དེ་རིང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཧ་ཁྲོན་ཡིང་ (Hua Chunying ) གིས་གསར་འགོད་གསལ་བསྒྲགས་ཤིག་ཐོག ཨ་རིའི་རྒྱལ་དོན་དྲུང་ཆེ་ཇོན་ཀེ་རེ་ཡིས་ཟླ་འདིའི་ཚེས་ ༢༡ ཉིན། ལྕམ་སཱ་ར་སེ་ཝལ་ (Sarah Sewall) ལགས་ཨ་རིའི་བོད་དོན་དམིགས་བསལ་འབྲེལ་མཐུད་པར་བསྐོ་བཞག་ཁྱབ་བསྒྲགས་བྱས་པར་སྐྱོན་བརྗོད་བྱས་འདུག
ཧ་ཁྲོན་ཡིང་གིས། “ཨ་རིས་བོད་དོན་དཀའ་རྙོག་སེལ་ཐབས་སུ་བོད་དོན་དམིགས་བསལ་འབྲེལ་མཐུད་པ་བསྐོ་བཞག་བྱས་པར་རྒྱ་ནག་གིས་ནམ་ཡང་ངོས་ལེན་བྱ་མི་སྲིད་ལ། ཨ་རི་གཙོས་རྒྱལ་ཁབ་གཞན་གྱིས་བོད་དོན་ཁར་འཁྱེར་ཏེ་རྒྱ་ནག་ནང་ཁུལ་གྱི་གནད་དོན་ལ་ཐེ་ཇུས་བྱས་པ་ཡིན་ན་རྒྱ་ནག་གིས་དེ་ལ་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན་”ཞེས་བརྗོད་འདུག
ཚེས་ ༢༡ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཨ་རིའི་སྲིད་གཞུང་གི་ཕྱི་སྲིད་དྲུང་ཆེ་སྐུ་ཞབས་ཇོན་ཀེ་རི་མཆོག་ John Kerry ཡིས་ལྕམ་སི་ཝེལ་ལགས་ཨ་རིའི་སྲིད་གཞུང་གི་དྲུང་ལས་དང་། བོད་དོན་དམིགས་བསལ་འབྲེལ་མཐུད་པར་བསྐོ་བཞག་གནང་བར་དགའ་བསུ་དང་། ཨ་རིའི་གྲོས་ཚོགས་གོང་མས་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་དང་ཁོང་ལྷན་མཇལ་འཕྲད་དང་ཕྱག་ལས་གནང་རྒྱུ་རེ་བ་ཡོད། ཁོ་མོ་བོད་ཀྱི་འགྲོ་བ་མིའི་ཐོབ་ཐང་གི་གནས་སྟངས་སྐོར་མཁྱེན་རྒྱ་དང་དོ་སྣང་ཆེན་པོ་ཡོད་པར་བརྟེན་བོད་དོན་དམིགས་བསལ་འབྲེལ་མཐུད་པ་ནུས་པ་ལྡན་པ་ཞིག་ཡོང་ངེས་ཡིན། ཞེས་དགའ་བསུ་ཞུས་ཡོད།
ཨ་རིའི་གཞུང་གིས་ ༢༠༠༢ ལོར་བོད་ཀྱི་ངོ་བོ་དང་རིག་གཞུང་སྲུང་སྐྱོབ་ཆེད་བོད་ཀྱི་སྲིད་བྱུས་ཁྲིམས་ཡིག་ (Tibetan Policy Act ) ཅེས་པ་ཞིག་གཏན་འབེབས་བྱས་ཏེ་ལོ་ལྟར་བོད་ནང་གི་འགྲོ་བ་མིའི་ཐོབ་ཐང་དང་བོད་རྒྱ་འབྲེལ་ལམ་སྐོར་གྱི་སྙན་ཐོ་འདོན་བཞིན་ཡོད། ༡༩༩༧ ལོའི་ཟླ་ ༡༠ པའི་ཚེས་ ༣༡ ཉིན་ཨ་རིའི་སྲིད་འཛིན་ཁི་ལིན་ཌོན་གྱི་སྐབས་སུ། ཨ་རིའི་བོད་དོན་དམིགས་བསལ་འབྲེལ་མཐུད་པ་སྐུ་ཞབས་གྷེར་གྷོ་རི་(Gregory Craig)ལགས་བསྐོ་བཞག་དང་། སྲིད་འཛིན་བྷུ་ཤིའི་སྐབས་སུ་སྐུ་ཞབས་པོ་ལཱ་ (Paula J. Dobriansky) དང་ལྕམ་ཀྲབ་ཌེ (Julia Taft) རྣམ་གཉིས་བསྐོ་བཞག སྲིད་འཛིན་ཨོ་བྷ་མའི་སྐབས་སུ་ལྕམ་མེ་རི་ཡཱ་ཨོ་ཌོ་རའོ་ (Maria Otero) དང་། ཟླ་འདིའི་ཚེས་ ༢༡ ཉིན་ལྕམ་སཱ་ར་སེ་ཝལ་ (Sarah Sewall)ལགས་བཅས་བསྐོ་བཞག་གནང་ཡོད།
ལྕམ་སཱ་ར་སེ་ཝལ་ (Sarah Sewall) ལགས་ནི་ཧར་ཝ་ཌི་ཁེལ་ནེ་ཌི་གཙུག་ལག་སློབ་ཆེན་གྱི་སློབ་དཔོན་ཆེན་མོ་དང་ཨ་རིའི་ (Oxfam America) ཞེས་པའི་ལས་ཁུངས་ཀྱི་འགན་འཛིན་ལྷན་ཚོགས་ཀྱི་ཚོགས་མི་ཞིག་ཡིན་པ་མ་ཟད། ཨ་རིའི་བདེ་སྲུང་ལྷན་ཁང་གི་རྒྱལ་སྲུང་ཐབས་ཇུས་རྟོག་ཞིབ་ཚོགས་ཆུང་གི་ཚོགས་མི་ཡང་ཡིན། ཁོ་མོ་དེ་སྔོན་བྷེལ་ཁེ་ལིན་ཀྲིང་སྐབས་སུ་དྲུང་ལས་གནས་རིམ་ཐོག་ཞི་མཐུན་དང་འགྲོ་བ་མིའི་བདེ་རྩར་རོགས་སྐྱོར་གནང་མཁན་གྱི་ལས་འཁུར་བཞེས་གནང་ཡོད་པ་དང་། ཨོ་བྷ་མའི་སྐབས་རྒྱལ་ཡོངས་བདེ་སྲུང་དང་ཕྱི་འབྲེལ་སྲིད་ཇུས་ཐོག་ཕྱག་ལས་ཀྱང་གནང་མྱོང་ཡོད།
ལྕམ་སྐུ་མཆོག་ལ་བཀྲ་ཤིས་བདེ་ལེགས་ཡོད། འཇིགས་ཞུམ་བྲལ་བའི་ཐོག་ནས་བོད་དོན་ལ་རྒྱབ་རོགས་གནང་རྒྱུ་དང་། ལྷག་པར་དུ་རྒྱ་ནག་གི་བྱ་ངན་སྤྱོད་ངན་དག་མངོན་ལྐོག་མེད་པའི་ཐོག་ནས་རྒྱལ་སྤྱིའི་སྡིངས་ཆའི་ཐོག་སྐྱེལ་ཐུབ་པ་གནང་རྒྱུར་འབོད་སྐུལ་སྙིང་ཁུངས་ནས་ཞུ་བཞིན་ཡོད།