ད་ལྟ་རང་སྤྱི་འཐུས་གྲོས་ཚོགས་ནང་ཉེ་ལམ་བོད་ནང་རང་ལུས་མེར་བསྲེཊ་གནང་མཁན་ལྷ་མོ་བཀྲ་ཤིས་ལགས་ཀྱི་ཆེད་གཞུང་འབྲེལ་ཐོག་ངག་བཅད་མྱ་ངན་གནང་སོང་།
དེ་རིང་སྐབས་བཅོ་ལྔ་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་ལས་ཉིན་དགུ་བའི་སྔ་དྲོའི་ཚོགས་འདུ་མགོ་འཛུགས་གནང་མ་ཐག སྤྱི་འཐུས་ཚོགས་གཙོ་མཆོག་གིས་ཟླ་འདིའི་ཚེས་ ༡༧ ཉིན་བོད་ནང་ཕ་གཅོད་པ་ཚེ་རིང་དང་མ་གདུགས་དཀར་མཚོ་གཉིས་ཀྱི་བུ་ལྷ་མོ་བཀྲ་ཤིས་ལགས་ཀྱིས། རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་བསྲེཊ་གནང་སྟེ་འདས་གྲོངས་སུ་ཕྱིན་པའི་གནས་ཚུལ་སྐྱོ་བོ་ཞིག་ཆགས་ཡོད་པ་དང་། ད་ལྟའི་བར་དུ་རང་ལུས་མེར་བསྲེཊ་གནང་མཁན་ ༡༣༡ དང་། འདས་གྲོངས་སུ་ཕྱིན་པ་ ༡༡༣ ཆགས་ཡོད་ཚུལ་གསུངས་སོང་བར་མ་ཟད། ཚོགས་གཙོ་མཆོག་གིས་དེ་རིང་གི་ཚོགས་འདུ་མྱ་ངན་གུས་འདུད་ཀྱི་གྲོས་འཆར་ལས་དབུ་འཛུགས་གནང་དགོས་ཁེལ་སོང་བ་དང་། ལྷ་མོ་བཀྲ་ཤིས་ལགས་ཀྱིས་རང་ལུས་མེར་བསྲེཊ་གནང་བ་དེ་ཡང་། རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་གར་ནང་བསླེབ་པའི་དུས་མཉམ་དུ་བཏང་གནང་ཡོད་པ་དང་། གཞན་པའི་གནས་ཚུལ་གསལ་བོ་ཞིག་ཤེས་ཀྱི་མི་འདུག་མོད། ཁོང་གིས་རང་ལུས་མེར་བསྲེཊ་གནང་རྗེས་སྐུ་ཕུང་ཙམ་ཡང་ནང་མིར་མ་སྤྲད་པའི་གནས་སྟངས་ཆགས་ཡོད་སྐོར་གསུངས་སོང་།
དེའི་རྗེས་སྤྱི་འཐུས་དགེ་བཤེས་རོང་བོ་བློ་བཟང་སྙན་གྲགས་ལགས་ཀྱིས་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་གྲོས་ཚོགས་སུ་སྙན་སྒྲོན་གནང་སོང་བར་མ་ཟད། སྤྱི་འཐུས་རྣམ་པ་སྐུ་བཞེངས་ཐོག་དམ་པ་ཁོང་གི་མཛད་རྗེས་ལ་ཡི་རངས་བསྔགས་བརྗོད་དང་། ཚེ་རབས་ཀུན་ཏུ་མཐར་བ་དང་ཐམས་ཅན་མཁྱེན་པའི་གོ་འཕང་ཐོབ་པའི་སྨོན་འདུན། ཁོང་གི་གཞིས་ལུས་ནང་མི་ཡོངས་ལ་གདུང་སེམས་མཉམ་སྐྱེད་བཅས་ཀྱི་ཆེད་སྐར་མ་གཅིག་རིང་ངག་བཅད་མྱ་ངན་གནང་སོང་།
ཁ་སང་ཕྱི་ཚེས་ ༢༡ ཉིན་གྱི་དགོང་མོ་དྷ་རམ་ས་ལར་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག བོད་ནང་རང་ལུས་མེར་བསྲེཊ་གནང་མཁན་ལྷ་མོ་བཀྲ་ཤིས་ལགས་དང་ཁོང་གི་ནང་མི་ཉེ་འབྲེལ་ཡོངས་ལ་གདུང་སེམས་མཉམ་སྐྱེད་མཚོན་ཆེད་མར་མེ་ཁྲོམ་སྐོར་ཞིག་ཀྱང་གནང་ཡོད་འདུག
གསར་འགོད་པ། དོན་གོ
