འཐབ་ཕྱོགས་གཅིག་གྱུར་ལ་སྙན་ཞུ་ཕུལ་ཡོད།

ཤར་ཕྱོགས་ཁུག་རྟ་ལགས་ཀྱིས་སོ་སོའི་རྩོམ་ཡིག་ཕྱོགས་བསྒྲིཊ་ཀྱི་དཔེ་དེབ་དབུ་འབྱེད་དང་འབྲེལ་ཉེ་ལམ་རྒྱ་གཞུང་ལ་ཡིག་འབྲེལ་བྱས་ཏེ་བཙན་བྱོལ་ནང་གི་རྩོམ་པ་པོ་སྐོར་ཞིག་བོད་ནང་གི་སློབ་ཆེན་ཁག་ནང་ལྟ་སྐོར་དུ་བསྐྱོད་ཆོག་རྒྱུའི་སྙན་ཞུ་ཕུལ་ཡོད་ཟེར།

ཁ་སང་ཕྱི་དྲོའི་ཆུ་ཚོད་ ༦།༢༠ སྟེང་དྷ་ས་མེག་གྷན་ཌི་རོམ་སི་ཌེ་ཁུ་ཟ་ཁང་ (Drum Stick Restaurant) དུ་ན་གཞོན་རྩོམ་པ་པོ་བློ་བཟང་ཆོས་འབྱོར་རམ་ཤར་ཕྱོགས་ཁུག་རྟ་ལགས་ཀྱིས་བརྩམས་པའི་༼སྟག་ཤར་གཞོན་པས་བོད་རྒྱའི་དཀའ་རྙོག་གླེང་བ།༽ཞེས་པའི་དཔེ་དེབ་དབུ་འབྱེད་ཀྱི་མཛད་སྒོ་ཞིག་ཚོགས་སོང་། མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་རྒྱུན་ལས་པདྨ་འབྱུང་གནས་ལགས་དང་མདོ་སྨད་དབུས་སྤྱི་ཁབ་རྒྱུན་ལས་ཚོགས་གཙོ་བསྟན་པའི་དངོས་གྲུབ་ལགས་གཉིས་དང་། སྤྱི་འཐུས་ཟླ་བ་ཚེ་རིང་ལགས། སྤྱི་འཐུས་རྒྱ་རིག་ཐར་ལགས། ཉམས་ཞིབ་པ་ལྷ་ལུང་རྒྱལ་དང་གཡང་མཁོ་རྒྱལ། དེ་བཞིན་གཞོན་སྐྱེས་རྩོམ་པ་པོ་ཁག་ཅིག་བཅས་འཛོམས་སོང་།

དཔེ་དེབ་དབུ་འབྱེད་དང་འབྲེལ་ནས་ཚོགས་གཙོ་བསྟན་པའི་དངོས་གྲུབ་ལགས་ཀྱིས། རྩོམ་པ་པོ་ཁོ་རང་ལ་མཚོན་ན་སྐྱབས་བཅོལ་དུ་འབྱོར་བ་ནས་བཟུང་དཀའ་ངལ་ལ་མ་འཛེམས་པར། བཤད་པ་དང་བསྒྲུབ་པའི་ནུས་པ་དང་གདེང་ཚོད་གཉིས་ཀ་ཡོད་མཁན་ཞིག་དང་། བོད་པའི་སྐད་ཡིག་རིག་གཞུང་ཐོག་དུས་རྒྱུན་ལས་ཀ་བྱེད་མཁན་ཞིག་ལ་མཐོང་གི་ཡོད། ང་ཚོའི་སྤྱི་ཚོགས་ནང་ཆབ་སྲིད་ལངས་ཕྱོགས་མང་པོ་ཡོད་པ་ལྟར། རྩོམ་པ་པོ་རང་ཉིད་ཀྱིས་བོད་མིའི་སྒྲིག་འཛུགས་ཀྱི་ལངས་ཕྱོགས་དབུ་མའི་ལམ་ལ་རྩོམ་ཡིག་དང་གཏམ་བཤད་སོགས་བརྒྱུད་ནས་ཤར་སྐྱོད་བྱེད་ཀྱི་ཡོད། དེར་བརྟེན། ངས་ཁོ་རང་༸གོང་ས་མཆོག་གི་བཀའ་དགོངས་ལམ་སྟོན་འོག་ཤར་སྐྱོད་བྱེད་མཁན་ཞིག་ལ་ངོས་འཛིན་བྱེད་བཞིན་ཡོད། མ་འོངས་པར་ཡང་མུ་མཐུད་ནས་འབད་བརྩོན་ཞུ་རྒྱུ་མདོ་སྨད་དབུས་རྒྱུན་ཚོགས་གཙོའི་མིང་ཐོག་ནས་འབོད་སྐུལ་ཞུ་རྒྱུ་ཡིན་ཞེས་བརྗོད་སོང་།

དཔེ་དེབ་དབུ་འབྱེད་སྐོར་ལ་ཤར་ཕྱོགས་ཁུག་རྟ་ལགས་ཀྱིས། དེབ་འདི་སྡོམ་བརྒྱབ་ནས་ཞུས་ན་གུས་པ་སྐྱབས་བཅོལ་དུ་འབྱོར་ནས་དབུ་མའི་ལམ་གྱི་ཉམས་ལེན་པ་རྣལ་མ་ཞིག་ཇི་ལྟར་བྱ་རྒྱུའི་སྟ་གོན་སྐབས་མཐོང་ཐོས་མྱོང་གསུམ་ཡོངས་བསྒྲགས་བྱས་པ་རྣམས་ལྷན་སྡེབ་བྱས་པ་ཞིག་ཡིན། €˜ བསྟོད་བསྔགས་མི་ལ་གཏོང་དུ་ཆུགས། རང་སྐྱོན་རང་གིས་ཤོད་ཅེས་པའི་བཀའ་སློབ་གནད་བསྡུས་འདི་རྩ་དོན་དུ་བཟུང་སྟེ། ང་ཚོའི་ཆོས་སྲིད་གཉིས་ཐོག་འཐུས་ཤོར་གང་ནས་ཕྱིན་མིན་དང་། འབད་བརྩོན་ཅི་ལ་མ་བྱས་པ། མདོར་ན་བོད་ཀྱི་རྩ་དོན་ལ་དོན་དམ་གྱིས་ཤ་ཞེན་ཡོད་མེད། ལོ་རྒྱུས་ཀྱིས་སྤྲད་པའི་འོས་འགན་ཏག་ཏག་བསྒྲུབ་ཡོད་མེད་བར་འཛེམས་ཟོན་སྤངས་ཏེ་དཔྱད་གླེང་བྱས་ཡོད་ཅེས་སོགས་བརྗོད་སོང་།

དབུ་མའི་ལམ་གྱི་སྐོར་ལ། “ཉེ་ལམ་འུ་ཐུག་ཐབས་ཟད་ལྟ་བུར་བཀུར་འོས་སྤྱི་ལྷན་ནས་བོད་ནང་སྐུ་ཚབ་ཚོགས་ཆུང་ཞིག་ཆེད་གཏོང་གནང་ཆེད་སྐུ་ཞབས་ཞི་ཅིན་ཕིན་ལ་ཕྱག་འཕྲིན་སྤྲིངས་འདུག་པར་ཡི་རངས་ཞུ་རྒྱུ་ཡིན། ང་ཚོ་དབུ་མ་པ་སྒེར་པ་དག་གིས་ཀྱང་འདི་ལྟར་ལྟ་སྐོར་ལ་འགྲོ་རྒྱུར་རང་རང་ས་ནས་ཐབས་ཤེས་བྱེད་པའི་དུས་ལ་བབས་ཡོད་པ་བཞིན། གུས་པས་རྒྱ་རིགས་གྲོགས་པོ་དབུ་མའི་ལམ་གྱི་ཉམས་ཞིབ་པ་ཞིག་བརྒྱུད་དེ། དམངས་ཁྲོད་དབུ་མའི་ལམ་གྱི་རྗེས་འཇུག་པ་རྩོམ་པ་པོ་སྐོར་ཞིག་བོད་ནང་གི་སློབ་ཆེན་ཁག་ཏུ་ལྟ་སྐོར་ལ་ཡོང་འཇུག་རྒྱུའི་རེ་སྐུལ་སྙན་ཞུ་ཕུལ་ཟིན་ལ། སྙན་ཞུ་དེ་ད་ལྟ་དབུས་འཐབ་ཕྱོགས་གཅིག་གྱུར་གྱི་མདུན་ཅོག་སྟེང་བསླེབས་སྐད་འདུག དེ་རིང་གི་གོ་སྐབས་འདི་བརྒྱུད་ནས་ཀྱང་བཀུར་འོས་སྤྱི་ལྷན་གྱི་འབོད་སྐུལ་དེར་རྒྱ་ནག་གཞུང་གིས་ཡ་ལན་ཚུལ་མཐུན་ཞིག་གནང་རྒྱུའི་འབོད་སྐུལ་ཞུ་རྒྱུ་ཡིན” ཞེས་སོགས་བརྗོད་སོང་།

སྤྱི་འཐུས་པདྨ་འབྱུང་གནས་ལགས་ཀྱིས། རྩོམ་པ་པོ་ཁོ་རང་གིས་བྲིས་པའི་རྩོམ་ཡིག་དག་ལ་སྡེབ་སྦྱོར་ཕུན་སུམ་ཚོགས་པོ་ཡོད་པ་མ་ཟད། ཁོས་བརྗོད་གཞི་ག་འདྲ་ཞིག་བྲིས་པ་ཡིན་ནའང་དོན་ལ་དམིགས་ཏེ་བྲིས་ཡོད་སྟབས་ཀློག་པ་པོ་ཚོས་ལམ་སང་རྟོགས་ཐུབ་པ་ཞིག་རེད་བསམ་གྱི་ཡོད། ཁོ་རང་གིས་གང་བརྩམས་པ་ཡོངས་རྫོགས་ཡག་པོ་འདུག་ཟེར་བ་ཞིག་དགོས་ཀྱི་ཡོད་པ་མ་རེད། རྩོམ་པ་པོ་ཚོར་ཡག་སྡུག་གཉིས་ཆ་ཡོང་གི་རེད། དེ་སྔ་རྩོམ་རིག་མཁས་པ་མང་པོས་སོ་སོའི་མི་ཚེའི་ནང་སྐྱོན་དངོས་སུ་མཐོང་བ་དང་མ་མཐོང་བ་མང་པོ་ཞིག་ཡོང་བསྡད་ཡོད། རྩོམ་པ་པོ་ཁ་ཤས་ཀྱིས་རང་ཉིད་ཀྱིས་གང་བརྩམས་པ་རང་ཉིད་ཀྱི་མི་ཚེའི་ནང་དཔར་སྐྲུན་བྱེད་མ་ཐུབ་པར་ཁོ་རང་གྲོངས་རྗེས་དཔར་སྐྲུན་བྱེད་པའི་གནས་ཚུལ་དེ་འདྲའང་བྱུང་མྱོང་ཡོད། གང་ལྟར་ལེགས་ཉེས་ཀྱི་གནས་ཚུལ་ག་རེ་བྱུང་བ་ཡིན་ན་གཙོ་བོ་རྩོམ་འབྲི་བའི་ཀུན་སློང་ཡིན་སྟབས་སོ་སོས་རྒྱུན་སྐྱོང་གནང་དགོས་པ་གལ་ཆེན་པོ་རེད། ཁྱེད་རང་གིས་གང་བརྩམས་གནང་བ་དེས་ཡོངས་རྫོགས་ལ་ཕན་མ་ཐོགས་ཀྱང་འཚམས་ཞིག་ལ་རང་བཞིན་གྱིས་ཕན་ཐོགས་པ་དང་། ལྷག་པར་དུ་རྩོམ་རིགས་ལ་དོ་སྣང་ཡོད་མཁན་ཚོར་ཐུགས་ཕན་སོས་པ་ཡོང་གི་རེད་ཅེས་བརྗོད་སོང་།

མཇུག་ཏུ་ཉམས་ཞིབ་ལྷ་ལུང་རྒྱལ་ལགས་ཀྱིས། དེབ་ཅིག་འབྲི་རྒྱུར་དཀའ་ངལ་ག་ཚོད་ཅིག་ཡོད་མེད་ང་ཚོའི་སྤྱི་ཚོགས་ནང་ཤེས་མཁན་ཉུང་ཉུང་རེད། བཙན་བྱོལ་ནང་ལྟ་བུར་མཚོན་ན། དེབ་འབྲི་མཁན་དང་དཔར་སྐྲུན་བྱེད་པ་སོགས་རྩོམ་པ་པོ་ཁེར་རྐྱང་གིས་བྱེད་དགོས་པ་ལས། གཞུང་དང་གཞུང་འབྲེལ་མ་ཡིན་པའི་ཚོགས་པ་གང་གིས་ཀྱང་རོགས་རམ་བྱེད་པ་ཉུང་ཉུང་རེད། གལ་སྲིད་རོགས་བྱས་ཡོད་ཚེ་དེ་ཡང་ངོ་སོ་དང་ལམ་ཁ་ཞིག་བརྒྱུད་རག་པ་ཤ་སྟག་ཆགས་ཡོད། གལ་སྲིད་ཤར་ཕྱོགས་ཁུག་རྟས་བྲིས་པའི་དེབ་འདིར་ལྗིད་ཁོག་ཡོད་མེད་ལ་མ་ལྟོས་པར་ཚད་ལྡན་རྒྱལ་ཁབ་ཅིག་དང་ལྷག་པར་དུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་རྩོམ་པ་པོས་གཞུང་གི་ལངས་ཕྱོགས་དང་མཐུན་པའི་དེབ་ཅིག་བྲིས་ཡོད་ན། རྩོམ་པ་པོ་ཁོ་རང་གི་མི་ཚེ་དལ་པོ་དང་ལྷོད་པོ་ཡོང་རྒྱུ་ཡིན་པ་བཤད་མ་དགོས་པ་རེད། ཅེས་བརྗོད་སོང་།

ཁོས་མུ་མཐུད་དུ། དོན་དངོས་ང་ཚོས་དབུ་མའི་ལམ་གྱི་རྩ་བའི་རྩ་དོན་ཆེན་པོ་དེ་བོད་ཀྱི་རིག་གཞུང་དང་ཁོར་ཡུག་སོགས་སྲུང་སྐྱོབ་བྱེད་ཆེད་རེད། ཡིན་ནའང་ང་ཚོས་ལག་ལེན་བྱེད་སྐབས་ང་ཚོས་རིག་གཞུང་གཅེས་སྐྱོང་གི་ལམ་ཁ་དེ་དོན་དངོས་ཐོག་རིག་གཞུང་གཅེས་སྐྱོང་ག་ཚོད་ཅིག་གནང་གི་ཡོད་མེད་གསལ་གསལ་ཐང་ཐང་རེད། མཚམས་རེར་ང་ཚོས་རྒྱ་ནག་དམར་པོའི་སྲིད་གཞུང་གིས་བོད་ཀྱི་རིག་གཞུང་འཕྲོ་བརླག་གཏོང་གི་ཡོད་སྐོར་ཁ་ཡོད་ཚད་ཀྱིས་ཤོད་ཀྱི་ཡོད། ཡིན་ནའང་ང་ཚོས་བསམ་བློ་རྣལ་དུ་ཕབ་ནས་འདང་བརྒྱབ་ན། དོན་དངོས་ཐོག་ང་ཚོའི་རིག་གཞུང་འདི་སུས་གཅེས་སྐྱོང་དང་སུས་གཏོར་བརླག་བཏང་ཡོད་པ་ང་རང་ལ་མཚོན་ན་བྱེད་མི་ཐུབ་པའི་གནས་བབ་ཅིག་ཆགས་འདུག་ཅེས་སོགས་བརྗོད་སོང་།

༼སྟག་ཤར་གཞོན་པས་བོད་རྒྱའི་དཀའ་རྙོག་གླེང་བ་༽ཞེས་པའི་དེབ་འདིར་ཁྱོན་ཤོག་ངོས་༥༡༩ ཙམ་ཡོད་པ་དང་། དེའི་ནང་གི་བརྗོད་བྱ་གཙོ་བོ་ཁག་ནི། བོད་རྒྱའི་རྩོད་རྙོག་དང་ཏཱ་ལའི་བླ་མའི་ཡང་སྲིད། དབུ་མའི་ལམ། བོད་རྒྱ་གྲོས་མོལ། ཤེས་ཡོན་སྲིད་བྱུས། དམ་སྲི་དོལ་རྒྱལ། ང་དང་སྲིད་སྐྱོང་བློ་བཟང་སེང་གེ་བཅས་ཀྱི་སྐོར་སོགས་འཁོད་འདུག

གསར་འགོད་པ། ལྷ་སྐྱབས་རྒྱལ།