སྲིད་སྐྱོང་དེ་ཁ་བྲལ་བ་རེད་ཟེར།

ཁ་སང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པས་གསར་འགོད་གསལ་བསྒྲགས་སྤེལ་ཏེ། རྒྱ་ནག་གཞུང་དང་༧གོང་ས་མཆོག་གི་སྐུ་ཚབ་བར་སྐུ་སྒེར་གྱི་གནད་དོན་ཐོག་གྲོས་མོལ་བྱ་རྒྱུའི་སྒོ་མོ་ཕྱེ་ཡོད་ཀྱང་། བཙན་བྱོལ་བོད་གཞུང་ཟེར་བ་དང་བོད་ཀྱི་གནད་དོན་ཟེར་བའི་ཐད་གྲོས་མོལ་བྱ་རྒྱུའི་གཞི་རྩ་གང་ཡང་མེད་པ་མ་ཟད། སྲིད་སྐྱོང་མཆོག་ནི་བོད་རྒྱ་ནག་དང་ཁ་བྲལ་གཏོང་མཁན་ཞིག་ཡིན་སྐོར་བསྒྲགས་འདུག

རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཧོང་ལེ་ཡིས། “ བཙན་བྱོལ་བོད་གཞུང་གི་མགོ་ཁྲིད་ནི་ཁ་བྲལ་རིང་ལུགས་པ་ཞིག་ཡིན་པ་མ་ཟད། ཁོས་ད་བར་བོད་ཀྱི་ས་ཁུལ་དང་བོད་ཀྱི་གནད་དོན་ཐད་བཟང་ཕྱོགས་ཀྱི་ལས་དོན་སྤུ་ཙམ་གྲུབ་མྱོང་མེད་པ་དང་། ཁོས་སྣེ་ཁྲིད་པའི་བཙན་བྱོལ་བོད་གཞུང་གིས་བོད་རྒྱ་ནག་དང་ཁ་བྲལ་ཐབས་ཀྱི་སྲིད་ཇུས་བཟུང་སྟེ། རྒྱལ་སྤྱིའི་ཐོག་ལས་འགུལ་འདྲ་མིན་སྤེལ་བཞིན་ཡོད་སྟབས། ཀྲུང་གོའི་སྲིད་གཞུང་གིས་སྒྲིག་འཛུགས་དེར་རྒྱལ་སྤྱིའི་སྒྲིག་འཛུགས་དང་རྒྱལ་ཁབ་སུས་ཀྱང་ལེན་བྱེད་ཀྱི་མེད་པའི་ཁྲིམས་འགལ་གྱི་སྒྲིག་འཛུགས་ཤིག་ཆགས་ཡོད།” ཅེས་བརྗོད་འདུག

དབུ་མའི་ལམ་གྱི་སྐོར་ལ། “ཏཱ་ལའི་བླ་མས་བཏོན་པའི་དབུ་མའི་ལམ་གྱི་སྲིད་ཇུས་ནི། བོད་རྒྱ་ནག་ནས་ཁ་བྲལ་གཏོང་རྒྱུའི་མངོན་པར་མི་གསལ་བའི་རང་བཙན་དང་། ཕྱེད་རང་བཙན་གྱི་ལྟ་གྲུབ་ཅིག་ཡིན་སྟབས། རྒྱ་ནག་གཞུང་གིས་དུས་ནམ་ཡང་ཁས་ལེན་བྱ་ཐབས་མེད་པ་ཞིག་ཡིན་སྟབས། ཏཱ་ལའི་བླ་མས་བོད་རྒྱ་ནག་ནས་ཁ་བྲལ་གཏོང་རྒྱུའི་ལས་འགུལ་མཚམས་འཇོག་བྱས་ཤིང་། བཤད་སྤྱོད་གཉིས་ཐད་ནས་རྒྱ་ནག་གཞུང་དང་མང་ཚོགས་ཀྱི་ཡིད་ཆེས་ཐོབ་པ་ཞིག་བྱ་རྒྱུ་གལ་ཆེན་ཆགས་ཡོད།” ཅེས་སོགས་བརྗོད་འདུག

ཟླ་འདིའི་ཚེས་ ༥ ཉིན་ངྷ་སྟེང་བོད་ཁྱིམ་དུ་༧གོང་ས་མཆོག་གིས་སློབ་ཕྲུག་ཚོར་ནང་ཆོས་ངོ་སྤྲོད་གནང་གི་ཡོད་པ་དང་བསྟུན་ཏེ། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་དབུ་མའི་ལམ་གྱི་དྲ་རྒྱ་དབུ་འབྱེད་དང་འབྲེལ། དྲིལ་བསྒྲགས་བཀའ་བློན་བདེ་སྐྱིད་ཆོས་དབྱངས་དང་སྲིད་སྐྱོང་བློ་བཟང་སེང་གེ་མཆོག་རྣམ་གཉིས་ཀྱིས་དབུ་མའི་ལམ་གྱི་སྐོར་ལ་གཏམ་བཤད་སྤེལ་ཡོད་ཅིང་། སྲིད་སྐྱོང་མཆོག་གིས་  “རང་བཙན་རྩོད་ཆོག་གི་མེད་ཅེས་སུ་གང་གིས་ཀྱང་གསུང་གི་ཡོད་པ་མ་རེད་ལ། ལོ་རྒྱུས་ཐོག་ནས་བོད་ལུང་པ་རང་བཙན་ཡིན་པ་གསལ་བོ་ཞེ་དྲག་རེད། རང་བཙན་རྩོད་པའི་ཐོབ་ཐང་ཡོད་པ་༧གོང་ས་མཆོག་གིས་དུས་རྟག་ཏུ་གསུང་གི་ཡོད་པ་རེད། ད་ལྟའི་ཆར་དབུ་མའི་ལམ་ཟེར་བ་དེ་རྒྱལ་སྤྱི་དང་རྒྱ་ནག བོད་པའི་སྤྱི་ཚོགས་ཁྱོན་ཡོངས་ནས་རྒྱབ་སྐྱོར་བྱེད་དགོས་པ་དེ་༧གོང་ས་མཆོག་ལ་དད་གུས་དང་བརྩི་བཀུར་གཅིག་པུའི་ཐོག་ནས་མ་རེད། དེའི་ནང་དོན་ཧ་གོ་བའི་ཐོག་ནས་བོད་ནང་གི་བོད་མི་ཚོའི་དཀའ་ངལ་མགྱོགས་མྱུར་ངང་སེལ་བའི་ཐབས་ལམ་ཡག་ཤོས་སུ་ངོས་འཛིན་གནང་གི་ཡོད་པ་རེད།”ཅེས་བརྗོད་འདུག

ཚེས་ ༦ ཉིན་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་གཞོན་པ་ལྕམ་སྐུ་མཱ་རི་ཡ་ཧབ་ (Marie Harf )ཀྱིས། རྒྱ་ནག་གཞུང་གིས་ཆ་རྐྱེན་གང་ཡང་མེད་པའི་ཐོག་ནས་བོད་མིའི་དབུ་ཁྲིད་༧གོང་ས་ཏཱ་ལའི་བླ་མ་མཆོག་གམ་ཡང་ན་ཁོང་གི་སྐུ་ཚབ་དང་ལྷན་དུ་དོན་སྙིང་ལྡན་པའི་གྲོས་མོལ་གནང་སྟེ་བོད་དོན་ཐག་གཅོད་གནང་དགོས་སྐོར་དང་། ༢༠༠༢ ལོར་ཨ་རིས་བོད་དོན་རྒྱབ་སྐྱོར་གྱི་སྲིད་བྱུས་ཞེས་པ་གཏན་འབེབས་བྱས་པ་ལྟར། ང་ཚོས་ལྷ་སར་ཨ་རིའི་ཚོང་དོན་གཞུང་ཚབ་ཁང་ཞིག་འཛུགས་རྒྱུར་འབད་བརྩོན་མུ་མཐུད་བྱ་རྒྱུ་དང་། རྒྱ་ནག་གཞུང་གིས་ཨ་རིའི་གཞུང་ཚབ་ལས་བྱེད་བོད་རིགས་ནང་གནས་ཚུལ་རྟོག་ཞིབ་ཆེད་བསྐྱོད་རྒྱུར་ཆོག་མཆན་སྤྲོད་དགོས་སྐོར་སོགས་བརྗོད་འདུག

༢༠༠༢ ལོ་ནས་བཟུང་ ༢༠༡༠ ལོའི་བར་༧གོང་ས་མཆོག་གི་སྐུ་ཚབ་དང་རྒྱ་གཞུང་བར་འབྲེལ་མོལ་ཐེངས་ ༩ ཙམ་གནང་ཡོད་པ་དང་། ༢༠༠༨ ལོའི་ཟླ་ ༡༠ པའི་ཚེས ༣༡ ཉིན་བོད་པའི་སྐུ་ཚབ་ཚོས་རྒྱ་ནག་གཞུང་ལ་༼བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར།༽ ཞེས་པའི་ཡིག་ཆ་ཞིག་ཀྱང་སྤྲད་ཡོད།

ཟླ་འདིའི་ཚེས་ ༨ དང་ ༩ བཅས་ཉིན་གཉིས་རིང་རྒྱ་ནག་གི་ཕྱི་སྲིད་བློན་ཆེན་ཝང་ཡི་རྒྱ་གར་ནང་སྐོར་སྐྱོད་དང་འབྲེལ། རྒྱ་གར་གྱི་ཕྱི་སྲིད་བློན་ཆེན་ལྕམ་སོ་ཞི་མཱ་ (Sushma Swaraj) མཆོག་དང་མཇལ་འཕྲད་གནང་སྟེ། རྒྱ་དཀར་ནག་གཉིས་ཀྱི་ས་མཚམས་དང་ཕྱི་འབྲེལ་སྲིད་ཇུས་སྐོར་ལ་གོ་བསྡུར་དང་། དེ་རྗེས་སྲིད་བློན་ནཱ་རེན་ཌ་མུ་དྷེ་མཆོག་དང་མཇལ་འཕྲད་ཀྱིས་རྒྱལ་ཁབ་གཉིས་ཀྱི་མཉམ་ལས་གོང་མཐོར་གཏོང་ཐབས་སོགས་ཀྱི་སྐོར་ལ་གོ་བསྡུར་བྱ་འཆར་ཡོད་འདུག

གསར་འགོད་པ། དོན་གྲུབ།