ཧོང་ཀོང་གི་དྲུག་བཞིའི་དོན་རྐྱེན་འབྱུང་ཉེན་འདུག་ཟེར།

ཁ་སང་ཕྱི་ཚེས་ ༣༡ ཉིན་རྒྱ་ནག་རྒྱལ་ཡོངས་མང་ཆེན་གྱི་རྒྱུན་ལས་ལྷན་ཚོགས་ཐོག ཧོང་ཀོང་གི་སྲིད་འཛིན་འོས་འདེམས་ལམ་ལུཊ་ལ་བསྒྱུར་བཅོས་བཏང་བར་མི་མང་གིས་ངོ་རྒོལ་ཤུགས་ཆེན་བྱེད་བཞིན་འདུག

ཟླ་འདིའི་ཕྱི་ཚེས་ ༢༧ ནས་ཉིན་གྲངས་ ༥ རིང་རྒྱ་ནག་གི་རྒྱལ་ས་པེ་ཅིན་གྱི་མི་མང་ཚོགས་ཁང་ཆེན་མོའི་ནང་། རྒྱལ་ཡོངས་མང་ཆེན་སྐབས་ ༡༢ པའི་རྒྱུན་ལས་ཚོགས་འདུ་བསྡུས་ཏེ། ཧོང་ཀོང་དམིགས་བསལ་སྲིད་འཛིན་ས་ཁུལ་གྱི་ ༢༠༡༧ ལོའི་སྲིད་འཛིན་དཔོན་པོ་འོས་འདེམས་ཀྱི་སྒྲོམ་གཞི་དང་། ༢༠༡༦ ལོའི་ཁྲིམས་འཛིན་ལྷན་ཚོགས་ཀྱི་ཆབ་སྲིད་ལམ་ལུགས་བསྒྱུར་བཅོས་སྐོར་ལ་གྲོས་བསྡུར་བྱས་ཡོད་པ་དང་། ཁ་སང་ཕྱི་ཚེས་ ༣༡ ཉིན་གྲོས་ཆོད་གཏན་འབེབས་བྱས་ཏེ། ཧོང་ཀོང་སྲིད་འཛིན་དཔོན་པོ་འོས་འདེམས་བྱེད་པར་འོས་མི་ ༢ ནས་ ༣ ལས་མི་མང་བ་དང་། འོས་མི་རེ་རེར་ཁྲིམས་འཛིན་ལྷན་ཚོགས་ཀྱི་འཐུས་མི་བརྒྱ་ཆ་ ༥༠ ཡན་གྱི་རྒྱབ་སྐྱོར་འཐོབ་དགོས་པ་མ་ཟད། འོས་འདེམས་ཀྱི་བརྒྱུད་རིམ་ཆ་ཚང་ངེས་པར་དུ་ཁྲིམས་འཛིན་ལྷན་ཚོགས་ལ་ཡར་ཞུ་བྱས་ཏེ། ལྷན་ཚོགས་ཀྱི་འཐུས་མི་གསུམ་ཆ་གཉིས་ཀྱིས་མོས་མཐུན་བྱུང་རྗེས། གཞི་ནས་དབུས་གཞུང་ལ་ཆོག་མཆན་རེ་ཞུ་དགོས་པའི་གཏན་འབེབས་བྱས་ཡོད་སྟབས། ཁ་སང་ཕྱི་དྲོའི་ཆུ་ཚོད་ ༧ པ་ཙམ་ལ། ཧོང་ཀོང་གི་ལྟེ་གནས་གྲོང་ཁྱེར་ཅིན་ཀྲུང་ཐེན་མཱ་སྤྱི་གླིང་དུ། ཧོང་ཀོང་གི་དཀྱིལ་སྙིང་བཙན་བཟུང་བྱེད་པར་ངོ་རྒོལ་བྱེད་མཁན་གྱི་སློབ་མའི་མཐུན་ཚོགས་དང་དམངས་གཙོ་ཚོགས་པ་སོགས་ཀྱི་མི་གྲངས་ ༥༠༠༠ ཙམ་འདུ་འཛོམས་ཀྱིས། རྒྱ་གཞུང་གི་གཏན་འབེབས་ལ་མོས་མཐུན་མེད་པའི་ངོ་རྒོལ་བྱས་ཡོད་པ་མ་ཟད། ཚོགས་པ་ཁག་གི་འཐུས་མི་ཚོས་གཏམ་བཤད་གནང་ཡོད་པ་དང་། སྐབས་དེར་ལས་འགུལ་སྣེ་ཁྲིད་པ་ཌེ་ཧེ་ཡན་གྱིས། ཉིན་དེ་རྒྱལ་ཁབ་གཅིག་ལ་ལམ་ལུགས་གཉིས་ཀྱི་ལོ་རྒྱུས་ཁྲོད་ཆེས་མུན་ནག་གི་ཉིན་མོ་ཞིག་ཡིན་ལ། ད་ལྟའི་བར་ཐབས་ཤེས་ཅི་ཡོད་ཀྱིས་འབྲེལ་མོལ་གྱི་ཐབས་ལམ་ལག་བསྟར་བྱས་ཡོད་ཀྱང་། ད་ནས་བཟུང་བཀའ་བཀོད་ལ་ངོ་རྒོལ་བྱེད་པའི་དུས་སྐབས་ཤིག་ཏུ་བསླེབ་སྐོར་བརྗོད་ཡོད་པ་མ་ཟད། ངོ་རྒོལ་གྱི་ལས་འགུལ་རིམ་པར་སྤེལ་རྒྱུ་ཡིན་ལུགས་བསྒྲགས་འདུག

པེ་ཅིན་དུ་རྒྱ་ནག་རྒྱལ་ཡོངས་མང་ཆེན་རྒྱུན་ལས་ཀྱི་ཚོགས་འདུ་གྲོལ་རྗེས། རྒྱུན་ལས་དྲུང་ཆེ་གཞོན་པ་ལི་ཧྥེ་ཟེར་བ་ཧོང་ཀོང་ནང་ཆེད་མངགས་ཀྱིས། དེ་རིང་སྔ་དྲོའི་ཆུ་ཚོད་ ༨ ཙམ་ལ། ཁུལ་དེའི་ཆབ་སྲིད་ལམ་ལུགས་ལ་འཕེལ་རྒྱས་འགྲོ་བཞིན་ཡོད་པའི་སྐོར་གྱི་གསར་འགོད་ལྷན་ཚོགས་ཤིག་བསྡུས་ཡོད་པ་དང་། ཚོགས་འདུ་དེ་ལྟེ་གནས་གྲོང་ཁྱེར་དང་བར་ཐག་རིང་བའི་གནམ་གྲུ་ཐང་གི་ཡ་གླིང་འགྲེམས་སྟོན་ཁང་དུ་ཚོགས་ཡོད་པ་དང་། ཚོགས་ར་དང་བར་ཐག་རྨིད་བརྒྱ་ཕྲག་འགའ་ཡོད་པའི་རླངས་འཁོར་འབབ་ཚིགས་སུ་ངོ་རྒོལ་བ་ཚོར་ས་ཆ་གོ་སྒྲིག་བྱས་ཡོད་འདུག ཚོགས་འདུའི་ཐོག་ལི་ཧྥེ་ཡིས་གཏམ་བཤད་བྱེད་གྲབས་ཡོད་སྐབས། ཁྲིམས་འཛིན་ལྷན་ཚོགས་ཀྱི་དམངས་གཙོ་ཚོགས་པའི་འཐུས་མི་ ༢༥ ཙམ་གྱིས། འཕྲེད་དར་འཕྱར་ཏེ་དབུས་གཞུང་ལ་ཡིད་ཆེས་བརླགས་སོང་། དབུས་གཞུང་ལ་ངོ་ཚ་མི་འདུག འོས་འདེམས་ཀྱི་དབང་ཆ་བཙན་འཕྲོག་བྱེད་ཀྱི་འདུག་ཅེས་པའི་ངོ་རྒོལ་གྱི་འབོད་སྒྲ་བསྒྲགས་ཏེ། གནས་སྐབས་རིང་ཚོགས་འདུ་མཚམས་འཇོག་བྱེད་དགོས་ཁེལ་ཡོད་པ་མ་ཟད། ལི་ཡི་གཏམ་བཤད་མ་བྱས་གོང་ནས་འཐུས་མི་ངོ་རྒོལ་བ་ཚོ་ཚོགས་ར་ནས་ཕྱིར་ཐོན་ཡོད་འདུག

གསར་འགོད་ལྷན་ཚོགས་ཐོག་ལི་ཧྥེ་ཡིས་ ༢༠༠༥ ལོའི་ཆབ་སྲིད་ལམ་ལུགས་བསྒྱུར་བཅོས་ལ་མི་མང་གིས་མོས་མཐུན་མ་བྱས་པར་ཧོང་ཀོང་གི་དམངས་གཙོ་འཕེལ་རྒྱས་གཏོང་བའི་གོ་སྐབས་ཤིག་ཤོར་ཟིན་པ་ལྟར། ད་རེས་ཀྱི་ཆབ་སྲིད་བསྒྱུར་བཅོས་འདི་ལའང་ཁྲིམས་འཛིན་ལྷན་ཚོགས་ཀྱིས་མོས་མཐུན་མ་བྱས་ཚེ། ཧོང་ཀོང་གི་ཆབ་སྲིད་ལམ་ལུགས་རང་སར་ལྷག་རྒྱུ་ཡིན་སྟབས། དབུས་གཞུང་གི་ཐག་གཅོད་ལ་བསམ་ཤེས་དགོས་པའི་འབོད་སྐུལ་བྱས་ཡོད་པ་དང་། དེ་བཞིན། ཧོང་ཀོང་དམིགས་བསལ་སྲིད་འཛིན་དཔོན་པོ་ཉིང་ཀྲིན་ཡེན་གྱིས་ཀྱང་གསར་འགོད་པར། གལ་སྲིད་ཁྲིམས་འཛིན་ལྷན་ཚོགས་ཀྱི་འཐུས་མིའི་གསུམ་ཆ་གཉིས་ཀྱི་རྒྱབ་སྐྱོར་བརྩོན་ལེན་བྱེད་མ་ཐུབ་ཚེ། ཕྱི་ལོ་ ༢༠༡༧ ལོའི་སྲིད་འཛིན་དཔོན་གྱི་འོས་འདེམས་ལམ་ལུགས་རང་སར་ལྷག་སྟེ། མུ་མཐུད་མི་གྲངས་ ༡༢༠༠ གིས་གྲུབ་པའི་འོས་བསྡུ་ལྷན་ཁང་གིས་འོས་འདེམས་བྱེད་དགོས་སྟབས། མི་ཁྲི་ ༥༠༠ ལྷག་གིས་འོས་བླུགས་ན་ཆོག་པའི་ཐོབ་ཐང་དེ་མེད་པ་ཆགས་རྒྱུ་ཡིན་སྐོར་བརྗོད་འདུག

ཕྱི་ཚེས་ ༣༠ ཉིན་ཧོང་ཀོང་མེན་བྷོ་གསར་ཁང་གིས་གནས་ཚུལ་སྤེལ་ཏེ། ཧོང་ཀོང་ཉེན་རྟོག་ཕྱོགས་ནས་དམག་མི་ ༥༠༠༠ ཙམ་གྲ་སྒྲིག་བྱས་ཏེ་ཉིན་མཚན་མེད་པར་ངོ་རྒོལ་བས་དཀྱིལ་དབུས་བཙན་བཟུང་ལ་དྲག་རྒོལ་བྱེད་འཆར་ཡོད་པ་དང་། གལ་སྲིད་དཀྱིལ་དབུས་བཙན་བཟུང་དངོས་སུ་བྱས་པ་ཡིན་ན། ཉེན་རྟོག་ཕྱོགས་ནས་དམག་མི་ ༧༠༠༠ ལྷག་ཆེད་མངགས་ཀྱིས་ངོ་རྒོལ་བར་རྒོལ་རྡུང་བྱེད་རྩིས་ཡོད་པ་མ་ཟད། ཧང་ཀྲུའུ་ཁཱང་ཉེན་རྟོག་སློབ་གླིང་ཟེར་བ་སོགས་ཉེན་རྟོག་ཁང་དང་འབྲེལ་བའི་རྟེན་གཞི་མང་པོ་གནས་སྐབས་རིང་བཀག་ཉར་ཁང་དུ་བསྒྱུར་འཆར་ཡོད་སྐོར་སོགས་བརྗོད་ཡོད་པ་མ་ཟད། རྒྱ་གཞུང་གིས་ཧོང་ཀོང་ནང་མི་མང་གི་ངོ་རྒོལ་ཤུགས་ཆེན་བྱུང་བར་འགོག་རྒོལ་ཆེད། ཧྲིན་ཀྲུའུ་རུ་བཅིངས་གྲོལ་དམག་གིས་དྲག་གནོན་སྦྱོང་བརྡར་བྱེད་བཞིན་ཡོད་པ་དང་། ཉེ་སྔོན་ཧོང་ཀོང་ནང་བཅིངས་གྲོལ་དམག་གི་རླངས་འཁོར་འགྲོ་སྐྱོད་བྱེད་ཀྱི་ཡོད་པའི་འདྲ་པར་སོགས་བརྒྱུད་ལམ་དུ་ཐོན་ཡོད་སྟབས། ཧོང་ཀོང་མི་མང་གིས་དོ་སྣང་དང་སྡང་སེམས་ཆེན་པོ་འཛིན་གྱི་ཡོད་པ་དང་། ཡང་གནད་དོན་དབྱེ་ཞིབ་པ་འགའ་རེས་དཀྱིལ་དབུས་བཙན་བཟུང་གི་ལས་འགུལ་ལ་སྐྱོན་བརྗོད་བྱེད་ཀྱི་ཡོད་འདུག

རྒྱ་གཞུང་གི་ཐག་གཅོད་ཐད་ཧོང་ཀོང་སློབ་གསོ་གླིང་གི་དགེ་རྒན་ཆེན་མོ་ཧྥང་ཏྲི་ཧིན་གྱིས། ལས་འགུལ་རྒྱ་ཆེ་ཆུང་དང་དུས་ཡུན་རིང་ཐུང་ཙམ་མ་གཏོགས་དཀྱིལ་དབུས་བཙན་བཟུང་གི་ལས་འགུལ་མི་སྤེལ་ཐབས་མེད་ཡིན་ལ། གལ་སྲིད་པེ་ཅིན་ཕྱོགས་ནས་དྲག་པོའི་བྱེད་ཐབས་སྤྱད་པ་ཡིན་ན་ངོ་རྒོལ་ཤུགས་ཆེ་རུ་འགྲོ་རྒྱུ་ཡིན་པ་མ་ཟད། ཐ་ན་ཧོང་ཀོང་གི་དྲུག་བཞིའི་དོན་རྐྱེན་ཟེར་བ་ཞིག་ཀྱང་འབྱུང་སྲིད་པ་དང་། ད་རེས་ཀྱི་ངོ་རྒོལ་ལས་འགུལ་དེས་ཧོང་ཀོང་གི་སྤྱི་ཚོགས་ལ་ཤུགས་རྐྱེན་ཐེབས་པར་སེམས་ཁུར་ཡོད་སྐོར་བརྗོད་འདུག་ལ། ཡང་ཧོང་ཀོང་དང་ཨོ་མིན་གྱི་སློབ་ཆེན་ཁག་ཅིག་གི་ཁྲིམས་ལུགས་རིག་པའི་ཆེད་མཁས་པ་དང་དགེ་རྒན་ཆེན་མོ་སོགས་མི་གྲངས་ ༥༤ ཡིས། འབྲེལ་མོལ་གྱི་ཐབས་ལམ་ལ་ཤུགས་སྣོན་བྱས་ཏེ་དམངས་གཙོའི་སེམས་ཤུགས་ནམ་ཡང་འཆི་མི་སྲིད་ཅེས་པའི་ཡོངས་ཁྱབ་བསྒྲགས་གཏམ་ཞིག་སྤེལ་ཡོད་པ་དང་། བསྒྲགས་གཏམ་དེའི་ནང་པེ་ཅིན་གཞུང་གིས་ལོ་རབས་ ༨༠ ནང་ནས་བཟུང་ནན་བརྗོད་བྱེད་བཞིན་པའི་ཧོང་ཀོང་གི་དམངས་གཙོའི་ལམ་ལུགས་ཀྱི་དམ་བཅའ་ལ་རྒྱབ་འགལ་བྱས་ཏེ། བཙན་གྱིས་ཧོང་ཀོང་མི་མང་ལ་འོས་འདེམས་ཀྱི་སྒྲོམ་གཞི་རྫུན་མ་ཞིག་དང་ལེན་བྱེད་དུ་འཇུག་བཞིན་པར་བློ་ཕམ་ཆེན་པོ་ཡོད་སྐོར་བརྗོད་འདུག

གསར་འགོད་པ། པདྨ་མཚོ།