དེ་རིང་སྔ་དྲོར་བོད་རྒྱལ་ཡོངས་མང་གཙོ་ཚོགས་པ་དབུ་བརྙེས་ཏེ་ལོ་ངོ་ ༢༠ འཁོར་བའི་དུས་དྲན་ཐོག ཁྲི་ཟུར་ཟམ་གདོང་རིན་པོ་ཆེ་མཆོག་གིས་ཆབ་སྲིད་ཀྱི་ཚོགས་པ་ཚོས་རང་གི་ཐོབ་ཐང་དང་ལས་འགན་གཉིས་ལས་འགན་གཙོ་བོ་དང་། རང་གི་མི་རིགས་དང་ཆབ་སྲིད་ཚོགས་པ་གཉིས་ལས་མི་རིགས་གཙོ་བོ། གནས་སྐབས་དང་ཕུགས་རྒྱང་རིང་པོ་གཉིས་ལས་ཕུགས་རྒྱང་རིང་པོ་གལ་ཆེར་འཛིན་དགོས་གསུངས་སོང་།
དེ་རིང་སྔ་དྲོའི་ཆུ་ཚོད་ ༡༠ པ་ཐོག་དྷ་ས་བོད་ཀྱི་ཟློས་གར་ཚོགས་ཁང་དུ། བོད་རྒྱལ་ཡོངས་མང་གཙོ་ཚོགས་པ་དབུ་བརྙེས་ནས་ལོ་ངོ་ཧྲིལ་པོ་ ༢༠ འཁོར་བའི་དུས་དྲན་མཛད་སྒོ་ཞིག་ཚོགས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་དང་བཀའ་ཟུར་ཀིརྟི་རིན་པོ་ཆེ་མཆོག དམིགས་བསལ་སྐུ་མགྲོན་ཧི་མ་ཅལ་མངའ་སྡེའི་ཡུལ་སྐོར་སྤྲོ་འཆམ་ཡར་རྒྱས་ལྷན་ཁང་གི་ཚོགས་གཙོ་གཞོན་པ་མེ་ཇོར་ཝེ་ཇེ་སིན་མོན་གྷོ་ཊི་ཡ་(Major Vijay Singh Mankotia)མཆོག དེ་བཞིན། བོད་མི་མང་སྤྱི་འཐུས་ཁག་ཅིག་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་ཚོགས་གཙོ་དང་སྐུ་ཚབ། གཞན་ཡང་། དྷ་ས་ཁུལ་གྱི་སེར་སྐྱ་མི་མང་བཅས་ཁྱོན་མི་གྲངས་ ༣༠༠ མ་ཟིན་ཙམ་འདུ་འཛོམས་གནང་འདུག༄༅ མཛད་སྒོའི་ཐོག་མར་སྐུ་མགྲོན་གཙོ་བོ་རྣམ་པས་མར་མེ་ཞལ་འབྱེད་དང་སྦྲགས་༧གོང་ས་མཆོག་དང་པཎ་ཆེན་རིན་པོ་ཆེ་མཆོག་གི་སྐུ་པར་ལ་མཇལ་དར་བསྒྲོན་འབུལ་ཞུས་པ་སོགས་མཛད་སྒོའི་སྔོན་འགྲོ་རྣམས་གྲུབ་རྗེས། བོད་དབྱིན་གཉིས་ཐོག་ནས་མང་གཙོ་ཚོགས་པ་ལོ་ངོ་ ༢༠ འཁོར་བའི་བསྒྲགས་གཏམ་སྒྲོག་སྦྱངས་གནང་སོང་བ་དང་། དེའི་རྗེས་བཀའ་བློན་ཁྲི་ཟུར་མཆོག་གིས་༼བོད་ཀྱི་རྒྱལ་ཡོངས་མང་གཙོ་ཚོགས་པ་དབུ་བརྙེས་ནས་ལོ་ངོ་ ༢༠ སོང་བ། ༽ཞེས་པའི་དུས་དེབ་དབུ་འབྱེད་དང་། བཀའ་ཟུར་ཀིརྟི་རིན་པོ་ཆེ་མཆོག་གིས་མང་གཙོ་ཚོགས་པའི་ལོ་འཁོར་དུས་དེབ་༼མང་ གཙོ༽ཞེས་པ་གཉིས་དབུ་འབྱེད་གནང་རྗེས། དམིགས་བསལ་སྐུ་མགྲོན་མཆོག་གིས་མང་གཙོ་ཚོགས་པའི་དབུས་རྒྱུན་ཟུར་པ་ཁག་ཅིག་ལ་དྲན་རྟེན་གྱི་བྱ་དགའ་གནང་སོང་བ་དང་། དེ་ནས་མང་གཙོ་ཚོགས་པའི་དབུས་སྤྱི་ཁྱབ་ཚོགས་གཙོ་དགེ་ལེགས་འཇམ་དབྱངས་ལགས་ཀྱིས་ཚོགས་པར་རྒྱབ་སྐྱོར་གནང་མཁན་ཁག་ཅིག་ལ་ཐུགས་རྗེ་ཆེ་ཞུའི་ཕྱག་རྟགས་བཅས་གནང་སོང་།
དེའི་རྗེས་བཀའ་ཟུར་ཀིརྟི་རིན་པོ་ཆེ་མཆོག་གིས་བོད་ཀྱི་དམངས་གཙོའི་འཕེལ་རིམ་ནང་གི་དགེ་སྐྱོན་སྐོར་ལ་བཀའ་སློབ་གནང་དོན། དམངས་གཙོའི་སྐྱོན་གྱི་ཐོག་ནས་བཤད་པ་ཡིན་ན། ཁ་ཐུག་ཏུ་ཞུ་རྒྱུ་མ་གཏོགས་དམིགས་བསལ་གྱིས་ཞུ་རྒྱུ་ཅི་ཡང་ཡོད་པ་མ་རེད། དེང་སང་མི་ཁ་ཤས་ཤིག་གིས་དམངས་གཙོའི་ཚིག་དེ་བེད་སྤྱོད་བཏང་ནས་གང་བྱུང་གི་ སྐད་ཆ་བཤད་པ་དང་། གང་བྱུང་གིས་སྐྱོན་བརྗོད་བྱེད་ཀྱི་ཡོད་པ་ལས། སོ་སོའི་བཤད་པ་དེས་མི་མང་ལ་ཕན་གྱི་འདུག་དང་མི་འདུག བོད་ཀྱི་རྩ་དོན་ཐོག་ཕན་གྱི་འདུག་དང་མི་འདུག བོད་ཀྱི་ཆོས་དང་རིག་གཞུང་ཐད་ཕན་གྱི་འདུག་དང་མི་འདུག་ལ་བསམ་བློ་རྩ་བ་ནས་མ་བཏང་བར་བཤད་གང་ཐུབ་བཤད་ནས་འགྲོ་མཁན་ཁག་ཅིག་ཡོད་པ་དང་། ཡང་ཁག་ཅིག་གིས་ཆེད་དུ་གཉེར་ནས་བོད་མི་ནང་ཁུལ་དུ་དཀྲུག་ཤིང་རྒྱག་པ་དང་། བོད་མིའི་བདེན་རྩ་ལ་ཆེད་གཉེར་གྱིས་གཏོར་སྐྱོན་གཏོང་བའི་སྐད་ཆ་བཤད་མཁན་ཁ་ཤས་ཡོད་པ་རེད། ཡང་ཁ་ཤས་མགོ་སྐོར་བསླུ་བྲིད་འོག་ཚུད་དེ་སྐད་ཆ་གང་བྱུང་བཤད་མཁན་ཡོད་པ་རེད། དེར་བརྟེན། ང་ཚོའི་སྤྱི་ཚོགས་ནང་དམངས་གཙོ་ཁ་ལ་འཁྱེར་ནས་འདྲ་མི་འདྲ་མང་པོ་བྱེད་བཞིན་པ་དེ་ཚོ་སྐྱོན་ཆེན་པོ་ཞེ་དྲག་རེད་དྲན་གྱི་འདུག ཁག་ཅིག་གིས་རྒྱུན་དུ་རང་དབང་དང་དམངས་གཙོའི་ཚིག་བེད་སྤྱོད་བཏང་སྟེ། ང་ཚོར་རང་དབང་དང་དམངས་གཙོ་མི་འདུག་ཟེར་ནས་བཤད་ཀྱི་ཡོད་པ་རེད། རང་དབང་དང་དམངས་གཙོ་བཤད་དགོས་ས་དེར་བཤད་མ་ཐུབ་པར་བཤད་མི་དགོས་སར་བཤད་དེ་ནང་ཁུལ་དཀྲུག་ཤིང་རྒྱག་གི་ཡོད་པ་རེད། ༧རྒྱལ་བ་རིན་པོ་ཆེས་རྒྱུན་དུ་ཆོས་ལུགས་མཐུན་སྒྲིལ་དང་འཛམ་གླིང་ཞི་བདེ་ཡོང་བར་མཛད་འགན་རྒྱ་ཆེན་པོ་བཞེས་ཀྱི་ཡོད་ཀྱང་། མི་ཁ་ཤས་ཀྱིས་དེ་གོ་ལྡོག་ནས་༧རྒྱལ་བ་རིན་པོ་ཆེའི་མདུན་དུ་ང་ཚོར་ཆོས་དད་རང་དབང་དགོས་ཟེར་གྱི་ཡོད་པ་དང་། ཁ་ཤས་ཀྱིས་ཤེས་བཞིན་དུ་སྐད་ཆ་དེ་འདྲ་བཤད་ཀྱི་ཡོད་པ་དང་། ཡང་ཁ་ཤས་ཀྱིས་མགོ་མ་ཚོས་པར་རི་བོང་ཅལ་འདྲོག་བྱས་ནས་འགྲོ་མཁན་རེ་ཟུང་ཡོད་པ་རེད། ང་ཚོའི་གཏམ་དཔེར་གྲོགས་བརྒྱ་ཡོད་ན་ཉུང་དྲགས་པ་དང་དགྲ་གཅིག་ཡོད་ནའང་མང་དྲགས་ཟེར་བ་ལྟར། སྤྱིར་བཏང་ཁོ་ཚོ་ཉུང་ཉུང་ཞིག་ལས་མེད་ཀྱང་ང་ཚོ་བོད་པ་ནང་ཁུལ་གྱི་མཐུན་ལམ་ལ་གནོད་པ་བཟོ་ཡི་ཡོད་པ་རེད། ཅེས་སོགས་གསུངས་སོང་།
མཇུག་ཏུ་ཁྲི་ཟུར་ཟམ་གདོང་རིན་པོ་ཆེ་མཆོག་གིས་རྒྱ་གར་གྱི་གཙོས་འཛམ་གླིང་རྒྱལ་ཁབ་ཁག་གི་དམངས་གཙོའི་གནས་བབ་སྐོར་ངོ་སྤྲོད་དང་འབྲེལ། དམངས་གཙོ་དང་ཁྲིམས་ལུགས་ཀྱི་གལ་ཆེའི་རང་བཞིན་སྐོར་ལ་བཀའ་སློབ་གནང་དོན། དམངས་གཙོ་ཟེར་བ་དེའི་གལ་གནད་ཅིག་དེ་ག་རེ་རེད་ཟེར་ན། ཡུལ་མི་མི་རེ་ངོ་རེ་ནས་མི་རིགས་དང་སྤྱི་ཚོགས་ཀྱི་འགན་འཁུར་རྒྱུ་དེ་རེད། ད་ལྟ་ང་ཚོའི་སྤྱི་ཚོགས་ནང་མ་འོངས་ལོ་ ༡༠༠ ཡི་ནང་བོད་ནང་དུ་གནས་ཚུལ་ག་འདྲ་ཆགས་ཀྱི་རེད། རྒྱ་ནག་ག་འདྲ་ཞིག་ལ་འགྲོ་རྒྱུ་རེད། བོད་པའི་མ་འོངས་པའི་མདུན་ལམ་ཐོག་གོམ་བགྲོད་ག་འདྲ་བྱེད་དགོས་པའི་ཐད། མ་འོངས་པའི་ལོ་སྟོང་ཕྲག་མང་པོའི་སྐད་ཆ་མེད་པ་ཡིན་ནའང་ལོ་ ༡༠༠ བར་ཚོད་དཔག་དང་འཆར་སྣང་བཟོས་ནས་དགོངས་པ་བཞེས་མཁན་དཀོན་པོ་ཡིན་པ་ཞིག་ངས་ཚོར་གྱི་འདུག མི་མང་ཆེ་བ་ཞིག་གིས་ལོ་གསུམ་བཞི་དང་ལྔ་ཡི་ནང་འཛིན་སྐྱོང་དང་གྲོས་ཚོགས་གཉིས་ཆར་འགྱུར་བ་ཞིག་འགྲོ་ཡི་ཡོད་སྟབས། དེ་ཙམ་གྱི་ཚོད་དཔག་ཅིག་གི་ཐོག་ནས་བསྡད་དེ་ལོ་ ༥ ཡི་དུས་བཀག་ལས་ཕར་བརྒལ་ཏེ། ལོ་ངོ་ཉི་ཤུ་རྩ་གྲངས་དང་སུམ་བཅུ་སོ་གྲངས། ལོ་བརྒྱ་ཕྲག་ཁ་ཤས་ཀྱི་དུས་ཚོད་ཅིག་ལ་ང་ཚོས་རྒྱང་མིག་གཟིགས་མ་ཐུབ་པ་ཡིན་ན། ཏན་ཏན་ང་ཚོར་སྐུ་ངལ་འཕྲད་རྒྱུ་རེད་བསམ་གྱི་འདུག ཅེས་གསུངས་སོང་།
ཡང་ཁོང་གིས། ད་ལྟ་ང་ཚོ་བཙན་བྱོལ་སྤྱི་ཚོགས་ནང་ཆབ་སྲིད་ཚོགས་པ་གཅིག་མ་གཏོགས་ཡོད་པ་མ་རེད། མ་འོངས་པར་ཆབ་སྲིད་ཚོགས་པ་མང་པོ་བྱུང་བ་ཡིན་ན་ང་ཚོས་འགོག་ཐུབ་པ་མ་རེད། འགོག་དགོས་པའང་གཅིག་བྱས་ན་ཡོད་པ་མ་རེད། ཡིན་ནའང་། ང་ཚོས་ངེས་པར་དུ་བསམ་བློའི་ནང་གལ་ཆེན་པོ་བྱས་ནས་འཇོག་དགོས་པ་དེ་ག་རེ་རེད་ཟེར་ན། དམངས་གཙོ་གལ་ཆེན་པོ་ཡིན་ན། སྤྱི་ཚོགས་ཀྱི་འཆམ་མཐུན་དང་ཆིག་སྒྲིལ་ཡང་གལ་ཆེ་བ་གཅིག་པ་རེད་མ་གཏོགས་ཆིག་སྒྲིལ་དང་མཐུན་སྒྲིལ་མེད་པའི་སྤྱི་ཚོགས་ཁ་འཐོར་བསྡད་པ་དང་། ཆབ་སྲིད་ཚོགས་པ་གཅིག་གིས་གཅིག་ལ་དགྲ་བོའི་འདུ་ཤེས་བཟུང་བསྡད་པ་ཞིག་གི་ནང་ཡང་དག་པའི་དམངས་གཙོ་ཞིག་ཡོང་ཐུབ་པ་ཁག་པོ་ཞེ་དྲག་ཡིན་སྟབས། ཆབ་སྲིད་ཀྱི་ཚོགས་པ་ཚོས་རང་གི་ཐོབ་ཐང་དང་ལས་འགན་གཉིས་ཀྱི་ནང་ནས་ལས་འགན་དེ་གཙོ་བོར་བཟུང་ནས་ལས་ཀ་བྱེད་དགོས་པ་ཞིག་དང་། མི་རིགས་དང་ཆབ་སྲིད་ཚོགས་པ་གཉིས་ཀྱི་ནང་ནས་མི་རིགས་གཙོ་ཆེར་བརྩི་དགོས་པ། གནས་སྐབས་དང་ཕུགས་རྒྱང་རིང་པོ་གཉིས་ལས་ཕུགས་རྒྱང་རིང་པོ་གལ་ཆེན་པོར་བརྩི་དགོས་པ་ཞེ་དྲག་གལ་ཆེན་པོ་རེད། ཅེས་གསུངས་སོང་།
རིན་པོ་ཆེ་མཆོག་གིས། ང་ཚོ་ནང་བཞིན་སྤྱི་ཚོགས་ཆུང་ཆུང་དང་ས་ཆ་མེད་མཁན། རྒྱལ་ཁབ་མེད་པར་སྐྱབས་བཅོལ་གྱི་ངོ་བོར་གནས་སྡོད་མཁན་ཞིག་དང་། ལྷག་པར་དུ་བོད་དོན་བདེན་མཐའ་སེལ་བར་ང་ཚོ་མི་རེ་ངོ་རེ་ལ་ལས་འགན་ཆེན་པོ་རེ་རེ་འཁྲི་བསྡད་པའི་སྐབས་འདིར། ཁ་ཐུག་གི་རང་གི་གོམ་པའི་མདུན་རྐྱང་རྐྱང་མ་གཏོགས་མ་གཟིགས་པ་དང་དགོངས་པར་མ་འཁོར་བ་ཡིན་ན་སྤྱིའི་རྩ་དོན་དེ་བསྒྲུབ་མི་ཐུབ་སྟབས། རྒྱལ་ཡོངས་མང་གཙོ་ཚོགས་པ་དཔེ་མཚོན་ཡོད་པའི་ཆབ་སྲིད་ཚོགས་པ་ཞིག་གི་ངོ་བོར་ཆབ་སྲིད་ཚོགས་པའི་ཞན་ཆ་དེ་ཚོ་ཤེས་དགོས་པ་རེད། གན་དྷི་དགོངས་པ་རྫོགས་པའི་ཉིན་གཅིག་གི་སྔོན་བྲིས་པའི་ཁོ་རང་གི་ཞལ་ཆེམས་ནང་དུ། རྒྱ་གར་རང་བཙན་བྱུང་བའི་རྗེས་སུ་ཀོང་རེ་སིའི་ཆབ་སྲིད་ཚོགས་པའི་ངོ་བོ་ཕྱིར་བསྡུ་བྱས་ཏེ། སྤྱི་ཚོགས་ཞབས་ཞུའི་ཚོགས་པ་ཞིག་ཏུ་བསྒྱུར་དགོས་པའི་སྐོར་གསལ་བོ་ཞེ་དྲག་གསུངས་ཡོད་པ་རེད། དེ་ཚོར་ད་ལྟ་བསམ་བློ་གཏོང་སྐབས་ལོ་བརྒྱ་ཕྲག་མང་པོའི་རྗེས་སུ་གཟིགས་ཐུབ་པའི་རླབས་ཆེན་གྱི་དགོངས་པ་བཞེས་སྟངས་ཤིག་རེད་བསམ་གྱི་འདུག དེར་བརྟེན། ང་རང་ཚོ་ཡོད་པའི་གནས་སྐབས་ཀྱི་གནས་བབ་ཚང་མར་ཕྱོགས་བསྡོམས་བརྒྱབ་པའི་ཐོག སྔ་ཕྱི་རྒྱང་གསུམ་ལ་གཟིགས་ཐུབ་པའི་ཐོག་ནས་ཕྱག་ལས་གནང་དགོས་རྒྱུ་དེ་ཞེ་དྲག་གལ་ཆེན་པོ་རེད་བསམ་གྱི་འདུག ཅེས་གསུངས་སོང་།
མཛད་སྒོའི་མཇུག་ཏུ་སྤྱི་ཁྱབ་ཚོགས་གཙོ་དགེ་ལེགས་འཇམ་དབྱངས་ལགས་ཀྱིས་སྐུ་མགྲོན་གཙོ་བོ་རྣམ་གཉིས་དང་དམིགས་བསལ་སྐུ་མགྲོན་བཅས་ལ་ཐུགས་རྗེ་ཆེ་ཞུའི་དྲན་རྟེན་དང་མཇལ་དར་བཅས་ཕུལ་ཏེ་མཛད་སྒོ་གྲོལ་སོང་།
གསར་འགོད་པ། པདྨ་མཚོ།
