ཉིན་གཉིས་སྔོན་རྒྱ་དམག་གིས་རྒྱ་གར་ལ་དྭགས་བྱང་ཕྱོགས་ཁུལ་གྱི་པུར་ཚེས་ས་ཁུལ་ནང་བཙན་འཛུལ་བྱས་ཡོད་ཀྱང་རྒྱ་གར་གཞུང་གིས་གནས་ཚུལ་དེར་ཁ་གསལ་ལན་འདེབས་གང་ཡང་བྱས་མི་འདུག
དེ་རིང་རྒྱ་གར་གསར་ལམ་ཁག་ཅིག་ནང་གནས་ཚུལ་ཐོན་པར། ཟླ་འདིའི་ཚེས་ ༡༧ ཉིན་རྒྱ་ནག་གི་དམག་མིས་ཡང་བསྐྱར་རྒྱ་གར་བྱང་ཕྱོགས་ལ་དྭགས་ཀྱི་ས་མཚམས་ནས་ཚུར་སྤྱི་ལེ་ ༢༥ ཙམ་གྱི་ས་ཁུལ་པུར་ཚེ་ (Burtse) ནང་འཛུལ་ནས་དམག་སྒར་བརྒྱབ་པར་བརྟེན། རྒྱ་གར་ས་མཚམས་སྐོར་སྲུང་དམག་མིས་ཉེན་བརྡ་བཏང་ཡང་ཕྱིར་ལོག་མ་བྱས་པ་མ་ཟད། ཁོ་ཚོས་འཕྲད་དར་དམར་པོ་ཞིག་གི་སྟེང་འདི་རྒྱ་ནག་གི་རྒྱལ་ཁོངས་ཡིན་ཞེས་འཁོད་ཡོད་པ་ཞིག་གཡུག་གཡུག་བྱས་ཡོད་སྟབས། རྒྱ་གར་དམག་མིས་ས་གནས་དམག་སྒར་གྱི་མགོ་བར་སྙན་སེང་ཞུས་པ་བརྒྱུད་ས་གནས་དེ་གར་དམག་དཔུང་འགྲེམ་འཇོག་བྱས་ཡོད་འདུག
གནས་ཚུལ་འདིའི་སྐོར་ལ་ཨོ་ཌམ་པོ་ (Udhampur)དམག་སྒར་གྱི་མགྲིན་ཚབ་པ་མདའ་དཔོན་གྷོ་སི་ཝ་མེ་ (S D Goswami) ལགས་ཀྱིས་རྒྱ་གར་དང་རྒྱ་ནག་གཉིས་ཀྱིས་ས་མཚམས་ལ་ངོས་འཛིན་བྱེད་སྟངས་མ་འདྲ་བ་ཡོད་སྟབས། མཚམས་རེར་རྒྱ་ནག་གི་དམག་མི་ས་མཚམས་བརྒལ་བའི་གནས་ཚུལ་རིགས་འབྱུང་གི་ཡོད་ཚུལ་བརྗོད་ཡོད་པ་དང་། དེ་བཞིན། རྒྱ་གར་གྱི་དམག་སྤྱི་ཆེན་མོ་སྐུ་ཞབས་ཌིར་སྤིར་སིན་(Gen Dalbir Singh Suhag) གྱིས་གསར་འགོད་པར་གནས་ཚུལ་དེ་བདེན་པ་མིན་ཚུལ་བརྗོད་ཡོད་འདུག
ཉེ་ལམ་རྒྱ་དཀར་ནག་བར་ས་མཚམས་སྲུང་སྐྱོབ་མཉམ་ལས་སྐོར་ལ་གྲོས་ཆོད་ཞིག་བཞག་ཡོད་པའི་ནང་། རྒྱལ་ཁབ་གཉིས་ཀྱི་ས་མཚམས་ཞི་འཇགས་ཡོང་ཆེད་གནས་སྐབས་རིང་ཕན་ཚུན་གྱི་དམག་དཔུང་ཕྱིར་འཐེན་བྱེད་དགོས་སྐོར་འཁོད་ཡོད་ཀྱང་། རྒྱ་ནག་ཕྱོགས་ནས་འགྱུར་བ་གང་ཡང་བཏང་མེད་སྟབས་ཐེངས་འདིར་རྒྱ་གར་གྱིས་ས་མཚམས་སུ་དམག་དཔུང་འགྲེམ་འཇོག་བྱེད་དགོས་བྱུང་བ་ཞིག་ཡིན་འདུག
གནད་དོན་འདིའི་ཐད་རྒྱ་གར་གྲོས་ཚོགས་ནང་གླེང་སློང་ཤུགས་ཆེན་བྱུང་ཡོད་ཅིང་། བདེ་སྲུང་བློན་ཆེན་ཨ་རུན་ཇད་ཌི་ལེ་(Arun Jaitley)ལགས་ཀྱིས། རྒྱལ་ཁབ་གཉིས་ཀྱིས་ས་མཚམས་ཀྱི་ས་ཐིག་ལ་ངོས་འཛིན་བྱེད་སྟངས་མ་འདྲ་བའི་དབང་གིས་རྒྱལ་ཁོངས་སུ་བཙན་འཛུལ་གྱི་གནས་ཚུལ་འབྱུང་བཞིན་ཡོད། ཟླ་སྔོན་མའི་ཚེས་ ༢༢ ཉིན་རྒྱ་དམག་གིས་ལ་དྭགས་ཀྱི་ཅཱར་ཊིན་ནེ་ལོ་ནོ་ལཱ་ (Charding Nilu Nullah ) ས་ཁུལ་ནང་བཙན་འཛུལ་བྱས་པར་དམག་དཔོན་ཕན་ཚུན་བར་གྲོས་མོལ་བརྒྱུད་དཀའ་ངལ་སེལ་རྗེས་ད་བར་བཙན་འཛུལ་གྱི་གནས་ཚུལ་རིགས་བྱུང་མེད་ཅེས་བརྗོད་ཡོད་འདུག
སྐབས་དེར་ཀོང་རེ་སིའི་མགོ་ཁྲིད་མ་ནེ་ཤཱི་ཌེ་བཱ་རེ་ (Manish Tewari ) ལགས་ཀྱིས། གཞུང་གིས་བཤད་པ་ལྟར་ན། རྒྱ་ནག་བཅིངས་འགྲོལ་དམག་དཔུང་རྒྱ་ནག་རང་གིས་ངོས་འཛིན་བྱས་པའི་ས་མཚམས་བར་ཡོང་ཆོག་གི་ཡོད་ཚོད་འདུག དེས་ན་རྒྱ་ནག་གི་ས་ཁྲའི་ནང་ཨ་རུ་ནཱ་ཅལ་དང་ཨ་ཀ་སཱ་ཆིན་ (Aksai Chin)། ཀཱ་ར་ཀོ་རམ་ (Karakoram) རི་རྒྱུད་སོགས་ཚུད་ཡོད་སྟབས། རང་གཞུང་གིས་རྒྱ་དམག་ས་གནས་དེ་དག་བར་ཡོང་འཇུག་གི་ཡིན་ནམ་ཞེས་མུ་དྷིའི་གཞུང་ལ་སྐྱོན་བརྗོད་བྱས་ཡོད་འདུག
གནད་དོན་དབྱེ་ཞིབ་པ་ཚོས། ཉེ་ལམ་མུ་དྷི་ཡིས་བྱང་ཕྱོགས་ལ་དྭགས་དང་ཀར་གྷིལ། སཱ་ཆེན་འཁྱག་རོམ་དམག་སྒར་སོགས་རྒྱ་གར་གྱི་བདེ་འཇགས་ཐད་ཧ་ཅང་གལ་གནད་དུ་ངོས་འཛིན་གྱིས་གཟིགས་སྐོར་བྱས་སྟབས། པ་ཀི་སི་ཐན་གྱིས་ཁོང་གི་གཟིགས་སྐོར་དེར་རྣམ་འགྱུར་མི་ལེགས་པ་སྟོན་ཆེད་ཇ་མུར་རྫོང་ལ་འཇབ་རྒོལ་བྱས་པ་ལྟར། རྒྱ་ནག་གིས་ཀྱང་རྒྱ་གར་ལ་ཚོད་ལྟ་དང་འཇིགས་སྐུལ་གྱི་རྣམ་འགྱུར་བསྟན་པ་ཡིན་ཚུལ་བརྗོད་འདུག
པུར་ཚེས་ས་ཁུལ་འདི་ནི་ད་ལོའི་ཕྱི་ཟླ་ ༤ ཚེས་ ༡༥ ཉིན་རྒྱ་དམག་གིས་ལ་དྭགས་ཀྱི་ཌེ་བྷེ་ཨོ་ (Daulat Beg Oldie)ས་གནས་བཙན་འཛུལ་བྱས་ཏེ་དམག་སྒར་ ༥ བརྒྱབ་པའི་ཉེ་འགྲམ་ཡིན་པ་དང་། གནས་ཚུལ་དེ་བྱུང་རྗེས་རྒྱ་གར་གཞུང་གིས་རྒྱ་མཚོའི་ངོས་ནས་མཐོ་ཚད་སྨི་ ༥༠༠༠ ལྷག་ཡོད་པའི་ས་གནས་འདིར་ས་མཚམས་སྐོར་སྲུང་ས་ཚིགས་གསར་བ་ཞིག་བརྒྱབ་ཡོད་འདུག
གསར་འགོད་པ། ལྷ་སྐྱབས་རྒྱལ།
