དེ་རིང་མང་གཙོའི་དུས་དྲན་ཐེངས་ ༥༤ པའི་ཐོག་སྲིད་སྐྱོང་མཆོག་གིས། མང་གཙོའི་སྤྱི་ཚོགས་ནང་བསམ་ཚུལ་མི་འདྲ་བ་ཡོང་ཆོག་པ་དང་། བསམ་ཚུལ་མི་འདྲ་བ་ཡོད་པ་དེ་དག་འགལ་རྐྱེན་མ་ཡིན་པར་མཐུན་རྐྱེན་དུ་བསྒྱུར་རྒྱུ་མང་གཙོའི་རིང་ལུགས་ཀྱི་ཁྱད་ཆོས་ཡིན་སྟབས། མང་ཚོགས་ཁྲོད་བསམ་འཆར་སྤེལ་རེས་བྱེད་སྐབས་གང་བྱུང་བཤད་པ་ཙམ་མ་ཡིན་པར་ཁུངས་ལུང་ལྡན་པ་གནང་གལ་ཆེ་སྐོར་གསུངས་སོང་།
དེ་རིང་སྔ་དྲོའི་ཆུ་ཚོད་ ༩།༣༠ ཐོག་བཙན་བྱོལ་བོད་མིའི་མང་གཙོ་དབུ་བརྙེས་ཏེ་མི་ལོ་ ༥༤ འཁོར་བའི་དུས་དྲན་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་སྲུང་གཙི་གནང་སོང་། མཛད་སྒོའི་སྐུ་མགྲོན་གཙོ་བོར་ཧི་མ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཤི་རེ་ར་ཝེ་དྷ་ཀུར་ (Shri Ravi Thakur) མཆོག་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག ཁྲིམས་ཞིབ་པ་ངག་དབང་ཆོས་གྲགས་མཆོག སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་ཚོགས་གཞོན་མཁན་པོ་བསོད་ནམས་བསྟན་འཕེལ་ཆོག་བཅས་གཙོས་བཀའ་བློན་དང་སྤྱི་འཐུས་རྣམ་པ། ལྷན་ཁང་ཁག་གི་དྲུང་ཆེ་ཆུང་གཙོས་པའི་སྲི་ཞུ་ལས་བྱེད། གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གི་འཐུས་མི། སློབ་གྲྭ་ཁག་གི་སློབ་ཕྲུག་དང་སེར་སྐྱ་མི་མང་བཅས་མི་ ༢༠༠༠ བརྒལ་བ་འཛོམས་འདུག
མཛད་སྒོའི་ཐོག་བོད་ཀྱི་ཟློས་གར་ཚོགས་པའི་རྔ་རོལ་དང་བཅས་ཧིན་བོད་གཉིས་ཀྱི་རྒྱལ་གླུ་དང་མང་གཙོའི་གླུ་གཞས་གྱེར་འདོན་དང་། ཚང་མ་སྐུ་བཞེངས་ཐོག་བོད་ཕྱི་ནང་གཉིས་སུ་རང་ལུས་མེར་བསྲེཊ་གནང་མཁན་གཙོས་བོད་རྒྱལ་ཁབ་དང་མི་རིགས་ཆེད་རང་སྲོག་བློས་གཏོང་གནང་མཁན་རྣམས་ལ་སྐར་མ་གཅིག་རིང་ངག་བཅད་མྱ་ངན། སྐུ་མགྲོན་གཙོ་བོ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཤི་རེ་ར་ཝེ་དྷ་ཀུར་མཆོག་ནས་བོད་མི་མང་སྤྱི་འཐུས་ལྷན་ཚོགས་ཀྱི་པར་བསྐྲུན་གནང་བའི་ ༼བཙན་བྱོལ་བོད་མིའི་མང་གཙོའི་བྱུང་བ་བརྗོད་པ༽ཞེས་པའི་དཔེ་དེབ་གཉིས་དབུ་འབྱེད། ཁྲིམ་ཞིབ་པ་ཆེ་བ་མཆོག་ནས་འདི་ལོ་འབུམ་རམས་པ་ (Ph.D) ཐོན་པའི་སློབ་མ་གཉིས་ལ་གཟེངས་བསྟོད་བྱ་དགའ་དང་། སྲིད་སྐྱོང་མཆོག་གིས་བོད་པའི་གཏན་ཉིན་སློབ་གྲྭ་ཁག་ནས་ ༢༠༡༤ ལོར་རྒྱ་གར་རྒྱལ་ཡོངས་འཛིན་རིམ་བཅུ་གཉིས་རྒྱུགས་སྤྲོད་ནང་ཨང་རིམ་རྩེར་སོན་སློབ་མ་ ༩ ལ་དགའ་ལྡན་ཕོ་བྲང་གི་སློབ་ཕྲུག་གཟེངས་རྟགས་བཅས་ཕུལ་སོང་།
སྔོན་འགྲོའི་མཛད་རིམ་ཁག་གྲུབ་རྗེས་སྐུ་མགྲོན་གཙོ་བོ་མཆོག་དང་སྲིད་སྐྱོང་མཆོག སྤྱི་འཐུས་ཚོགས་གཙོ་བཅས་རིམ་པས་དུས་དྲན་དང་འབྲེལ་བའི་གསུང་བཤད་གནང་སོང་ལ། སྐབས་དེར་སྐུ་མགྲོན་གཙོ་བོ་སྐུ་ཞབས་ཤི་རེ་ར་ཝེ་དྷ་ཀུར་ (Shri Ravi Thakur) མཆོག་གིས་གསུང་བཤད་གནང་སྐབས། ཁོང་གི་ངོས་ནས་༧གོང་ས་མཆོག་གིས་རང་ལོ་ ༡༦ ནས་བོད་མིའི་ཆོས་སྲིད་གཉིས་ཀྱི་མཛད་འགན་བཞེས་པ་དེ་སྐུལ་སློང་ཆེན་པོ་ཞིག་ལ་ངོས་འཛིན་གནང་གི་ཡོད་པ་དང་། ༧གོང་ས་མཆོག་གིས་བོད་ནང་མང་གཙོའི་ལམ་སྲོལ་ཐོག་བསྐྱོད་རྒྱུའི་སྐུ་ལུས་གང་མང་བསྐྱོན་ཡང་ལེགས་འགྲུབ་མ་བྱུང་བར། རྒྱ་གར་ནང་བཙན་བྱོལ་དུ་འབྱོར་རྗེས་བཙན་བྱོལ་བོད་མི་ཚོར་མང་གཙོའི་ལམ་སྲོལ་གསར་གཏོད་གནང་སྟེ། ད་ཆར་འཛམ་གླིང་གི་མིག་དཔེར་འོས་པའི་མང་གཙོའི་སྤྱི་ཚོགས་ཤིག་ཆགས་ཡོད་པ་མ་ཟད། ཁོང་འཛམ་གླིང་གི་འཚེ་མེད་ཞི་བའི་ལྟ་གྲུབ་སྨྲ་བ་དང་ཞི་བདེའི་དེད་དཔོན་ཆགས་པའི་བཀའ་དྲིན་ལ་བརྟེན་ནས་ཧི་མ་ཅལ་ནང་འཛམ་གླིང་གི་ཡུལ་སྐོར་བ་མང་པོ་ཡོང་བ་ དང་ཡུལ་མི་དང་བོད་མིའི་མཐུན་ལམ་སོགས་ཕྱོགས་ཡོངས་ནས་ཕན་པ་ཆེན་པོ་བྱུང་ཡོད་སྐོར་གསུང་བྱུང་བར་མ་ཟད། ཁོང་གི་ངོས་ནས་བོད་ནང་རང་ལུས་མེར་བསྲེཊ་གཙོས་པའི་ཛ་དྲག་གི་གནས་སྟངས་ལ་གདུང་སེམས་མཉམ་སྐྱེད་ཡོད་པ་དང་། མ་འོངས་པར་བོད་མི་ཚོས་ལམ་དབུ་མའི་སྲིད་བྱུས་ལ་བརྟེན་ནས་བོད་དོན་འཐབ་རྩོད་གནང་རྒྱུ་དང་། ཡུལ་མི་དང་བོད་མིའི་མཐུན་ལམ་སྔར་ལྷག་ཡར་རྒྱས་ཡོང་བའི་སྨོན་འདུན་ཡོད་སྐོར་སོགས་གསུངས་སོང་།
སྲིད་སྐྱོང་བློ་བཟང་སེང་གེ་མཆོག་གིས་བཀའ་ཤག་གི་གསུང་བཤད་སྒྲོགས་སྦྱང་གནང་སྐབས། ང་ཚོའི་ཕུགས་དམིགས་གང་མྱུར་བོད་དོན་བདེན་མཐའ་གསལ་ཐབས་བྱེད་པ་དང་ཆབས་ཅིག ཇི་སྲིད་བོད་དོན་བདེན་མཐའ་མ་གསལ་གྱི་བར་བཙན་བྱོལ་དུ་གནས་པའི་རིང་མང་གཙོའི་སྒྲིག་འཛུགས་དང་དེའི་ལག་ལེན་མུ་མཐུད་ཡར་རྒྱས་གོང་འཕེལ་ཡོང་བ་བྱ་དགོས། དེ་ཡང་མང་གཙོའི་སྒྲིག་འཛུགས་ཡར་རྒྱས་གཏོང་རྒྱུའི་ཆ་ཤས་གལ་ཆེ་བ་གཅིག་ནི་ང་ཚོས་མང་གཙོའི་ཐོབ་ཐང་བེད་སྤྱོད་ལོག་པར་མ་སོང་བྱ་རྒྱུ་དེ་ཡིན། སྨྲ་བརྗོད་རང་དབང་ནི་མང་གཙོའི་རིང་ལུགས་ཀྱི་ཀ་བ་བཞི་པ་ལྟ་བུ་ཆགས་ཡོད། འོན་ཀྱང་། སྨྲ་བརྗོད་རང་དབང་གི་གོ་དོན་རྒྱུ་མཚན་ཁུངས་ལུང་མེད་པར་གང་བྱུང་སྐྱོན་བརྗོད་བྱེད་ཆོག་པའི་དོན་མ་ཡིན་པ་གསལ་པོ་རེད། སྲིད་བྱུས་བྱེ་བྲག་པ་གཅིག་ལ་མོས་མཐུན་མེད་མཁན་ཞིག་ཡིན་ན། སོ་སོས་མོས་མཐུན་བྱེད་མ་ཐུབ་པའི་རྒྱུ་མཚན་རྣམས་གང་ཟག་སྒེར་ལ་སྐྱོན་བརྗོད་དང་འཁོན་འཛིན་མེད་པའི་སྒོ་ནས་གསལ་སྟོན་བྱེད་ཐུབ་པ་ཞིག་དགོས། དེ་ལྟར་བྱས་ན་མང་གཙོའི་ལམ་ལུགས་དང་མཐུན་པར་དོན་སྙིང་ལྡན་པའི་བགྲོ་གླེང་ཡོང་རྒྱུ་དང་། མང་ཚོགས་ནས་ཀྱང་དངོས་ཡོད་གནས་ཚུལ་ཤེས་པར་ཕན་ཐོགས་ཡོད། མང་གཙོའི་སྤྱི་ཚོགས་ནང་བསམ་ཚུལ་མི་འདྲ་བ་ཡོང་ཆོག་པ་དང་། བསམ་ཚུལ་མི་འདྲ་བ་ཡོད་པ་དེ་དག་འགལ་རྐྱེན་མ་ཡིན་པར་མཐུན་རྐྱེན་དུ་བསྒྱུར་བ་ནི་མང་གཙོའི་རིང་ལུགས་ཀྱི་ཁྱད་ཆོས་ཡིན་ཞིང། ད་ལྟའི་ཆར་བཙན་བྱོལ་བོད་མིའི་མང་གཙོའི་ལང་ཚོ་ནར་སོན་བཞིན་པའི་སྐབས་ཡིན་སྟབས། མང་ཚོགས་ཁྲོད་བསམ་འཆར་སྤེལ་རེས་བྱེད་སྐབས་གང་བྱུང་བཤད་པ་ཙམ་མ་ཡིན་པར་ཁུངས་ལུང་ལྡན་པ་གནང་གལ་ཆེ་བ་དང་། མང་གཙོའི་ཐོབ་ཐང་ལོངས་སུ་སྤྱོད་པ་དང་མཉམ་མང་གཙོའི་ལས་འགན་ཡང་སྒྲུབ་དགོས། ཁྱད་པར་བོད་སྤྱིའི་རྩ་དོན་དང་བོད་མིའི་གོང་བུ་གཅིག་སྒྲིལ་གྱི་ནུས་ཤུགས་མ་ཉམས་པ་ཞིག་དགོས་རྒྱུ་གནད་ཀྱི་དོན་པོ་ཡིན། ཞེས་གསུང་སོང་།
སྲིད་སྐྱོང་མཆོག་གིས་བོད་ནང་གི་བོད་མི་ཚོར། གཞིས་བཞུགས་བོད་རིགས་སྤུན་ཟླ་རྣམས་དང་ལྷག་དོན་རང་ལུས་མེར་བསྲེཊ་གནང་མཁན་ཚོའི་ནང་མི་ཉེ་འབྲེལ་ཚོར་ཞུ་རྒྱུར། བོད་བསྟན་སྲིད་མི་རིགས་ཀྱི་དོན་དུ་རང་ལུས་མེར་སྲེག་གནང་མཁན་ཚོའི་བློས་བཏང་བྱས་རྗེས་ལོ་རྒྱུས་ནང་གཏན་དུ་གནས་རྒྱུ་དང་། མ་འོངས་པའི་མི་རབས་རྗེས་མ་ཚོས་ནམ་ཡང་བརྗེད་ཐབས་བྲལ་བ་ཞིག་ཡིན། ལུས་སྲོག་བློས་གཏོང་གནང་མཁན་ཚོའི་ཞལ་ཆེམས་༸གོང་ས་མཆོག་ལ་བོད་ལ་གདན་འདྲེན་ཞུ་རྒྱུ་དང་། བོད་མིའི་རང་དབང་བསྐྱར་གསོ་བྱ་རྒྱུའི་དམིགས་ཡུལ་མངོན་འགྱུར་ཡོང་ཐབས་སུ་སྔར་ལྷག་ནུས་ཤུགས་ཟོང་ཁ་གཅིག་སྒྲིལ་བྱ་རྒྱུ་ནི་ང་ཚོའི་རྩ་ཆེའི་ལས་འགན་ཆགས་ཡོད། ཅེས་གསུངས་སོང་།
དབུ་མའི་ལམ་གྱི་སྐོར་ལ། ༸གོང་ས་མཆོག་གིས་འདོན་གནང་མཛད་པའི་གཉིས་སྨན་དབུ་མའི་ལམ་ནི་བོད་དོན་དཀའ་རྙོག་སེལ་བའི་ཐབས་ལམ་བཟང་ཤོས་དང་། ཕྱོགས་གཉིས་ཀ་ལ་ཁེ་ཕན་ཡོད་པ་ཞིག་ཡིན་སྟབས་བཀའ་ཤག་ནས་མུ་མཐུད་དམ་འཛིན་གྱིས་འབད་བརྩོན་ཞུས་དང་ཞུ་མུས་ཡིན། མང་ཚོགས་ནས་ཀྱང་སྲིད་བྱུས་འདིའི་གལ་འགངས་སྔར་ལྷག་ངོས་འཛིན་ཐུབ་པ་ཡོང་ཆེད་ཉེ་བའི་ཆར་བཀའ་བློན་དང་དྲུང་ཆེ་རྣམ་པ་ས་གནས་ཁག་བགོས་ཀྱིས་དབུ་མའི་ལམ་གྱི་གོ་རྟོགས་སྤེལ་རྒྱུའི་ལས་འགུལ་སྤེལ་ཡོད། དེ་བཞིན། བཀའ་ཤག་སྐབས་བཅུ་བཞི་པས་ ༢༠༡༤ ལོ་༸གོང་ས་མཆོག་ལ་བཀའ་དྲིན་རྗེས་དྲན་ཞུ་རྒྱུའི་ལོར་སྲུང་གཙི་ཞུ་བཞིན་པ་ལྟར། རིང་མིན་ཕྱི་ཟླ་ ༡༠ ཚེས་ ༢ བདག་ཉིད་ཆེན་པོ་གྷན་དྷིའི་འཁྲུངས་སྐར་གྱི་ཉིན་མོར་ནོ་སྦེལ་གཟེངས་རྟགས་བཞེས་མཁན་གྱི་དབུ་འཁྲིད་ཁག་ཅིག་དྷ་སར་གདན་འདྲེན་ཞུས་ཏེ་༸གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་གནང་སྟེ་ལོ་ཉེར་ ༢༥ འཁོར་བའི་དུས་དྲན་སྲུང་གཙི་ཞུ་རྒྱུ་ཡིན། ཞེས་གསུངས་སོང་།
སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་སྤྱི་འཐུས་ཀྱི་གསུང་བཤད་སྒྲོགས་སྦྱང་གནང་སྐབས། སྤྱིར་མང་གཙོའི་རིང་ལུགས་ནི། མིའི་རིགས་ཀྱི་ལོ་རྒྱུས་བྱུང་རབས་ནང་བཙན་པོ་དང་གཉོམ་ཆུང་། དབུལ་ཕྱུག ཕོ་མོ། རིགས་རྒྱུད་སོགས་མིའི་སྤྱི་ཚོགས་སུ་མཆོག་དམན་གྱི་དབྱེ་བ་འབྱེད་པའི་འདུ་ཤེས་དོར་ནས། སྤྱི་ཡོངས་ཐུན་མོང་ལ་ལྟ་བའི་འདྲ་མཉམ་གྱི་སྤྱི་ཚོགས་མི་མང་གི་འདོད་མོས་གཙོ་བོར་འཛིན་པའི་རིང་ལུགས་ཤིག་ཡིན། རླབས་ཆེན་གྱི་རིང་ལུགས་དེ་འདྲ་ཞིག་མངོན་འགྱུར་བྱ་རྒྱུར་འཛམ་གླིང་རྒྱལ་ཁབ་མི་ཉུང་བ་ཞིག་གི་ལོ་རྒྱུས་བརྒྱུད་རིམ་ཁྲོད་དམག་འཁྲུག་དང་། འོས་ལངས། འཐབ་རྩོད་བཅས་ཀྱི་མཇུག་འབྲས་ཁོ་ནས་རྒྱལ་ཕམ་ཐག་གཅོད་བྱས་ཏེ། སྲིད་དབང་མི་མང་གིས་བསྒྱུར་རྒྱུར་འབད་པའི་ནུས་ཤུགས་མངོན་འགྱུར་བྱུང་དང་འབྱུང་བཞིན་པ་ཡིན་ཡང་། བོད་མིའི་སྤྱི་ཚོགས་ནང་གི་ཡང་དག་པའི་མང་གཙོའི་ལམ་ལུགས་འདི་མང་ཚོགས་ཀྱིས་འཐབ་རྩོད་དང་འཁྲུག་སློང་སོགས་ཆ་ཕྲ་མོ་ཙམ་ཡང་བྱེད་མ་དགོས་པར། བོད་རྒྱལ་ཁབ་ཀྱི་ཆོས་སྲིད་གཉིས་ཀྱི་དབུ་ཁྲིད་༸གོང་ས་མཆོག་ནས་ཐུགས་དགྱེས་བརྩེ་ཆེན་པོས་བོད་རྒྱ་ཆེའི་མི་མང་ལ་གསོལ་བསྩལ་གནང་བ་ཞིག་ཡིན་སྟབས། བོད་མི་སྤྱི་བོ་གནམ་བསྟན་ཡོངས་ཀྱིས་མང་གཙོའི་ལམ་སྲོལ་དང་མཐུན་པའི་འགན་ཁུར་ཚུལ་བཞིན་དུ་གནང་མ་ཐུབ་ཚེ་གནས་སྟངས་ཇི་ཆགས་ཆ་མ་འཚལ་བས། མགོན་པོ་གང་གི་བཀའ་དྲིན་དང་ཐུགས་རེ་སྙིང་དབུས་སུ་བཅངས་ཏེ་བོད་བསྟན་སྲིད་མི་རིགས་ཀྱི་ཕུགས་འདུན་མངོན་འགྱུར་ཡོང་ཆེད་ཚང་མས་ཞུ་སྒོ་ཅི་མཆིས་སྒོ་ཀུན་ནས་ལྷོད་གཡེང་མེད་པར་གནང་དགོས་པ་ནི་དོན་གྱི་གནད་དམ་པ་ཡིན། ཞེས་གསུངས་སོང་།
ཚོགས་གཙོ་མཆོག་གིས་རྒྱ་གཞུང་གི་མཁྲེགས་འཛིན་སྲིད་བྱུས་དང་དོལ་རྒྱལ་གྱི་སྐོར་ལ། བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། ཡུལ་གོམས་གཤིས་ལུགས། མི་རིགས་དང་བཅས་པའི་ངོ་བོ་མ་བརླགས་པར། རྒྱ་ནག་གི་རྩ་ཁྲིམས་ཀྱི་སྒྲོམ་གཞིའི་འོག་གནས་ཏེ་བོད་རྒྱ་མཉམ་གནས་ཐོག་ཁེ་ཕན་འདྲ་མཉམ་དུ་སྤྱོད་ཆོག་པའི་གཉིས་ཕན་དབུ་མའི་ལམ་གྱི་སྲིད་བྱུས་ནི། བོད་ཙམ་མ་ཟད་རྒྱ་གཞུང་ལའང་ཕན་རླབས་ཆེ་བའི་སྲིད་བྱུས་ཤིག་ཡིན་པ་དངོས་ར་འཕྲོད་བཞིན་དུ་ཁ་བྲལ་བ་དང་། ཏཱ་ལའི་ལོག་སྤྱོད་སྲིད་གཞུང་ཟེར་བ་སོགས། ༸གོང་ས་མཆོག་དང་། ཁོང་ལ་དད་གུས་དང་ཡི་རངས་གནང་མཁན་རྣམས་ལ་མ་ཉེས་ཁག་གཡོགས་དང་བསྙོན་དཀྲི་བཙན་འགེལ་རབས་དང་རིམ་པར་བྱས་ཏེ་བོད་རྒྱའི་དཀའ་རྙོག་སེལ་རྒྱུའི་ཐབས་ལམ་མ་བསྟེན་པར་ཇི་མི་སྙམ་པར་འཇོག་བཞིན་པ་ནི་བློ་ཕམ་གྱི་ཡུལ་དུ་གྱུར། དེ་བཞིན། རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་ལ་བཟང་ཕྱོགས་ཀྱི་འགྱུར་བ་གང་ཡང་བཏང་མེད་ཁར། རྒྱ་གཞུང་གི་སྟངས་འཛིན་འོག་ཡོད་པའི་གསར་འགྱུར་བརྒྱུད་ལམ་ཁག་དང་། དོལ་རྒྱལ་རྗེས་འབྲང་པ་རེ་ཟུང་བརྒྱུད་སྐུལ་གྱིས་༸གོང་ས་མཆོག་ལ་མཚན་སྨད་ཞུ་རུ་བཅུག་པ་དང་། དོལ་རྒྱལ་རྗེས་འབྲང་པ་རྣམས་ཀྱང་དངུལ་དངོས་ཀྱི་ཁེ་ཕན་དོན་གཉེར་ལས་ནང་ཆོས་ཀྱི་བསླབ་བྱའི་བླང་དོར་རྣམས་ཚུལ་བཞིན་བསྟེན་མ་ཐུབ་པར་མི་ཡི་རྣམ་དཔྱོད་ཀྱིས་ ཕོངས་པའི་བྱ་སྤྱོད་ཅིག་དང་། དྲང་བདེན་དང་དངོས་ཡོད་ཀྱི་གནས་ཚུལ་ལ་གཞི་མ་བཅོལ་བར་སྨྱོན་པས་གར་འཁྲབ་པ་ལྟ་བུ་ལ་རྒྱལ་སྤྱིའི་སྤྱི་ཚོགས་སྤྱི་དང་རྒྱ་རིགས་མི་མང་རྣམས་མགོ་བོ་མི་འཁོར་བའི་ཡིད་ཆེས་ཞུ་བཞིན་ཡོད། ཅེས་དང་།
ཁོང་གིས་མུ་མཐུད། རྒྱ་གཞུང་གིས་བོད་འབངས་རྣམས་ལ་འགྲོ་བ་མིའི་འདུ་ཤེས་ཙམ་ཡང་མི་འཛིན་པར་ཁེ་ཕན་ཡོད་ཚད་རྒྱ་ནག་དམར་གཞུང་བདེ་ཐབས་འབའ་ཞིག་དོན་གཉེར་བྱས་ཏེ་རྒྱལ་སྤྱིའི་འགྲོ་བ་མིའི་ཐོབ་ཐང་གི་རྩ་འཛིན་ཁྲིམས་སྒྲིག་ཁག་རྩིས་མེད་རྡོག་རོལ་ཏུ་བཏང་སྟབས། རྒྱལ་སྤྱིའི་གཞུང་སྒེར་ཚོགས་སྡེ་ཁག་མང་པོས་བོད་ཀྱི་ཡ་ང་བའི་གནད་དོན་ཐོག་གདུང་སེམས་མཉམ་སྐྱེད་ཀྱིས། རྒྱ་གཞུང་ལ་གདུག་རྩུབ་ཅན་གྱི་སྲིད་བྱུས་མཚམས་འཇོག་དགོས་པའི་རེ་སྐུལ་དང་བསླབ་བྱ། སྐྱོན་བརྗོད། དགོས་འདུན་སོགས་ལོ་བསྟར་ཆགས་སུ་བཏོན་ཡོད་མོད། དེ་དག་དང་ལེན་བྱ་རྒྱུ་ལྟ་ཅི། དེ་ལས་ལྡོག་སྟེ་ཀྲུང་གོའི་ནང་སྲིད་ལ་ཐེ་བྱུས་བྱེད་ལུགས་ཀྱི་ཧམ་བཤད་སྐྱོན་འཛུགས་བྱེད་པ་ནི། དུས་རབས་ཉེར་གཅིག་པའི་འགྲོ་བ་མིའི་སྤྱི་ཚོགས་དང་རྒྱལ་སྤྱིའི་སྤྱི་སྲོལ་གྱི་འགྲོ་ལུགས་དང་ཤིན་ཏུ་མི་འཚམས་པ་ཞིག་ཡིན་པས། རྒྱ་ནག་གཞུང་ཕྱོགས་ནས་གཡོན་ཐལ་གྱི་བསམ་སྦྱོར་རྣམས་བཅོས་བསྒྱུར་ལེགས་སྤེལ་ བགྱིས་ཏེ། འཛམ་གླིང་གི་སྔོན་ཐོན་ཚུལ་མཐུན་གྱི་རྒྱལ་ཁབ་དག་གི་སྤྱི་ཚོགས་ལྟར། བོད་འདི་ཉིད་ཞི་མཐུན་དང་བརྟན་ལྷིང་ངང་། ཡང་དག་པའི་སྤྱི་ཚོགས་ཞི་བདེ་མཉམ་གནས་ཀྱི་ལམ་ཁ་གསར་པ་ཞིག་ལ་འཕྲལ་ནས་མྱུར་དུ་ འཁྲིད་དགོས་པར་འབོད་སྐུལ་ཞུ་རྒྱུ་ཡིན། ཞེས་གསུངས་སོང་།
དེ་རིང་གི་གཞུང་འབྲེལ་མཛད་སྒོ་ཁག་གྲུབ་རྗེས་བོད་ཀྱི་ཟློས་གར་ཚོགས་པ་དང་བཞུགས་སྒར་ཉེ་འཁྲིས་ཀྱི་སློབ་གྲྭ་ཁག ཚོགས་པ་སྐྱིད་སྡུག་བཅས་ཀྱིས་མི་མང་ལ་གཞས་སྣ་གཟིགས་འབུལ་གནང་རྒྱུ་ཡིན་འདུག
གསར་འགོད་པ། དོན་གོ
