐྱུར་ནས་གོམ་པ་རེ་རེ་བཞིན་འཛེགས་སྐབས་ང་ཚོའི་སྔོན་དུ་ད་དུང་མི་ཁ་ཤས་སོང་བ་མཐོང་ཐུབ། ཆེ་ཆུང་མི་འདྲ་བའི་རྐང་རྗེས་ཁ་ཤས་ལ་བལྟས་ཚེ་ཁོང་ཚོ་ཡང་རང་གི་ཕ་ཡུལ་ནས་རང་གི་ཕ་ཡུལ་དུ་བྲོས་བྱོལ་དུ་ཕྱིན་པ་འདྲ། ཁ་སང་མི་དག་གིས་བཤད་ན་ས་གནས་ཀྱི་མི་མ་ཡིན་ཚེ་དོན་མེད་དུ་གཅར་རྡུང་དྲག་པོ་བྱེད་རབས་འདུག་པས་དངོས་གནས་བདེན་པ་འདྲ།

ལ་རྒྱབ་འདི་ནས་ད་དུང་ལམ་ཕྲན་ནམ་ཡང་ན་བགྲོད་ལམ་གཏན་འཁེལ་མེད་པར་རྐང་རྗེས་མང་པོ་ལ་རྒྱབ་ཏུ་ཟུག་འདུག་ཅིང་རི་འདབས་ན་རྒྱལ་ཁབ་རིམ་པའི་མྱུར་བགྲོད་གཞུང་ལམ་ཡོད་བཞིན་དུ་འདི་ལྟའི་མི་མང་ཞིག་གང་དུ་ཅིའི་ཕྱིར་ཕྱིན་པ་ཡིན་ན། བལྟས་ཡོང་ན་ང་དང་འདྲ་བའི་མི་གང་མང་ཞིག་ཡོད་པ་ཤེས་ཐུབ། ཁ་བ་བབས་ནས་ཉིན་གཉིས་ཙམ་ཕྱིན་སོང་བས་རྐང་རྗེས་མང་ལུགས་ཀྱིས་ཉིན་རེ་བཞིན་མི་མང་པོ་ང་ལྟར་འགྲོ་བཞིན་ཡོད་པ་འདྲ། སྤྱིར་ཡིན་ན་འཕྲུལ་རྟ་མཐོན་པོ་དག་འདི་ནས་སོང་ན་ཐར་ཙམ་འདུག་མོད། དེ་རིང་ལྟ་བུ་གནམ་གཤིས་ཡག་རྒྱུ་མེད་ཅིང་ཁ་བ་དང་ཆུ་འདམ་ཆེ་སྐབས་ཐབས་ཤེས་གང་ཡང་མེད་པ་འདྲ།

ད་ནི་ལ་རྒྱབ་ཏུ་ཐོན་སོང༌། དུས་ཚོད་གཉིས་ཙམ་གྱི་མཐར་ལ་ཆེན་པོ་དེ་བརྒལ་ཐུབ་ཙམ་བྱུང༌། ད་དུང་ཁ་བ་མཐུག་ཙམ་ཡོད་པའི་སྤང་ངོས་དག་ནས་ཐུར་དུ་འགྲོ་བ་ཡང་དེ་ཙམ་ལས་སླ་པོ་ཞིག་མ་རེད། གང་ལྟར་ས་ཁུག་ཆུང་ཆུང་འདི་ནས་ང་དང་ང་འདྲ་བ་དག་རང་གི་ཕ་ཡུལ་དུ་འགྲོ་བ་ཡང་ཅི་འདྲའི་དཀའ་ངལ་ཆེ་བ་ཞིག་རེད། མང་ཚོགས་མང་པོ་ཞིག་གིས་རྒྱ་མི་མལ་བུག་རྒྱུ་ཚང་ཞེས་དམོད་མོ་བྱེད་ཅིང་འདུག་ལ། ཚོད་བྱས་ན་ཨ་མདོ་དང་ཁམས་ཕྱོགས་ལས་ཀྱང་གཞུང་ཕྱོགས་ལ་མི་དགའ་མཁན་མང་བ་འདུག  ངས་ནི་འདི་དག་མཐོང་ཚེ་བོད་ལྗོངས་ལ་ལག་བསྟར་བྱེད་བཞིན་པའི་སྲིད་བྱུས་འདི་དག་ཕམ་ཉེས་སུ་འགྲོ་གི་ཡོད་པའི་ཚོར་བ་ཤུགས་ཆེན་བྱུང་།

མཇུག་མཐར་ངས་གསལ་བཤད་བྱེད་རྒྱུར། འདི་ནི་ང་རང་ཆབ་མདོའི་ས་ཁུལ་ཞིག་ཏུ་བྲོས་བྱོལ་དུ་ཕྱིན་པའི་གནས་ཚུལ་ཙམ་ཡིན་ཞིང༌། ནམ་རྒྱུན་ཐོས་རྒྱུ་མང་བའི་ལུགས་མེད་ཁྲིམས་མེད་ཀྱི་འགག་སྒོ་སྟེ་སྡོང་རྒན་ཐང་གི༼  ཆབ་མདོ་རི་བོ་ཆེའི་ཞིབ་བཤེར་ས་ཚིགས་དང་པོ ༽  昌都类乌齐县一级检察站 ཟེར་བ་འདི་ནས་དོན་མེད་ཀྱི་མང་ཚོགས་མང་པོར་དཀའ་ཁག་འཕྲད་ཀྱི་ཡོད་པའི་གནས་ཚུལ་ཙམ་ཡིན། འདི་ལྟ་བུའི་གནས་ཚུལ་ཁག་འབྲེལ་ཡོད་ཀྱི་འགོ་ཁྲིད་དང༌། ཡང་ན་རིམ་པ་གོང་མའི་དབུ་ཁྲིད། འཛམ་གླིང་མི་མང་རྣམས་ཀྱིས་ཤེས་རྟོགས་བྱུང་ནས་བོད་ལྗོངས་ཀྱི་འགྲོ་འདུག་གནས་ཚུལ་ཐད་དོ་སྣང་ཆེ་ཙམ་གནང་སྟེ་འགྱུར་བ་འགྲོ་བའི་རེ་བས་ཟིན་བྲིས་འདི་བཀོད་པ་ཡིན།

མ་རྩོམ་གྱི་འབྲེལ་ཐག http://woeser.middle-way.net/2014/01/47.html