བཙན་བྱོལ་བོད་མི་ཕྲུ་གུ་གསུམ་ཡན་ཡོད་མཁན་ཚོའི་ཤེས་ཡོན་དང་འཕྲོད་བསྟེན་ཐོག་བོད་མིའི་སྒྲིག་འཛུགས་ཀྱིས་དམིགས་བསལ་ལྟ་སྐྱོང་རོགས་རམ་གནང་རྒྱུ་ཡིན་ཟེར།
ཉེ་ལམ་ཟླ་ ༦ ཚེས་ ༡༦ ཉིན་བཀའ་ཤག་གིས་བཙན་བྱོལ་བོད་མིའི་ཚོགས་སྡེ་ཁག་ལ་བཀོད་ཁྱབ་ཅིག་བཏང་ཡོད་པའི་ནང་། དམིགས་བསལ་ཚོགས་ཆེན་གྱི་རྒྱབ་གཉེར་སྙན་ཐོའི་དགོངས་དོན་ལྟར། བཙན་བྱོལ་བོད་མི་ཕྲུ་གུ་གསུམ་ཡན་ཡོད་པ་རྣམས་ལ་གཞུང་ངོས་ནས་དམིགས་བསལ་བལྟ་སྐྱོང་གནང་རྒྱུ་ཡིན་པ་དང་། སྲིད་བྱུས་དེ་ད་ལོའི་ཕྱི་ཟླ་ ༧ ཚེས་ ༡ ཉིན་ནས་བཟུང་ལག་བསྟར་བྱེད་དགོས་སྐོར་སོགས་འཁོད་འདུག
བཀའ་ཤག་གི་བཀོད་ཁྱབ་ནང་འཁོད་དོན། ཕྱི་ལོ་ ༢༠༡༣ ཟླ་ ༩ ཚེས་ ༢༥ ནས་ ༢༨ བར་བཞུགས་སྒར་དྷ་རམ་ས་ལར་དམིགས་བསལ་ཚོགས་ཆེན་ཐེངས་གཉིས་པ་བསྐྱངས་པའི་རྒྱབ་གཉེར་སྙན་ཐོའི་བརྗོད་གཞི་གཉིས་པའི་དོན་ཚན་ ༡༦ པའི་དགོངས་དོན། “ བོད་མི་རིགས་ཀྱི་འཐབ་རྩོད་ལ་འཕྲལ་ཕུགས་གང་ཐད་ནས་མི་འབོར་ཉུང་བའི་དཀའ་ངལ་ དངོས་ཡོད་ལ་བརྟེན། ཕྲུ་གུ་མང་པོ་སྐྱེད་གསོ་བྱེད་དགོས་པ་དང་། ཕྲུ་གུ་གསུམ་པ་ཡན་ཡོད་པ་རྣམས་ལ་གཞུང་ངོས་ནས་དམིགས་བསལ་བལྟ་སྐྱོང་དགོས།” ཞེས་གསལ་ཡོད་པ་ལྟར། དེ་ལྟའི་གཟིགས་སྐྱོང་གནང་ཕྱོགས་ཀྱི་སྲིད་ཇུས་གཏན་འབེབས་བྱ་རྒྱུའི་འཆར་འབུལ་ཚོགས་ཆུང་ཟུར་འཛུགས་བྱས་པའི་རྒྱབ་གཉེར་སྙན་ཐོ་ལ་བཀའ་ཤག་ནས་བསྐྱར་ཞིབ་གནང་འོས་གནང་སྟེ་སྲིད་ཇུས་དོན་ཚན་ ༥ ཅན་ཞིག་གཏན་འབེབས་གནང་སོང་བའི་འདྲ་བཤུས་འདི་མཉམ་ཟུར་འབུལ་ཞུས་ཡོད་ཅིང་། སྲིད་ཇུས་དོན་ཚན་ལྔ་པའི་དགོངས་དོན་ཇི་བཞིན་དེ་ག་འབྲེལ་ཡོད་ལས་ཁུངས་སོ་སོ་ནས་ཕྱི་ལོ་ ༢༠༡༤ ལོའི་ཟླ ༧ ཚེས་ ༡ ནས་བཟུང་རྩ་འཛིན་ཕྱག་བསྟར་དོན་འཁྱོལ་དགོས་པ་དགོངས་འཇགས་ཞུ། ཞེས་འཁོད་འདུག
ལས་དོན་དེ་ལག་བསྟར་གནང་ཕྱོགས་ཀྱི་རྩ་འཛིན་སྲིད་བྱུས་དོན་ཚན་ ༥ འཁོད་ཡོད་པའི་ནང་། དང་པོ། ཕྲུ་གུ་གསུམ་ཡན་ཡོད་པའི་ཁྱིམ་ཚང་རྣམས་ཀྱི་ཕྲུ་གུ་གསུམ་པ་ཡན་ཚང་མར་ཤེས་རིག་ལས་ཁུངས་ནས་དམིགས་བསལ་སློབ་ཡོན་རོགས་སྐྱོར་དགོས་རྒྱུ། འོན་ཀྱང་སློབ་ཡོན་སྒེར་ཁུངས་ནས་གཏོང་ཐུབ་པའི་ཁྱིམ་ཚང་ཁག་ནས་དམིགས་བསལ་ལམ་སྟོན་འདི་ཞུ་ལེན་མི་དགོས་པའི་ལམ་སྟོན་ཞུ་རྒྱུ། གཉིས་པ། ཕྲུ་གུ་གསུམ་ཡན་ཡོད་པའི་ཁྱིམ་ཚང་གི་འཕྲོད་བསྟེན་མཐུན་རྐྱེན་ཐོག་འཕྲོད་བསྟེན་ལས་ཁུངས་ནས་དམིགས་བསལ་རོགས་སྐྱོར་གྱི་ལས་གཞི་གང་དགོས་སྤེལ་རྒྱུ། གསུམ་པ། ཕྲུ་གུ་གསུམ་ཡན་ཡོད་པའི་སྐྱེད་མ་རྣམས་དང་ཕྲུ་གུ་གསུམ་ཡན་ལ་འཕྲོད་བསྟེན་ལས་ཁུངས་ཀྱི་སྨན་བཅོས་ལྟ་སྐྱོང་ལས་གཞིའི་འོག་ནས་སྨན་བཅོས་རིན་མེད་གནང་རྒྱུའི་ཆ་རྐྱེན་གཏོད་རྒྱུ། བཞི་པ། ཕྲུ་གུ་གསུམ་ཡན་མངལ་འཁོར་བྱུང་བའི་སྐྱེད་མ་རྣམས་ལ་སྦྲུམ་མའི་དུས་ཡུན་རིང་དང་ཕྲུ་གུ་བཙའ་དུས་ཀྱི་སྨན་བཅོས་འགྲོ་གྲོན་ཆ་ཚང་འཕྲོད་བསྟེན་ལས་ཁུངས་ནས་གཏོང་རྒྱུ། ལྔ་པ། བོད་མིའི་སྒྲིག་འཛུགས་ཀྱི་ཁྱབ་ཁོངས་སྡེ་ཚན་ཁག་དང་། བཙན་བྱོལ་བོད་མིའི་སྤྱི་ཚོགས་ཀྱི་རང་སྐྱོང་ཚོགས་སྡེ་ཁག་བཅས་ཀྱི་བུད་མེད་ལས་བྱེད་རྣམས་ལའང་བོད་མིའི་སྒྲིག་འཛུགས་ཀྱི་བུད་མེད་ལས་བྱེད་རྣམས་ལ་ཇི་ཡོད་ལྟར་ཕྲུ་གུ་བཙས་ཤོར་སྐབས་དམིགས་བསལ་ཕོགས་ཡོད་གུང་སེང་གི་ཐོབ་ཐང་གཏན་འབེབས་ དགོས་པའི་ལམ་སྟོན་བཀོད་ཁྱབ་བྱ་རྒྱུ། ཞེས་སོགས་འཁོད་འདུག
གསར་འགོད་པ་ཤེས་རིག་ལས་ཁུངས་སུ་བཅར་ཏེ་བཀའ་ཤག་གི་བཀོད་ཁྱབ་ནང་གསལ་ལྟར། བཙན་བྱོལ་བོད་མི་ཕྲུ་གུ་གསུམ་ཡན་ཡོད་མཁན་ཚོའི་སློབ་ཡོན་སོགས་ལ་གཞུང་གིས་རོགས་རམ་གནང་རྒྱུར། རོགས་དངུལ་ལ་ཚད་གཞི་ཡོད་མེད་སོགས་བྱེ་བྲག་གི་སྲིད་བྱུས་གང་འདྲ་ཡོད་མེད་བཀའ་འདྲི་ཞུས་བར། ཤེས་རིག་དྲུང་ཆེ་སྟོབས་རྒྱལ་ལགས་ཀྱིས་ཤེས་རིག་དང་འབྲེལ་བ་ཡོད་པའི་གནས་ཚུལ་ཁག་ཤེས་རིག་ལས་ཁུངས་ཀྱིས་ཚོགས་ཆུང་བཙུགས་ཏེ་བསྐྱར་ཞིབ་གནང་རྗེས་སྙན་ཐོ་བཀའ་ཤག་ལ་ཕུལ་ཡོད་པ་རེད། དེའི་སྐོར་བཀའ་ཤག་གིས་ཐག་གཅོད་གཏན་འབེབས་གནང་རྗེས་གསལ་བསྒྲགས་གནང་ཡོང་གི་རེད། དེ་མ་གཏོགས་ད་སྔ་དེའི་སྐོར་ལ་ཞུ་རྒྱུ་གཞན་མེད། ཅེས་བརྗོད་བྱུང་།
གསར་འགོད་པ། དོན་གྲུབ།
༈དེང་སང་བཙན་བྱོལ་ཁྲོད་ཀྱི་ཁྱིམ་གསར་འཛིན་མཁན་ཚོའི་མི་ཚེ་གཅིག་འཚོ་སྐྱེལ་རྒྱུར་ཞེད་ཐག་ཆོད་དེ་ཕྲུ་གུ་གཅིག་སྐྱེས་སྐྱོང་ཕོད་ན་དེ་ནི་བློ་ཁོག་ཆེ་གྲས་དང་ཁོ་རང་གཉིས་འབྲེལ་པ་མི་ཆད་ཐབ་ཙམ་རེད་བོད་མི་རིགས་ལ་འགན་ཁུར་ནི་མེད་ཐག་ཆོད་རེད་བུ་ཕྲུག་གཅིག་པུ་བཟོས་པ་རྟེན་བུ་ཕྲུག་དེ་ཚོ་ཆེན་པོ་ཆགས་དུས་ཁོ་ཚོ་ལ་སྤུན་ཆེད་མེད་པའི་མི་ཞིག་ཕ་མ་གཉིས་ཀྱིས་བཟོས་པ་རེད་ལ་ཕ་མ་རང་ཉིད་བུ་ཕྲུག་གཅིག་པུ་དེས་ཡག་པོ་མ་བྱས་པ་འམ་ཤི་ཆད་དེ་ནས་ཚར་མ་རེད་དམ་
དེང་སྐབས་ཕྲུ་གུ་གསུམ་ལས་ལྷག་ཕར་ཟད་གསུམ་རེ་སྐྱེས་མཁན་ཡང་རེག་གི་མ་རེད། བོད་གཞུང་སྐད་ངན་ཤོར་བཞིན་འདུག
བཀའ་ཤག་གི་གསལ་བསྒྲགས་ “ནང་ཕྲུ་གུ་གསུམ་ཡན” ཟེར་བ་དེ་ག་རེ་ལ་གོ་དགོས་པ་རེད། ཕྲུ་གུ་གསུམ་པ་དེ་དམགས་བསལ་ལྟ་སྐྱོང་འོག་ཚུད་གི་རེད་དམ།
བཀོད་ཁྱབ་འདི་ནང་དུ་ཁ་གསལ་བོ་མེད་པ་དང་མགོ་རྙོག་གཞིའི་རིགས་མང་པོ་ཞིག་འདུག སློབ་ཡོན་ག་ཚོད་རེག་གི་རེད། དུས་ཡུན་ཅི་ཙམ་ལ་རེག་གི་རེད། འཕྲོད་བསྟེན་གྱི་དངུལ་ཆ་ཚང་སྤྲོད་གི་རེད་དམ་དུས་ཚོད་ག་ཚོད་བར་རེག་གི་རེད།