རྒྱ་གར་གྱི་འགྲིམ་འགྲུལ་བློན་ཆེན་གྱིས་ལ་དྭགས་དང་ཀར་གྷིལ་གཉིས་ཀྱི་གཞུང་ལམ་འཛུགས་སྐྲུན་ཆེད་ཧིན་སྒོར་ས་ཡ་ ༤༣༨ ཀྱི་འགྲོ་གྲོན་གཏོང་རྒྱུ་བཀའ་འཁྲོལ་སྤྲད་ཡོད་འདུག
ཟླ་འདིའི་ཚེས་ ༡༠ ཉིན་རྒྱ་གར་འགྲིམ་འགྲུལ་བློན་ཆེན་སྐུ་ཞབས་ནེ་ཊིན་གྷ་ཀ་རེ་(Nitin Gadkari)ལགས་ཀྱི་བཀའ་འཁྲོལ་འོག་རྒྱ་གར་དབུས་གྲོང་གསེབ་འཛུགས་སྐྲུན་ལས་ཁུངས་ཀྱིས། ཇ་མུ་ཀ་ཤི་མུར་མངའ་སྡེའི་ཀར་གྷིལ་རྫོང་དང་ལ་དྭགས་རྫོང་གཉིས་ནང་གི་གཞུང་ལམ་རིང་ཚད་སྤྱི་ལེ་ ༣༥༠ ལྷག་གི་འཛུགས་སྐྲུན་ཆེད་ཧིན་སྒོར་ས་ཡ་ ༤༣༨ ཀྱི་འགྲོ་གྲོན་གཏོང་རྒྱུའི་བཀའ་འཁྲོལ་སྤྲད་དེ་ལས་གཞི་གང་མགྱོགས་མགོ་འཛུགས་བྱ་འཆར་ཡོད་འདུག
རྒྱ་གར་གཞུང་གིས་འགྲོ་གྲོན་གཏོང་སྟངས་གཏན་འབེབས་བྱས་པ་ལྟར་ན། ལ་དྭགས་རྫོང་ཁོངས་ཀྱི་གཞུང་ལམ་རིང་ཚད་སྤྱི་ལེ་ ༡༤༢ ཙམ་གྱི་འཛུགས་སྐྲུན་ཆེད་ཧིན་སྒོར་ས་ཡ་ ༡༨༡།༤ དང་། ཀར་གྷིལ་རྫོང་ཁོངས་ཀྱི་གཞུང་ལམ་རིང་ཚད་སྤྱི་ལེ་ ༢༠༧ ཙམ་ཧིན་སྒོར་ས་ཡ་ ༢༥༦།༦ སོ་སོར་བགོས་ཡོད་འདུག
ད་ལོར་རྒྱ་གར་རྒྱལ་ཡོངས་གྲོས་ཚོགས་འོག་མའི་འོས་བསྡུའི་སྐབས། བྷེ་ཇེ་པེ་རྒྱལ་ཡོངས་དམངས་གཙོ་མནའ་འབྲེལ་ཚོགས་པ་ (NDA) ཡིས་ལ་དྭགས་ཁུལ་དུ་ཁོང་ཚོའི་སྲིད་དོན་ཚོགས་པར་རྒྱལ་ཡོངས་འོས་བསྡུ་ཐོབ་ཚེ། ལ་དྭགས་དང་ཀར་གྷེལ་ཁུལ་གྱི་གཞུང་ལམ་འཛུགས་སྐྲུན་དང་ཆུ་གློག གཞོན་སྐྱེས་ལས་མེད་སོགས་ཀྱི་དཀའ་ངལ་སེལ་རྒྱུ་ཡིན་པའི་ཁས་ལེན་བྱས་པ་ལྟར་ཐག་གཅོད་བྱས་ཡོད་འདུག
གནས་ཚུལ་འདིའི་ཐད་རྒྱ་གར་ཛེ་ (Zee News)གསར་ཁང་གིས། ཆོག་མཆན་དེ་ནི་ཉིན་འགའི་སྔོན་ལ་དྭགས་ཁུལ་གྱི་བྷེ་ཇེ་པེ་གྲོས་ཚོགས་འོག་མའི་འཐུས་མི་སྐུ་ཞབས་ཐུབ་བསྟན་ཆོས་དབང་ལགས་ཀྱིས་སྣེ་འཁྲིད་པའི་ལ་དྭགས་ས་གནས་ཀྱི་སྐུ་ཚབ་ཚོ་འགྲིམ་འགྲུལ་བློན་ཆེན་ལ་ཐུག་འཕྲད་གནང་སྟེ། སྲིད་དོན་ཚོགས་པའི་རྒྱལ་ཡོངས་འོས་བསྡུའི་སྐབས་ཀྱི་ཁྱབ་བསྒྲགས་འབྲུ་དོན་ཁག་ལག་བསྟར་ཡོང་བའི་རེ་སྐུལ་ཞུས་པ་དང་། ལྷག་པར་དུ་ལ་དྭགས་ས་ཁུལ་དམག་དོན་སྒང་ནས་གནད་འགག་ཆགས་སྟབས་ད་རེབ་ཆོག་མཆན་གནང་བ་ཞིག་རེད། ཅེས་བརྗོད་འདུག
གནད་དོན་དབྱེ་ཞིབ་པ་ཚོས་བྱང་ཕྱོགས་ལ་དྭགས་དང་ཀར་གྷེལ་ཁུལ་གྱི་གཞུང་ལམ་དང་བརྡ་འཕྲིན། ཆུ་གློག་སོགས་ཀྱི་མཐུན་རྐྱེན་ཡར་རྒྱས་གཏོང་རྒྱུ་དེ། མུ་དྷི་སྲིད་གཞུང་གིས་པ་ཀི་སི་ཐན་ནང་གི་འཇིགས་སྐུལ་བ་དང་། རྒྱ་ནག་གི་དམག་མི་རྒྱལ་ཁོངས་སུ་འཛུལ་བའི་བརྙས་སོགས་ལ་ཁ་གཏད་གཅོག་རྒྱུར་ནུས་པ་ཆེན་པོ་འཐོན་རྒྱུ་ཡིན་སྐོར་བརྗོད་འདུག
གསར་འགོད་པ། ལྷ་སྐྱབས་རྒྱལ།
