རྒྱ་ནག་གཞུང་གིས་དྲག་སྦྱོད་ཀྱི་སྣེ་འཁྲིད་དང་ལས་འགུལ་ནང་མཉམ་ཞུགས། དྲག་སྤྱོད་པར་དངུལ་གྱི་རོགས་སྐྱོར་བྱེད་མཁན་བཅས་ཀྱི་ཉེས་མིང་འོག་ཡུ་གུར་བ་ ༢༥ ལ་ཁྲིམས་ཐག་བཅད་ཡོད་འདུག
ཁ་སང་ཚེས་ ༡༢ ཉིན་རྒྱ་ནག་གཞུང་འབྲེལ་མི་དམངས་ཁྲིམས་ལུགས་ཚགས་པར་སྟེང་གནས་ཚུལ་བཀོད་པ་ལྟར་ན། ཤིན་ཅང་ཡུ་གུར་རིགས་རང་སྐྱོང་ཁུལ་ཐོན་སྐྱེད་བཟོ་སྐྲུན་དམག་དཔུང་རུ་ཁག་དང་པོའི་འབྲིང་རིམ་མི་དམངས་ཁྲིམས་ཁང་གིས། ཟླ་འདིའི་ཚེས་ ༨ ཉིན་ཁྲིམས་ཆད་ཕྱིར་བསྒྲགས་བྱས་ཏེ། དྲག་སྤྱོད་ཀྱི་སྒྲིགས་འཛུགས་བཙུགས་པ་དང་། དྲག་སྤྱོད་ཀྱི་སྣེ་འཁྲིད་མཁན། དྲག་སྤྱོད་ཀྱི་ལས་འགུལ་ནང་མཉམ་ཞུགས། དྲག་སྤྱོད་ཀྱི་སྒྲིག་འཛུགས་ལ་དངུལ་གྱི་རོགས་རམ་གནང་མཁན་བཅས་ཀྱི་ཉེས་མིང་འོག་ཡུ་གུར་བའི་མི་ ༢༥ ལ་ལོ་གསུམ་དང་། བཅོ་ལྔ། ཚེ་བཙོན་བཅས་ཀྱི་ཁྲིམས་ཐག་བཅད་ཡོད་སྐོར་བསྒྲགས་འདུག
གནས་ཚུལ་ནང་། ཡུ་གུར་བ་མི་ ༢༥ ལས་ཨེ་མེལ་ཁྲི་ཡེ་མེན་ (Ai Maiti Yiming) གཙོས་པའི་མི་ ༥ ལྷག་གིས་ཁྲིམས་འགལ་ཐོག་ཆོས་ལུགས་ཀྱི་སྒྲིག་འཛུགས་གསར་འཛུགས་གནང་སྟེ། ཐེངས་མང་པོར་ཆོས་ལུགས་ཀྱི་བྱེད་སྒོ་དང་དྲིལ་བསྒྲགས། ཆོས་བྱེད་མི་སྣ་བསྡུ་རུབ་སོགས་དྲག་སྤྱོད་ཀྱི་བསམ་བློའི་སློབ་གསོ་སྤེལ་ཡོད་ཚུལ་དང་། མེ་མེལ་ཁྲི་ཡེ་མིན་ (Ai Maiti Yiming) དང་མེལ་མེལ་ཁྲི་ཧྥི་དྷི་ (Mai Maiti If the) གཙོས་པའི་མི་ཁག་ཅིག་གིས་གྲི་ཉོ་བ་དང་འགད་རྫས་ཀྱི་རིགས་བཟོ་སྐྲུན། མི་གཞན་པར་གྲི་དང་རྡོ་སྣུམ་སོགས་མཁོ་སྤྲོད་བྱས་ཏེ་ཁོངས་གཏོགས་ས་གནས་ཀྱི་དམག་ཁང་དང་དམག་མིའི་ལས་ཁུངས། དོ་དམ་རྟོག་ཞིབ་ས་ཚིགས། ཉེན་རྟོག་པའི་ས་ཚིགས་སོགས་ལ་འཇབ་རྒོལ་དང་མེ་མདའ་བཙན་འཕྲོག ཤང་དང་གྲོང་རྡལ་གྱི་ལས་བྱེད་མི་སྣ་དམར་གསོད་སོགས་ཀྱི་བྱ་འགུལ་སྤེལ་ཡོད་ཚུལ་སོགས་བཀོད་འདུག
རྒྱ་ནག་གཞུང་གིས་ཐེངས་འདིའི་ཉེས་དོན་ཁྲིམས་ཆད་ཕྱིར་བསྒྲགས་གནང་སྐབས་ཁོང་ཚོའི་མི་རིགས་དང་ཐོབ་ཐང་བསྒྲགས་བྱས་མེད་ཀྱང་། མིང་ཐོའི་ནང་གི་མི་ ༢༥ ཚང་མ་ཡུ་གུར་བ་དང་གྲངས་ཉུང་མི་རིགས་ཀྱི་མི་ཤ་སྟག་ཆགས་ཡོད་འདུག་ལ། གཞུང་ཕྱོགས་ནས་ཐེངས་འདིའི་ཁྲིམས་ཆད་ཕོག་མཁན་ཚོ་ཉེ་ལམ་ཤིན་ཅང་ཡུ་གུར་ཁུ་ཧྲི་ས་གནས་ཀྱི་དྲག་སྤྱོད་གནས་ཚུལ་དང་འབྲེལ་བ་ཡོད་མེད་གང་ཡང་བསྒྲགས་མི་འདུག
ཤིན་ཅང་ཡུ་གུར་རིགས་རང་སྐྱོང་ཁུལ་དུ་ ༧་༢༨ གྱི་ཟིང་འཁྲུག་དོན་རྐྱེན་བྱུང་རྗེས། རྒྱ་གཞུང་གིས་ས་གནས་སུ་དམག་མི་སྟོག་ཕྲག་མང་པོ་འགྲེམས་འཇོག་གིས་མུ་མཐུད་དྲག་གནོན་བྱས་ཏེ། ད་ཆར་ཡང་ས་གནས་ཀྱི་གནས་སྟངས་ཛ་དྲག་གི་གནས་སུ་གྱར་ཡོད་འདུག འདིའི་ཐད་ཨ་རིའི་རྒྱལ་ས་ཝ་ཤིན་ཊོན་དུ་ཡོད་པའི་ཡུ་གུར་མཐུན་ཚོགས་ཀྱི་འགན་འཁུར་བ་ཨེ་སི་ལེ་ཌི་རོ་སུ་ཌོར་ཨེལ་མྰ་ཌེའེ་ཡིས་ (Islet Rostov Almaty) གསར་ལམ་དུ། ཤིན་ཅང་ནང་བྱུང་བའི་གནས་ཚུལ་མཐའ་དག་རྒྱ་ནག་གཞུང་གི་དྲག་གནོན་དབང་བསྒྱུར་གྱི་སྲིད་བྱུས་དང་འབྲེལ་བ་ཡོད་པ་དང་། ཁོང་ཚོས་ད་བར་ས་གནས་སུ་དམ་དྲག་བཀག་སྡོམ་བྱས་ཏེ་ད་ཆར་ཡང་ཁི་ཧྲི་ཧྲ་ཁྲི་རྫོང་གི་ཟིང་འཁྲུག་གི་བྱུང་རྐྱེན་གང་ཡིན་ཕྱིར་བསྒྲགས་བྱེད་ཀྱི་མེད་སྐོར་བརྗོད་ཡོད་པར་མ་ཟད། རྒྱ་གཞུང་གིས་ད་བར་ཕྱི་ཕྱོགས་སུ་དངོས་ཡོད་གནས་ཚུལ་ཤེས་རྒྱུའི་གོ་སྐབས་སྤྲོད་ཀྱི་མེད་པ་དང་། ཕྱི་ཕྱོགས་ནས་ནང་གི་གནས་ཚུལ་མི་ཤེས་པའི་ཐབས་ཤེས་བྱེད་ཀྱི་ཡོད་སྟབས། དོན་དངོས་ཀྱི་གནས་ཚུལ་མང་དག་ཅིག་རྒྱ་ནག་གཞུང་ཕྱོགས་ནས་བསྒྲགས་པ་དང་འགལ་ཟླ་ཆགས་ཡོད་སྐོར་བརྗོད་འདུག
ཤིན་ཅང་ཡུ་གུར་རིགས་སྐྱོང་ཁུལ་སྲིད་གཞུང་གིས་ཁྱབ་བསྒྲགས་ནང་། ཕྱི་ཟླ་ ༧ ཚེས་ ༢༨ ཉིན་ཁི་ཧྲི་ཧྲ་ཁྲི་རྫོང་གི་ཟིང་འཁྲུག་དོན་རྐྱེན་ཁྲོད་ཉུང་མཐར་མི་ ༣༧ འདས་གྲོངས་དང་། མི་ ༡༣ རྨས་སྐྱོན། མི་ ༣༡ རླངས་འཁོར་འབར་གས་ཁྲོད་ཚིགས་ཡོད་སྐོར་བཀོད་ཡོད་ཅིང་། ས་གནས་ཉེན་རྟོག་པས་ཁྱབ་བསྒྲགས་ནང་། ཟིང་འཁྲུག་ཁྲོད་དྲག་སྤྱོད་པ་མི་ ༥༩ བསད་ཡོད་པ་དང་། མི་ ༢༡༥ འཛིན་བཟུང་བྱས་ཡོད་སྐོར་བཀོད་ཡོད་འདུག ཡིན་ནའང་། རྒྱལ་སྤྱིའི་ཚོགས་སྡེ་དང་གསར་ལམ་ཁག ས་གནས་མི་མང་བཅས་ཀྱིས་ཁི་ཧྲིའི་ཟིང་འཁྲུག་ཁྲོད་ཀྱི་མི་ཤི་རྨས་གྲངས་འབོར་གཞུང་འབྲེལ་གྱི་བསྒྲགས་པའི་གྲངས་འབོར་ལས་མང་བ་ཡོད་ཚུལ་གྱི་གླེང་སློང་ཡོང་གི་ཡོད་འདུག
གསར་འགོད་པ། དོན་གོ
