དེ་རིང་ཕྱི་དྲོར་བོད་རིཊ་མཐོ་རིམ་སློབ་མའི་མགོ་ཁྲིད་ཟབ་སྦྱོང་ཐེངས་བཅུ་གསུམ་པ་དབུ་འཛུགས་གནང་ཡོད་ཅིང་། མ་འོངས་པའི་བདུན་ཕྲག་གཅིག་ལྷག་རིང་ངྷ་རམ་ས་ལ་ཁུལ་གྱི་གནད་ཡོད་མི་སྣ་ ༦༦ ཙམ་གྱིས་སློབ་ཕྲུག་ཚོར་ལམ་སྟོན་གསུང་བཤད་གནང་རྒྱུ་ཡིན་འདུག
དེ་རིང་ཕྱི་དྲོའི་ཆུ་ཚོད་ ༢།༣༠ ཙམ་ལ། དྷ་ས་མེག་གྷན་ཧི་མ་ཅལ་སྤྲོ་འཆམ་ཚོགས་ཁང་(Himachal Tourism Club House)དུ། བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་གོ་སྒྲིག་འོག བོད་རིགས་མཐོ་རིམ་སློབ་མ་ཚོར་༼དེང་གི་ན་གཞོན་དང་མ་འོངས་མགོ་ཁྲིད༽ཅེས་པའི་མགོ་ཁྲིད་ཟབ་སྦྱོང་ཐེངས་ ༡༣ པ་དབུ་འབྱེད་གནང་ཡོད་ཅིང་། མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་ལགས་གཙོས། སྲིད་བྱུས་ཉམས་ཞིབ་ཁང་གི་ངེས་སྟོན་པ་ཆོས་སྐྱོང་དབང་ཕྱུག་ལགས་དང་སྤྱི་འཐུས་ཨཅརྱ་ཡེ་ཤེས་ཕུན་ཚོགས་ལགས། དེ་བཞིན། རྒྱ་གར་གྱི་ས་གནས་ཁག་ ༡༠ ཙམ་གྱི་བོད་རིགས་མཐོ་རིམ་སློབ་མ་བུ་མོ་ ༢༤ དང་བུ་ ༢༢ བཅས་ཁྱོན་སློབ་ཕྲུག་ ༤༦ ཙམ་མཉམ་ཞུགས་གནང་འདུག
ངེས་སྟོན་པ་ཆོས་སྐྱོང་དབང་ཕྱུག་ལགས་ཀྱིས་ཟབ་སྦྱོང་གི་དགོས་དམིགས་སྐོར་ལ། ཟབ་སྦྱོང་དེ་མཐོ་རིམ་སློབ་ཕྲུག་ཚོར་སོ་སོའི་རྒྱལ་ཁབ་དང་མི་རིགས། རིག་གཞུང་། དེ་བཞིན་རང་ཉིད་སུ་ཡིན་མིན་སོགས་ཤེས་རྟོགས་ཡོང་ཆེད་དང་། སློབ་ཕྲུག་གི་འདུན་པ་དེ་སྐུལ་སློང་ཐུབ་པའི་དམིགས་ཡུལ་བཟུང་སྟེ། ༢༠༠༢ ལོ་ཙམ་ནས་བཟུང་ཟབ་སྦྱོང་གི་ལས་འཆར་དེ་མགོ་འཛུགས་བྱས་ཡོད་ལ། ཐེངས་འདིའི་ཟབ་སྦྱོང་ཁྲོད་གཅིག་ནས་སློབ་ཕྲུག་ཚོར་བཙན་བྱོལ་བོད་མིའི་སྒྲིག་འཛུགས་ཀྱི་ལྟེ་གནས་མྱོང་ཚོར་ཐུབ་པའི་གོ་སྐབས་ཡོད་པ་དང་། གཉིས་ནས་བཙན་བྱོལ་བོད་མིའི་སྒྲིག་འཛུགས་ཀྱི་མཛད་གཙོ་དང་འབྲེལ་ཡོད་ལས་སྣེ་བ་ ༦༦ ཙམ་ལ་མཇལ་འཕྲད་བྱེད་པའི་གོ་སྐབས་ཡོད་པ་མ་ཟད། བཙན་བྱོལ་བོད་མིའི་སྲིད་བྱུས་དང་རྩ་དོན། དེ་བཞིན་སྐད་ཡིག་རིག་གཞུང་སོགས་བརྗོད་གཞི་འདྲ་མིན་ཐོག་ལམ་སྟོན་གནང་འཆར་ཡོད་སྟབས།
སློབ་ཕྲུག་ཚོས་བཙན་བྱོལ་བོད་མིའི་སྒྲིག་འཛུགས་དང་བོད་མིའི་རྩ་དོན་ཐོག་ཤེས་རྟོགས་གང་ཡོད་པ་དེ་གོང་འཕེལ་གཏོང་རྒྱུ་དང་། མ་འོངས་པར་བཙན་བྱོལ་བོད་མིའི་སྒྲིག་འཛུགས་ཀྱི་སྣེ་ཁྲིད་ཐུབ་མཁན་ཞིག་ཡོང་བའི་ཕུགས་ཀྱི་རེ་བ་བཅངས་ཡོད་ལ། སྤྱིར་བཏང་བཙན་བྱོལ་བོད་མིའི་གྲངས་འབོར་ཉུང་ཉུང་ཡིན་ནའང་ཕན་ཚུན་མཐུན་པོ་དང་འབྲེལ་ལམ་ཡག་པོ། ཕུགས་ནས་གཅིག་གིས་གཅིག་ལ་བརྟེན་ཐུབ་པ་ཞིག་ཡོང་བའི་རེ་བ་དང་དམིགས་ཡུལ་བཟུང་སྟེ། ད་རེབ་ཀྱི་ཟབ་སྦྱོང་འདི་གོ་སྒྲིག་བྱས་པ་ཡིན། ཞེས་སོགས་བརྗོད་སོང་།
དེའི་རྗེས་སྐུ་མགྲོན་གཙོ་བོ་སྤྱི་འཐུས་ཚོགས་གཞོན་མཆོག་གིས་ཟབ་སྦྱོང་དབུ་འབྱེད་ཀྱི་གཏམ་བཤད་གནང་དོན། “ བོད་ནང་གི་གནས་སྟངས་དང་བོད་མིའི་བསམ་བློ་གཏོང་སྟངས་ལ་མཚོན་ན། གཞིས་བཞུགས་བོད་མི་མང་ཆེ་བས་མི་རིགས་ཀྱི་རྩ་དོན་དང་མི་སྒེར་གྱི་འཚོ་གནས་གཉིས་ལས་མི་རིགས་ཀྱི་རྩ་དོན་ཆེད། སོ་སོའི་མི་ཚེ་གཅིག་གམ་ཡང་ན་ཉིན་རེའི་ཆུ་ཚོད་ཀྱི་བརྒྱ་ཆ་ ༦༠ བེད་སྤྱོད་གཏོང་གི་ཡོད་པ་དང་། མི་སྒེར་གྱི་འཚོ་གནས་ཆེད་ཆུ་ཚོད་ཀྱི་བརྒྱ་ཆ་ ༤༠ གཏོང་གི་ཡོད་པ་རེད་དྲན་གྱི་འདུག ང་ཚོ་བཙན་བྱོལ་སྤྱི་ཚོགས་ནང་མཚོན་པ་ཡིན་ནའང་། མི་ཚེ་གཅིག་གམ་ཡང་ན་ཉིན་རེའི་ཆུ་ཚོད་ཀྱི་བརྒྱ་ཆ་ ༦༠ ཙམ་བོད་མི་རིགས་ཀྱི་ཆེད་དུ་གཏོང་བ་དང་། བརྒྱ་ཆ་ ༤༠ མི་སྒེར་གྱི་འཚོ་གནས་ཆེད་གཏོང་བར་དགོངས་པ་བཞེས་དགོས་པ་རེད་བསམ་གྱི་འདུག ཐིགས་པ་བསགས་པའི་རྒྱ་མཚོ་ཟེར་བ་ལྟར་དེ་འདྲ་ཞིག་བྱུང་བ་ཡིན་ན། ང་ཚོ་བོད་མི་རིགས་ཀྱི་དཀའ་ངལ་སེལ་བའི་དུས་ཚོད་ཅིག་ཤར་ངེས་རེད་དྲན་གྱི་འདུག ཕྱོགས་གཅིག་ནས་རྒྱ་གཞུང་ལ་རག་ལས་ཡོད་ཀྱང་། རྒྱ་ནག་དམར་ཤོག་གཞུང་དབུ་བརྙེས་པ་ནས་ད་ལྟའི་བར་གྱི་གནས་སྟངས་ལ་བལྟས་པ་ཡིན་ན། འགྱུར་བ་མང་པོ་ཕྱིན་ཡོད་པ་མ་ཟད། རྒྱལ་སྤྱིའི་གནས་བབ་ལ་ཁ་ཕྱོགས་ནས་བཟང་ཕྱོགས་ཀྱི་ཐོག་ནས་འགྱུར་བ་མང་པོ་འགྲོ་བཞིན་ཡོད་སྟབས། ནམ་ཞིག་ང་ཚོར་བདེན་པ་ཤར་བའི་དུས་ཚོད་ཅིག་ཡོད་ལ། བདེན་པ་རྩོད་པའི་ནུས་པ་དེའང་ང་ཚོར་གནས་དགོས་པ་གལ་ཆེན་པོ་རེད། ”ཅེས་དང་། བོད་རིགས་གཞོན་སྐྱེས་ཚོའི་ནང་མ་འོངས་པར་རབ་བྱུང་ན་ནོ་བྷེལ་གཟེངས་རྟགས་ལེན་མཁན་མང་པོ་བྱུང་དགོས་པ་དང་། དེ་མ་བྱུང་བ་ཡིན་ནའང་བོད་མི་ས་ཡ་དྲུག་ལ་ཕན་ཐོགས་མཁན་ཞིག་ཡོང་དགོས་སྐོར་གསུངས་སོང་།
ཐེངས་འདིའི་ཉིན་གྲངས་དགུ་ཙམ་རིང་གི་ཟབ་སྦྱོང་སྟེང་། སློབ་ཕྲུག་ཚོར་བཙན་བྱོལ་བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱིས་སྤྱི་ཚོགས་ལ་དགེ་ཕན་ཇི་བྱུང་དང་གདོང་ལེན་བྱེད་དགོས་པ་ཇི་ཡོད། དེ་བཞིན་དབུ་མའི་ལམ་གྱི་སྲིད་བྱུས་ངོ་སྤྲོད་དང་། དམངས་གཙོའི་ལམ་ལུགས་ནང་རང་དབང་ཅན་གྱི་སྡེ་ཚན་དགོས་གལ་དང་ཕན་ནུས་ཇི་ཡོད། མ་འོངས་བོད་ཀྱི་རྩ་དོན་ལ་འགན་ཁུར་ཕྱོགས། བོད་དང་རྒྱལ་སྤྱིའི་ཁོར་ཡུག་གནས་སྟངས། རྒྱ་གཞུང་གིས་བོད་ཐོག་འཛིན་པའི་སྲིད་བྱུས་ངོ་སྤྲོད། དེ་བཞིན། དྲ་རྒྱ་གསར་བཟོ་དང་བོད་དོན་དྲིལ་བསྒྲགས་གནང་ཕྱོགས། གཉེན་ནད་རེག་དུག་གི་ཉེན་ཚབས་རང་བཞིན། བོད་ཀྱི་སྐད་ཡིག་དང་རྩོམ་འབྲིར་ཉམས་ཞིབ་གནང་ཕྱོགས་སོགས་ཀྱི་བརྗོད་གཞི་འདྲ་མིན་ཐོག སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གི་གཙོས་སྤྱི་འཐུས་ཁག་ཅིག་དང་འབྲེལ་ཡོད་ལས་བྱེད་བཅས་གཏམ་བཤད་པ་ ༦༦ ཙམ་ཆེད་དུ་གདན་འདྲེན་ཞུས་ཏེ་ལམ་སྟོན་གནང་རྒྱུ་ཡིན་པ་མ་ཟད། ཕྱི་ཚེས་ ༢༧ ཉིན་གྱི་ཕྱི་དྲོར་སྲིད་སྐྱོང་བློ་བཟང་སེང་གེ་མཆོག་གིས་སློབ་ཕྲུག་ཚོར་བསམ་ཚུལ་རྗེས་རིས་གནང་རྒྱུ་དང་། ཟབ་སྦྱོང་གི་ཉིན་མཐའ་མར་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་ལགས་ཀྱིས་ལམ་སྟོན་གསུང་བཤད་གནང་རྒྱུ་ཡིན་འདུག
གསར་འགོད་པ། པདྨ་མཚོ།
གཞོན་སྐྱེས་ནང་ནེ་བྷེལ་གཟེངས་རྟགས་རེག་མཁན་མང་པོ་ཐོན་དགོས་ཞེས་ར་བཟི་སྐད་ཆ་འདྲ་བཤད་ཀྱི་འདུག་པ་མ་ཟད། ཚིག་ཟུར་རྣོ་བོ་འདི་དམིགས་ཡུལ་༧གོང་ས་མཆོག་ལ་གཏད་ནས་བཤད་པ་རེད།
བོད་རིཊ་གཞོན་སྐྱེས་ཁྲོད་ནོ་བྷེལ་གཟེངས་རྟཊ་ལེན་མཁན་མང་པོ་ཐོན་དགོཧཧཧཧ་་ང་ཚོ་ནི་སྐབས་རེ་དམིགས་ཚད་མཐོ་དྲགས་ནས་རྒྱལ་སྤྱིའི་ཚད་རིམ་གྱི་མཐོ་ས་མཐོ་ས་དག་ལ་འཕུར། ལན་རེ་ནི་དམིགས་ཚད་དམའ་དྲག་ནས་སྐྱབས་བཅོལ་ནང་གི་སློབ་གསོའི་དམིགས་ཚད་ཀྱང་རང་ཁ་གསོ་བ་ལ་བཞག
མ་གཞི་ང་ཚོའི་མཐོ་རིམ་སློབ་མ་རྣམས་ནི་ཁུག་སྟོང་འདྲ་ཞིག་ཡིན་པ་འདྲ། རྡ་ས་ནས་ཁུག་སྟོང་དེ་ཚོའི་ནང་དུ་ཆོས་ལུགས་དང་སྲིད་ལུགས་འདྲེས་མ་མང་པོ་བླུགས་པའི་ཐབས་ཤེས་མང་པོ་བྱེད་ཀྱི་འདུག འོན་ཀྱང་བླུག་མཁན་དག་ཀྱང་ཁུག་སྟོང་མིན་པར་ཤོག
་་་་་་ བོད་ཀྱི་སྐད་ཡིག་དང་རྩོམ་འབྲིར་ཉམས་ཞིབ་གནང་ཕྱོགས་སོགས་ཀྱི་བརྗོད་གཞི་འདྲ་མིན་ཐོག ་་་་་་་་
་་་་་་ བོད་ཀྱི་སྐད་ཡིག་དང་རྩོམ་འབྲིར་ཉམས་ཞིབ་གནང་ཕྱོགས་སོགས་ཀྱི་བརྗོད་གཞི་འདྲ་མིན་ཐོག སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གི་གཙོས་སྤྱི་འཐུས་ཁག་ཅིག་དང་འབྲེལ་ཡོད་ལས་བྱེད་བཅས་གཏམ་བཤད་པ་ ༦༦ ཙམ་ཆེད་དུ་གདན་འདྲེན་ཞུས་ཏེ་ལམ་སྟོན་གནང་རྒྱུ་ཡིན་པ་མ་ཟད། ཕྱི་ཚེས་ ༢༧ ཉིན་གྱི་ཕྱི་དྲོར་སྲིད་སྐྱོང་བློ་བཟང་སེང་གེ་མཆོག་གིས་སློབ་ཕྲུག་ཚོར་བསམ་ཚུལ་རྗེས་རིས་གནང་རྒྱུ་དང་། ཟབ་སྦྱོང་གི་ཉིན་མཐའ་མར་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་ལགས་ཀྱིས་ལམ་སྟོན་གསུང་བཤད་གནང་རྒྱུ་ཡིན་འདུག ་་་་་་་