དེ་རིང་བྷེ་ཇི་པེ་ཚོགས་པའི་གྲོས་ཚོགས་འཐུས་མི་ལྕམ་སུ་མི་ཌེ་ར་མཱ་ཧཱ་ཇན་མཆོག་རྒྱ་གར་གྲོས་ཚོགས་འོག་མའི་ཚོགས་གཙོར་བསྐོ་བཞག་གནང་ཡོད་འདུག
དེ་རིང་རྒྱ་གར་གྲོས་ཚོགས་འོག་མའི་ནང་། སྲིད་བློན་གསར་པ་ནཱ་རེན་ཌ་མུ་དྷེ་མཆོག་གཙོས་བྷེ་ཇེ་པེ་ཚོགས་པ་དང་ཕྱོགས་འགལ་ཀོང་རེ་སེ་ཚོགས་པའི་གྲོས་ཚོགས་འཐུས་མི་མ་ལི་ཀར་ཇན་ (Mallikarjun Kharge) དང་། ཨེ་ཨ་ཡེ་ཌེ་ཨེམ་ཀེ་ཚོགས་པའི་འཐུས་མི་ཋམ་བྷེ་ཌུ་རའེ་(M Thambidurai ) ། ཌེ་རི་མོལ་ཀོང་རེ་སེ་ཚོགས་པའི་འཐུས་མི་སུ་དྷེབ་ (Sudip Bandopadhyay )སོགས་ཆབ་སྲིད་ཚོགས་པ་འདྲ་མིན་གྱི་འཐུས་མི་ ༡༩ ཙམ་གྱིས་བྷེ་ཇི་པེ་ཚོགས་པའི་གྲོས་ཚོགས་འཐུས་མི་ལྕམ་སུ་མི་ཌེ་ར་མཱ་ཧཱ་ཇན་ (Sumitra Mahajan ) མཆོག་གྲོས་ཚོགས་འོག་མའི་ཚོགས་གཙོར་བསྐོ་བཞག་གནང་དགོས་སྐོར་གྲོས་འཆར་བཏོན་པ་ལྟར། གྲོས་ཚོགས་འཐུས་མི་ཡོངས་ཀྱིས་སྤྱི་མོས་ཐོབ་སྟེ་ཚོགས་གཙོར་བསྐོ་བཞག་གནང་ཡོད་འདུག
འདིའི་ཐད་རྒྱ་གར་སྲིད་བློན་ནཱ་རེན་ཌ་མུ་དྷེ་མཆོག་གིས། “ གྲོས་ཚོགས་འཐུས་མི་ཚོས་ལྕམ་སུ་མི་ཌེ་ར་མཱ་ཧཱ་ཇན་མཆོག་རྒྱ་གར་གྲོས་ཚོགས་འོག་མའི་ཚོགས་གཙོར་བསྐོ་བཞག་གནང་བར་ཐུགས་རྗེ་ཆེ་ཞུ་རྒྱུ་ཡིན།” ཞེས་ཁོ་མོ་ནི་ལས་ལ་བརྩོན་ཞིང་གཞན་དང་གྲོགས་འདྲིས་བཟང་པོ་གནང་ཐུབ་མཁན་གྱི་འཐུས་མི་རྒན་གྲས་ཞིག་ཡིན་སྟབས། མ་འོངས་པར་གྲོས་ཚོགས་ཀྱི་ལས་དོན་སྔར་ལྷག་ཚགས་ཚུད་ཡོང་རྒྱུ་ཡིན་སྐོར་བརྗོད་འདུག
རྒྱ་གར་གྱི་གྲོས་ཚོགས་འོག་མའི་ཚོགས་གཙོ་བསྐོ་བཞག་བྱས་རྗེས། གྲོས་ཚོགས་འཐུས་མི་དང་ཆབ་སྲིད་ཚོགས་པ་ཁག་གིས་ཚོགས་གཞོན་གྱི་གོ་གནས་ཐོབ་ཐབས་བྱེད་བཞིན་ཡོད་པ་ལྟར། ཏ་མིལ་ན་ཌའུ་མངའ་སྡེའི་སྤྱི་ཁྱབ་བློན་ཆེན་ཇེ་ཇཱ་ཡ་ལ་ལི་དྷ་ (J Jayalalithaa) རྒྱལ་ས་ལྡི་ལིར་སྐོར་སྐྱོད་དང་འབྲེལ། ཁ་ཉིན་སྲིད་བློན་ནཱ་རེན་ཌ་མུ་དྷེ་མཆོག་ལ་ཐུག་འཕྲད་བྱས་ཏེ་བྷེ་ཇི་པེ་དང་། ཨེ་ཨ་ཡེ་ཌེ་ཨེམ་ཀེ་ཚོགས་པ་གཉིས་ཀྱི་མཉམ་ལས་ཐོག་གཞུང་འཛིན་རྒྱུར་གོ་བསྡུར་བྱས་ཡོད་སྟབས། ཏ་མིལ་ན་ཌའུ་ཨེ་ཨ་ཡེ་ཌེ་ཨེམ་ཀེ་ཚོགས་པའི་འཐུས་མི་ཋམ་བྷེ་ཌུ་རའེ་ (M Thambidurai ) མཆོག་གྲོས་ཚོགས་འོག་མའི་ཚོགས་གཞོན་ལ་བསྐོ་བཞག་བྱ་རྒྱུའི་རེ་བ་ཆེན་པོ་ཡོད་སྐོར་རྗོད་བཞིན་འདུག ཁོང་ ༡༩༨༥ ནས་ ༡༩༨༩ བར་རྒྱ་གར་གྲོས་ཚོགས་འོག་མའི་ཚོགས་གཞོན་གནང་ཡོད་འདུག
རྒྱ་གར་གྲོས་ཚོགས་འོག་མའི་ཚོགས་གཙོ་ལྕམ་སུ་མི་ཌེ་ར་མཱ་ཧཱ་ཇན་ (Sumitra Mahajan ) མཆོག་ནི། ༡༩༤༣ ལོའི་ཟླ་ ༤ པའི་ཚེས་ ༡༢ ཉིན་མཱ་ཧཱ་ར་ཤི་ཌ་མངའ་སྡེའི་ཆིབ་ལོན་ (Chiplun) ཞེས་པའི་གྲོང་བརྡལ་ཞིག་ཏུ་སྐྱེས་ཤིང་། དམའ་རིམ་དང་མཐོ་འབྲིང་སློབ་གྲྭ་འགྲིམ་རྗེས། མཱ་ཧཱ་ར་ཤི་ཌའི་ཨིན་ཌོར་གཙུག་ལག་སློབ་ཆེན་ནང་གཙུག་ལག་རབ་འབྱམས་དང་། ཁྲིམས་ལུགས་ཐོག་ཉེ་བའི་གཙུག་ལག་རབ་འབྱམས་ཐོན་ཡོད་འདུག ཕྱིས་སུ་བྷེ་ཇི་པེ་ཚོགས་པའི་ནང་འཛུལ་ཏེ་ ༡༩༨༩ ལོར་ཨིན་ཌོར་གྱི་གྲོས་ཚོགས་འཐུས་མིའི་འོས་མིར་ལངས་ཏེ་རྒྱལ་ཁ་ཐོབ་པ་ནས་བཟུང་ད་བར་གྲོས་ཚོགས་འཐུས་མི་སྐབས་ ༨ ཙམ་གནང་ཡོད་འདུག
༢༠༠༢ ལོ་ནས་ ༢༠༠༤ ལོ་བར་རྒྱ་གར་དབུས་གཞུང་གི་བརྡ་འཕྲིན་དང་རྡོ་སྣུམ། ཤེས་རིག་ལྷན་ཁང་བཅས་ཀྱི་བློན་ཆེན་གནང་ཡོད་པ་དང་། རྒྱ་གར་གྲོས་ཚོགས་འོག་མས་བདམས་ཐོན་བྱུང་བའི་བུད་མེད་ཚོགས་གཙོ་ཨང་གཉིས་པ་ དང་། བྷེ་ཇི་པེ་ཚོགས་པའི་གྲོས་ཚོགས་འཐུས་མིས་ཚོགས་གཙོ་གནང་ཐེངས་ཐོག་མ་དེ་ཆགས་ཡོད་འདུག ཁོ་མོ་ད་ལོ་དགུང་ལོ་ ༧༡ ཡིན་འདུག
གསར་འགོད་པ། དོན་གྲུབ།
