༧གོང་ས་མཆོག་གིས་ཨི་ཊ་ལི་གནས་སྡོད་བོད་མི་ཚོར་བཀའ་སློབ་གནང་སྟེ། བོད་མི་རྒན་གཞོན་ཚང་མས་རིག་པ་སྒྲིམ་ཏེ་བོད་མི་རིགས་ཀྱི་རིན་ཐང་མཚོན་པའི་ཡ་རབས་སྤྱོད་བཟང་གོང་འཕེལ་གཏོང་བ་དང་ཆབས་ཅིག་རྒྱ་གར་ནང་གི་གཞིས་ཆགས་ཁག་ལ་རོགས་རམ་བྱེད་རྒྱུ་གལ་ཆེན་པོ་ཆགས་ཡོད་སྐོར་གསུངས་འདུག
ཟླ་འདིའི་ཚེས་ ༡༠ ཉིན་ནས་བཟུང་༸གོང་ས་མཆོག་ཨི་ཊ་ལིའི་ནང་ཆིབས་བསྒྱུར་མཛད་འཕྲིན་སྐྱོང་བཞིན་ཡོད་ཅིང་། ཁ་སང་ཚེས་ ༡༥ ཉིན་གྱི་སྔ་དྲོར་བླ་མ་ཙོང་ཁ་པའི་ཆོས་ཚོགས་ཀྱི་གླེང་སྟེགས་ཤིག་ཏུ་དབུ་བཞུགས་གསུང་བཤད་དང་། ཉིན་རྒྱབ་བྱམས་བརྩེ་ལྡན་པའི་བཟང་སྤྱོད་ཅེས་པའི་བརྗོད་གཞིའི་ཐོག་བཀའ་སློབ་གནང་སྐབས། ཨི་ཊ་ལི་དང་དབྱིན་སྐད། ཕ་རན་སི། སི་པེན། ཨུ་རུ་སུ། རྒྱ་སྐད་སོགས་སྐད་རིགས་ཁག་ཏུ་གསུང་བསྒྱུར་གནང་ཡོད་པར་མ་ཟད། གྲོང་ཁྱེར་མི་ལན་གྱི་བཙོན་པ་ ༡༢༠༠ ལྷག་གིས་ཐད་ཀར་གཟིགས་ཐུབ་པའི་ཆ་རྐྱེན་བསྐྲུན་ཡོད་འདུག
ཚེས་ ༡༤ ཉིན་གྱི་སྔ་དྲོར་༧གོང་ས་མཆོག་གིས་མོ་ཌེ་གྷི་ལ་ནེ་ཧྥི་རན་ (Modigliani Forum) རྩེད་ཐང་དུ་མི་མང་ལ་ཆོས་འབྲེལ་མ་གནང་གོང་ལེ་ཝོ་ནོར་མངའ་སྡེའི་བློ་ཆེན་ཧྥེ་ལེ་ཕོ་ནོར་གྷེན་ (Filippo Nogarin) མཆོག་གིས། ༧གོང་ས་མཆོག་གིས་འཛམ་གླིང་ནང་ཞི་བདེ་གོང་འཕེལ་གཙོས་པའི་མཛད་འཕྲིན་རྒྱ་ཆེར་སྐྱོང་བཞིན་པར་ཆེད་བསྟོད་ཀྱི་གཏམ་བཤད་གནང་ཡོད་པར་མ་ཟད། ལེ་ཝོ་ནོར་མངའ་སྡེའི་ཆེ་བསྟོད་ཀྱི་ལྡེ་མིག་༧གོང་ས་མཆོག་ལ་འབུལ་ལམ་ཞུས་ཡོད་འདུག དགོང་དྲོར་ཨི་ཊ་ལི་བོད་རིགས་མཐུན་ཚོགས་ཀྱིས་གསོལ་འདེབས་ལྟར་མོ་ཌེ་གྷི་ལ་ནེ་ཧྥི་རན་རྩེད་ཐང་དུ་ས་གནས་བོད་མི་ ༣༠༠ བརྒལ་བར་བཀའ་སློབ་གནང་སྐབས། ༧གོང་ས་མཆོག་གིས་སྤྱིར་བཏང་ང་ཚོ་བཙན་བྱོལ་བའི་རྟེན་གཞི་རྒྱ་གར་ཆགས་ཡོད་པ་ལྟར། ད་ལྟའང་རྒྱ་གར་ནང་བོད་མི་མང་ཤོས་གནས་ཡོད། གལ་ཆེ་ཤོས་ང་ཚོའི་ཆོས་དང་རིག་གཞུང་གི་བསྟི་གནས་སུ་ལྷ་ཁང་ཡོད་པ་ཙམ་གྱིས་ཕན་ཐོགས་མེད་པར། ལོ་སུམ་ཅུ་བཞི་བཅུར་སློབ་སྦྱོང་བྱས་ཏེ་བོད་ཀྱི་ཆོས་དང་རིག་གཞུང་འཛིན་སྐྱོང་བྱེད་རྒྱུ་ཧ་ཅང་གལ་ཆེན་པོ་རེད། བོད་ཀྱི་ཆོས་དང་རིག་གཞུང་དེ་དཔལ་ནཱ་ལན་ཊའི་ལུང་སྡེ་སྣོད་གསུམ་དང་ལམ་བསླབ་པ་གསུམ་གྱི་ཉམས་ལེན་བྱེད་དགོས་པ་རེད་མ་གཏོགས། གྲྭ་ཆས་གྱོན་པ་དང་ཆོ་ག་བཏོན་པ་ཙམ་གྱིས་ཕན་ཐོགས་གང་ཡང་མེད། ང་ཚོའི་བཤད་གྲྭ་དང་རིས་སུ་མ་ཆད་པའི་སློབ་གཉེར་ཁང་རྣམས་རྒྱ་གར་ནང་གནས་ཡོད། དེ་དག་ཕྱི་རྒྱལ་དུ་ཡོང་རྒྱུ་ཧ་ཅང་དཀའ་ལས་ཁག་པོ་ཡིན་སྟབས། རྒྱ་གར་ནང་གི་ང་ཚོའི་གཞིས་ཆགས་ཁག་ཧ་ཅང་གལ་ཆེན་པོ་ཆགས་འདུག བོད་ཀྱི་ཆོས་དང་རིག་གཞུང་མི་རིགས་དང་བཅས་པ་ང་ཚོ་མི་རབས་གཅིག་གཉིས་ཤིག་སྒུག་ནས་སྡོད་དགོས་བྱུང་ཡང་། ད་ཡོད་ཀྱི་གཞིས་ཆགས་ཁག་ཡག་པོ་བྱུང་ན་མུ་མཐུད་གནས་ཐུབ་ཀྱི་རེད།
ཐོག་མར་ནེ་རུ་སྐུ་འཚོ་བཞུགས་སྐབས་རྒྱ་གར་གཞུང་ལ་ང་ཚོར་གཞིས་ཆགས་དང་སློབ་གྲྭ་ཟུར་གསལ་ཞིག་དགོས་ཀྱི་འདུག་ཅེས་བསམ་བློ་འདི་ལྟར་བཏང་ནས་འབོད་སྐུལ་ཞུས་ཡོད། ད་ཆ་ལོ་ ༥༥ བརྒལ་བ་འགྲོ་བཞིན་ཡོད། དུས་ཡུན་དེའི་རིང་ང་ཚོ་བཙན་བྱོལ་བ་རྣམས་ཧྲ་ཏག་ཏག་གནས་ཡོད། དེང་སྐབས་རྒྱ་གར་དུ་རྟེན་གཞི་བྱས་པའི་བོད་མིའི་གཞིས་ཆགས་ཁག་ནང་རྒན་རྒོན་མ་གཏོགས་གཞོན་སྐྱེས་མང་ཆེ་བ་ཕྱི་རྒྱལ་ལ་འགྲོ་བཞིན་འདུག སྤྱིར་བཏང་གཞིས་ཆགས་གཅིག་ནང་ཚང་མ་སྡུག་མཉམ་མྱོང་བྱས་ནས་སྡོད་རྒྱུ་དེ་བདེ་པོ་གང་ཡང་མེད་སྟབས། སློབ་སྦྱོང་ཕྲན་བུ་ཡོད་མཁན་ཚོ་ལུང་པ་འདྲ་མིན་ནང་བསླེབས་ཏེ་དཔལ་འབྱོར་འདུ་འགོད་ཀྱིས་མཚོན་སོ་སོའི་མི་རིགས་ཀྱི་ལྟ་བ་དང་སྤྱོད་པ་མ་བརླག་པའི་ཐོག་ནས་ཡུལ་ལུང་འདྲ་མིན་ནང་རང་ཉིད་འཚོ་ཐབས་ཀྱི་ལས་ཀ་གང་ཐུབ་ཀྱིས་ཕུགས་བརྟན་བྱེད་ ཐུབ་ན་ཡག་པོ་འདུག ཁ་སྔོན་ངོས་རང་ཨ་རིར་ཡོད་སྐབས་བོད་པ་ཁག་གཅིག་དང་ཐུག་རྒྱུ་བྱུང་། ངོས་ཀྱིས་ཁོང་ཚོར་ (millionaire) ས་ཡའི་བདག་པོ་བྱེད་ཐུབ་ཀྱི་མི་འདུག་གམ། ས་ཡའི་བདག་པོ་ཆེན་པོ་དེ་འདྲ་ལམ་སེང་ཡོང་རྒྱུ་ཁག་པོ་ཡིན་ཡང་ཆུང་ཆུང་ཞིག་ཡོང་དགོས་རྒྱུ་ལྟ་བུ་རེད། དེར་བརྟེན་ཁྱེད་རང་ཚོས་འབད་བརྩོན་བྱས་ཏེ་ས་ཡའི་བདག་པོ་ཆུང་ཆུང་ཞིག་ཡོང་ཐབས་བྱེད་ཐུབ་ན་ཡག་པོ་ཡོད། ཁྱེད་རང་ཚོ་འདི་གར་ཡོད་མཁན་ཚོས་བོད་པའི་སྤྱི་དོན་གྱི་བསམ་བློ་མ་བརླག་པ་བྱེད་རྒྱུ་ཧ་ཅང་གལ་ཆེན་པོ་རེད། དེར་བརྟེན་བོད་མི་རྒན་གཞོན་ཚང་མས་རིག་པ་སྒྲིམ་ཏེ་བོད་མི་རིགས་ཀྱི་རིན་ཐང་མཚོན་པའི་ཡ་རབས་སྤྱོད་བཟང་གོང་འཕེལ་བཏང་བ་དང་ཆབས་ཅིག་རྒྱ་གར་ནང་གནས་པའི་གཞིས་ཆགས་ཁག་ལ་རང་ཉིད་ཀྱི་འཁོས་དཔག་ལ་གཞིགས་པའི་རོགས་རམ་བྱེད་རྒྱུ་གལ་འགངས་ཆེན་པོ་ཆགས་ཡོད། ཅེས་སོགས་གསུངས་འདུག
ཚེས་ ༡༢ ཉིན་༸གོང་ས་མཆོག་གིས་ཨི་ཊ་ལིའི་ཊུ་སི་ཀན་ནི་མངའ་སྡེའི་པོ་མ་ཡ་ (Pomaia) གྲོང་གསེབ་དུ་ཨི་ཊ་ལིའི་གསར་ཤོག་ (Corriere della Sera) གི་དྲི་བར་བཀའ་ལན་གནང་སྐབས། ཁོང་གིས་ཐེངས་འདིར་ཨི་ཊ་ལིར་ཆིབས་བསྒྱུར་གྱི་དམིགས་ཡུལ་དང་སྐུའི་མཛད་འགན་གསུམ། ཁོང་ཉིད་ནས་ཆབ་སྲིད་ཀྱི་སྐུ་དབང་རྩིས་སྤྲོད་བྱས་པའི་སྐོར་སོགས་ངོ་སྤྲོད་གནང་ཡོད་པ་དང་། གསར་འགོད་པ་ཞིག་གིས་རྒྱ་ནག་སྐམ་སར་རྒྱ་རིགས་ནང་པ་མང་དུ་འགྲོ་བཞིན་པའི་སྐོར་ལ་བཀའ་འདྲི་ཞུས་པར་༧གོང་ས་མཆོག་གིས། དེང་སྐབས་འཛམ་གླིང་དུ་ནང་པ་མང་ཤོས་རྒྱ་ནག་ནང་ཡོད། རྒྱ་ནག་ནང་དུ་ནང་པ་ས་ཡ་ ༤༠༠ ཡོད་སྐོར་རྗོད་བཞིན་འདུག རྒྱ་ནག་སྐམ་སའི་རྒྱ་རིགས་མང་པོས་ནང་ཆོས་ལ་དོ་སྣང་ཧ་ཅང་ཆེན་པོ་བྱེད་བཞིན་ཡོད་པར་མ་ཟད། ཁོང་ཚོ་རྒྱ་གར་ནང་ངོས་ཀྱི་སར་གསུང་ཆོས་ཉན་དུ་ཡོང་གི་ཡོད། ཅེས་བཀའ་ལན་གནང་འདུག
ལ་དྭགས་དུས་འཁོར་དབང་ཆེན་གྱི་སྐོར་ལ་༧གོང་ས་མཆོག་གིས། རྒྱ་ནག་གཞུང་གིས་དུས་འཁོར་དབང་ཆེན་ལ་བཅར་མཁན་བོད་རིགས་དང་རྒྱ་རིགས་དབར་དབྱེ་བ་འབྱེད་བཞིན་འདུག དེ་སྔ་ཕྱི་ལོ་ ༢༠༡༢ ལོར་ངོས་ཀྱིས་རྒྱ་གར་བྱང་ཕྱོགས་རྡོ་རྗེ་གདན་དུ་དབང་གནང་སྐབས། ཆོས་ཞུར་བཅར་མཁན་རྒྱ་རིགས་དང་བོད་རིགས་རྣམས་བོད་དུ་ཕྱིར་ལོག་རྗེས་རྒྱ་ནག་གཞུང་གིས་རྒྱ་རིགས་ཆོས་ཞུ་བ་ཚོར་སུན་གཙེར་གང་ཡང་མ་བཟོས་པར་བཞག་ཡོད་ཀྱང་། བོད་རིགས་ཆོས་ཞུ་བ་ཚོར་འདྲི་རྩད་བྱས་པ་མ་ཟད། ཁང་པའི་ནང་བཟང་བཙོན་དུ་བཀག་ཉར་སོགས་བྱས་འདུག འདི་ལོར་ངོས་ཀྱིས་ཕྱི་ཟླ་ ༧ ནང་ལ་དྭགས་སུ་དུས་འཁོར་དབང་གནང་རྒྱུ་ཡིན། དེར་བརྟེན་རྒྱ་ནག་གཞུང་གིས་ད་ལྟ་ནས་བོད་རིགས་རྣམས་ལ་དམ་དྲག་བཀག་བསྡོམས་བྱེད་བཞིན་ཡོད་པ་དང་། ལྷག་པར་བོད་རང་སྐྱོང་ལྗོངས་ནས་དུས་འཁོར་དབང་ཆེན་ལ་འགྲོ་མཁན་ཚོར་དམ་དྲག་ཤུགས་ཆེན་བྱེད་བཞིན་འདུག ཅེས་བཀའ་ལན་བསྩལ་ཡོད་འདུག
གསར་འགོད་པ། དོན་གོ
༸གོང་ས་མཆོག་གིས།
་་་་་་་་་་བོད་དུ་ཕྱིར་ལོག་རྗེས་རྒྱ་ནག་གཞུང་གིས་རྒྱ་རིགས་ཆོས་ཞུ་བ་ཚོར་སུན་གཙེར་གང་ཡང་མ་བཟོས་པར་བཞག་ཡོད་ཀྱང་། བོད་རིགས་ཆོས་ཞུ་བ་ཚོར་འདྲི་རྩད་བྱས་པ་མ་ཟད། ཁང་པའི་ནང་བཟང་བཙོན་དུ་བཀག་ཉར་སོགས་བྱས་འདུག
འདི་ལོར་ངོས་ཀྱིས་ཕྱི་ཟླ་ ༧ ནང་ལ་དྭགས་སུ་དུས་འཁོར་དབང་གནང་རྒྱུ་ཡིན། དེར་བརྟེན་རྒྱ་ནག་གཞུང་གིས་ད་ལྟ་ནས་བོད་རིགས་རྣམས་ལ་དམ་དྲག་བཀག་བསྡོམས་བྱེད་བཞིན་ཡོད་པ་དང་། ལྷག་པར་བོད་རང་སྐྱོང་ལྗོངས་ནས་དུས་འཁོར་དབང་ཆེན་ལ་འགྲོ་མཁན་ཚོར་དམ་དྲག་ཤུགས་ཆེན་བྱེད་བཞིན་འདུག ་་་་་་་་་
༈།།ལོ་ངོ་ཉི་ཤུ་རྩ་གྲང་རིང་རང་ཉིད་སློབ་གཉེར་དང་འཚོ་གནས་བྱེད་ས་ཁང་ཚན་མི་ཚན་ལ་དུས་ཡུན་ལོ་གཅིག་གི་ལས་ཀ་ཁང་ཚན་རྒན་སོགས་ལས་དོན་གང་མི་གྲུབ་པར་མགོ་བདེ་དྲན་འཕྲུལ་ཚ་བའི་ལྷ་རམ་དགེ་བཤེས།།
༄༅།།སྤྱི་ཚོགས་ནང་གི་དགེ་ལས་སློབ་ཕྲུག་བྱེད་སྟངས་ག་འདྲ་ཡིན་མི་ཤེས་ཀྱང་གྲྭ་ས་ཡི་ནང་གི་གྲྭ་པ་དཔེ་ཆ་ཡག་གྲས་ཚོར་ལ་དགེ་ལུགས་རྒྱུགས་སྤྲོད་སྐབས་གྲྭ་ཚང་དང་ཁང་ཚན་གྱི་དམིགས་གསལ་གང་དྲག་དྲག་བྱས་ན་ཡང་ཁོ་ཚོ་གྲས་མང་པོ་ཞིག་ལ་གྲྭ་ས་གྲྭ་ཚང་ལ་ཤ་ཚ་རྟིང་འབྲུ་ཙམ་མི་འདུག་ཐ་ན་སོ་སོ་མི་ལོ་ཉི་ཤུ་རྩ་གྲང་བར་སློབ་གཉེར་བྱས་ས་ཁང་ཚན་གྱི་རྒན་ཙམ་མི་བྱེད་པར་རང་དོན་ཁོ་ན་བྱེད་བཞིན་འདུག་གོ་