བཀའ་སྒྲུབ་ཀྱི་ཡོད་དམ་ཁྲལ་སྒྲུབ་ཀྱི་ཡོད།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༣༧ སྟེང་གི་རྩོམ་སྒྲིག་པའི་གཏམ།

ཁ་ཐོགས་ཚད་ཀྱིས་༧གོང་ས་མཆོག་གི་བཀའ་དགོངས་བསྒྲུབ་དགོས་ཟེར་བ་དང་། ལག་ཐོགས་ཚད་ཀྱིས་༧གོང་ས་མཆོག་ལ་ཞབས་ཞུ་སྒྲུབ་བཞིན་ཡོད་མདོག་སྟོན། དོན་དངོས་ཐོག་༧གོང་ས་མཆོག་གི་བཀའ་དགོངས་ཚུལ་བཞིན་སྒྲུབ་མཁན་ཉིན་མོའི་སྐར་མ་དང་། ཆོ་ག་ཕྱག་ལེན་གྱི་ངོ་བོར་ཉི་མ་སྐྱེལ་མཁན་དང་། ཁ་ནས་མ་ཎི་བཞིན་བགྲང་བ་ལས་ལག་ལེན་སྣ་གཅིག་མི་བསྟར་མཁན་མཚན་མོའི་སྐར་ཚོགས་ཡིན། ༧གོང་ས་མཆོག་གི་བཀའ་དགོངས་ལོག་འགྲེལ་བརྒྱབ་ནས་རང་གི་མངོན་འདོད་སྒྲུབ་མཁན་ཡང་བཙན་བྱོལ་སྤྱི་ཚོགས་ནང་ཉུང་ཉུང་མིན།

༧གོང་ས་མཆོག་གིས་དུས་ནས་དུས་སུ་འཕྲལ་ཕུགས་རྒྱང་གསུམ་ལ་ཕན་པའི་ལས་དོན་མང་པོ་ཞིག་ལམ་སྟོན་གནང་གི་ཡོད། ཉེ་བའི་ལོ་བཅུ་ཕྲག་ཚུན་ལའང་བོད་པའི་རིག་གཞུང་དང་འབྲེལ་བའི་ཐོག རིགས་གཅིག་རྐང་འཛིན་པ་གསོ་སྐྱོང་དགོས་པ་དང་། ནང་བའི་ལྟ་གྲུབ་ཀུན་བཏུས་ཀྱི་ལས་གཞི་མགོ་འཛུགས་དགོས་པ། དེ་བཞིན། བོད་པའི་ཆོས་བརྒྱུད་ཁག་ནང་གཞུང་ཆེན་རིགས་གཅིག་རྐང་འཛིན་གསོ་སྐྱོང་བྱེད་དགོས་པ་སོགས་ཡང་ནས་བསྐྱར་དུ་གསུངས་ཡོད།

ལས་དོན་འདི་རིགས་དེང་སྐབས་རྒྱལ་སྤྱིའི་ཐོག་དར་སོ་ཆེན་པོ་ཡིན་ལ། བོད་སྤྱི་ཚོགས་ལ་དེ་བས་ཀྱང་ཁ་ཚ་དགོས་གཏུགས་ཆགས་ཡོད། ནང་པའི་ལྟ་གྲུབ་ཀུན་བཏུས་འདི་༧གོང་ས་མཆོག་གིས་གསར་གཏོད་དང་ལོ་རྒྱུས་ཐོག་གི་ལས་དོན་རླབས་ཆེན་ཞིག་ཡིན། སྔར་རྒྱ་གར་དུ་དཔལ་ན་ལེནྚའི་མཁས་པ་གདན་འཛོམ་དུས་དང་། རྒྱན་དྲུག་མཆོག་གཉིས་ཞལ་བཞུགས་སྐབས། ཚད་མ་ཀུན་བཏུས་དང་མངོན་པ་ཀུན་བཏུས་སོགས་བརྩམས་ཡོད། ༧གོང་ས་མཆོག་གིས་ལྟ་གྲུབ་ཀུན་བཏུས་ཀྱི་ལས་གཞི་འདི་བོད་པའི་བླ་རྒན་ཚོར་རེ་བ་བཅོལ་ཡོད།

ད་ལྟ་༧གོང་ས་མཆོག་གི་བཀའ་དགོངས་དེ་དག་ཅི་ཙམ་སྒྲུབ་ཡོད་མེད་དང་ཇི་ལྟར་སྒྲུབ་ཀྱི་ཡོད་མེད་ཐོག་ཕྱི་མིག་ཅིག་བལྟས་ན། དགའ་ལྡན་ཕོ་བྲང་གི་བང་མཛོད་ནས་དངུལ་གཏོང་བཞིན་པའི་ཤེས་རིག་ལས་ཁུངས་འོག་གི་རིག་གཅིག་རྐང་འཛིན་དེ་ད་བར་ལོ་བཅུ་ཕྲག་གཅིག་དང་སྐབས་བཞི་ཙམ་འགྲོ་བཞིན་ཡོད་ཀྱང་གྲུབ་འབྲས་སྣ་གཅིག་སྟོན་རྒྱུ་མེད་པར་གྲང་ལྷག་གི་ཁྲོད་ན་ལུས་ཡོད་ལ། ནང་པའི་ལྟ་གྲུབ་ཀུན་བཏུས་ཀྱི་ལས་གཞི་དེ་ཡང་ལབ་གླེང་གི་ཁྲོད་ནས་རིམ་པ་དང་པོ་གྲུབ་ཙམ་བྱུང་ཡང་ནང་དོན་དང་སྤུས་ཚད་ད་དུང་དཔྱད་གཞིར་བསྡད་ཡོད།

ཉེ་ལམ་འདི་གའི་གསར་འགོད་པའི་རྒྱུས་ལོན་བྱས་པར། ཆོས་རིག་ལས་ཁུངས་འོག་གི་གཞུང་ཆེན་རིགས་གཅིག་རྐང་འཛིན་ཡང་སྐྱ་ཆད་སྔོ་སྡུག་གི་གནས་སྟངས་འོག་ལྷག་འདུག འཆར་གཞི་ལྟར་ན་ཆོས་བརྒྱུད་ལྔ་ལ་མི་བཅུ་རེ་དང་ཇོ་ནང་ལ་མི་ལྔ་བཅས་ཁྱོན་མི་ ༥༥ རེ་བསྡུ་དགོས་ཀྱང་། སྐབས་དང་པོར་གྲངས་ཚད་ཕྱེད་ཀ་ཙམ་ཡང་ལོན་མི་འདུག་ལ། སྐབས་གཉིས་པའི་གསལ་བསྒྲགས་སྤེལ་ཏེ་ཟླ་གཅིག་ལྷག་ཕྱིན་ཡང་ད་སྔ་སྙན་ཞུ་འབུལ་མཁན་གཅིག་ཀྱང་བྱུང་མི་འདུག་ཟེར།

གྲྭ་བཙུན་ཚོར་གཞུང་ཆེན་རིགས་གཅིག་རྐང་འཛིན་གནང་འདོད་མེད་སོང་བ་རེད་དམ། ཆོས་རིག་ལས་ཁུངས་ཀྱི་གོ་སྒྲིག་གིས་མ་འདང་པ་རེད། རིགས་གཅིག་རྐང་འཛིན་པ་རེར་ཟླ་གཅིག་ལ་ཧིན་སྒོར་ཆིག་སྟོང་ལྔ་བརྒྱ་ཙམ་ལས་མི་འདུག དངུལ་འདིས་དེང་སྐབས་དྷ་ས་ནས་ལྡི་ལིར་ཕར་བསླེབས་ཀྱང་ཚུར་མི་བསླེབ། ༧གོང་ས་མཆོག་གི་ཐུགས་རེ་དེ་དག་ཁ་ཞེ་གཉིས་མེད་ཀྱིས་སྒྲུབ་བཞིན་ཡོད་པ་དང་། ལས་གཞི་འདི་ཁྲལ་འུལ་གྱི་ངོ་བོར་མུ་མཐུད་འཇོག་འདོད་མེད་ན། ཁ་ཡར་དཀྲི་དང་ཁག་མར་འདོག་མི་བྱེད་པར་དགོངས་པ་གུ་ཡངས་བཞེས་ཏེ་བདག་གཞན་མཉམ་བརྗེ་ཞིག་གནང་རོགས།།