སི་ནོལ་ཌིན་ངེས་སྟོན་པར་བསྐོས།

ཟླ་འདིའི་ཚེས་ ༡༨ ཉིན་སེ་ཁཱོ་ལཱན་ཌིའི་གྷེ་ལཱ་སེ་གྷོ་ (Glasgow) གཙུག་ལག་སློབ་ཆེན་གྱི་སློབ་མ་ཚོས་འོས་ཤོག་འཕངས་བ་བརྒྱུད་དེ། ཨ་རིའི་གསང་བ་ཕྱིར་བསྒྲགས་བྱེད་མཁན་སྐུ་ཞབས་སི་ནོལ་ཌིན་ལགས་སློབ་ཆེན་དེའི་ངེས་སྟོན་པར་བསྐོ་བཞག་བྱས་ཡོད་འདུག

ཐེངས་འདིར་སྐུ་ཞབས་སི་ནོལ་ཌིན་ལགས་གྷེ་ལཱ་སེ་གྷོ་གཙུག་ལག་སློབ་ཆེན་གྱི་ངེས་སྟོན་པར་འོས་ཤོག་ཐོབ་དོན་ནི། སྔ་ལོར་སྐུ་ཞབས་སི་ནོལ་ཌིན་གྱིས་སོ་སོའི་བདེ་འཇགས་བློས་གཏོང་གིས་ཨ་རིའི་གསང་བའི་ལས་ཁུངས་ཀྱིས་འཛམ་གླིང་རྒྱལ་ཁབ་ཁག་གི་གཞུང་དང་ཚོགས་སྡེ་ཁག དེ་བཞིན་གནད་ཡོད་མི་སྣ་སྒེར་བ་བཅས་ཀྱི་ཁ་པར་དང་དྲ་གནས་ཡིག་ཚགས་ལ་ལྐོག་ཉན་ལྐོག་ལྟ་བྱས་ཏེ། གསང་བ་རྐུ་འཁྱེར་བྱེད་ཀྱི་ཡོད་པའི་གནས་ཚུལ་ཁག་ཕྱིར་བསྒྲགས་ཀྱིས་ཨ་རིའི་གསང་ལས་ཀྱི་བྱ་སྤྱོད་ཐེར་འདོན་བྱས་ཡོད་སྟབས། སློབ་ཆེན་སློབ་མ་ཚོས་སི་ནོལ་ཌིན་གྱི་དྲང་བདེན་དང་སྙིང་སྟོབས་ལ་ངོས་འཛིན་དང་ཡི་རངས་བྱས་པ་ཞིག་ཡིན་འདུག

སི་ནོལ་ཌིན་ལགས་ཀྱིས། “ངོས་ལ་གྷེ་ལཱ་སེ་གྷོ་གཙུག་ལག་སློབ་ཆེན་སློབ་མ་ཚོས་ཡིད་ཆེས་བློས་འགེལ་བྱས་ཏེ་ངེས་སྟོན་པར་བདམས་ཡོད་སྟབས། ངས་རང་ནུས་ཡོད་རྒུ་བཏོན་ཏེ་གཙུག་ལག་སློབ་ཆེན་འདིའི་ཤེས་ཡོན་དང་ལག་རྩལ་གྱི་ལས་དོན་ཐོག་འབད་བརྩོན་ཞུ་རྒྱུ་ཡིན།”ཞེས་བརྗོད་འདུག འདིའི་ཐད་གནད་དོན་དབྱེ་ཞིབ་པ་ཚོས་སློབ་ཆེན་སློབ་མ་ཚོས་སྐུ་ཞབས་སི་ནོལ་ཌིན་ལགས་སློབ་ཆེན་གྱི་ངེས་སྟོན་པར་བདམས་པ་དེ་དྲང་བདེན་ལ་རྒྱབ་སྐྱོར་བྱས་པ་ཞིག་དང་། འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཁན་རྒྱལ་ཁབ་དང་མི་སྒེར་ལ་ངོ་རྒོལ་བྱས་པ་མཚོན་གྱི་ཡོད་སྐོར་བརྗོད་འདུག

ཨ་རིའི་གསང་བའི་ལས་ཁུངས་གློག་ཀླད་སྡེ་ཚན་གྱི་ཆོད་གན་ལས་བྱེད་སི་ནོལ་ཌིན་ལགས་ཀྱིས་སྔར་ལོའི་ཕྱི་ཟླ་ ༥ པའི་ཚེས་ ༢༠ ཉིན་ཧོང་ཀོང་དུ། གློག་བརྙན་བཟོ་སྐྲུན་པ་དང་གསར་འགོད་པ་ལྕམ་ལོ་རཱ་ ( Laura Poitra)ལགས་སུ། ཨ་རིའི་བདེ་སྲུང་ལས་ཁུངས་ཀྱི་འཇའ་ཤེལ་ (Prism) ཞེས་པའི་ལས་གཞི་དེས། འཛམ་གླིང་ཐོག་བེད་སྤྱོད་ཤུགས་ཆེན་གཏོང་བཞིན་པའི་དྲ་གནས་གྷོ་གྷལ་ ( Google)དང་ངོ་དེབ་ ( Facebook)། ཌོའུ་ཌར་ ( twitter )། སི་ཁཡེ་ཕུ་ ( Skype)། ཡཱ་ཧོ་ ( Yahoo) ཡུ་ཀྲུབ་ ( Youtube) སོགས་སྤྱི་ཚོགས་དྲ་གནས་ ༩ ཙམ་ནང་ལྐོག་འཛུལ་བྱས་ཏེ། ཉིན་ལྟར་འཇར་མན་དང་ཧྥ་རན་སི། བྷར་ཛིལ། རྒྱ་ནག རྒྱ་གར། ཡུ་རོབ་མཐུན་ཚོགས། དབྱིན་ཡུལ་སོགས་ཀྱི་དབུ་ཁྲིད་དང་ཚོགས་པ་ཁག་གི་ཁ་པར་དང་དྲ་རྒྱའི་ཡིག་ཚགས་ས་ཡ་ ༦༠༠ ལྷག་ལ་ལྐོག་ཉན་བྱས་ཏེ་གསང་བ་རྐུ་འཁྱེར་བྱེད་ཀྱི་ཡོད་པའི་གནས་ཚུལ་དབྱིན་ཇིའི་ཚགས་པར་གྷ་ཌེན་ (The Guardian) བརྒྱུད་ཕྱིར་བསྒྲགས་བྱས་ཡོད་སྟབས། ཨ་རིའི་གཞུང་གིས་སི་ནོལ་ཌིན་འཛིན་བཟུང་བཀའ་རྒྱ་བཏང་ཡོད་པ་མ་ཟད། རྒྱལ་ཁབ་དང་ཚོགས་སྡེ་མི་སྒེར་སུས་ཀྱང་ཁོང་སྦས་སྐུང་དང་སྐྱབས་བཅོལ་སྤྲད་མི་ཆོག་ཚུལ་བརྗོད་ཡོད།

སི་ནོལ་ཌིན་གྱིས་ཐོག་མར་ཧོང་ཀོང་ལ་སྐྱབས་བཅོལ་ཞུས་ཀྱང་ཨ་རི་དང་རྒྱ་ནག་གི་གནོན་ཤུགས་འོག་སྐྱབས་བཅོལ་མ་སྤྲད་སྟབས་མཁའ་ལམ་བརྒྱུད་ཨུ་རུ་སུར་ཕྱིན་ཏེ། སྲིད་འཛིན་པུའུ་ཊིན་གྱིས་ཁོང་ཚོའི་རྒྱལ་ཁབ་ནང་སྡོད་ཆོག་པའི་ཆོག་མཆན་སྤྲད་པ་དེར། ཨ་རིའི་གཞུང་གིས་གནོན་ཤུགས་སྣ་ཚོགས་སྤྲད་ཡོད་ཀྱང་། སྲིད་འཛིན་པུ་ཊིན་གྱིས་ཨ་རིའི་གནོན་ཤུགས་དང་ལེན་མ་བྱས་པ་མ་ཟད། ཨ་རིས་འཛམ་གླིང་གང་སར་སྟོབས་ཤུགས་ངོམ་ཏེ་ཁ་ནས་འགྲོ་བ་མིའི་ཐོབ་ཐང་གླེང་གི་ཡོད་ཀྱང་། དོན་དངོས་སུ་གཞན་གྱི་ཁ་པར་དང་དྲ་རྒྱའི་ཡིག་ཚགས་ལ་ལྐོག་ལྟ་དང་རྐུ་འཁྱེར་བྱས་ཏེ། འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་ཡོད་པ་དེར། རྒྱལ་སྤྱིའི་སྤྱི་ཚོགས་ལ་སེམས་པ་དག་པའི་འགྲེལ་བཤད་རྒྱག་དགོས་པའི་ལན་འདེབས་བྱས་ཡོད།

གནས་ཚུལ་དེས་རྒྱལ་ཁབ་གཉིས་བར་གྱི་འབྲེལ་ལམ་ཇེ་སྡུག་ཏུ་ཕྱིན་ཏེ་ཨ་སྒོར་ཐེར་འབུམ་ ༤༥ ལྷག་གི་ཚོང་འབྲེལ་ཕྱིར་འཐེན་བྱས་ཡོད་པ་དང་། དེའི་རྗེས་ཨ་རི་དང་ཨུ་རུ་སུའི་བར་སེ་རི་ཡ་དང་ཡུའུ་ཁུ་རེ་ཡཱའི་ནང་འཁྲུག ཨི་རན་གྱི་རྡུལ་མཚོན་སྔོན་འགོག་སོགས་ཀྱི་གྲོས་མོལ་ལའང་བསམ་ཚུལ་མི་མཐུན་པ་བྱུང་སྟེ། དེང་སྐབས་ཨ་རི་དང་ཨུ་རུ་སུ་དགྲ་ཟླར་གྱུར་ཏེ་ཨུ་རུ་སུ་དང་རྒྱ་ནག་མཐུན་གྲོགས་ཆགས་ཡོད།

སི་ནོལ་ཌིན་ལགས་ཀྱིས་ཨ་རིའི་གསང་བའི་ལས་ཁུངས་ཀྱི་གནས་ཚུལ་དེ་ཕྱིར་བསྒྲགས་བྱས་རྗེས། འཇར་མན་སྲིད་འཛིན་ཨན་གྷི་ལ་མེར་གྷལ་ (Angela Merkel) མཆོག་དང་རྒྱ་གར་ཕྱི་སྲིད་བློན་ཆེན་སོགས་རྒྱལ་ཁབ་ཁག་ཅིག་གི་སྲིད་འཛིན་དང་སྲིད་བློན། ཡུ་རོབ་མཐུན་ཚོགས་དང་འགྲོ་བ་མིའི་ཐོབ་ཐང་ཚོགས་སྡེ་ཁག་གིས་ཨ་རིའི་བྱ་སྤྱོད་དེར་སྐྱོན་བརྗོད་བྱས་ཡོད་ཅིང་། སི་ནོལ་ཌིན་ལགས་ཀྱིས་ཀྱང་ “ གཞན་གྱི་བརྙས་བཅོས་འོག་གི་མི་མང་ལ་རང་དབང་ཐོབ་པར་རོགས་རམ་བྱ་རྒྱུའི་ཐོབ་ཐང་ང་ལ་ཡོད་སྟབས། མི་སྒེར་གྱི་གསང་བ་རྐུ་འཁྱེར་བྱེད་པའི་སྤྱི་ཚོགས་ཤིག་གི་ནང་དུ་སྡོད་འདོད་མ་བྱུང་སྟབས། ཨ་རིའི་གསང་བ་དེ་འཛམ་གླིང་མི་མང་ལ་བཤད་པ་ཡིན”ཞེས་བརྗོད་འདུག

གནས་ཚུལ་དེ་དག་ལ་བརྟེན་ཏེ་སྐུ་ཞབས་སི་ནོལ་ཌིལ་ལགས་འཛམ་གླིང་ནང་སྙན་གྲགས་ཅན་གྱི་མི་སྣ་ཞིག་ཆགས་ཏེ། ༢༠༡༣ ལོའི་ནོར་བྷེལ་ཞི་བདེའི་གཟེངས་རྟགས་འབུལ་ཡུལ་གྱི་འོས་མིའི་ཁུངས་སུ་བསླེབས་ཡོད་པ་མ་ཟད། ཟླ་སྔོན་མའི་ཕྱི་ཚེས་ ༢༩ ཉིན། ནོར་ཝེལ་སྤྱི་ཚོགས་རིང་ལུགས་ཚོགས་པའི་ཚོགས་མི་དང་ཁོར་ཡུག་བློན་ཆེན་ཟུར་པ་བྷེར་ཌི་ (Baard Vegar Solhjell)ལགས་དང་སི་ཎོ་རེར་ (Snorre Valen)རྣམ་གཉིས་ཀྱིས་སླར་ཡང་སི་ནོལ་ཌིན་ ༢༠༡༤ ལོའི་ནོ་བྷེལ་ཞི་བདེའི་གཟེངས་རྟགས་གྱི་འོས་མིའི་ཁོངས་སུ་མིང་འདོན་བྱས་ཡོད་འདུག

 སེ་ཁཱོ་ལཱན་ཌིའི་མིང་གྲག་ཆེ་བའི་གྷེ་ལཱ་སེ་གྷོ་ (Glasgow)གཙུག་ལག་སློབ་ཆེན་དེ་ནི། ཝུ་ལེམ་ (William Turnbull )ལགས་ཀྱིས་ ༡༤༥༡ ལོར་གསར་འཛུགས་བྱས་ཤིང་། ༢༠༡༣ ལོར་འཛམ་གླིང་ཐོག་གི་སྙན་གྲགས་ཆེ་བའི་སློབ་ཆེན་བརྒྱ་ཐམ་པའི་ཁྲོད་ཀྱི་ཨང་ ༥༡ པ་དང་། དབྱིན་ཡུལ་གཙུག་ལག་སློབ་ཆེན་ཁག་ནས་རྩེ་ཕུད་ཨང་ ༩ པར་བདམས་ཡོད་པ་དང་ད་ལྟ་ཁྱོན་སློབ་མ་ ༢༣༣༥༧ ཙམ་ཡོད་འདུག སློབ་ཆེན་གྱི་ཉེ་བའི་རིགས་བདག་ ( Vice Chancellor )ནི་སྐུ་ཞབས་སར་ཁལ་མན་ ( Sir Kenneth Calman) དང་ངེས་སྟོན་པ་སྐུ་ཞབས་སི་ནོལ་ཌིན། སློབ་སྤྱི་ཨན་ཀྲོན་ ( Anton Muscatelli)ལགས་བཅས་ཡིན་འདུག

གསར་འགོད་པ། དོན་གྲུབ།