དགུན་ཁའི་ཨོ་རྩེད་དང་རྒྱ་ནག་གི་མཛའ་བརྩེ།

ཨུ་རུ་སུའི་དགུན་དུས་ཨོ་རྩེད་འགྲན་ཚོགས་ལ་ལོ་རྒྱུས་ལས་བརྒལ་བའི་འགྲོ་སོང་ཕོན་ཆེན་གཏོང་བཞིན་པར་རྒྱལ་སྤྱིའི་ཐོག་སྐྱོན་བརྗོད་ཡོང་བཞིན་ཡོད་འདུག

ད་ལོའི་དགུན་དུས་ཀྱི་ཨོ་རྩེད་འགྲན་ཚོགས་ཐེངས་ཉེར་གཉིས་པ་དེ་ཟླ་འདིའི་ཚེས་ ༧ ནས་ ༢༣ བར་ཨུ་རུ་སུའི་གྲོང་ཁྱེར་སུའུ་ཆིའི་ནང་ཚོགས་བཞིན་ཡོད་པ་དང་།རྒྱ་ནག་གི་སྲིད་འཛིན་ཞི་ཅིན་ཕིན་དབུ་འཛུགས་མཛད་སྒོའི་སྐུ་མགྲོན་དུ་ཕེབས་ཡོད་པ་མ་ཟད། ༢༠༡༥ ལོར་རྒྱ་ནག་དང་ཨུ་རུ་སུ་མཉམ་འབྲེལ་ཐོག འཛམ་གླིང་ཧྥ་ཤི་སི་འགོག་རྒོལ་དམག་འཁྲུག་དང་རི་འགོག་དམག་འཁྲུག་གཉིས་ལ་རྒྱལ་ཁ་ཐོབ་སྟེ་ལོ་ ༧༠ འཁོར་བའི་དུས་དྲན་མཛད་སྒོ་བསྡུ་རྒྱུར་གྲོས་མོལ་ཐག་གཅོད་བྱས་ཡོད་འདུག་ལ། དེ་མིན་ཨུ་རུ་སུའི་བརྙན་འཕྲིན་ལས་ཁུངས་ཀྱི་བཅར་འདྲི་དང་ལེན་བྱས་ཏེ་རྒྱལ་ཁབ་གཉིས་བར་གྱི་མཛའ་བརྩེ་མཉམ་ལས་སོགས་ཆབ་སྲིད་གནད་དུ་བཟུང་སྟེ་དྲི་བར་ལན་འདེབས་བྱས་ཡོད་འདུག

གནས་ཚུལ་ཐོན་པར།ཐེངས་འདིའི་ཨོ་རྩེད་སྟེང་རྩེད་མོའི་རྣམ་གྲངས་ ༩༨ ཙམ་ཡོད་པ་དང་། རྩེད་མོ་རེར་ཨ་སྒོར་དུང་ཕྱུར་ ༥.༢ རེ་ཡི་འགྲོ་སོང་གཏོང་རྒྱུ་ཡིན་པ་དང་། རྩེད་འགྲན་མགོ་བཙུགས་ཏེ་ཉིན་བཞི་ཕྱིན་པའི་རིང་ཨ་སྒོར་དུང་ཕྱུར་ ༥༠༠ ལྷག་ཕྱིན་ཡོད་ལུགས་བསྒྲགས་འདུག ཐེངས་འདི་ནི་ ༡༩༩༨ ལོའི་ཉི་ཧོང་དུ་ཨ་སྒོར་དུང་ཕྱུར་ ༡༨༦ དང་། ༢༠༠༨ ལོར་པེ་ཅིན་གྱི་དབྱར་དུས་ཨོ་རྩེད་ལ་ཨ་སྒོར་དུང་ཕྱུར་ ༤༠༠ ཕྱིན་པ་སོགས་ལས་བརྒལ་ཏེ།ཨོ་རྩེད་འགྲན་ཚོགས་ཀྱི་ལོ་རྒྱུས་ཁྲོད་འགྲོ་སོང་ཆེ་ཤོས་དེ་ཆགས་ཡོད་འདུག

གནད་དོན་དབྱེ་ཞིབ་པ་ཚོས་ཐེངས་འདིའི་དགུན་དུས་ཨོ་རྩེད་བརྒྱུད་ཨུ་རུ་སུའི་སྲིད་འཛིན་ཕུའོ་ཊིན་གྱིས་རྒྱལ་སྤྱིའི་ཐོག་ཁོ་བོས་སྣེ་ཁྲིད་པའི་ཨུ་རུ་སུ་ཡང་བསྐྱར་སྟོབས་འབྱོར་ལྡན་པའི་ལམ་བུ་ཞིག་ཏུ་བསྐྱོད་མགོ་ཚུགས་ཡོད་པའི་རྣམ་པ་བསྟན་ཡོད་ཀྱང་། ད་ལྟའི་ཨུ་རུ་སུའི་དཔལ་འབྱོར་གནས་བབ་ཡག་པོ་མེད་པའི་ཁར། ཨོ་རྩེད་འགྲན་ཚོགས་འཛུགས་སྐྲུན་ཁྲོད་ལྐོག་ཟ་རུལ་སུངས་དང་ཁོར་ཡུག་གཏོར་བཤིགལས་བཟོ་བ་སྟོང་ཕྲག་མང་པོར་གླ་ཕོགས་ཀྱི་དཀའ་ངལ་འཕྲད་པ་སོགས་ལ་བརྟེན་ཏེ། ཐེངས་འདིའི་ཨོ་རྩེད་ལ་འགྲོ་སོང་ཕོན་ཆེན་བཏང་བ་དེར་རྒྱལ་སྤྱིའི་ཐོག་སྐྱོན་བརྗོད་འབྱུང་བཞིན་ཡོད་པ་མ་ཟད། ཨོ་རྩེད་དབུ་འཛུགས་སྐབས་ཨོ་རྩེད་མཚོན་རྟགས་ཨ་ལུང་ལྔ་འབྲེལ་ལས་ཨ་ལུང་གཅིག་མེ་ཏོག་གི་དབྱིབས་ཀྱིས་ལོགས་སུ་ཐོན་ཏེ་དུས་ཐོག་ཏུ་ཁ་འབྱེད་མ་ཐུབ་པར་སྲིད་འཛིན་ཕུའོ་ཊིན་ཁ་སྐྱེངས་པོ་བྱུང་བ་སོགས་ལ་རྒྱལ་སྤྱིའི་ཐོག་གླེང་སློང་ཆེན་པོ་འབྱུང་བཞིན་ཡོད་པ་རེད།

ཆབ་སྲིད་དབྱེ་ཞིབ་པ་ཚོས། རྒྱ་ནག་གི་སྲིད་འཛིན་ཞི་ཅིན་ཕིན་ལོ་གསར་པའི་ནང་གི་ཕྱོགས་སྐྱོད་ཐོག་མ་ཨུ་རུ་སུ་བདམས་ཏེ། གཞི་རྒྱ་ཆེ་བའི་རྒྱལ་སྤྱིའི་ལུས་རྩལ་འགྲན་ཚོགས་ལ་མཉམ་ཞུགས་བྱས་པ་དེས། རྒྱ་ནག་གཞུང་ཁྱིམ་མཚེས་རྒྱལ་ཁབ་ཉི་ཧོང་དང་རྒྱ་གར། ཧྥི་ལི་པིན། ཝེ་ཊི་ནམ། འབར་མ་སོགས་དང་མཐའ་མཚམས་ཀྱི་རྩོད་རྙོག་འབྱུང་བཞིན་ཡོད་སྟབས། ཨུ་རུ་སུ་ལ་འབྲེལ་བ་དམ་ཟབ་ཡོད་པའི་རྣམ་འགྱུར་བསྟན་པ་དང་ཆབས་ཅིག རྒྱ་ནག་གི་སྲིད་འཛིན་ཟུར་པ་ཧུའུ་ཅིན་ཐའོ་ཡི་སྐབས་ཀྱི་རྒྱལ་ཁབ་གཉིས་བར་གྱི་འགལ་བའི་སྟོང་ཆ་རྣམས་ཁ་གསབ་བྱེད་པའི་དམིགས་ཡུལ་བཟུང་ཡོད་ཀྱང་། ཨུ་རུ་སུ་དང་རྒྱ་ནག་གཉིས་ནམ་ཡང་ཨ་རི་དང་ཉི་ཧོང་ལྟ་བུའི་དམག་དོན་མནའ་མཐུན་གྱི་འབྲེལ་བ་ཆགས་ཐབས་མེད་པའི་ངོས་འཛིན་བྱེད་བཞིན་ཡོད་འདུག

ཕྱི་ལོ་ ༢༠༡༤ ལོའི་དགུན་དུས་ཨོ་རྩེད་འགྲན་ཚོགས་(The Sochi 2014 Winter Olympics)ཞེས་པ་དེ་དབུ་འཛུགས་བྱས་པའི་ཚུན་གྱི་ཉིན་ ༤ རིང་། གངས་དང་འཁྱག་པའི་ཁྲོད་ནས་རྩེད་མོ་སྣ་ཚོགས་ཤིག་འགྲན་བསྡུར་བྱས་པའི་ཁྲོད། ཁེ་ན་ཌར་གསེར་རྟགས་ ༣ དང་དངུལ་རྟགས་ ༣ ། ཟངས་རྟགས་ ༡ བཅས་ཁྱོན་རྟགས་མ་ ༧ ཐོབ་སྟེ་ཨང་དང་པོ་དང་། ནེ་ཐཱར་ལན་ཌིར་གསེར་རྟགས་ ༣ དང་དངུལ་རྟགས་ ༢ ། ཟངས་རྟགས་ ༢ བཅས་ཁྱོན་རྟགས་མ་ ༧ ཐོབ་སྟེ་ཨང་གཉིས་པ། ནོར་ཝེ་ལ་གསེར་རྟགས་ ༢ དང་དངུལ་རྟགས་ ༡ ། ཟངས་རྟགས་ ༤ བཅས་ཁྱོན་རྟགས་མ་ ༧ ཐོབ་སྟེ་ཨང་གསུམ་པ་ཆགས་འདུག གཞན། ཨ་རི་ཨང་བཞི་པ་དང་རྒྱ་ནག་ཨང་བཅོ་ལྔ་པ་བཅས་རེད།

ད་ལོའི་ཕྱི་ཟླ་ ༧ པའི་ནང་། ཕྱི་ལོ་ ༢༠༢༢ ལོའི་དགུན་དུས་ཨོ་རྩེད་འགྲན་ཚོགས་བསྡུ་ཡུལ་གསལ་བསྒྲགས་བྱ་འཆར་ཡོད་པ་དང་། ཟླ་འདིའི་ཕྱི་ཚེས་༨ ཉིན་སུའུ་ཆི་ཨོ་རྩེད་འགྲན་ཚོགས་ཀྱི་གསར་འགོད་བསྟི་གནས་སུ། རྒྱ་ནག་པེ་ཅིན་དང་ཀྲང་ཅཱ་ཁོའུ་དགུན་དུས་ཨོ་རྩལ་འགྲན་ཚོགས་སྙན་ཞུ་མཉམ་འབྲེལ་ཚོགས་པས་གསར་འགོད་ལྷན་ཚོགས་ཤིག་སྐོང་པའི་ཐོག པེ་ཅིན་ཨོ་རྩེད་སྙན་ཞུ་ཚོགས་པའི་ཚོགས་གཞོན་ཡཱང་ཧྲོ་ཁྲོ་ཡིས་པེ་ཅིན་གྲོང་ཁྱེར་དང་ཀྲང་ཅཱ་ཁོའུ་གྲོང་ཁྱེར་གཉིས་ཀྱིས་ ༢༠༢༢ ལོའི་དགུན་དུས་ཨོ་རྩེད་འགྲན་ཚོགས་བསྡུ་རྒྱུར་རེ་བ་དང་ཆ་རྐྱེན། ནུས་པ། ཉམས་མྱོང་བཅས་ཀྱི་ཐད་གྲ་སྒྲིག་ཆ་ཚང་ཡོད་ལ། དེ་ནི་གྲོང་ཁྱེར་གཉིས་ཀྱི་མི་མང་ཁྲི་ ༢༥༠༠ ཡི་རེ་འདོད་ཡིན་ལུགས་བརྗོད་ཡོད་ཀྱང་། གྲོང་ཁྱེར་དེ་གཉིས་ཀྱི་དྲ་རྒྱ་བེད་སྤྱོད་པ་མང་པོས་གྲོང་ཁྱེར་མགོ་ཁྲིད་ཚོས་ཐོག་མར་མི་མང་ཁྲི་ ༢༥༠༠ ཡི་ཚབ་བྱས་ཏེ་མང་ཚོགས་ཀྱི་དཀའ་ངལ་ཐག་གཅོད་བྱེད་དགོས་པ་ལས། དཔལ་འབྱོར་གནས་བབ་བརྟན་པོ་མིན་པའི་ཐོག ཨོ་རྩེད་འགྲན་ཚོགས་ལྟ་བུའི་མི་མང་ལ་དཀའ་ངལ་དང་རྒྱུ་དངོས་ལ་གྱོང་གུད་ཕོག་པའི་ལས་ཀ་རིགས་བྱས་ན་དོན་སྙིང་གང་ཡང་མེད་སྐོར་གྱི་བསམ་ཚུལ་བཏོན་འདུག