དམག་འཐབ་ལ་གྲ་སྒྲིག་དགོས།

རྒྱ་ནག་སྲིད་འཛིན་ཞི་ཅིན་ཕིན་གྱིས་རྒྱ་ནག་གི་དམག་སྤྱི་ཚོར་དམར་ཤོག་ཚོགས་པ་དང་གཞུང་གི་མགོ་ཁྲིད་ཚོར་ཡིད་ཆེས་བྱས་ཏེ་བཀའ་རྒྱ་ཅི་ཕེབས་དོན་འཁྱོལ་བྱེད་དགོས་སྐོར་བརྗོད་འདུག

ཟླ་འདིའི་ཚེས་ ༢༡ ཉིན་རྒྱ་ནག་སྲིད་འཛིན་ཞི་ཅིན་ཕིན་དང་རྒྱ་ནག་བཅིངས་འགྲོལ་དམག་མིའི་དམག་སྤྱིའི་བར་༼ བཀའ་རྒྱ་ཞིག་གི་འོག་རྒྱ་ནག་བཅིངས་འགྲོལ་དམག་མིའི་ནུས་སྟོབས་དོན་འཁྱོལ་བྱེད་དགོས་པ།༽ཞེས་པའི་གྲོས་མོལ་ཚོགས་འདུ་ཞིག་ཚོགས་ཏེ། ཚོགས་ཐོག་ཏུ་ཞི་ཅིན་ཕིན་གྱིས་བཅིངས་འགྲོལ་དམག་མིས་རྒྱ་ནག་གཞུང་ལ་ཡིད་ཆེས་ བརྟན་པོ་བཅང་དགོས་པ་ཙམ་མ་ཟད། མ་འོངས་པར་རྒྱ་ནག་དབུས་གཞུང་མགོ་ཁྲིད་ཚོས་ལམ་སྟོན་གང་བྱས་པ་དག་དོན་ཐོག་ཏུ་འཁྱོལ་ཐུབ་པ་བྱ་དགོས་སྐོར་བརྗོད་ཡོད་འདུག

འདིའི་ཐད་ཞི་ཅིན་ཕིན་གྱིས། “€œབཅིངས་འགྲོལ་དམག་མིའི་སྤྱི་ཁྱབ་ལས་ཁུངས་ཀྱིས་རྒྱ་ནག་དམར་ཤོག་ཚོགས་པར་ཡིད་ཆེས་བརྟན་པོ་འཆང་སྟེ། རྒྱ་ནག་གི་མགོ་ཁྲིད་ཚོས་ལམ་སྟོན་གང་བྱས་པ་དག་མཐའ་གཅིག་ཏུ་ལག་བསྟར་བྱེད་ དགོས་པ་ཙམ་མ་ཟད། ད་ལྟའི་བརྡ་འཕྲིན་ཚན་རྩལ་གྱི་དུས་རབས་དང་མཐུན་པའི་དམག་འཐབ་ཀྱི་ནུས་སྟོབས་ཡར་ རྒྱས་བཏང་སྟེ། ཡོང་ཉེན་ཡོད་པའི་མངའ་ཁུལ་གྱི་དམག་འཐབ་ལ་གྲ་སྒྲིག་བྱས་ཏེ་རྒྱལ་ཁ་ཐོབ་ཐབས་བྱ་དགོས”€ ཞེས་སོགས་བརྗོད་འདུག

རྒྱ་ནག་བདེ་སྲུང་ལྷན་ཁང་གིས། “བཅིངས་འགྲོལ་དམག་མིའི་དམག་དཔུང་ཁག་གིས་སྲིད་འཛིན་ཞི་ཅིན་ཕིན་དང་རྒྱ་ནག་དམར་ཤོག་ཚོགས་པའི་ལམ་སྟོན་ལྟར། མ་འོངས་པར་དམིགས་ཡུལ་དང་ཐབས་བྱུས་གསར་པ་ཞིག་གི་ཐོག་བསྐྱོད་ཐུབ་པ་བྱ་དགོས། ཉེ་ལམ་སྲིད་འཛིན་ཞི་ཅིན་ཕིན་གྱིས་རྒྱ་ནག་བཅིངས་འགྲོལ་དམག་མིས་མངའ་ཁུལ་གྱི་དམག་འཐབ་ལ་གྲ་སྒྲིག་བྱ་དགོས་ཞེས་བརྗོད་པ་དེ་ནི་གནས་ཚུལ་གསར་པ་གང་ཡང་ཆགས་མེད་ཀྱང་། དེ་གལ་འགངས་ཆེན་པོ་ཞིག་ཡིན་སྟབས་དམག་སྤྱི་རྣམ་པས་བསམ་གཞིགས་བྱས་ཏེ་ཐག་གཅོད་བྱེད་དགོས” €ཞེས་བརྗོད་འདུག

ཁ་སང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཧཱ་ཁྲོན་ཡེན་གྱིས། “€œསྲིད་འཛིན་ཞི་ཅིན་ཕིན་རྒྱ་གར་ནང་རྒྱལ་དོན་སྐོར་སྐྱོད་བྱས་པ་དེས། ཁྱིམ་མཚེས་རྒྱལ་ཁབ་གཉིས་ཀྱི་དོགས་པ་རྣམ་རྟོག་མང་པོ་ཞིག་སེལ་ཏེ། འབྲེལ་ལམ་གསར་པ་ཞིག་གི་ཐོག་བསྐྱོད་ཐུབ་པ་བྱུང་ཡོད་སྟབས། ད་ལྟ་རྒྱལ་ཁབ་གཉིས་ཀྱི་ས་མཚམས་ཁུལ་དུ་དཀའ་ངལ་དག་ལ་གྲོས་མོལ་བརྒྱུད་སེལ་ཐབས་བྱ་རྒྱུ་ཡིན་ཡང་། རྒྱ་ནག་གི་དམག་སྤྱི་རྣམ་པས་རྒྱལ་སྤྱི་རྒྱལ་ནང་གི་བདེ་འཇགས་སྲུང་སྐྱོབ་གནས་སྟངས་དང་དམག་དོན་ཐད་འགྱུར་ལྡོག་གང་ཕྱིན་པ་དག་ལ་ཤེས་རྟོགས་ཐུབ་རྒྱུ་གལ་ཆེན་པོ་ཆགས་ཡོད” €ཅེས་བརྗོད་འདུག

ཟླ་འདིའི་ཚེས་ ༢༡ ཉིན་རྒྱ་ནག་མཐའ་སྲུང་དམག་མི་ ༥༠ ལྷག་གིས་རྒྱ་གར་ལ་དྭགས་ཆུ་དམར་ (Chumar) ཁུལ་དུ་སིམ་འཛུལ་གྱིས་སྡོད་གུར་ ༧ བརྒྱབ་ཏེ་རྒྱ་གར་གཞུང་ལ་འཇིགས་སྐུལ་བྱས་ཡོད་སྟབས། ཁ་སང་རྒྱ་གར་གཞུང་གིས་བདུན་ཕྲག་འདིའི་ནང་རྒྱ་ནག་གི་གསར་ཤོག་དང་དུས་དེབ་ཁག་གི་རྩོམ་སྒྲིག་པ་ཁག་ཅིག་རྒྱ་གར་ནང་ཡོང་འཆར་ཡོད་པ་ཕྱིར་འཐེན་བྱས་ཡོད་འདུག

ཆབ་སྲིད་དབྱེ་ཞིབ་པ་ཚོས། སྲིད་འཛིན་ཞི་ཅིན་ཕིན་གྱིས་རྒྱ་ནག་གི་དམག་སྤྱི་ཚོར་མངའ་ཁུལ་གྱི་དམག་འཐབ་ལ་གྲ་སྒྲིག་བྱ་དགོས་པའི་ཕྱིར་བསྒྲགས་བྱས་པ་དེས། རྒྱ་གར་གཙོས་ཨེ་ཤ་ཡ་དང་རྒྱལ་སྤྱིའི་སྒྲིག་འཛུགས་ཁག་ལ་ཕོག་ཐུག་ཆེན་པོ་བཏང་ཡོད་པའི་ཚོད་དཔག་བྱེད་བཞིན་ཡོད་འདུག

གསར་འགོད་པ། དོན་གྲུབ།