རྒྱ་གར་བྱང་ཤར་མཐའ་མཚམས་སུ་གྲ་སྒྲིག

རྒྱ་གར་བདེ་སྲུང་ལྷན་ཁང་གིས་མེ་ཤུགས་འཕུར་མདའི་རུ་ཁག་དྲུག་བྱང་ཤར་མཐའ་མཚམས་ཨ་སམ་མངའ་སྡེའི་ས་གནས་ཊེ་ཛི་པུར་དང་ཅཱ་སྦ་གཉིས་ལ་སྐྱེལ་འདྲེན་བྱེད་མགོ་བཙུགས་ཡོད་འདུག

ཕྱི་ཚེས་ ༢༡ ཉིན་རྒྱ་གར་བདེ་སྲུང་ལྷན་ཁང་གིས་གནས་ཚུལ་ཞིག་སྤེལ་བའི་ནང་། རྒྱ་གར་བྱང་ཤར་མཐའ་མཚམས་ཨ་སམ་མངའ་སྡེའི་ས་གནས་ཊེ་ཛི་པུར་ (Tezpur) དང་ཅཱ་སྦ་ (Chabua) གཉིས་ནང་སྔོན་ཐོན་དམག་འཐབ་གནམ་གྲུ་ (Sukhoi-30MKI) ཡི་རྟེན་གཞི་གསར་བཙུགས་བྱས་པ་ལྟར། བྱང་ཤར་མཐའ་མཚམས་སུ་རྒྱ་ནག་གི་དམག་འཐབ་གནམ་གྲུ་དང་ཐད་འཕུར་གནམ་གྲུ་སོགས་ཀྱི་བཙན་འཛུལ་འགོག་ཐབས་སུ། རྒྱ་གར་མཁའ་དམག་ལས་ཁུངས་ཀྱིས་ཨ་ཀཱ་ཤི་ (Akash)ཟེར་བའི་ས་ངོས་མེ་ཤུགས་འཕུར་མདའི་རུ་ཁག་ ༦ གོང་གི་ས་ཁུལ་དེ་དག་ལ་སྐྱེལ་འདྲེན་བྱེད་བཞིན་ཡོད་འདུག

གནད་དོན་འདིའི་སྐོར་ལ་རྒྱ་གར་བདེ་སྲུང་ལས་ཁུངས་ཀྱིས་གསར་འགོད་པ་ཚོར་ཨ་ཀཱ་ཤི་མེ་ཤུགས་འཕུར་མདའ་ཡིས་བར་ཐག་སྤྱི་ལེ་ ༢༥ ནང་ཚུད་དུ་གནམ་གཤིས་གནས་སྟངས་ཡག་མིན་ལ་མ་ལྟོས་པར་གཞན་གྱི་མེ་ཤུགས་འཕུར་མདའ་རྒྱལ་ཁོངས་སུ་འཕེན་པ་འགོག་སྲུང་ཐུབ་ཀྱི་ཡོད་སྐོར་བརྗོད་འདུག

སྔོན་མ་རྒྱ་གར་བདེ་སྲུང་ལྷན་ཁང་གིས་ས་གནས་གྷོ་ཝ་ལུར་ (Gwalior)དང་པུ་ནེ་ (Pune) གཉིས་ནང་ཨ་ཀཱ་ཤི་མེ་ཤུགས་འཕུར་མདའི་དཔུང་སྡེ་གཉིས་ཆེད་འཛུགས་བྱས་ཡོད་པ་དང་། འབྱུང་འགྱུར་ཟླ་ ༦ རིང་རྒྱ་གར་བློན་ཆེན་ལྷན་ཚོགས་ཀྱི་ཚོགས་ཆུང་གིས། ལ་དྭགས་བྱང་ཕྱོགས་མཐའ་མཚམས་ཀྱི་བདེ་འཇགས་སྲུང་སྐྱོབ་བྱེད་པར་བཀའ་འཁྲོལ་ཐོབ་ཚེ་ས་ངོས་མེ་ཤུགས་འཕུར་མདའི་རུ་ཁག་འཛུགས་འཆར་ཡོད་འདུག

དམག་དོན་དབྱེ་ཞིབ་པ་ཚོས། ད་ལྟའི་འཆར་རྒྱ་དཀར་ནག་གཉིས་ཀྱི་མཐའ་མཚམས་སུ་ཡོད་པའི་དམག་དཔུང་དང་མཚོན་ཆ། རྟེན་གཞི་འཛུགས་སྐྲུན་བཅས་བསྡུར་ན་རྒྱ་གར་ཞན་པོ་ཡིན་པ་དང་། འཛུགས་སྐྲུན་ལས་འཆར་དེས་རྒྱལ་ཁབ་གཉིས་བར་ཡོད་པའི་མཐའ་མཚམས་ (LAC)རིང་ཚད་སྤྱི་ལེ་ ༤༠༥༧ ཙམ་ལ་གཏན་སྲུང་བྱེད་ཐུབ་ཀྱི་ཡོད་ཚུལ་བརྗོད་འདུག

རྒྱ་གར་མཁའ་དམག་ལས་ཁུངས་ཀྱིས་ས་གནས་ཊེ་ཛི་པུར་ (Tezpur) དང་ཅཱ་སྦ་ (Chabua) གཉིས་ལ་མཁའ་དམག་རྟེན་གཞི་གསར་རྒྱག་བྱས་པ་ལྟར། བྱང་ཕྱོགས་ལ་དྭགས་ཀྱི་ས་གནས་ཌེ་བྷེ་ཨོ་ (Daulat Beg Oldie)། ཉུ་ཡོ་མཱ་ (Nyoma)། བདེ་མཆོག་དང་། གཞན། བྱང་ཤར་ཨ་རུ་ནཱ་ཅལ་གྱི་པཱ་སེ་གྷ་ཊི་ (Pasighat)། མེ་ཆུ་ཁ་(Mechuka) ཝང་ལུང་ (wanlong)། ཊོབ་ཊིན་(Tuting) སོགས་སུ་དམག་དོན་ལས་གཞི་འགྲོ་བཞིན་ཡོད་འདུག

རྒྱ་ནག་གིས་རྒྱ་གར་ལ་དམིགས་ཏེ་བོད་མཐོ་སྒང་དུ་དམག་སྡེ་ ༢༡ དང་གནམ་ཐང་ ༨ ཙམ་གསར་བྱས་འཛུགས་ཏེ། ད་ལོར་བཅིངས་འགྲོལ་དམག་དཔུང་གིས་དམག་འཐབ་གནམ་གྲུ་ཇེ་རྟགས་ (J-10) དང་སོ་ཁོབ་ (Sukhoi-27UBK)རྟགས་ཅན་སོགས་ཚོད་ལྟ་དང་། རྒྱ་གར་གྱི་ཁྱིམ་མཚེས་རྒྱལ་ཁབ་བལ་ཡུལ་དང་། པ་ཀི་སི་ཐན། འབྲུག་བཅས་ཀྱི་མཐའ་མཚམས་སུ་གཞུང་ལམ་དང་མེ་འཁོར་ལྕགས་ལམ་འཛུགས་སྐྲུན་རྒྱ་སྐྱེད་ཀྱིས། རྒྱ་གར་གྱི་བདེ་འཇགས་ལ་མངོན་གསལ་ཐོག་ནས་འཇིགས་སྐུལ་བྱེད་བཞིན་ཡོད་སྟབས། རྒྱ་གར་གྱིས་བྱང་ཕྱོགས་ལ་དྭགས་དང་ཤར་བྱང་ཕྱོགས་སུ་དམག་དཔུང་རྒྱ་སྐྱེད་དང་། གཞུང་ལམ་གསར་རྒྱག གནམ་ཐང་དང་མེ་འཁོར་ལྕགས་འཛུགས་སྐྲུན་སོགས་བྱེད་བཞིན་ཡོད་འདུག

ཉེ་ལམ་རྒྱ་གར་གསར་ཁང་ (NDTV 24X7 ) གིས་རྒྱལ་ཁབ་གཉིས་ཀྱི་རྐང་དམག་དང་མཚོན་ཆའི་སྐོར་ལ་ཚོད་དཔག་བྱས་པ་ལྟར་ན། རྒྱ་གར་ལ་གྲ་སྒྲིག་ཡོད་པའི་ས་དམག་འབུམ་ ༡༣,༢༥ དང་། རྒྱ་ནག་ལ་ས་དམག་འབུམ་ ༢༢,༥༥ ཙམ་ཡོད། རྒྱ་ནག་ལ་མཁའ་དམག་གནམ་གྲུ་ ༩༠༠༠ དང་མཉམ་དུ་དམག་འཐབ་གནམ་གྲུ་ ༢༠༠༠ ཙམ་དང་། རྒྱ་གར་ལ་མཁའ་དམག་གནམ་གྲུ་ ༣༠༠༠ དང་མཉམ་དུ་དམག་འཐབ་གནམ་གྲུ་ ༧༩༠ ཙམ་ཡོད་འདུག དེ་བཞིན་རྒྱ་ནག་ལ་རྡུལ་ཕྲན་དང་མེ་ཤུགས་འཕུར་མདའ་ཡོད་པའི་མཚོ་དམག་གྲུ་གཟིངས་དང་ ༢༨༤ དང་། རྒྱ་གར་ལ་ ༡༤༥ ཙམ་ཡོད་འདུག